Na Latou Faia le Finagalo o Ieova

Ua Aauina Atu e Iesu Soo e Toʻa 70

O LE tau e afu ai mea i le 32 T.A. Ua toe ono lava masina o totoe a o lei oo i le maliu o Iesu. O lea, ina ia faatelevave le galuega talaʻi ma faaauiluma le toleniina o nisi o ona soo, na ia tofia ai soo e toʻa 70 ma “aauina atu o i latou e taitoalua ua muamua atu ia te ia, i aai uma ma mea uma o le a maliu atu i ai o ia.”—Luka 10:1.a

Na aauina atu e Iesu ona soo e “muamua atu ia te ia” ina ia mafai ai e tagata ona vave filifili pe faamata latou te talia pe teena le Mesia pe a taunuu ane i ai Iesu i se taimi mulimuli ane ai. Ae aisea na ia aauina atu ai i latou “taitoalua”? E manino lava, ina ia mafai ai ona fefaalaeiauai le tasi i le isi pe a fesagai ma teteega.

I le faamamafaina o le faanatinati o la latou galuega talaʻi, na taʻu atu ai e Iesu i ona soo: “E tele le saito e seleseleina, a o le au faigaluega e toaitiiti ia; o lea ia outou aioi ai i le Alii e ana le saito e seleseleina, ina ia aauina mai e ia ni e galulue i lana saito e seleseleina.” (Luka 10:2) Sa talafeagai ona faatusatusa atu i le seleselega, auā so o se tasi e faatuai i le taimi o le seleselega e mafai ona iu i le maimau o le fuata tāua. E faapena foi pe ana faapea e faatalale soo i lo latou tofiga o le talaʻi, e ono maimau foi ia ola tāua!—Esekielu 33:6.

Faifeau e Lē Fetosinaai

Na aʻoaʻo atu atili Iesu i ona soo e faapea: “Aua tou te ave se ete tupe, po o se taga, po o seevae; aua foi tou te ofo alofa atu i se tasi i le ala.” (Luka 10:4) O se tu masani mo se tagata malaga le ave e lē gata i se taga ma se meaʻai ae faapea foi se pea seevae faaleoleo, ina neʻi faasolo ina manifinifi lalo o seevae ma motusi nonoa. Ae peitai sa lē tatau ona popole soo o Iesu i na mea. Nai lo lena, na latou faatuatua o le a tausia i latou e Ieova e ala i tagata Isaraelu ia o la latou tu masani le talimalo.

Ae aisea na taʻu atu ai e Iesu i ona soo ina ia aua neʻi ofo alofa atu i se tasi i se faafeiloaiga? Po o le uiga ea ina ia faaalia lo latou lē faaleuo, po o le lē faaaloalo? E matuā leai lava! O le upu Eleni o le a·spaʹzo·mai, o lona uiga o le ofo alofa atu i se faafeiloaiga, e ono sili atu lona uiga nai lo se “faatalofa aloaia” po o se “faamalo.” E ono aofia ai tu masani o le feasogi, o le feopoai, ma ni talanoaga uumi lea e ono iu i ai pe a feiloai ni tagata masani se toalua. Na matauina e se tasi tagata faimanatu e faapea: “O faafeiloaiga a tagata mai Sasaʻe e lē tutusa ma i tatou, ua na o sina ifo, po o le lūlū lima, ae o isi faafeiloaiga e feopoai, ifo atu, e oo lava i le ifo toele i le eleele. O nei mea uma e manaomia ai le taimi umi.” (Faatusatusa i le 2 Tupu 4:29.) O lea la na fesoasoani atu ai Iesu i ona soo ina ia alofia mea e faalavelave ai ae lē manaomia, e ui o ni tu masani.

Na mulimuli ane ai lava, fetalai atu Iesu i ona soo pe afai e ulu atu i se fale ae talia ai i latou, e tatau ona latou “nonofo i lea fale, ma aai ma inu i mea [o le a] latou . . . avane.” Ae afai latou te ulu atu i se aai ae lē talia lelei, e tatau ona latou “o ai i o latou auala, ma faapea atu, O le eleele lava mai la outou aai ua pipii mai ia te i matou, matou te sōloi atu ia te outou.” (Luka 10:7, 10, 11) O le sōloi po o le tūtū o pefu o vae o se tasi ua faailoa atu ai na tuua ma le filemu e soo fale po o aai e lei talia ai i latou, i le faaiuga lea o le a aumaia e le Atua mulimuli ane ai. A o i latou o ē na talia soo o Iesu ma le agalelei ua latou tuuina i latou i le ala mo faamanuiaga. Na taʻu atu e Iesu i ona aposetolo i se isi taimi e faapea: “O lē talia outou, ua talia e ia o aʻu; o lē talia foi aʻu, ua talia e ia o le na auina mai aʻu. Ai se avane foi tau lava o se ipu vai mālūlū e inu ai se tasi o i latou nei e faatauvaa i le igoa o le soo, e moni, ou te fai atu ia te outou, e le māumau lona taui.”—Mataio 10:40, 42.

Lesona mo i Tatou

O le poloaiga ia talaʻia le tala lelei o le Malo o le Atua ma faia soo ua faataunuuina nei e le silia i le 5,000,000 Molimau a Ieova i le lalolagi aoao. (Mataio 24:14; 28:19, 20) Ua latou iloaina le faanatinati o la latou feau. O lea la, ua latou faaaogā tatau ai o latou taimi, ma alofia mea e faalavelave ai ia e ono taofia ai i latou mai le uaʻi atoatoa atu i lo latou tofiga tāua.

E taumafai Molimau a Ieova e faaalia le uiga faaleuo ia i latou uma latou te feiloai. E ui i lea, latou te lē auai i ni talanoaga lē aogā, pe aafia foi i ni felafolafoaiga o ni mataupu faaletagata po o ni taumafaiga lē taulau a lenei lalolagi ina ia faasaʻoina ai faiga lē tonu. (Ioane 17:16) Nai lo lea, latou te talanoa e taulai atu i le vaifofo tumau o faafitauli o tagata—le Malo o le Atua.

E masani ona vaaia Molimau a Ieova o galulue taitoalua. Pe e lē sili atu mea e mafai ona faataunuuina pe afai e galulue taitoatasi? Atonu. Peitai, ua iloatino e Kerisiano i aso nei le aogā o le galulue soosoo tauʻau ma se aumea talitonu. E maua ai sina puipuiga pe afai e molimau atu i oganuu e lē saogalemu. O le galulue faatasi la ma se paga e mafai ai foi e tagata fou ona maua aogā mai i tomai o tagata talaʻi agavaa o le tala lelei. O le mea moni, e mafai e i laua uma ona saosaolaumea i le fefaalaeiauai.—Faataoto 27:17.

E mautinoa, o le galuega talaʻi o le galuega pito i sili lea ona faanatinati o loo faia i nei “aso e gata ai.” (2 Timoteo 3:1) Ua fiafia Molimau a Ieova e maua le lagolagosua a le au uso i le lalolagi aoao lea o loo latou galulue “faatasi mo le faatuatuaga ua i le tala lelei.”—Filipi 1:27.

[Faaopoopoga i lalo]