O le ā o le a Avea ma Ou Lumanai?

PE AFAI o le Atua e Ona le Malosi Uma Lava na te silafia mea uma, silafia mea uma ua tuanai, i le taimi nei, ma le lumanai, pe e lē o mea uma ea la ua tuupoina e tutupu moni lava e pei ona muai silafia ai e le Atua? Pe afai e muai silafia e le Atua mea, ma faatonuina le ala ma iuga tuupoina o tagata taitoatasi, pe e mafai moni ea la ona faapea atu ua tatou saʻoloto e filifili o tatou ala o le olaga, ma o tatou lumanai?

O nei fesili ua leva ona faia i ai ni finauga i le tele o senituri. O loo tumau pea ona fevaevaeai ai lotu autū ona o lenei finauga. Pe mafai ea ona ogatasi le muai silafiaina e le Atua o le lumanai ma le filifiliga saʻoloto a le tagata? O fea e tatau ona tatou saili i ai mo ni tali?

E faitau miliona tagata i le lalolagi aoao e ioe faapea ua fesootai mai le Atua i tagata e auala i lana Afioga tusia lea na faaoo atu e ala i ana fofoga fetalai, o perofeta. Mo se faaaoaoga, ua faasino atu le Korana i faaaliga e aumai mai le Atua: o le Taurāh (Torah, le Tulafono, po o tusi e lima a Mose), o le Zabūr (o Salamo), ma le Injīl (Evagelia, Tusitusiga Kerisiano Eleni po o le “Feagaiga Fou”), atoa ma mea ia sa faaalia atu i perofeta o Isaraelu.

I le Tusitusiga Kerisiano Eleni, tatou te faitau ai e faapea: “O tusi paia uma lava e mai le Agaga o le Atua ia, e aoga foi ia e aʻoaʻo ai, e aoai ai, e faatonu ai.” (2 Timoteo 3:16) E manino la, so o se taitaiga po o se malamalamaga tatou te mauaina e tatau ona aumai moni mai le Atua lava ia. Pe e lē o se mea atamai ea la le iloiloina o tusitusiga a perofeta na muamua atu a le Atua? O le ā o loo latou faailoa mai e uiga i lo tatou lumanai?

Le Lumanai na Muai Tusia

So o se tasi ua faitauina le Tusi Paia e na te iloaina ai o loo iai moni le faitau selau o valoaga. O ia mea na tutupu i le talafaasolopito e pei o le paʻū o Papelonia anamua, o le toe fuataiina o Ierusalema (senituri lona ono i le lona lima T.L.M.), ma le tulai mai ma le toe paʻūū o tupu anamua o Metai ma Peresia ma Eleni, o na mea uma sa muai valoia auiliili mai. (Isaia 13:17-19; 44:24–45:1; Tanielu 8:1-7, 20-22) O le faataunuuga o na valoaga o se tasi o faamaoniga malosi e faapea o le Tusi Paia o le Afioga moni a le Atua, ona e na o le Atua lava e iai lona mana e muai silafia ai ma filifilia ai po o ā mea o le a tutupu i le lumanai. O le uiga la lenei na muai tusia moni ai i le Tusi Paia le lumanai.

O le Atua lava ia na ia folafola mai: “O aʻu o le Atua, e leai lava se tasi; o le Atua, e leai se ma te tutusa; o loo faaali talu mai le amataga o mea e mulimuli; mai anamua foi o mea ua le faia; o loo fai ane, E tu laʻu pule, ou te faia foi mea uma ou te loto i ai . . . na ou fai atu ai, ou te faaooina ai lava; na ou fuafuatia, ou te faia lava.” (Isaia 46:9-11; 55:10, 11) O le suafa lava lea na faailoa ai e le Atua ia lava i ana perofeta anamua o Ieova, o lona uiga moni “O Ia Lava ua Mafua ai Ona Iai.”a (Kenese 12:7, 8; Esoto 3:13-15; Salamo 83:18) Ua faaalia mai e Ieova o ia lava o Lē na te Faataunuuina lana afioga, o Lē e faataulauina pea ana fuafuaga.

O lea, e faaaogā e le Atua lona mana e muai silafia ai mea e faataunuuina ai ana fuafuaga. E masani ona ia faaaogaina e lapataia ai ē amioleaga i se faamasinoga o loo fotuai mai ma avatu ai i ana auauna le faamoemoe mo le faaolataga. Ae pe e faaaogā e le Atua lenei mana i se auala e lē faatapulaaina? Pe e iai ea se faamaoniga i le Tusi Paia o ni mea ua lē finagalo le Atua na te muai silafiaina?

Pe e Muai Silafia e le Atua Mea Uma?

O finauga uma e lagolagoina ai iuga tuupoina e faavae mai le manatu faapea ona e lē mafaafitia le iai o le mana o le Atua e muai silafia ma fuafuaina ai mea o le a tutupu i le lumanai, e tatau foi la ona ia muai silafia mea uma, e aofia ai gaoioiga i le lumanai a tagata taitoatasi uma lava. Peitai, pe e talafeagai ea lena manatu? Ua faaalia mai e le Atua se mea e ese mai i lana Tusi Paia.

Mo se faaaoaoga, ua taʻua mai e le Tusi Paia faapea “ona tofotofo lea o le Atua ia Aperaamo,” e ala i le faatonuina o ia e ofoina atu lona atalii o Isaako e fai ma taulaga mu. Ina ua sauni Aperaamo e fai le taulaga ia Isaako, na taofia o ia e le Atua ma faapea mai: “Ua ou iloa nei ua e mataʻu i le Atua, ina ua e le taofia lou atalii, o lou atalii e toatasi, a ua e tuu mai ia te au.” (Kenese 22:1-12) Pe faamata e faia e le Atua na faamatalaga pe ana muai silafia e ia o le a usitaia e Aperaamo lana faatonuga? Pe sa ono avea ea lea ma se tofotofoga faamaoni?

E lē gata i lena, na taʻua mai e perofeta anamua le fetalai pea lava pea o le Atua e uiga ia te ia ua ‘lagona le salamō’ ona o se mea na ia faia po o se mea na mafaufau e faia. Mo se faaaoaoga, na fetalai le Atua faapea ua ia ‘salamō [mai le upu Eperu na·chamʹ] foi ina ua ia tofia Saulo e fai ma tupu o Isaraelu.’ (1 Samuelu 15:11, 35; faatusatusa i le Ieremia 18:7-10; Iona 3:10.) Talu ai o le Atua e lelei atoatoa, e lē mafai ai la ona uiga nei fuaiupu faapea na faia e le Atua se measese i le tofia o Saulo e avea ma uluai tupu o Isaraelu. Nai lo lena, e tatau i nei fuaiupu ona faailoa mai faapea na lagona e le Atua le faanoanoa ina ua iu ina lē faamaoni Saulo ma lē usiusitai. O le faaaogaina e le Atua o lena faaupuga e faasino atu ia te ia o le a lē talafeagai pe afai na ia muai silafia gaoioiga a Saulo.

O le faaupuga lava lea e tasi o loo maua i Tusi Paia anamuā lava lea o loo faasino atu i aso o Noa, e faapea: “Ua salamo foi Ieova ina ua faia e ia tagata i le lalolagi, ma ua tiga ai lona finagalo. Ona fetalai ane lea o Ieova, Ou te soloieseina i le fogāeleele tagata na ou faia; . . . auā ua ou salamo ina ua ou faia i latou.” (Kenese 6:6, 7) Iinei foi ua faaalia mai ai faapea e lē o tuupoina e le Atua gaoioiga a le tagata. Sa lagona e le Atua le salamō, le mafatia, ma oo lava ina tiga ai, e lē ona sa sese ana lava gaoioiga, ae ona sa faatuputupulaia le amioleaga o tagata. Na salamō Lē na Foafoaina Mea talu ai sa tatau ona faaumatia tagata uma seʻi vaganā ai Noa ma lona aiga. Ua faamautinoa mai e le Atua ia i tatou: “Ou te le fiafia lava i le oti o lē amio leaga.”—Esekielu 33:11; faatusatusa i le Teuteronome 32:4, 5.

O lea pe sa muai silafia e le Atua ma faatonuina ai le paʻū o Atamu i le agasala, faapea ai ma āuga leaga lea ua aumaia e lenei mea i luga o le fanau a tagata? O mea ua tatou iloiloina ua faaalia ai e lē moni lea itu. O le mea e sili atu, pe ana muai silafia e le Atua nei mea uma, e mafai ona avea ai o ia ma pogai o le agasala ina ua ia faia le tagata, ma matuā tuuaia ai le Atua mo amioleaga ma puapuaga uma a tagata. E manino, e lē mafai ona ogatasi lenei mea ma mea ua faaalia mai e le Atua e uiga ia te ia i le Tusi Paia. O ia o le Atua o le alofa ma le faamasinotonu o lē ʻinoʻino i le amioleaga.—Salamo 33:5; Faataoto 15:9; 1 Ioane 4:8.

Iuga e Lua o le Tagata

E lē o faaalia mai e le Tusi Paia e faapea ua muai fuafuaina mai o tatou lumanai taitoatasi, po o tuupoina e le Atua. Nai lo lena, ua faailoa mai o loo muai valoia mai e le Atua e na o le lua iuga e mafai ona oo i le tagata. Ua foai mai e le Atua i tagata uma lava le filifiliga saʻoloto e filifili ai po o le ā le iuga o le a oo ia te ia. I se taimi ua leva lava na faailoa atu ai e le perofeta o Mose i tagata Isaraelu e faapea: “Ua ou tuuina atu i ou luma o le ola ma le oti, . . . ia e filifili i le ola, ina ia ola ai oe atoa ma lau fanau; ina ia e alofa atu ia Ieova lou Atua, ma e faalogo i lona siufofoga, ma ia e pipii atu ia te ia; auā o lou ola ia, ma le na te faafualoaina ou aso.” (Teuteronome 30:19, 20) Na muai lapatai mai le perofeta a le Atua o Iesu: “Ia outou ulu atu i le faitotoa va apiapi; auā e va tele le faitotoa, e lautele foi le ala e tau atu i le malaia, e toatele foi i latou o e ui atu ai. Auā e va apiapi le faitotoa, e lauitiiti foi le ala e tau atu i le ola, e toaitiiti foi i latou o e maua.” (Mataio 7:13, 14) E lua auala, lua taunuuga. O lo tatou lumanai e faalagolago i a tatou lava gaoioiga. Pe a usitai i le Atua e maua le ola, ae a lē usitai ia te ia e oo i ai le oti.—Roma 6:23.

O le Atua “o loo fetalai mai nei i tagata uma i nuu uma lava ia salamo; auā ua faatuina e ia le aso e faamasinoina ai le lalolagi ma le tonu.” (Galuega 17:30, 31) E pei lava o le toatele o tagata i aso o Noa ona filifili e lē usiusitai i le Atua ma o lea na faaumatia ai, ua faapena foi aso nei o le toatele ua lē usiusitai i faatonuga a le Atua. Peitai, ua lē muai fuafuaina mai e le Atua po o ai o le a faaumatia a o ai o le a mauaina le faaolataga. O le mea moni, ua faapea mai le Afioga a le Atua “ua le finagalo [o ia] ia fano se tasi, a ia oo uma lava i le salamo.” (2 Peteru 3:9) E oo lava i tagata e matuā leaga lava e mafai ona salamō, usiusitai, ma faia suiga manaomia ina ia talileleia ai e le Atua.—Isaia 1:18-20; 55:6, 7; Esekielu 33:14-16; Roma 2:4-8.

Ia i latou o ē usiusitai, ua folafola mai e le Atua le ola e faavavau i le parataiso filemu, se lalolagi mamā mai amioleaga uma, faiga sauā, ma taua, se lalolagi o le a lē toe iai se fia aai, puapuagatia, maʻi, ma le oti. (Salamo 37:9-11; 46:9; Isaia 2:4; 11:6-9; 25:6-8; 35:5, 6; Faaaliga 21:4) E oo lava i ē ua maliliu o le a toe faatutūina ma maua ai le avanoa e auauna ai i le Atua.—Tanielu 12:2; Ioane 5:28, 29.

Ua faapea mai le faisalamo: “Ina mafaufau ia i le ua sao lana amio, ma vaavaai i le ua amiotonu; auā o le iuga o lea tagata o le manuia lava lea. A e fano faatasi o e solitulafono; o le iuga o e amio leaga o le malaia lava lea.” (Salamo 37:37, 38) O le ā o le a avea ma ou lumanai? E faalagolago uma atu ia te oe. O le a fiafia ē o lomia lenei mekasini e faaooina atu ia te oe nisi faamatalaga atili ina ia mafai ai ona faamautinoa ia te oe lava se lumanai fiafia, ma le filemu.

[Faaopoopoga i lalo]

[Faamatalaga faaopoopo i le itulau 6]

E faaaogā e le Atua lona mana e muai silafia ai mea e faataunuuina ai ana fuafuaga

[Faamatalaga faaopoopo i le itulau 8]

“Ua le finagalo [le Atua] ia fano se tasi, a ia oo uma lava i le salamo.” 2 Peteru 3:9

[Ata i le itulau 7]

Pe ana muai silafia e le Atua o le a loto malie Aperaamo e fai le taulaga i lona atalii, pe e mafai ea la ona avea o se tofotofoga faamaoni?