Po o se Viiga po o se Faaʻoleʻole?

UA FAAPEA atu se tasi ia te oe, “E ese lou aulelei i le otiga fou lena o lou ulu!” Po o se viiga po o se faaʻoleʻole? “E te matuā onomea lava i lou suti lena e fai!” Po o se viiga po o se faaʻoleʻole? “O se taumafataga aupito sili lenei le manaia ua ou ʻai ai!” Po o se viiga po o se faaʻoleʻole? Afai e fai mai ia i tatou na ituaiga o viiga, tatou te tau mānatu pe moni ma faamaoni, pe tau ina fai mai e faafiafia ai i tatou e aunoa ma le talitonu i ai o lē o fai maia nei faamatalaga.

E faapefea ona tatou iloa po o se viiga po o se faaʻoleʻole lea o loo fai mai e se tagata ia i tatou? Pe afaina ea? Aisea e lē tau ai ina talia faamatalaga o loo fai mai, ma fiafia i ai? Ae faapefea pe a tatou viia isi? Po ua tatou iloilo ea mafuaaga o faaviivii atu ai? O le manatunatu i fesili nei e mafai ona fesoasoani ia i tatou ina ia maua le faautauta ma ia faaaogā o tatou laulaufaiva i se auala e viia ai Ieova le Atua.

Le Uiga o le Viiga ma le Faaʻoleʻole

Ua faauiga e le Webster’s Dictionary le viiga o se faamatalaga o le talileleia po o le faamālō, ma e mafai foi ona faauiga le upu i le tapuai po o le faaaloalo atu. E manino mai la o le faauigaina lea o le tapuai ma le faaaloalo atu, ua na o Ieova lava e avatu ai lea ituaiga o viiga. O se vala autū lea o le tapuaiga moni, e pei ona timai mai le faisalamo na faagaeeina: “Auā e lelei . . . auā e matagofie, e ono lava le viiga.” “Ia vivii atu ia Ioa o mea uma lava e mānava.”—Salamo 147:1; 150:6.

Ae peitai, e lē faapea la e lē mafai ona viia tagata. E mafai pe a faapea e avatu i se tulaga o le faamālō, talileleia, po o se faaiuga lelei. I se faataoto sa faia e Iesu, sa faapea atu se alii i lana auauna: “Ua lelei ia, le auauna lelei e, ma le faamaoni.”—Mataio 25:21.

I le isi itu, ua faauiga le faaʻoleʻole i le pepelo, e lē moni po o le viiviia naʻuā, o le tagata faaʻoleʻole e masani lava ona iai ni ona uunaiga manatu faapito. E faia se faamālō taufaasee po o le faaʻoleʻole naʻuā ina ia maua ai se tulaga lelei po o ni meafaitino mai se tasi, po o le faatupu foi o ni lagona o le iai o se tiutefai agaʻi i le tagata faaʻoleʻole. O lea la, o tagata faaʻoleʻole o loo uunaia i le manatu faapito. E tusa ai ma le Iuta 16, o loo latou “nofo sauni e faaʻoleʻole i isi tagata pe a latou iloa e maua ai ni lelei i le faia faapea.”—The Jerusalem Bible.

Le Vaaiga Faale-Tusi Paia

O le ā le vaaiga faale-Tusi Paia i le viiaina o uso a tagata? Ua faataatia e Ieova se ata mo i tatou e mulimuli ai e tusa ai ma lenei tulaga. Ua taʻu mai e le Tusi Paia ia i tatou e faapea, e viia i tatou pe afai tatou te faia le finagalo o Ieova. Ua faapea mai le aposetolo o Paulo “e . . . taitasi ma [viia] e le Atua.” Ua taʻu mai e Peteru ia i tatou e faapea, o lo tatou faatuatua ua uma ona tofotofoina, “e avea ma mea e iu ai i le viiga.” O lea la o le mea moni faapea e vivii e Ieova tagata, e faaalia mai ai ia i tatou, o le avatuina o viiga moni o se mea agalelei, alofa, ma o se uiga aogā, lea e tatau ona uaʻi atu i ai.—1 Korinito 4:5; 1 Peteru 1:7.

E tusa ai ma le Tusi Paia, o se isi puna e ala mai ai o tatou viiga, o pule faalemalo ia e faamālō moni mai ona o le vaavaai mai i a tatou amio lelei. Ua taʻu mai ia i tatou e faapea: “Ia faaauau ona amio lelei, ona ia viia mai lea o oe ona o lena mea.” (Roma 13:3, NW) E mafai ona viia i tatou e tagata o loo moni a latou faamatalaga ma e lē o iai se isi uunaiga lilo o lo latou viiviiina o i tatou. Ua faapea mai le Tusi Paia i le Faataoto 27:2: “Ia viia oe e le tagata ese, a e le o lou lava gutu.” Ua faaalia e lenei mea le talafeagai o le taliaina o viiga mai tagata.

Ae e lē faapea le tulaga o le faaʻoleʻole po o le taliaina o ni faaoleolega. Aisea e lē fiafia ai Ieova i faamatalaga faaʻoleʻole? O se faiga faatagafai, ma e taʻusalaina e Ieova faiga faatagafai. (Faatusatusa i le Faataoto 23:6, 7.) E lē gata i lea, e lē o se faiga faamaoni. I le faamatalaina o tagata ua faamaonia le lē talileleia e le Atua, ua faapea mai le faisalamo: “Ua na ona latou pepelo le tasi i le isi, o laugutu faaʻoleʻole, ma tautatala mai i le faalotolotolua. Ia vavae ese e Ieova o laugutu faaʻoleʻole uma lava.”—Salamo 12:2, 3, JB.

Ae maise ai, o le faaʻoleʻole o se lē alofa. Ua uunaia e le manatu faapito. Ina ua uma ona tautala faatatau i tagata faaʻoleʻole, ona sii mai lea e le faisalamo o Tavita a latou faamatalaga e faapea: “O tatou laulaufaiva tatou te manumalo ai, o tatou laugutu o tatou lava ia; o ai ea so tatou alii?” Ua faamatalaina e Ieova nei tagata manatu faapito e faapea ua latou ‘faasaua i e puapuagatia.’ Ua faaaogaina o latou laulaufaiva faaʻoleʻole e faaleaga ma faapuapuagatia ai i isi, nai lo le faalaeiau ai ia i latou.—Salamo 12:4, 5.

Faaʻoleʻole—O se Mailei

“O le tagata ua faaoleole i lē la te tuaoi; na te folasia le upega i le mea e ui ai o ia.” O upu na a le tupu poto o Solomona, ma maeu le moni o na upu! (Faataoto 29:5) Na taumafai le au Faresaio e folasia se mailei mo Iesu e ala i le faaʻoleʻole. Na latou faapea atu: “Le aʻoaʻo e, ua matou iloa o oe le faamaoni, ua e aʻoaʻo foi i le ala o le Atua ma le faamaoni, e te le mataʻu foi i se tasi; auā e lei faailogaina e oe se tagata.” Maeu le logolelei o na faamatalaga! Ae peitai, e lei faavaleaina Iesu i na faamatalaga faaʻoleʻole. Na ia silafia lo latou lē talitonu i ana aʻoaʻoga moni, ae na latou taumafai e maileia o ia i ana faamatalaga e faatatau i le mataupu o le toe totogia o lafoga ia Kaisara.—Mataio 22:15-22.

E matuā tuufaafeagai ma Iesu, le tupu o Herota i le uluai senituri. Ina ua lauga atu i tagata lautele i le aai o Kaisareia, na tali mai tagata e faapea: “O le siufofoga o se atua, a e le se leo o se tagata.” Na talia e Herota na faaʻoleʻolega nai lo le aoai atu i tagata i le sese ma le leoleoā o na viiga. O le taimi lena na faasala ai e le agelu a Ieova ina ua taia Herota i le atiolaina e anufe, ma na iu ai i lona oti.—Galuega 12:21-23.

O se Kerisiano taʻumatuaina o le a mataala e iloa le faaʻoleʻole. E ao i toeaina o le faapotopotoga ona mataala pe a iai se tasi o aafia i se mataupu taufaamasinoga e tumu i faamatalaga faaʻoleʻole, atonu e oo i le tulaga o le faia o ni faatusatusaga o le tasi toeaina mai le isi ma faapea mai e sili le agalelei ma le malamalama o le toeaina lea e talanoa atu i ai nai lo o le isi.

Ua faaalia manino e le Tusi Paia se isi mailei e mafai e le faaʻoleʻole ona faia ina ua faamatalaina le auala na maileia atu ai se taulealea i faiga lē mamā a se fafine faatosina. (Faataoto 7:5, 21) E talafeagai lenei lapataiga i tulaga o aso nei. Mai ia i latou na faateaina mai le faapotopotoga Kerisiano i tausaga taitasi, e toatele na tuuesea ona o amioga lē mamā. Faamata o le paʻū atu i na agasala matagā na amata mai i le faaʻoleʻole? Talu ai o tagata e naunau tele atu i le faamālō ma le taʻuleleia e isi, o faamatalaga tau faaʻoleʻole mai laugutu molemole e mafai ona faavaivaia ai le tetee atu o se Kerisiano i amioga e lē talafeagai. Pe afai e lē faaeteete i na faiga e ono taitaia atu ai i iuga leaga.

Puipuiga Faasaga i le Faaʻoleʻole

E faamalieina e le faaʻoleʻole le alofa ifo o le tagata o lē o loo tuuina atu i ai le faaʻoleʻole ia te ia lava, po o lona lē aogā foi. E foliga e avatu e le faaʻoleʻole se vaiga maualuga i se tagata nai lo le mea moni e mafaia e ia, e faapogaia o ia e manatu e sili o ia i nisi o auala i lo isi. Ua faatusaina e le faifilosofia lea o François de La Rochefoucauld le faaʻoleʻole, i tupe pepelo e lē aogā “ae a na leai le mimita semanū e lē salalau atu.” O lea la, o le auala e puipui mai ai se tagata, o le uaʻi atu lea i le timaiga talafeagai a le aposetolo o Paulo e faapea: “Ou te fai atu ai ia te outou uma, aua le faasili le manatu o se tasi i le mea ua tatau ona manatu ai, a ia māmā le manatu, ia tusa ma le tofiga o le faatuatua ua taitasi ma tofu ai mai le Atua.”—Roma 12:3.

E ui lava o lo tatou faanaunauga masani o le fia faalogo atu lea i mea e logolelei i la tatou faalogo, ae o le mea e tatou te manaomia moni i le tele o taimi, o fautuaga ma aoaiga ia o loo faavae mai i le Tusi Paia. (Faataoto 16:25) Sa manao le tupu o Aapo e faalogo tau lava o mea na fiafia i ai; na oo lava ina talosaga atu ana auauna i le perofeta o Mekaio ia avea ana upu e “pei o le upu a so latou [o perofeta faaʻoleʻole a Aapo], ia e fai atu se upu lelei.” (1 Tupu 22:13) Pe ana fai e naunau Aapo e faalogo atu i faamatalaga saʻo ma suia ona ala fouvale, semanū e mafai ona ia alofia le matuā faatoilaloina i taua a Isaraelu faapea foi ma lona lava oti. Mo lo tatou lava lelei faaleagaga, e ao ona tatou tali vave atu i fautuaga maumauai, ae e alofa a toeaina Kerisiano, o ē naunau e fesoasoani ia i tatou e tumau i le ala saʻo o le upu moni, nai lo le sailia o tagata e faapea soo mai ia i tatou e ese lo tatou lelei, i le faamimitaina o i tatou i a latou faamatalaga tau faaʻoleʻole!—Faatusatusa i le 2 Timoteo 4:3.

E lē tatau lava ona liliu atu Kerisiano i le faaʻoleʻole e tusa lava po o le ā le mafuaaga. E pei o Eliu faamaoni, ua latou tatalo ma le maumauai: “Aua lava neʻi oʻu faailogaina se tagata, aua foi neʻi oʻu faaʻoleʻole i so o se tasi; auā ou te lē iloa faaʻoleʻole, neʻi avea faafuasei aʻu e Lē na faia aʻu.” Ma i le pei o Paulo, e mafai ona latou faapea atu: “Matou te lei fai lava se upu e faavivii [faaʻoleʻole] atu ai . . . pe faia se ufiufi o le manumanu.”—Iopu 32:21, 22, An American Translation; 1 Tesalonia 2:5, 6.

Avatu le Viiga i le Tulaga ua Tatau i Ai

Ua faaalia e le faataoto faagaeeina e faapea e mafai ona avea le viiga ma se taiala, i le faapea mai: “O le ulo e tunu ai e mo le ario ma le ogaumu mo le auro, ae o le viiga e tofotofoina ai le amio.” (Faataoto 27:21, The New English Bible) Ioe, atonu e uunaia e viiga lagona o le fiasili po o le faamaualuga, e taitaia atu ai i le leaga o se tasi. I le isi itu, e mafai ona faaalialia ai lona agamalu ma lona lotomaulalo pe afai na te amanaiaina lona nofo aitalafu ia Ieova, mo so o se mea ua ia faia lea ua viia ai o ia.

O viiga moni mo amioga lelei ua tatau ai po o ni laasaga ua ausia, e faalaeiau ai lē o faia viiga faapea ma lē o mauaina na viiga. E fesoasoani i le mafana atu ma le talisapaia lelei e le tasi o le isi. E faalaeiau ai le tuliloaina o sini tauleleia. O le viiga e tuuina atu i talavou ona ua tatau ai, e ono uunaia ai i latou ina ia atili ai ona galulue mamafa. Atonu e fesoasoani ai ia i latou e ati ae o latou uiga a o latou faia se sini e ola e tusa ai ma tapulaa o loo faatalitalia i latou e tausisia.

O lea la, seʻi o tatou alofia le faaʻoleʻole—po o le avatuina po o le taliaina foi. Ia tatou lotomaulalo pe a taliaina viiga. Ma ia o tatou matuā avatu ma le loto atoa viiga—i se tulaga faifai pea ia Ieova i la tatou tapuaiga faapea ma le fai atu i isi ma le faamaoni e ala i le faamālō lelei ma le talisapaia, i le manatuaina faapea o “le upu i ona aso ua tatau i ai, e lelei naua lea.”—Faataoto 15:23.