Mātua—Ia Leoleomalu a Outou Fanau!

I SE aʻoga maualuga i Nigeria, sa fai ai ma mea fiafia a se teine o lē sa taʻutaʻua i amioga lē mamā faaleituaiga le talatalanoa atu i teine aʻoga e uiga i mataupu e faatatau i feusuaiga. O se tasi o ana auala na fautuaina mo le faapaʻūtama, o le ʻava malosi po o le pia ua matuā faaoonaina i vailaau e maua mai i le tapaa. O ana tala, sa maua mai i tusi e faatatau i faiga lē mamā faaleituaiga, na taaina ai le toatele o ana uo i le aʻoga. Na amata ai e isi ona faataitai le faia o feusuaiga, ma na oo ai ina maʻito le tasi o i latou. Ina ia faia se faapaʻūtama, sa ia inuina ai se paluga malosi o le pia ma le sua o le tapaa. I ni nai itula, ae amata loa ona puai toto o ia. I ni nai aso mulimuli ane, na oti ai o ia i le falemai.

I le lalolagi i aso nei, ua lē mapu ai le talatalanoa pea o le toatele o talavou e uiga i faiga faaleituaiga, ua faaleagaina ai i latou o ē e fiafia e faalogologo ma talitonu i ai. O ai e tatau ona liliu atu i ai talavou mo le poto saʻo lea o le a mafai ona leoleomaluina ai i latou? Maeu le lelei pe afai e mafai ona latou vaavaai atu i o latou mātua amioatua, o ē o iai le tiute tauave o le tausia aʻe o i latou “i aoaiga ma tulafono a Ieova e faagaoioia ai le mafaufau.”—Efeso 6:4, NW.

Manatu o Tagata Aferika Agaʻi i Aʻoaʻoga Tau i Faiga Faaleituaiga

I le lalolagi aoao, ua iloa e le toatele o mātua le faigata ona talanoa ma a latou fanau ia mataupu e faatatau i faiga faaleituaiga. E moni lava lenei mea ae maise lava i Aferika. Na matauina e Donald, o se tamā i Sierra Leone e faapea: “E matuā lē mafai lava ona talanoaina na mea ma tamaiti. E lē o se aganuu lena a Aferika.” E ioeina foi lena mea e se teine Nigeria e igoa ia Mautinoa e faapea: “E manatu oʻu mātua i faiga faaleituaiga o se mea e matuā lē tatau lava ona talanoaina i luma o le lautele; o se mea e tapu i le aganuu.”

I nisi o aganuu faa-Aferika, e manatu i ai o se palauvale pe a taʻua na upu e uiga i faiga faaleituaiga e pei o totoga sa o le tamaloa, sua o le tino, po o le maʻi masina. Na oo lava foi ina faasaina e se tasi tinā Kerisiano lana tama teine ina ia aua lava neʻi tautala i le faaupuga “faiga faaleituaiga,” ae sa ia faapea atu e mafai e le teine ona faaaogā le upu “faitaaga.” I se faaeseesega, o loo tautala ma le saʻo le Afioga a le Atua, le Tusi Paia, e uiga i faiga faaleituaiga ma totoga sa. (Kenese 17:11; 18:11; 30:16, 17; Levitiko 15:2) O le fuafuaga o lenei mea, e lē faia ina ia faateia pe ina ia faafiafia ai, ae ina ia puipuia ma faatonuina ai tagata o le Atua.—2 Timoteo 3:16.

E ese ai mai tapu faaleaganuu, o le isi mafuaaga e taofiofi mamau ai nisi mātua, na faaalia mai e se isi tamā Nigeria e faapea: “Afai ou te talanoaina faiga faaleituaiga ma laʻu fanau, ou te ono faagaee ai i latou e faia faiga lē mamā faaleituaiga.” Ae pe faalaeiauina e faamatalaga faaaloalo e faavae i le Tusi Paia ia tamaiti e nanati atu e faataitai na faiga? E leai, e lē o fai mai ai faapena. O le mea moni, e foliga mai, o le itiiti o le iloa e talavou, o le sili atu foi lena ona foliga mai e oo i ai faafitauli. Ua faapea mai le Tusi Paia: “O le atamai [e faavae i le poto saʻo] e mo le puipuiga.”—Failauga 7:12, NW.

I le faataoto a Iesu, o se tagata faautauta, e na te muai iloa atu le ono oo mai o ni afā i le lumanai ma fausia ai lona fale i luga o se papa, a o le tagata valea, na fau lona fale i luga o le oneone ma pagatia ai i se mala. (Mataio 7:24-27) E faapena foi i mātua Kerisiano faautauta, i lo la iloa o le a fesagai a latou fanau ma omiga e pei o se afā ina ia lolo atu i amioga lē pulea o feusuaiga lē mamā a lenei lalolagi, e latou te faamalosiau i a latou fanau i le poto saʻo ma le malamalama lea o le a fesoasoani ia i latou e tumau mausali ai.

O se isi foi mafuaaga ua lē mafai ai e le toatele o mātua ona talanoaina faiga faaleituaiga ma a latou fanau, na taʻua e se tasi fafine Aferika e faapea: “Ina o oʻu talavou, e lei talanoa mai lava oʻu mātua Molimau ia te au i mataupu tau i faiga faaleituaiga, o lea, ou te lei mafaufau ai foi e talanoaina nei mea ma laʻu fanau.” Ae peitai, ua matuā faateteleina lava omiga i tagata talavou i aso nei nai lo o tagata talavou i le 10 po o le 20 tausaga ua mavae. E lē o se mea lenei e ofo ai. Na valoia e le Afioga a le Atua e faapea “o aso e gata ai . . . , o tagata amio leaga ma e taupelopelo, e alualu pea lava lo latou leaga, o loo faasese atu, ua faaseseina foi i latou.”—2 Timoteo 3:1, 13.

E faaopoopo atu i le faafitauli le mea moni e faapea, e toatele tamaiti e faatalatu po ua lē mafai ona talanoa atu i o latou faafitauli mo se fesoasoani i o latou mātua. E masani lava ona lē mafai ona faia se talanoaga lelei e itu uma e lua e oo lava i ni mataupu masani. Na tagi talatala se tasi talavou e 19 tausaga e faapea: “E matou te lē talanoa atu i oʻu mātua e faatatau i ni mataupu. E leai se fesootaiga lelei i le va o aʻu ma loʻu tamā. E lē tāitai lava popole mai.”

E ono fefefe foi le au talavou e faapea, o le fesili atu e uiga i mataupu tau i faiga faaleituaiga, o le a aumaia ai ni iuga lē lelei. Na faapea mai se teine e 16 tausaga le matua: “Ou te lē talanoa lava ma oʻu mātua i ni faafitauli tau i faiga faaleituaiga, ona o o la uiga e faaalia mai e faatatau i na mea. I se taimi ua mavae, na fesili atu ai loʻu uso matua ia Mama i ni fesili e faatatau i faiga faaleituaiga. Nai lo o le fesoasoani atu o Mama ia te ia i lona faafitauli, sa oo ina masalosalo o ia e uiga i mea o faanaunau i ai loʻu uso. E masani lava ona valaau mai Mama ia te au ma fesili mai e uiga i loʻu uso, i nisi taimi e na te faia ai ni faaupuga masalosalo e uiga i ana amioga. Ona ou te lē manao e aveesea le alofa o Mama mai ia te au, o lea, ou te lē talanoa atu ai lava ia te ia i oʻu faafitauli.”

Aisea e Aʻoaʻo Atu Ai?

O le aʻoaʻo o a tatou fanau i se tulaga sili e uiga i mataupu tau i faiga faaleituaiga, e lē gata o se mea e tatau ona fai ae o se faiga alofa foi le faia faapea. Afai e lē aʻoaʻoina e mātua a latou fanau e uiga i faiga faaleituaiga, o le a faia faapena e nisi—e masani lava ona vave iloa mai e fanau mai isi nai lo o le mea o faatalitalia e mātua, ma e matuā lē talafeagai lava ma mataupu silisili faaleatua. Na faia e se teine e 13 tausaga le faitaaga auā na taʻu atu ia te ia e sana uo i le aʻoga e faapea, afai e na te tausisia pea lona tulaga taupou, o le a matuā tigaina lava i se taimi o i luma. Na taʻu atu ia te ia e faapea: “O le a latou otiina lou alā tagata i le seleulu.” Ina ua fesiligia mulimuli ane pe aisea na ia lē taʻuina atu ai i lona tinā Kerisiano le mea lea na ia faalogo i ai, na tali mai le teine e faapea, o na mataupu, e lē tāitai lava ona talanoa i ai ma ni tagata matutua.

Na faapea mai se teine Nigeria: “Sa taumafai lava aʻu uo i le aʻoga e faatalitonu aʻu e faapea, o faiga faaleituaiga, o se mea e tatau lava i tagata ola uma ona faia. Na latou faapea mai, afai ou te lē faia i le taimi nei faiga faaleituaiga, o le a oo ina ou maʻi pe a aulia le 21 o oʻu tausaga, ma o lena mea o le a oo ai ia te au se tulaga faigata i le taimi e avea ai aʻu ma fafine. I lea, ina ia alofia na lamatiaga leaga, na latou faapea mai, e lelei pe a faia ni feusuaiga faaleituaiga a o lei faaipoipo.”

Ae ona sa faia ni talanoaga lelei ma ona mātua, sa vave ai lava ona ia iloa le feteenai o mea ia e faalogo i ai ma mea na aʻoaʻoina ai o ia i le aiga. “E pei lava ona masani ai, sa ou alu i lo matou aiga ma taʻu atu i loʻu tinā mea ia na latou faamatala mai ia te au i le aʻoga.” Sa mafai e lona tinā ona faafetaiaia faamatalaga sese.—Faatusatusa i le Faataoto 14:15.

E ala i le tuuina atu o le poto e manaomia e fesoasoani ai i le fanau e mauaina le atamai faaleatua i mataupu e faatatau i faiga faaleituaiga, ua faaauupegaina ai i latou e mātua ina ia iloa tulaga matautia ma iloa ai tagata o loo mananao e faaleagaina i latou. E fesoasoani lea ina ia puipuia ai i latou mai le loto tiga ma faamaʻi pipisi ona o feusuaiga lē mama, ma maʻito e lei manaomia. E saosaolaumea lea i le faaaloalogia ai o i latou lava faapea ma le faaaloalo tatau lea e faaalia mai e isi ia i latou. E faasao ai foi i latou mai manatu sese ma le popole. E maua ai foi se uiga mamā ma le mautinoa agaʻi i faiga faaleituaiga tatau, e iu ai i le fiafia pe a oo ina latou faaipoipo mulimuli ane. E mafai foi i lea ona fesoasoani ia i latou e tausisia se tulaga talileleia mai e le Atua. Ma a o vāai atu le fanau i le naunau ma le alofa o faaalia atu ia i latou, e mafai ona uunaia ai i latou e sili atu ona faaaloalo ma alolofa i o latou mātua.

Fesootaiga Lelei

Ina ia mafai e mātua ona faafetaui atu le fautuaga i manaoga o a latou fanau, e tatau lava ona iai se fesootaiga i itu e lua. Afai e lē iloa e mātua mea o i mafaufau ma loto o a latou fanau, e oo lava i fautuaga aogā, e mafai ona lē aogā, e pei lava ona taumafai se fomai e tusi atu se vailaau e aunoa ma lona iloaina o le mafuaaga o le maʻi o lea tagata. Ina ia avea o ni faufautua aogā, e tatau i mātua ona iloa po o ā moni lava mea o mafaufau i ai, ma faalogona o a latou fanau. E manaomia ona latou malamalama i omiga ma faafitauli o loo fesagai ma a latou fanau atoa ma fesili o loo fai ma faalavelave ia i latou. E tāua tele le faalogologo ma le faaeteete i fanau, ia “faataalise ona faalogologo, ia faagesegese ona tautala atu.”—Iakopo 1:19; Faataoto 12:18; Failauga 7:8.

E alu ai se taimi umi, le onosai, ma taumafaiga a mātua i le atiina ae ma le tausia pea o se faiā vavalalata ma a latou fanau, o se faiā e lagona ai e fanau le saoloto e faailoa atu o latou lagona lo-loto. Ae maeu le matagofie pe a mafai ona faia o lenei mea! Ua faapea mai se tamā i Aferika i Sisifo e toalima lana fanau: “O aʻu o se tamā ma o sē e faamatala mai i ai faafitauli. E saoloto tamaiti e talanoa mai ia te au e uiga i mataupu uma lava, e oo lava i faiga faaleituaiga. E oo lava i teine, e latou te fesili mai ia te au. E matou te faaalu se taimi e talanoa ai i o latou faafitauli. E latou te faamatala mai foi ia te au mea o fai ma o latou fiafiaga.”

Ua faapea mai Bola, o se tasi o ona afafine: “Ou te lē natia so o se mea lilo mai loʻu tamā. E magafagafa lava Tamā ma e alofa. E na te lē soonafai i matou pe inainā ia i matou, e tusa lava pe matou te faia ni mea sese. Nai lo o le ita, e manatunatu o ia i le mataupu ma faailoa mai ia i matou le mea sa tatau ona matou faia po o le mea sa lē tatau ona matou faia. E masani lava ona ia suʻe i le tusi, Talavou ma le tusi Fiafia i le Aiga.”a

Pe afai e mafai, e lelei mo mātua ona amata talanoa i a latou fanau e uiga i faiga faaleituaiga a o laiti lava le fanau. O lenei faiga e faataatia ai se faavae mo ni talanoaga faifai pea a o faagasolo tausaga talavou ia e masani lava ona faigata. Pe afai e lē vave amataina ia talanoaga a o laiti le fanau, i nisi taimi e masani lava ona sili atu ona faigata ona toe talanoa i ai i se taimi mulimuli ane, ae e mafai lava ona faia. Na faapea mai se tinā e toalima lana fanau: “Sa ou faamalosi ou te talanoa e uiga i le mataupu seia oo lava ina ou lē toe mā e talanoa i ai, e faapea foi i le tamaitiiti.” I le matuā tele o lamatiaga, e mautinoa lava le matuā aogā o na taumafaiga.

E Puipuia ma Fiafia Ai

E talisapaia e tamaiti mātua o ē faaauupegaina ma le alofa i latou i le poto o le a puipuimaluina ai i latou. Seʻi manatu i faamatalaga a nisi Molimau a Ieova i Aferika:

Na faapea mai Mojisola e 24 tausaga: “Ou te matuā loto faafetai pea i loʻu tinā. Sa ia tuuina mai ia te au i le taimi saʻo le aʻoaʻoga manaomia e faatatau i faiga faaleituaiga. E ui lava sa ou lagona le matamuli pe a talanoaina na mataupu i aso ua mavae, a ua ou iloa nei le aogā o mea na faia e loʻu tinā mo aʻu.”

Na faaopoopo mai Iniobong e faapea: “Ou te lagona pea lava le fiafia pe a ou toe tepa i tua ma mafaufau i mea na faia e Mama mo aʻu i le tuuina mai ia te au o le tele o toleniga e faatatau i faiga faaleituaiga. Ua avea o se fesoasoani matuā tāua i le tapasaina o aʻu a o agaʻi atu ina avea o se fafine. Ou te tautino atu o le mea foi lea o le a ou faia mo saʻu fanau pe a maua i le lumanai.”

Na faapea mai Kunle ua 19 tausaga: “Na fesoasoani mai oʻu mātua ia te au e tetee atu i omiga mai teine o le lalolagi e tuufau i le faia o feusuaiga lē mamā. Ana lē seanoa le toleniga na la tuuina mai ia te au, semanu ou te paʻū atu i le faia o le agasala. Ou te talisapaia pea le mea na la faia.”

Na faapea mai Christiana: “E tele lava ni aogā na ou maua mai i ni a ma talanoaga na faia ma loʻu tinā e faatatau i faiga faaleituaiga. Ua puipuia ai aʻu mai faamaʻi e oti ai ma maʻito e lei manaomia, ma ua mafai foi ona ou faataatia ai se faaaoaoga lelei mo oʻu tuagane ma oʻu uso laiti e mulimuli ai. E faaaloalogia ai foi aʻu e tagata, ma o le a faaaloalogia ai foi aʻu e se tane o le a ou faia i le lumanai. O le mea e sili ona tāua, ua ou maua ai se faiā lelei ma Ieova le Atua ona o le tausia o ana poloaiga.”

Na faapea mai Bola, lea na taʻua i le amataga: “Sa iai saʻu uo i le vasega o lē na faapea mai, o feusuaiga, e mafai lava ona faafiafiaina ai e aunoa ma le saisaitia i se faaipoipoga. Ia te ia, sa avea o se mea e mālie pe faafiafiaina ai. Ae peitai, sa lē toe avea o se mea mālie ina ua iloaina ua maʻito o ia ma ua lē mafai ona suʻe faatasi ma i matou i le suega pasi a le aʻoga. Ana faapea ou te lē maua se tamā lelei e taitaia aʻu, ai semanu ua ou pei o ia, i le aʻoaʻoina o se lesona i ni mea faigata e oo mai.”

Maeu se faamanuiaga pe a fesoasoani mātua Kerisiano i a latou fanau ina ia ‘faapopoto mo le faaolataga’ i lenei lalolagi maʻi valea i feusuaiga! (2 Timoteo 3:15) O a latou faatonuga e faavae i le Tusi Paia, ua pei o se ula matagofie e teuteu ma faamatagofie ai a latou fanau i fofoga o le Atua. (Faataoto 1:8, 9) E lagona ai e fanau le saogalemu, ma e olioli mātua i le matuā loto malie. Na faapea mai se tasi tamā Aferika o lē sa tauivi ina ia tausia pea le tatalaina o fesootaiga ma lana fanau iti: “Ua ia i matou le filemu o le mafaufau. Matou te mautinoa ua iloa e a matou fanau mea e fiafia i ai Ieova; e lē mafai ona taitaiseseina i latou e ni tagata ese. Matou te mautinoa e latou te lē faia ni mea e oo mai ai mafatiaga i le aiga. Ou te faafetai ia Ieova ona ua latou faamaonia lo matou faatuatuaina o i latou.”

[Faaopoopoga i lalo]

[Ata i le itulau 10]

O talavou Kerisiano o ē e maua faamatalaga e faavae i le Tusi Paia mai mātua, ua mafai ona latou teena tala sese i faiga faaleituaiga e fai atu e isi talavou ia i latou