E Aumaia e Ieova o Atalii e Toatele i le Mamalu

“Sa tatau [i le Atua], i lona aumaia o atalii e toatele i le mamalu, ia faaatoatoaina ai le Sui Sili o lo latou faaolataga e ala i tiga.”—EPERU 2:10, NW.

1. Aisea e mafai ai ona tatou mautinoa o le a faataunuuina lava le fuafuaga a Ieova mo tagata?

NA FOAFOAINA e Ieova le lalolagi ia avea ma nofoaga e faavavau o le aiga faaletagata lelei atoatoa e olioli i le ola e lē uma. (Failauga 1:4; Isaia 45:12, 18) E moni, na agasala lo tatou augātamā o Atamu ma faapea ona faasolo mai ai le agasala ma le oti i lana fanau. Peitai o le fuafuaga a le Atua mo tagata o le a faataunuuina e ala mai i lana Fanau Folafolaina, o Iesu Keriso. (Kenese 3:15; 22:18; Roma 5:12-21; Kalatia 3:16) O le alofa o Ieova mo le lalolagi o tagata na uunaia ai o ia e foaiina mai “lona Atalii e toatasi, ina ia le fano se tasi e faatuatua ia te ia, a ia maua e ia le ola faavavau.” (Ioane 3:16) O le alofa foi na uunaia ai Iesu e “foaiina [mai] lona ola e fai ma togiola e sui aʻi tagata e toatele.” (Mataio 20:28) O lenei ‘togiola talafeagai’ ua toe totogiina ai aiā ma faamoemoega ia na leiloa ia Atamu ma mafai ai ona toe maua le ola e faavavau.—1 Timoteo 2:5, 6; Ioane 17:3.

2. Na faapefea i le faatatauina o le taulaga togiola a Iesu ona faaatagia mai ai mea na faia i le Aso o le Togisala?

² O le faatatauina o le taulaga togiola a Iesu sa faaatagia i mea na faia i le Aso o le Togisala faaletausaga. I lena aso, sa muai osi ai e le ositaulaga sili a Isaraelu le taulaga i se povi poʻa e fai ma taulaga mo agasala, ma aveina atu le toto i le Atolaau paia o loo i totonu o le Mea e Sili ona Paia o le falefetafai, ma sa faaauauina lenei faiga mulimuli ane ina ua iai le malumalu. Sa faia lenei mea mo ia lava, mo lona auaiga, ma le ituaiga o sā Levī. I se uiga talitutusa, na ofoina atu e Iesu Keriso i le Atua le tāua o lona toto, muamua ina ia faamagaloina ai agasala a ona “uso” faaleagaga. (Eperu 2:12; 10:19-22; Levitiko 16:6, 11-14) I le Aso o le Togisala, sa osi ai foi e le ositaulaga sili le taulaga i se ʻoti e fai ma taulaga mo agasala, ona avatu lea o le toto i totonu o le Mea e Sili ona Paia, ma fai ai le togisala mo agasala a ituaiga e 12 e lē o ni ositaulaga a Isaraelu. O le a faapena foi, i le Ositaulaga Sili o Iesu Keriso, ona faaaogaina lona toto ola e sui aʻi tagata o ē o loo faaalia le faatuatua, ma aveesea ai a latou agasala.—Levitiko 16:15.

Ua Aumaia i le Mamalu

3. E tusa ai ma le Eperu 2:9, 10, o le ā ua faia e le Atua mo le 1,900 tausaga?

³ Mo le 1,900 tausaga, ua faia ai e le Atua se mea mataina i le fesootai atu i “uso” o Iesu. E tusa ai o lenei mea, na tusi le aposetolo o Paulo: “Ua tatou iloa o Iesu o lē na faamaulaloina teisi i agelu, ua faapaleina i le mamalu ma le viiga, ona o le tiga o le oti, ina ia oo ia te ia le oti mo tagata uma i le alofa tunoa o le Atua. Auā sa tatau ia te ia [Ieova le Atua]; ona o ia na faia mea uma lava, ma o ia foi ua ala mai ai mea uma, i lona aumaia o atalii e toatele i le mamalu, ia faaatoatoaina ai le Sui Sili o lo latou faaolataga e ala i tiga.” (Eperu 2:9, 10, NW) O le Sui Sili o le faaolataga o Iesu Keriso lea, o lē na aʻoaʻoina le usiusitai atoatoa e ala i mea na ia mafatia ai a o soifua o se tagata i luga o le lalolagi. (Eperu 5:7-10) O Iesu o ia lea na muamua faauuagagaina o se atalii faaleagaga o le Atua.

4. O anafea ma na faapefea ona avea Iesu ma Atalii faaleagaga o le Atua?

⁴ Na faaaogā e Ieova lona agaga paia, po o le malosi galue, e faauuagagaina ai Iesu ia avea mona Atalii faaleagaga, ina ia aveina aʻe ai o ia i le mamalu faalelagi. A o iai na o i laua ma Ioane le Papatiso, sa faatofuina atoatoa ai Iesu i le vai e faailogaina ai lona ofoina atu o ia lava i le Atua. Ua faapea mai le Evagelia a Luka: “Ua papatisoina le nuu uma, ona papatisoina ai lea o Iesu, ua tatalo o ia, ona faaavanoaina ai lea o le lagi, ona afio ifo lea o le Agaga Paia i ona luga, ua tino mai e peiseai se lupe, ua oo mai foi le siufofoga mai le lagi, ua faapea mai, ‘O loʻu Atalii pele oe, ua ou fiafia lava ia te oe.’” (Luka 3:21, 22) Na vaaia e Ioane le agaga paia ua alu ifo i luga o Iesu ma faalogoina le fetalai ane o Ieova e matuā faamaonia ai o ia o Lona Atalii pele. I lena taimi, ma e ala mai i le agaga paia, na faia ai e Ieova Iesu e avea o le faapolopolo i le ‘toatele o ona atalii o le a aumaia i le mamalu.’

5. O ai na muai maua aogā mai le taulaga a Iesu, ma e toafia i latou?

⁵ O “uso” o Iesu o i latou ia na muai maua aogā mai lana taulaga. (Eperu 2:12-18) I le faaaliga, na vaaia ai i latou e le aposetolo o Ioane ua latou iai i le mamalu i le Mauga o Siona faalelagi faatasi ma le Tamai Mamoe, o le Alii o Iesu Keriso ua toe faatuina aʻe. Na iloa foi e Ioane lo latou aofai, i le faapea mai: “Na aʻu iloa, faauta foi, ua tu mai le Tamai Mamoe i le mauga o Siona, ua faatasi foi ma ia tagata e selau afe ma afe e fa sefulu ma le fa o afe, ua tusia le suafa o lona Tamā i o latou muaulu. . . . o i latou ia o e ua faatauina nai tagata, o e ua faapolopoloina mo le Atua ma le Tamai Mamoe; e le iloa foi se pepelo i o latou gutu; auā e le ponā i latou.” (Faaaliga 14:1-5) O ‘atalii la e toatele o ē ua aumaia i le mamalu’ i le lagi e na o le 144,001 lo latou aofai—o Iesu ma ona uso faaleagaga.

‘Fanau Mai le Atua’

6, 7. O ai i latou ua ‘fananau mai le Atua,’ ma o le ā le uiga o lenei mea mo i latou?

⁶ O i latou ua faauuagagaina e Ieova ua ‘fananau mai le Atua.’ I le faasino atu ia i latou na, na tusi ai le aposetolo o Ioane: “O i latou uma o e ua fanau mai i le Atua, latou te le faia le agasala; auā o loo tumau i totonu ia te i latou lona uiga [uiga o Ieova]; e le mafai foi ona agasala, auā ua fanau mai i latou i le Atua.” (1 Ioane 3:9) O lenei “uiga” o le agaga paia lea o le Atua. O le galulue faatasi ma lana afioga, ua avatu ai i sui taitoatasi o le 144,000 se “fanaufouina” i se faamoemoe faalelagi.—1 Peteru 1:3-5, 23.

⁷ Sa avea Iesu ma Alo o le Atua mai lava i lona fanau mai o se tagata, e pei foi ona avea le tagata lelei atoatoa o Atamu ma ‘atalii o le Atua.’ (Luka 1:35; 3:38) Peitai, ina ua mavae le papatisoga o Iesu, na matuā mataina mai ai ina ua faalauiloa e Ieova: “O loʻu Atalii pele oe, ou te fiafia ia te oe.” (Mareko 1:11) E ala i lenei faalauiloaga na aumaia faatasi ma le agaga paia, sa manino mai ai faapea, o lena ua aumaia e le Atua Iesu e avea ma Ona Atalii faaleagaga. I se uiga faafaatusa, sa foaiina atu ai loa ia Iesu se “fanaufouina” faatasi ai ma le aiā e maua na te toe maua ai le ola lea sa iai muamua o ia o se Atalii agaga o le Atua i le lagi. I le pei o ia, ua faapena foi ona “toe fanau” mai ona uso faaleagaga le 144,000. (Ioane 3:1-8; tagai i le Watchtower, o Novema 15, 1992, itulau 3-6.) I le pei foi o Iesu, ua faauuina i latou e le Atua ma tofia e folafola atu le tala lelei.—Isaia 61:1, 2; Luka 4:16-21; 1 Ioane 2:20.

Faamaoniga o le Faauuagagaina

8. O le ā le faamaoniga sa iai o le faauuagagaina i le tulaga o (a) Iesu (e) ona uluai soo?

⁸ Sa iai se faamaoniga e iloa ai ua faauuagagaina Iesu. Na vaaia e Ioane le Papatiso le agaga o loo faapepepepe ifo i luga o Iesu ma ia lagonaina le faalauiloa mai e le Atua o le avea o le Mesia fou ua faauuina mona atalii faaleagaga. Ae na faapefea ona iloa e soo o Iesu ua faauuagagaina i latou? I le aso na toe afio aʻe ai o ia i le lagi, na fetalai atu Iesu: “Na papatiso lava Ioane i le vai; a o outou, e papatisoina outou i le Agaga Paia, e le tele ni aso e va aʻi.” (Galuega 1:5) O soo o Iesu sa ‘papatisoina i le agaga paia’ i le aso o le Penetekoso i le 33 T.A. O lena liligiina ifo o le agaga sa ō mai faatasi ma “le taalili mai le lagi, peiseai o le matagi ua agi tele mai” ma “laulaufaiva peiseai o le afi” ua i luga o soo taitasi. Na sili atu ona mataina le mafai e soo “ona tautala i gagana eseese, pei ona foaiina mai e le Agaga o le gagana ia te i latou.” Sa iai la se faamaoniga na mafai ona vaaia ma lagonaina faapea, ua tatalaina mai mo soo o Keriso le ala e ulu atu ai i le mamalu faalelagi o ni atalii o le Atua.—Galuega 2:1-4, 14-21; Ioelu 2:28, 29.

9. O le ā le faamaoniga e iloa ai, sa faauuagagaina tagata Samaria, o Konelio, ma isi o le uluai senituri?

⁹ I se isi taimi mulimuli ane, na talaʻi atu ai Filipo le faievagelia i Samaria. E ui sa talia e tagata Samaria lana feau ma papatisoina i latou, ae na leai ni faamaoniga e iloa ai faapea na faauuina i latou e le Atua e avea ma ona atalii. Ina ua tatalo aposetolo o Peteru ma Ioane ma faaee o la lima i luga o na tagata talitonu, “ona maua lea e i latou o le Agaga Paia” i se tulaga sa mafai ona manino i ai i latou na matauina. (Galuega 8:4-25) O le faamaoniga lenei e iloa ai sa faauuagagaina tagata talitonu o Samaria e avea o atalii o le Atua. E faapena foi, i le 36 T.A., na talia ai e Konelio ma isi tagata o Nuu Ese le upu moni a le Atua. O Peteru ma tagata talitonu mai Iutaia o ē na iai faatasi ma ia, sa latou “matuā ofo . . . ina ua liligi ifo i nuu ese le alofa o le Agaga Paia. Auā ua latou faalogo atu ia te i latou ua tautala mai i gagana uiga ese, ma vivii atu i le Atua.” (Galuega 10:44-48) E toatele Kerisiano o le uluai senituri na latou maua ‘meaalofa o le agaga,’ e pei o le tautala i gagana eseese. (1 Korinito 14:12, 32) Ona maua ai lea e nei tagata le faamaoniga manino faapea ua faauuagagaina i latou. Ae na faapefea ona iloa e Kerisiano mulimuli ane pe o faauuagagaina i latou pe leai?

Le Molimau a le Agaga

10, 11. E faavae aʻe i le Roma 8:15-17, e faapefea ona e faamatalaina le molimau mai o le agaga ia i latou ua avea ma suli faatasi ma Keriso?

¹⁰ Ua iai i Kerisiano faauuina uma e 144,000 le faamaoniga aʻiaʻi faapea ua ia i latou le agaga o le Atua. I lenei itu, na tusi ai Paulo: “Ua outou maua le Agaga o tamafai, tou te valaau atu ai, ‘Ava, le Tamā e!’ O loo molimau mai lea lava Agaga i o tatou agaga, o fanau i tatou a le Atua. Afai foi o fanau i tatou, o suli foi, o suli lava o le Atua, o suli faatasi ma Keriso; pe afai tatou te tiga faatasi ma ia, ina ia faamanuiaina foi i tatou faatasi ma ia.” (Roma 8:15-17) E iai lagona alofa o Kerisiano faauuina e pei o ni fanau i lo latou Tamā faalelagi, o se uiga autū lea i le tulaga o se atalii. (Kalatia 4:6, 7) Ua latou mautinoa aʻiaʻi ua faauuina i latou e le Atua i le tulaga o ni atalii faaleagaga e fai ma suli faatasi ma Keriso i le Malo faalelagi. I lenei itu, ua faatino ai e le agaga paia o Ieova se matafaioi patino.

¹¹ E ala i le taaʻiga a le agaga paia o le Atua, e faagaeetia ai e agaga, po o uiga autū o ē faauuina i latou ina ia tali atu i se uiga mautinoa i mea o loo fai mai ai le Afioga a le Atua e faatatau i le faamoemoe faalelagi. Mo se faataitaiga, pe a latou faitau i mea o loo fai mai ai le Tusi Paia e uiga i fanau faaleagaga a Ieova, e vave lava ona latou iloa o na upu o loo faatatau mai ia i latou. (1 Ioane 3:2) Latou te iloa ua ‘papatisoina i latou ia Keriso Iesu’ ma i lona maliu. (Roma 6:3) O lo latou talitonuga mausalī faapea o i latou o le fanau faaleagaga a le Atua, o le a latou feoti ma faatutuina aʻe i le mamalu faalelagi, e pei ona sa tupu ia Iesu.

12. O le ā ua tuuina e le agaga o le Atua i Kerisiano faauuina?

¹² O le faauuina e avea o ni atalii faaleagaga e lē o se faanaunauga e mafai ona atiina ae. E lē mananao ē ua faauuagagaina e ō atu i le lagi ona ua mafatia i tulaga faigata o loo iai nei i le lalolagi. (Iopu 14:1) Nai lo lea, ua tuuina e le agaga o Ieova i ē ua faauuina moni, se faamoemoe ma se faanaunauga e lē masani aʻi tagata lautele. E iloa e i latou na faauuina faapea, o le ola e faavavau i tulaga lelei atoatoa faaletagata i luga o se lalolagi ua siosiomia e se aiga ma ni uo fiafia o le a matuā ofoofogia lava. Peitai, e lē o avea lena olaga ma faanaunauga autū o o latou loto. Ua iai i ē faauuina se faamoemoe malosi faalelagi, lea ua latou faataulagaina ai ma le loto malie isi uma fuafuaga ma ni mea o le lalolagi sa tosina atu i ai.—2 Peteru 1:13, 14.

13. E tusa ai ma le 2 Korinito 5:1-5, o le ā le ‘manaoga naunautai’ o Paulo, ma o le ā ua faaalia mai e lenei mea e tusa ai o ē ua faauuagagaina?

¹³ O le faamoemoe faalelagi ua foaiina mai e le Atua e matuā malosi lava ia i latou nei, o le mea lea ua faapei ai o latou moomooga o moo-mooga sa iai ia Paulo, o lē na tusi mai: “Ua matou iloa afai e lepetia lo matou fale apitaga faalelalolagi, ua ia te i matou le fale mai le Atua, o le fale e lei faia e lima, e faavavau i le lagi. Auā foi ua matou feoi i lenei fale, o loo naunau tele i le fia faaofuina i lo matou fale mai le lagi; afai foi o faaofuina i matou, e le maua i matou e le lavalavā. Auā o i matou o i lenei fale apitaga, ua feoi i matou o loo mafatia; e le ona ua matou loto ina ia toeseina ofu, a ia faaofuina, ina ia tofatumoanaina le iu vale i le ola. O ia foi ua saunia i matou mo lenei lava mea, o le Atua ia, o ia foi ua foai mai le faamaoni o le Agaga ia te i matou.” (2 Korinito 5:1-5) O le ‘manaoga naunautai’ o Paulo o le faatūina aʻe lea i le lagi o se foafoaga agaga e lē mafai ona oti. I lona faasino atu i le tino faaletagata, na ia faaaogā ai le faaupuga faafaatusa o se fale apitaga e mafai ona lepetia, o se nofoaga e faaleagaina gofie ma e lē tumau, e faatusatusa atu i se fale. E ui ina ola i le lalolagi i se tino faaletino e mafai ona oti, ae o Kerisiano ua faauuina i le agaga e faailogaina ai le olaga faalelagi o loo fotuai mai, latou te tulimatai atu i le “fale mai le Atua,” o se tino agaga e lē pala, e lē mafai ona oti. (1 Korinito 15:50-53) I le pei o Paulo, e mafai ona latou faapea mai ma le naunautai: “Ua matou loto tetele ma ua sili lo matou manao ia o ese i matou i le tino [faaletagata], a ia nonofo i matou [i le lagi] ma le Alii.”—2 Korinito 5:8.

Ua Faaaofiaina i ni Feagaiga Faapitoa

14. Ina ua faavaeina le Faamanatuga, o le ā le feagaiga na muai taʻua e Iesu, ma o le ā le matafaioi ua faia e lena feagaiga i le fesootai atu i tagata Isaraelu faaleagaga?

¹⁴ Ua mautinoa e Kerisiano faauuagagaina faapea ua faaaofiaina i latou i ni feagaiga faapitoa se lua. Na taʻua e Iesu se tasi o nei feagaiga ina ua ia faaaogā le areto lē faafefeteina ma le uaina e taʻi ai le Faamanatuga o lona maliu lea sa lalata ane ma ia fetalai ai i le ipu o le uaina: “O lenei ipu o le feagaiga fou lea i loʻu toto, ua faamaligiina mo outou.” (Luka 22:20; 1 Korinito 11:25) O ai moni i latou e aofia i le feagaiga fou? O Ieova le Atua ma sui o le Isaraelu faaleagaga—i latou ua fuafuaina e Ieova e avatu i ai le mamalu faalelagi. (Ieremia 31:31-34; Kalatia 6:15, 16; Eperu 12:22-24) I le faagaoioia e ala i le toto maligi o Iesu, ua aumaia ai e le feagaiga fou mai nuu ese ni tagata mo le suafa o Ieova ma avea ai nei Kerisiano faauuagagaina o se veaga o le “fanau” a Aperaamo. (Kalatia 3:26-29; Galuega 15:14) Ua saunia le feagaiga fou mo Isaraelu uma faaleagaga ina ia aumaia ai i latou i le mamalu e ala i le faatutuina aʻe i le ola e lē mafai ona oti i le lagi. Ona o se “feagaiga [e] faavavau” o le a tumau ai e faavavau ona aogā. O le a faaalia mai i le lumanai pe o le a faatinoina foi e lenei feagaiga se matafaioi i isi vala i le taimi o le Meleniuma ma i le taimi mulimuli ane ai.—Eperu 13:20.

15. E tusa ai ma le Luka 22:28-30, o le ā le isi feagaiga na amata ona faaaofia atu i ai soo faauuina o Iesu, ma o anafea?

¹⁵ O “atalii e toatele” ua fuafuaina e Ieova e ‘aumaia i le mamalu’ ua faapena foi ona faaaofiaina i latou taitoatasi i le feagaiga mo se Malo faalelagi. E tusa ai o lenei feagaiga i le va o ia lava ma ona soo sa mulimulitui ia te ia, na fetalai ai Iesu: “Ua outou tumau ia te au i oʻu tofotofoga. E faapei ona tofia mai e loʻu Tamā o le malo ia te au, e faapea foi ona ou tofia outou, ina ia outou aai ma inu i laʻu laoai i loʻu malo, ma ia nonofo i nofoālii, ma faamasino atu i itu aiga o Isaraelu e sefulu ma le lua.” (Luka 22:28-30) Na faavaeina le feagaiga o le Malo ina ua faauuina soo o Iesu i le agaga paia i le Penetekoso e 33 T.A. E faaauau pea ona aogā lena feagaiga i le va o Keriso ma ana tupu lagolago e faavavau. (Faaaliga 22:5) O lea la, e mautinoa e Kerisiano faauuagagaina faapea, o loo aofia ai i latou i le feagaiga fou ma i le feagaiga mo le Malo. O lea, i le faamanatuina o le Talisuaga Afiafi a le Alii, ua na o se vaega toaitiiti o ē faauuina o loo iai pea i le lalolagi, latou te taumafaina le areto, o loo fai ma sui o le tino faaletagata lē agasala o Iesu, ma le uaina, ua faailogaina ai lona toto lelei atoatoa na faamaligiina i lona maliu ma faamautuina ai le feagaiga fou.—1 Korinito 11:23-26; tagai i Le Olomatamata, Tesema 1, 1989, itulau 14-17.

Ua Valaauina, ua Filifilia, ma Faamaoni

16, 17. (a) Ina ia aumaia i le mamalu, o le ā e ao ona moni ia i latou uma o le 144,000? (e) O ai ‘tupu e toasefulu,’ ma ua faapefea ona latou feutagai ma le vaega o loo totoe pea i le lalolagi o “uso” o Keriso?

¹⁶ O le uluai faatatauina o le taulaga togiola a Iesu ua mafai ai e le 144,000 ona valaauina i le ola faalelagi ma filifilia ai e ala i le faauuagagaina e le Atua. O le mea moni, ina ia aumaia i le mamalu, e tatau ona latou ‘atili faamalolosi ina ia faamautinoa lo latou valaauina ma lo latou filifilia,’ ma e ao ona faamautinoa atu lo latou faamaoni seia oo i le oti. (2 Peteru 1:10; Efeso 1:3-7; Faaaliga 2:10) O se vaega totoe toalaiti o ē faauuina o loo iai pea i le lalolagi ua latou tausisia lo latou faamaoni e ui lava i teteega mai ‘tupu e toasefulu’ na o loo faaatagia mai ai malo malolosi uma faapolotiki. “Latou te tau le taua ma le Tamai Mamoe,” o le faamatalaga lea a le agelu, “a e manumalo le Tamai Mamoe ia te i latou, auā o le Alii ia o alii ma le Tupu o tupu; o e ua ia te ia foi ua valaauina i latou, ma filifilia, ma faamaoni.”—Faaaliga 17:12-14.

¹⁷ E leai se mea e mafai e pule faaletagata ona fai e tetee atu ai ia Iesu, le “Tupu o tupu,” auā o loo iai o ia i le lagi. Peitai latou te faaalia le lotoa i le vaega totoe o ona “uso” o loo iai pea i le lalolagi. (Faaaliga 12:17) O le a faaiuina lena lotoa i le taua a le Atua o Amaketo, pe a oo ina tuuina atu le manumalo i le “Tupu o tupu” ma ona “uso”—‘i latou ua valaauina ma filifilia ma faamaoni.’ (Faaaliga 16:14, 16) Ae i le taimi nei, o loo tele pea galuega o loo faia e Kerisiano faauuagagaina. O ā mea o loo latou faia i le taimi nei, a o lei avatuina e Ieova le mamalu ia i latou?

O le ā Lau Tali?

◻ O ai i latou ua ‘aumaia e le Atua i le mamalu faalelagi’?

◻ O le ā le uiga o le “fanau mai i le Atua”?

◻ E faapefea ona ‘molimau le agaga’ i nisi Kerisiano?

◻ O ā feagaiga ua faaaofiaina i ai ē ua faauuagagaina?

[Ata i le itulau 15]

I le Penetekoso o le 33 T.A., na avatu ai se faamaoniga faapea, ua tatalaina le ala mo le mamalu faalelagi