Ola e Tusa Ai o le Tuuina Atu Faa-Kerisiano i le Saʻolotoga

“O le mea o i ai le Agaga o le Alii, o i ai le saʻolotoga.”—2 KORINITO 3:17.

1. O ai o loo tuuina atu i ai Molimau a Ieova, ma aisea latou te faaaogaina ai sosaiete faaletulafono?

E TALITONU Molimau a Ieova o le a tumau e faavavau la latou tapuaiga. O lea ua latou faatalitalia ai e auauna atu i le Atua “i le agaga ma le faamaoni” seia oo i le faavavau. (Ioane 4:23, 24) Ona o ni tagata e iai le filifiliga saʻoloto, ua faia ai e nei Kerisiano se tuuina atu atoatoa ia Ieova le Atua ma ua maumauai e ola aʻe ai. Ona o lena fuafuaga, ua latou faalagolago ai i le Afioga a le Atua ma i lona agaga paia. A o latou tuliloaina ma le loto atoa lo latou ala o le tuuina atu faa-Kerisiano e tusa ma le saʻolotoga mai le Atua, ua faaalia ai e Molimau se faaaloalo tatau mo le matafaioi a “faipule silisili” faalemalo ma latou faaaogā tatau faatulagaga ma sauniuniga faaletulafono o loo iai. (Roma 13:1; Iakopo 1:25) Mo se faataitaiga, e faaaogā e Molimau le Sosaiete o le Olo Matamata o se sosaiete faaletulafono—o se tasi lea o sosaiete o loo faaaogaina i le tele o atunuu—ina ia mafai ai ona latou faataulau la latou galuega o le fesoasoani atu i uso a tagata, ae maise lava i vala faaleagaga. Peitai ua tuuina atu Molimau i le Atua, ae lē i se faalapotopotoga faaletulafono, ma o lo latou tuuina atu ia Ieova o le a tumau e faavavau.

2. Aisea ua matuā talisapaia ai e Molimau a Ieova le Sosaiete o le Olo Matamata ma isi vaega faapena faaletulafono?

² Ona o ni auauna tuuina atu i le Atua, o se tiute tauave ai a Molimau a Ieova le usitaia o faatonuga a Iesu ina ia “fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia; ia . . . aʻoaʻo atu ia te i latou.” (Mataio 28:19, 20) O le a faaauau lenei galuega seia oo i le iuga o le faiga o mea, auā na fetalai foi Iesu: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:3, 14) I tausaga taitasi, e avatu ai e falelomitusi a le Sosaiete o le Olo Matamata ma isi vaega faapena faaletulafono, i Molimau a Ieova le faitau miliona o Tusi Paia, tusi, polosiua, ma mekasini mo le faaaogaina i la latou galuega talaʻi i le lalolagi aoao. O lea la, ua matuā tāua ai nei faalapotopotoga tumaʻoti faaletulafono i le fesoasoani i auauna tuuina atu a le Atua, ina ia ola e tusa ai ma lo latou tuuina atu ia te ia.

3. O le ā le uiga sa muai faaaogā ai e Molimau a Ieova le taʻu “le Sosaiete”?

³ E ono finau mai se tasi faapea o le auala o loo talanoa ai Molimau e uiga i le Sosaiete o le Olo Matamata—po o le taʻu masani “le Sosaiete”—e faaalia ai latou te vaai i ai e sili atu le tāua nai lo na o se auala faaletulafono. Po ua latou lē manatu ea i ai o le pule autū lea i mataupu tau i le tapuaiga? Ua faamanino e le tusi Jehovah’s Witnesses—Proclaimers of God’s Kingdom lenei manatu i le faamalamalama mai: “Ina ua faasino atu le Watchtower [Iuni 1, 1938] i ‘Le Sosaiete,’ o lona uiga, e lē na o se auala faaletulafono, ae o le vaega o Kerisiano faauuina na faavaeina lena vaega tumaʻoti faaletulafono ma latou faaaogaina.”a O lea la, o le faaupuga ua faasino atu i le “auauna faamaoni ma le mafaufau.” (Mataio 24:45) O le uiga lenei o loo taatele ina faaaogā ai e Molimau le taʻu “le Sosaiete.” O le mea moni, o le faalapotopotoga faaletulafono ma “le auauna faamaoni ma le mafaufau” e lē o ni faaupuga mo le mea lava e tasi. E filifilia faapalota faatonu o le Sosaiete o le Olo Matamata, peitai o Molimau o loo faia aʻe ai le ‘auauna faamaoni’ o i latou ia ua faauuina e le agaga paia o Ieova.

4. (a) E faapefea ona fai atu faamatalaga a le toatele o Molimau ina ia alofia ai ni lē femalamalamaai? (e) Aisea e tatau ai ona tatou paleni e tusa ai o le tulaga i faaupuga?

⁴ Ina ia aveesea ni lē femalamalamaai, ua faaeteete ai Molimau a Ieova i le auala latou te fai atu ai faamatalaga. Nai lo le faapea atu, “ua aʻoaʻo e le Sosaiete,” ae ua sili atu i le toatele o Molimau ona latou faaaogā faaupuga e pei o le, “ua faapea mai le Tusi Paia” po o le, “ou te malamalama o loo aʻoaʻo le Tusi Paia faapea.” I lena auala latou te faamamafa ai le filifiliga totino ua faia e Molimau taitoatasi i le taliaina o aʻoaʻoga a le Tusi Paia ma alofia ai foi le iai o ni manatu sese faapea o loo saisaitia Molimau i faatonuga mai ni lotu mavae. O le mea moni, o manatu faatutu e tusa ai i faaupuga e lē tatau ona avea o se mataupu e fefinauai ai. Ae maise ai, o le tulaga i faaupuga e pau lava le aogā o le taofia ai o ni lē femalamalamaai. E manaomia le paleni faa-Kerisiano. Ua timai mai le Tusi Paia ia i tatou ia “aua neʻi . . . fefinauai i upu.” (2 Timoteo 2:14, 15) Ua taʻua foi i le Tusi Paia le mataupu silisili lenei: “Afai tou te le sauniuni atu i o outou laulaufaiva ni upu matala, e iloa ea faapefea le upu ua tautala aʻi?”—1 Korinito 14:9.

Ua Faaitiitia e le Agaga o le Atua le Manaomia o Tulafono

5. O le ā le malamalamaga e tatau ona malamalama ai i le 1 Korinito 10:23?

⁵ “Ua tataga mea uma . . . a ua le aoga mea uma,” o le manatu lea o le aposetolo o Paulo. Na ia faapea mai atili: “Ua tataga mea uma . . . a ua le faamafanafana mea uma.” (1 Korinito 10:23) E manino lava sa lei uiga upu a Paulo faapea e taga ona faia mea o loo taʻusalaina patino mai e le Afioga a le Atua. I le faatusatusa i tulafono e tusa ma le 600 na tuuina atu ia Isaraelu anamua, e itiiti lava ni nai poloaiga maʻoti e faatatau i le olaga faa-Kerisiano. O lea, o le tele o mataupu o loo tuu atu i le loto fuatiaifo o le tagata lava ia. O le tagata ua tuuina atu ia Ieova e olioli o ia i le saʻolotoga e maua mai le taitaiga a le agaga o le Atua. I le filifilia lava e ia o le upu moni, e usitaia ai e se Kerisiano lona loto fuatiaifo ua aʻoaʻoina e le Tusi Paia ma faalagolago atu i le taitaiga a le Atua e ala mai le agaga paia. E fesoasoani lenei mea i se Kerisiano tuuina atu ia filifili ai po o le ā o le a “faamafanafana” ma “aoga” mo ia lava ma isi. Na te iloa ai o faaiuga na te faia o le a aafia ai lana faiā totino ma le Atua, o lē ua ia tuuina atu i ai.

6. I sauniga faa-Kerisiano, e mafai faapefea ona faaali atu ua tatou filifilia lava e i tatou le upu moni?

⁶ E faaalia mai e se Molimau le filifilia lava e ia o le upu moni ma ana lava meatotino e ala i ana tali i sauniga faa-Kerisiano. Muamua, atonu na te toe taʻu mai upu uma o loo taʻua i le lomiga lea e suesueina. Peitai, a o faagasolo taimi, o le a ia agaigai atu i le tulaga o le mafai ona faamatala mai o aʻoaʻoga a le Tusi Paia i ana lava upu. Ua ia avatu ai la se faamaoniga faapea o loo ia atiina ae lona tomai faalemafaufau, e lē o tau ina toe taʻu mai o mea ua uma ona taʻua e isi. O le faaupuina o manatu i ana lava upu ma le faamatala mai o manatu saʻo o le upu moni i se uiga e sau mai le loto o le a faafiafia ai o ia ma faaalia ai o loo ia mautinoa i lona lava mafaufau.—Failauga 12:10; faatusatusa i le Roma 14:5e.

7. O ā filifiliga ua faia ma le saʻoloto e auauna a Ieova?

⁷ Ua uunaia Molimau a Ieova e le alofa mo le Atua ma o latou uso a tagata. (Mataio 22:36-40) E moni, e autasia vavalalata i latou i le fusi o le alofa e pei o Keriso, i se aufaatasiga o uso i le lalolagi aoao. (Kolose 3:14; 1 Peteru 5:9) Peitai i le avea o ni tagata e iai le filifiliga saʻoloto, ua filifili totino ai i latou taitoatasi ina ia folafola atu le tala lelei o le Malo o le Atua, ia tausisia le solitu mai faiga faapolotiki, ia taumamao ese mai le toto, ia alofia nisi o faafiafiaga, ma ia ola e ogatusa ma tapulaa a le Tusi Paia. E lē o ni filifiliga nei o faamalosia ia i latou. O nei filifiliga o loo avea ma vaega o le olaga lea e filifili saʻoloto i ai i latou o le a ono avea o ni Molimau a o latou lei uia le laasaga o le tuuina atu faa-Kerisiano.

Pe Tatau Ona Tala Atu se Tala i le Vaega Pule?

8. O le ā le fesili e manaomia ona faamaninoina?

⁸ Ua faaalia manino e le Tusi Paia o Kerisiano moni e lē auauna i le Atua i se faiga e fai faamalosi. Ua faapea mai: “O le Alii [Ieova] foi o le Agaga ia; o le mea o i ai le Agaga o le Alii [Ieova], o i ai le saʻolotoga.” (2 Korinito 3:17) Ae mafai faapefea ona ogatusa lenei mea moni ma le tulaga o le iai o le “auauna faamaoni ma le mafaufau” ma lana Vaega Pule?—Mataio 24:45-47.

9, 10. (a) E faapefea ona faatatauina le mataupu silisili o le tulaga ulu i le faapotopotoga Kerisiano? (e) O le ā na manaomia e le usitai atu i le tulaga ulu i le faapotopotoga Kerisiano i le uluai senituri?

⁹ Ina ia taliina lenei fesili, e tatau ona tatou manatua le mataupu silisili faale-Tusi Paia o le tulaga ulu. (1 Korinito 11:3) I le Efeso 5:21-24, ua taʻua ai Keriso o le “ulu ia o le ekalesia,” o lē o loo “usiusitai” atu i ai le ekalesia. E malamalama Molimau a Ieova ua faia aʻe le auauna faamaoni ma le mafaufau i uso faaleagaga o Iesu. (Eperu 2:10-13) O lenei vasega o le auauna faamaoni ua tofia latou te saunia mai mo tagata o le Atua “mea e ʻai [faaleagaga] i ona itu aso.” I lenei taimi o le iuga, ua tofia ai e Keriso lenei auauna “e pule i ana mea uma.” O lona tulaga la, ua talafeagai ai ona avatu i ai le faaaloalo a so o se tasi o loo faapea mai o se Kerisiano.

¹⁰ O le fuafuaga o le tulaga ulu ina ia tausia ai le autasi ma faamautinoa ua “faia mea uma lava ma le matagofie ma le sauni lelei.” (1 Korinito 14:40) Ina ia ausia lenei fuafuaga i le uluai senituri, na filifilia ai ni Kerisiano faauuina mai le vasega o le auauna faamaoni ma le mafaufau e fai ma sui o le vaega atoa. O mea na faasolosolo ona tutupu mulimuli ane ua faamaonia ai, sa iai le faamaoniga ma le faamanuia a Ieova i le taitaiga lea sa faatino e lenei vaega pule i le uluai senituri. Na talia ma le fiafia e Kerisiano o le uluai senituri le faatulagaga. Ioe, na latou taliaina moni ma loto faafetai mo iuga lelei na maua mai ai.—Galuega 15:1-32.

11. O le ā le vaaiga e tatau ona vaai ai i le Vaega Pule i aso nei?

¹¹ O loo iai pea i aso nei le aogā o lena faatulagaga. I le taimi nei, ua faia aʻe le Vaega Pule o Molimau a Ieova i Kerisiano faauuina e toasefulu, o i latou uma ua faitau fiasefulu tausaga o o latou talaaga faa-Kerisiano. Latou te ofoina mai taiala faaleagaga i Molimau a Ieova, e pei ona sa faia e le vaega pule i le uluai senituri. (Galuega 16:4) I le pei o uluai Kerisiano, ua faapea foi i Molimau ona latou saili atu ma le fiafia i uso taʻumatuaina o le Vaega Pule mo ni taitaiga ma ni taiala faale-Tusi Paia i mataupu tau i le tapuaiga. E ui ina avea sui o le Vaega Pule ma auauna a Ieova ma Keriso, e pei foi o o latou uso Kerisiano, ua faatonu mai i tatou e le Tusi Paia: “Ia outou usiusitai i o outou taʻitaʻi ma outou gauai i ai; auā o loo leoleo i latou mo o outou agaga, latou te tala atu le tala i ai, ina ia faia ma le olioli, a e aua ma le tiga; auā e le aoga lea ia te outou.”—Eperu 13:17.

12. O ai e tatau i Kerisiano taitoatasi ona tala atu i ai se tala?

¹² Po o le tulaga ea o le vaavaaiga lea ua tofia atu e le Tusi Paia i le Vaega Pule, e faapea ai e tatau i Molimau taitoatasi uma a Ieova ona tala atu se tala i le Vaega Pule e tusa ai o a latou galuega? E leai, pe a fua i upu a Paulo i Kerisiano i Roma: “Se a le mea e te faasala ai i lou uso? O oe na foi, pe se a le mea e te taʻufaatauvaaina ai lou uso? Auā tatou te laulaututū uma lava i luma o le nofoa faamasino o Keriso [“le Atua,” NW] . . . E taitasi i tatou ma tala i lana amio i le Atua.”—Roma 14:10-12.

13. Aisea e lipotia ai e Molimau a Ieova la latou galuega talaʻi?

¹³ Ae pe lē moni ea, e faatalitalia Molimau taitoatasi ia lipotia atu la latou galuega talaʻi? Ioe, peitai o le fuafuaga o lenei mea o loo faamalamalama manino mai i se tamaitusi a Molimau lea e faapea mai: “Sa fiafia uluai soo o Iesu Keriso i lipoti o le auiluma o le galuega talaʻi. (Mareko 6:30) A o olaola le galuega, o lipoti o numera faamaumauina sa tuufaatasia faatasi ma tala o mea mataina na tutupu ia i latou o ē sa faia se sao i le talaʻiina o le tala lelei. . . . (Galuega 2:5-11, 41, 47; 6:7; 1:15; 4:4) . . . Maeu se faalaeiauina ai mo na Kerisiano galulue faamaoni i le faalogologo atu i lipoti o mea sa faataulauina! . . . Ua faapena foi ona taumafai le faalapotopotoga a Ieova i ona po nei e tausia ni faamaumauga saʻo aʻiaʻi o le galuega ua faia e faataunuuina ai le Mataio 24:14.”

14, 15. (a) E faapefea ona faatatau atu le 2 Korinito 1:24 i le Vaega Pule? (e) I luga o le ā le faavae e tatau ai ona faia e Kerisiano taitoatasi a latou filifiliga totino, i le amanaiaina o le ā le mea moni?

¹⁴ O le Vaega Pule o se sauniuniga alofa lea ma se faaaoaoga o le faatuatua ua onomea ona faataitai i ai. (Filipi 3:17; Eperu 13:7) E ala i lo latou pipii mau ma le mulimuli atu ia Keriso o se faaaʻoaʻo, ua mafai ai ona latou toe faaleo mai upu a Paulo: “E leai foi so matou fia pule i lo outou faatuatua, a o fesoasoani [“le au faigaluega faatasi,” NW] i matou i lo outou olioli; auā o le faatuatua tou te tumau ai.” (2 Korinito 1:24) E ala i le matauina o āʻega ua iai, ua tataʻi atu ai e le Vaega Pule manatu i aogā e maua pe a utagia fautuaga a le Tusi Paia, ua latou ofoina mai fautuaga e uiga i le faatatauina o tulafono ma mataupu silisili o le Tusi Paia, ua lapatai mai e faatatau i lamatiaga lilo, ma saunia faalaeiauga manaomia mo “le au faigaluega.” O lena faiga ua faatino ai la latou avega faa-Kerisiano o le tausimea, fesoasoani e faatumauina ai lo latou olioli, ma atiina ae ai i latou i le faatuatua ina ia mafai ona latou tumau mausalī.—1 Korinito 4:1, 2; Tito 1:7-9.

¹⁵ Pe a faia e se Molimau ni filifiliga e faavae aʻe i fautuaga faale-Tusi Paia ua ofoina mai e le Vaega Pule, e na te faia faapea i lana lava faitalia auā o lana lava suesuega i le Tusi Paia ua faatalitonuina ai o ia faapea o le laasaga talafeagai lenei. Ua taaʻina Molimau taitoatasi e le Afioga a le Atua lava ia ina ia latou faatatauina fautuaga lelei faale-Tusi Paia o loo aumaia e le Vaega Pule, i le amanaiaina atoatoa faapea, o filifiliga na te faia o le a aafia ai lana faiā totino ma le Atua, o lē ua ia tuuina atu i ai.—1 Tesalonia 2:13.

Tagata Aʻoga ma Fitafita

16. E ui lava o filifiliga e tusa ai o amioga o se mataupu e fitoitonu i le tagata lava ia, ae aisea e faateʻaina ai nisi?

¹⁶ Peitai afai o filifiliga e tusa ai o amioga o se mataupu e fitoitonu i le tagata lava ia, ae aisea la e faateʻaina ai nisi Molimau a Ieova? E leai se tasi na te filifilia i lana lava faitalia faapea o le faia o se agasala patino e manaomia ai le faateʻaina. Nai lo lea, o lenei gaoioiga e faatoʻā manaomia lava e tusa ai o le Tusi Paia, pe afai e faia e se tasi o le faapotopotoga ni agasala matuia e aunoa ma le salamō, e pei o agasala na o loo lisiina i le mataupu e 5 o le tusi Muamua o Korinito. O lea, e ui atonu e faateʻaina se Kerisiano ona o le faia o le faitaaga, peitai e faatoʻā faatino lena faaiuga pe afai e musu le tagata e talia se fesoasoani faaleagaga mai leoleo mamoe alolofa. E lē na o Molimau a Ieova o loo mulimuli i lenei faiga faa-Kerisiano. Ua taʻua e le Encyclopedia of Religion e faapea: “E tāpā e so o se nuu le aiā tatau e puipuia ai i latou mai ona tagata lē taupulea o ē ono faamataʻuina le tulaga lelei o le nuu. I se faatulagaga faalelotu, ua masani ona faamalosia lenei aiā tatau e le talitonuga faapea o le faasalaga [o le tuuesea mai le ekalesia] e aafia ai le tulaga o se tasi i luma o le Atua.”

17, 18. Ua ono mafai faapefea ona faataitaia mai le talafeagai o le tulaga o le faateʻaina?

¹⁷ O Molimau a Ieova o ni tagata aʻoga o le Tusi Paia. (Iosua 1:8; Salamo 1:2; Galuega 17:11) O le polokalame tau aʻoaʻoga a le Tusi Paia ua saunia e le Vaega Pule atonu e faatusatusa atu i se polokalame a se aʻoga ia e faatulaga mai e le komiti o aʻoga (board of education). E ui e lē o le komiti e puna mai ai mataupu ia e aʻoaʻoina, ae o latou e faatulagaina le polokalame, filifilia le auala e faatino atu ai aʻoaʻoga, ma latou avatuina taiala manaomia. So o se tasi la ua manino mai le musu e ola ai e tusa o mea o loo manaomia e le aʻoga, na te faatupuina ni faafitauli i isi tagata aʻoga, pe faia se mea e faalumaina ai le aʻoga, e mafai ona tuliesea o ia. Ua iai i le pulega a le aʻoga le aiā tatau e gaoioi ai mo le lelei o tagata aʻoga uma.

¹⁸ E lē gata o ni tagata aʻoga, ae o Molimau a Ieova foi o ni fitafita a Iesu Keriso, ua faatonuina e “tau le taua lelei i la le faatuatua.” (1 Timoteo 6:12; 2 Timoteo 2:3) O le tulaga masani, o ni amioga faifai pea ua lē tusa ai ma se fitafita Kerisiano e mafai ona lē maua ai le finagalo malie tauatua. I le avea o se tagata ua tuu atu i ai le saʻolotoga e filifili ai, e mafai e se fitafita Kerisiano ona filifili e tusa o lona manaoga, peitai e tatau ona ia amoina āuga o lana filifiliga. Ua faapea mai Paulo: “E leai sē tau i le taua na te faalavelavea o ia e ia i mea o le olaga sa masani ai, ina ia faafiafia o ia i lē na filifili ia te ia e fai ma tagata tau. Afai foi e finau se tasi i le fia malo i tausinioga, e le faapaleina o ia pe a le finau e tusa ma tulafono.” (2 Timoteo 2:4, 5) O Kerisiano taʻumatuaina, e aofia ai i latou o le Vaega Pule, e tausisi atoatoa atu i le pule a lo latou Taʻitaʻi, o Iesu Keriso, i le tausia o “tulafono” ina ia mafai ai ona latou manumalo i le taui o le ola e faavavau.—Ioane 17:3; Faaaliga 2:10.

19. I le maeʻa ona iloiloina o mea moni e faatatau i le tuuina atu faa-Kerisiano, o le ā e mafai ona tatou mautinoa ai?

¹⁹ Po ua lē faamanino mai ea la e mea moni faapea, o Molimau a Ieova o auauna i latou a le Atua, ae lē ni pologa a tagata? Ona o ni Kerisiano tuuina atu o loo olioli i le saʻolotoga na faasaʻoloto ai i latou e Keriso, ua latou faataga ai le agaga o le Atua ma lana Afioga e puleaina o latou olaga a o latou auauna autasi ma o latou uso i le faapotopotoga a le Atua. (Salamo 133:1) O faamaoniga o lenei mea e tatau foi ona aveesea ai so o se lē mautinoa e faatatau i le puna o lo latou malosi. Ua mafai ona latou pepese atu faatasi ma le faisalamo: “O Ieova, o loʻu malosi ma loʻu talita o ia; na faatuatua loʻu loto ia te ia, ona ou maua ai lea o le fesoasoani; o lea e fiafia ai loʻu loto, ma ou vivii atu ia te ia i laʻu pese.”—Salamo 28:7.

[Faaopoopoga i lalo]

E Faapefea Ona E Tali?

◻ E faapefea ona fesoasoani atu le Sosaiete o le Olo Matamata ma isi vaega faapena faaletulafono i Molimau a Ieova?

◻ E faapefea ona aogā i Kerisiano le matafaioi a le Vaega Pule o Molimau a Ieova?

◻ Aisea e lipotia ai e tagata o Ieova la latou galuega talaʻi?

◻ I lalo o ā tulaga ua talafeagai ai ona faateʻaina se Kerisiano tuuina atu?

[Ata i le itulau 19]

Sa puipuia e le vaega pule i le uluai senituri le autasi o aʻoaʻoga

[Ata i le itulau 23]

I le lalolagi atoa, ua olioli ai Molimau a Ieova i le saʻolotoga lea na faasaʻolotoina ai i latou e Keriso