Filemoni ma Onesemo—Autasia i le Auuso Kerisiano

O SE tasi o tusi faagaeeina tauatua a le aposetolo o Paulo o loo taulimaina ai se faafitauli tugā o ni tagata se toalua. O le tasi o Filemoni, a o le isi o Onesemo. O ai ia tagata? O le ā na māfua ai ona naunau Paulo i o la tulaga?

O Filemoni, o lē na avatu i ai le tusi, sa nofo i Kolose i Asia Itiiti. E lē pei o le toatele o isi Kerisiano i lena lava vaipanoa, sa masani lelei Filemoni ia Paulo, na ia taliaina le tala lelei ona o le galuega talaʻi a le aposetolo. (Kolose 1:1; 2:1) Sa iloa e Paulo o ia o se ‘aumea faigaluega pele.’ O Filemoni o se faaaoaoga o le faatuatua ma le alofa. O ia o se tagata talimalo ma sa avea o se puna o faalaeiauga mo ona uso Kerisiano. E mautinoa o Filemoni foi o se tagata e tamaoaiga faaletino, ona sa lava le telē o lona fale e faia ai sauniga mo le faapotopotoga i lena vaipanoa. Ua faapea mai nisi o Afia ma Akeripa, isi tagata e toalua ia o loo taʻua i le tusi a Paulo, atonu o lana avā ma lona atalii. Sa iai foi le auauna e toatasi a Filemoni, o Onesemo.—Filemoni 1, 2, 5, 7, 19e, 22.

O se Tagata Fesolasolatai i Roma

E lē o taʻuina mai e le mau ia i tatou le mafuaaga na alu ese ai Onesemo mai lona aiga i le mamao e silia ma le 900 maila (1,400 kilomita) ae faatasi ma Paulo i Roma, i le nofoaga lea na tusi atu ai le tusi ia Filemoni e tusa o le 61 T.A. Ae na taʻu atu e Paulo ia Filemoni e faapea: “A e afai na ia [Onesemo] agaleaga ia te oe, po ua aitalafu ia te oe, ia e tuu mai lea mea ia te au.” (Filemoni 18) O nei upu ua faamanino mai ai e faapea o Onesemo sa iai se faafitauli i lo la va ma lona matai, o Filemoni. Sa tusia le tusi a Paulo ma le sini o le toe faaleleia o nei tagata e toalua.

Ua iai ni manatu e faapea sa avea Onesemo ma tagata fesolasolatai ina ua uma ona ia gaoia tupe a Filemoni ina ia faatupe ai lana solaaga i Roma. O iina na ia mafaufau e faigofie ona lafilafi solo ai i le toatele o tagata.a I le faiga malo fuifuilua o Eleni ma Roma, o ē na sosola ese na faapogaia ai se faafitauli matuia e lē gata i ē ana pologa, ae faapena foi i pulega i le lautele. Ua taʻua faapea o Roma lava ia ua “lauiloa o se sulufaiga masani” mo pologa e sosola ese.

Na faapefea ona fetaiai Paulo ma Onesemo? E lē o taʻuina mai e le Tusi Paia ia i tatou. Ae peitai, ina ua mou atu le mālie o le saolotoga lea e lē masani aʻi, na iloa ai e Onesemo ua ia tuuina o ia i se tulaga e matuā lamatia. I le aai o Roma, sa iai se vaega faapitoa o leoleo e tuliloaina pologa fesolasolatai, o ē o la latou solitulafono o se tasi o mea e pito i sili ona matuia e tusa ai ma le tulafono anamua. E tusa ai ma le faamatalaga a Gerhard Friedrich, “o pologa na sosola ese ae toe maua e masani ona faailogaina o latou muaulu. E masani ona faatigaina i latou . . . , lafoina i manu feai i malae mataaga, po o le faasatauroina ina ia faalotovaivaia ai isi pologa mai le faataitai atu i a latou faaaoaoga.” Ua faapea mai Friedrich, atonu ina ua uma le tupe a Onesemo lea na gaoi mai ma ua leai se nofoaga e lafi ai po o se galuega, o lea na ia talosaga atu ai loa mo le puipuiga ma le puluvaga a Paulo, o lē na ia faalogo i ai a o iai i le aiga o Filemoni.

E talitonu isi e faapea na sola atu Onesemo ma le mautinoa i se tasi o uo a lona matai, ma le faamoemoe o lena tagata, atonu e toe faaleleia ai le la faiā ma lona matai lea sa talafeagai lona ita ia te ia mo se isi mafuaaga. I faamatalaga faatalafaasolopito ua faailoa mai ai o “se faiga taatele ma le masani lea i pologa o loo iai i se tulaga faigata.” Pe afai o lea, o le gaoiga la a Onesemo “atonu sa faia ina ia faafaigofie ai lona taunuu atu ia Paulo o lē sa fai ma puluvaga nai lo o se vaega o le fuafuaga mo le solaaga,” na faapea mai ai le tagata atamai o Brian Rapske.

Ua Avatu e Paulo se Fesoasoani

Po o le ā lava le mafuaaga mo le solaaga, ae mautinoa na sailia e Onesemo le fesoasoani a Paulo ina ia toe faalelei ai ma lona matai sa toatamai. O lea na fesagai ai Paulo ma se faafitauli. O lenei o loo ia faatasi ma se pologa sa lē talitonu na solia le tulafono ona o lona fesolasolatai. Pe sa tatau i le aposetolo ona taumafai e fesoasoani ia te ia e ala i le faatauanau atu i se uo Kerisiano ina ia lē faatinoina lana aiā tatau e faaoo atu ai lana faasalaga matuia? O le ā na faia e Paulo?

E oo ane i le taimi na tusi atu ai Paulo ia Filemoni, e mautinoa ua fai si umi talu ona faatasi lē na sola ma Paulo. Sa lava le umi o le taimi na māfua ai ona faapea atu Paulo ua avea nei Onesemo ma ‘uso pele.’ (Kolose 4:9) Na faapea mai Paulo e uiga i le la faiā faaleagaga ma Onesemo: “Ou te aioi atu ia te oe mo loʻu atalii o Onesemo, o le na fanaua e aʻu, a o noanoatia aʻu.” I mea uma na ono tulai mai, atonu o le mea mulimuli lea na faatalitalia e Filemoni. Na faapea mai le aposetolo o le pologa lea na muai ‘lē aogā’ ua toe foi atu o se uso Kerisiano. Ua avea nei Onesemo ma “sē e maua mai ai ni mea e lelei” pe e “aoga tele,” ma ua ola e tusa ai o le uiga o lona igoa.—Filemoni 1, 10-12.

Na avea Onesemo ma se tagata na matuā aogā i le aposetolo na faafalepuipuiina. O le mea moni, sa ono tuu ai pea e Paulo o ia iina, ae e ese mai i le tetee atu i le tulafono, atonu o lenei mea o le a faalēaogaina ai aiā tatau a Filemoni. (Filemoni 13, 14) I le isi tusi, na tusia e tusa ai ma le taimi lava lena i le faapotopotoga lea na feiloai i le fale o Filemoni, sa faasino atu ai e Paulo ia Onesemo o “lona uso faamaoni lea ma le pele, o lo outou foi ia.” Ua faailoa mai e lenei mea e faapea ua uma ona faamaonia le maufaatuatuaina o Onesemo.—Kolose 4:7-9.b

Na faalaeiau atu Paulo ia Filemoni ia talia ma le agaalofa Onesemo ae sa lei faaaogaina e Paulo le pule faaaposetolo e faatonu ai o ia ina ia faia faapea pe tuusaʻoloto ai lana pologa. Ona o la la faauooga ma le alofa, na mautinoa ai e Paulo le “faia o mea e sili” e Filemoni nai lo mea na talosaga atu ai. (Filemoni 21) O “mea e sili” ia sa uiga i ai e lē o taʻu maia, ona e na o Filemoni e talafeagai ona mafai ona filifilia le mea e ono fai ia Onesemo. O nisi ua latou faauiga upu a Paulo o se talosaga ina ia ‘toe faafoi mai Onesemo ina ia mafai ai e ia ona fesoasoani ia Paulo e pei ona ia muai faia.’

Pe na talia e Filemoni le talosaga a Paulo mo Onesemo? E foliga mai e leai se masalosaloga na ia faia faapea, e ui o lenei mea sa ono lē fiafia ai isi tagata Kolose e iai a latou pologa, o ē na sili ia i latou le vaai atu ia Onesemo o faia lona faasalaga, ina ia faalotovaivaia ai a latou lava pologa mai le faataitai atu i lana faaaoaoga.

Onesemo—O se Tagata na Suia

Po o le ā lava, ae na toe foi atu Onesemo i Kolose ua avea o se tagata fou. Na suia e le malosi o le tala lelei ona mafaufauga, ma na mautinoa le avea o ia ma sui faamaoni o le faapotopotoga Kerisiano i lena aai. E lē o faaalia mai e le Tusi Paia pe mata na mulimuli ane tuusaoloto e Filemoni Onesemo. Peitai, mai se vaaiga faaleagaga, o lē na muai avea ma sē na sola ese ua avea ma tagata saoloto. (Faatusatusa i le 1 Korinito 7:22.) O loo tutupu foi na suiga talitutusa i aso nei. Pe a faatatauina e tagata mataupu silisili o le Tusi Paia i o latou olaga, e suia ai o latou uiga totino ma tulaga. O i latou ia na muai manatu i ai e lē aogā i le atunuu ua fesoasoania e avea ma tagatānuu e fai ma faaaoaoga.c

Maeu se suiga ese ua faia e le faatuatuaga moni! E ui o Onesemo na “lē aogā” muamua ia Filemoni, e lē masalomia le ola aʻe o Onesemo fou e tusa ai ma lona igoa o se tasi e “maua mai ai se mea aogā.” Ma e mautinoa o se faamanuiaga le autasia o Filemoni ma Onesemo i le auuso Kerisiano.

[Faaopoopoga i lalo]

[Pusa i le itulau 30]

Pologa i Lalo o Tulafono Faa-Roma

I lalo o tulafono faa-Roma i le uluai senituri T.A., sa faalagolago atoatoa atu le pologa i lagona e oso aʻe i lona matai, naunau atu, ma le toatamai. E tusa ai ma se tagata faimanatu o Gerhard Friedrich, “i faiga faavae ma faaletulafono, o le pologa e lē o se tagata, ae o se mea totino e mafai e lē e ana ona faaaogaina e tusa ai ma lona loto. . . . Sa tuu atu o [ia] i le tulaga tutusa ma meafafaga ma mea faigaluega ma e lē faatatauina mo ia tulafono mo tagata lautele.” E lē mafai e se pologa ona sailia so o se faasaʻoga faaletulafono mo faiga lē tonu o loo mafatia ai. Na pau lana mea e fai o le fai o faatonuga a lona matai. Sa leai se tapulaa o faasalaga e faia e se matai toatamai. E oo lava i sina solitulafono laititi, e iai i le matai le pule e faaoo atu ai le oti po o le ola.*

A o iai i le mauoa se faitau selau o pologa, i se faatusatusaga e oo lava i aiga masani atonu foi e iai ni pologa se toalua pe toatolu. Ua faapea mai le tagata suesue faapitoa o John Barclay: “O galuega a pologa i aiga e matuā eseese lava. E tatou te vaai ai i pologa o fai ma leoleo faitotoa, o kuka, o alii tautū meaʻai, o teufale, o avefeau, o tausi tama, i latou e faafaileleina tamaiti, ma alii e faia so o se auaunaga patino, ae lē o taʻua ai le eseese o galuega tau tomai faapitoa e ono maua e se tasi i maota tetele ma tamaoaiga. . . . I sona faatatauga, o le lelei o le ola o se pologa a se aiga e matuā faalagolago atu i uiga o le matai ma e mafai ona aofia ai itu e lua: i le auauna atu i se matai sauā e mafai ona iu i le mafatia ma le anoanoai o mea leaga eseese, ae o se matai e agaalofa ma agalelei e mafai ona maua ai le lotomalie ma le faamoemoe i le olaga. E iai faaaoaoga lauiloa o faiga sauā o loo faamauina i lomiga a Roma ma Eleni i aso anamua, ae anoanoai foi tusitusiga e molimauina ai le māfana o faalogona o nisi o matai i a latou pologa.”

*E tusa ai o pologa sa iai i tagata o le Atua i aso anamua, tagai i le Insight on the Scriptures, lomia e le Watchtower Bible and Tract Society of New York, Inc., Tusi 2, itulau 977-979.