E Faataunuu e Ieova Ana Folafolaga i Ē Faatuatua

“E faamaoni o ia ua folafola mai.”—EPERU 10:23.

1, 2. Aisea e mafai ai ona ia i tatou se mautinoa atoatoa i folafolaga a Ieova?

UA TĀPĀ e Ieova ana auauna ina ia latou faatupuina ma tausisia se faatuatua malosi ia te ia ma ana folafolaga. O se faatuatua faapena e mafai ai e se tasi ona faalagolago atoatoa atu ia Ieova ina ia faia le mea ua ia folafola e fai. Ua faalauiloa mai e lana Afioga faagaeeina e faapea: “Ua tauto Ieova o ʻau, o loo faapea mai, E moni, e pei ona ou manatu e faapea lava ona taunuu, e pei ona aʻu pule e faapea lava ona faatumauina.”—Isaia 14:24.

² O le fuaitau, “ua tauto Ieova o ʻau,” e faaalia ai ua faia lana tautoga mamalu ina ia faataunuuina ana folafolaga. O le mafuaaga lena e mafai ai ona faapea mai lana Afioga: “Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.” (Faataoto 3:5, 6) Pe a tatou faatuatua ia Ieova ma faataga i tatou lava e taitaia e lona atamai, e mautinoa o le a taitaiina atu ai o tatou ala i le ola e faavavau, auā o le atamai o le Atua o “le laau o le ola i e tago atu i ai.”—Faataoto 3:18, NW; Ioane 17:3.

Le Faatuatua Moni i Taimi Anamua

3. Na faapefea ona faaalia e Noa lona faatuatua ia Ieova?

³ O le tala i gaoioiga a Ieova ia i latou sa iai le faatuatua moni ua faamaonia lona maufaatuatuaina. Mo se faaaoaoga, i le silia i le 4,400 tausaga ua mavae, na fetalai atu ai le Atua ia Noa o le a faaumatia le lalolagi o ona aso e se Lolo tele. Na ia faatonuina Noa e fau se vaa telē ina ia faasaoina ola o tagata ma manu. O le ā na faia e Noa? Ua taʻu mai e le Eperu 11:7 ia i tatou e faapea: “O le faatuatua na fausia ai e Noa le vaa ina ua mataʻu, e ola ai lona aiga, ina ua aʻoaʻoina e le Atua i mea e lei vaaia i ia ona po.” Aisea na faatuatua ai Noa i se mea e lei tupu lava muamua, o se mea “e lei vaaia”? Talu ai na lava mea sa ia iloa e faatatau i feutagaiga ua teʻa a le Atua ma le aiga faaletagata, na te talisapaia ai faapea, so o se mea e fetalai i ai le Atua e oo moni mai lava. Sa mautinoa la e Noa o le a oo mai lava le Lolo.—Kenese 6:9-22.

4, 5. Aisea na faatuatua atoatoa ai Aperaamo ia Ieova?

⁴ O se isi faaaoaoga o le faatuatua moni o Aperaamo. I le toetoe 3,900 tausaga ua mavae, na poloai atu ai le Atua ia te ia e faia le taulaga ia Isaako, e na o le pau lea o lona atalii mai lana avā, o Sara. (Kenese 22:1-10) Sa faapeī le tali mai a Aperaamo? Ua taʻua e le Eperu 11:17: “O le faatuatua na fai taulaga ai Aperaamo ia Isaako, ina o tofotofoina o ia.” Peitai ane, i se toe sekone lava, ae taofia loa Aperaamo e le agelu a Ieova. (Kenese 22:11, 12) Ae, aisea lava na mafaufauina ai e Aperaamo le faia o lena mea? Talu ai e pei ona fai mai le Eperu 11:19, “ua manatu o ia e mafaia e le Atua ona toe faatu mai [Isaako] nai e ua oti.” Ae mafai faapefea e Aperaamo ona faatuatua i le toetu ae semanū e lei vaai muamua lava i se mea faapena ma e leai foi se tala i se toetu na tupu muamua?

⁵ Ia manatua, e 89 tausaga o Sara ina ua folafola atu e le Atua o le a la maua ai se atalii. Sa lē toe mafai e le manava o Sara ona fanauina mai se pepe—lona uiga, ua pa. (Kenese 18:9-14) Na toe faaolaina e le Atua le manava o Sara, ma ia fanauina mai ai Isaako. (Kenese 21:1-3) Na iloa e Aperaamo talu ai na toe faaolaina e le Atua le manava o Sara, e mafai foi la ona ia toe faafoisia mai Isaako i le ola pe afai e manaomia. Ua faapea mai le Roma 4:20, 21 e faatatau ia Aperaamo: “E lei masalo vale ia ma le le faatuatua i le mea na folafolaina e le Atua, a ua malosi tele o ia i le faatuatua ua vivii atu i le Atua, ua na mautinoa foi, e mafai ia te ia ona faia o le mea na folafolaina e ia.”

6. Na faapefea ona faaalia e Iosua lona mautinoa ia Ieova?

⁶ E silia i le 3,400 tausaga ua mavae ina ua sili atu i le selau tausaga o Iosua mo lona olaga atoa na ia iloa ai le maufaatuatuaina o le Atua, ona ia taʻu mai ai lea o le mafuaaga lenei mo lona mautinoa e faapea: “Ua outou iloa ma o outou loto atoa, ma o outou agaga atoa, e lei iuvale se upu e tasi i upu lelei uma na fetalai mai ai Ieova lo outou Atua ia te outou; ua taunuu uma ia te outou, ua le iuvale se upu e tasi.”—Iosua 23:14.

7, 8. O le ā le laasaga faasaoola na uia e Kerisiano faatuatua i le uluai senituri, ma aisea?

⁷ Pe tusa o le 1,900 tausaga ua tuanai, e toatele tagata lotomaulalo na latou faaalia se faatuatua moni. Na latou iloatino mai le faataunuuga o le valoaga a le Tusi Paia faapea o Iesu o le Mesia ma latou talia ana aʻoaʻoga. O le iai o se faavae mausalī i mea moni ma i Tusitusiga Eperu, ua latou faatuatua atu ai i mea na aʻoaʻoina e Iesu. O lea, ina ua fetalai Iesu faapea ua oo mai le aso o le faamasinoga a le Atua ia Iutaia ma Ierusalema ona o le lē faatuatua, sa latou talitonu ia te ia. Ma ina ua ia taʻu atu ia i latou le gaoioiga e ao ona latou fai ina ia faasaoina o latou ola, sa latou utagia.

⁸ Na taʻu atu e Iesu i tagata talitonu, pe a siosiomia Ierusalema e autau, e tatau ona latou sosola ese. Na osofai mai autau a Roma i Ierusalema i le tausaga e 66 T.A. Peitai na toe tuumuli fitafita Roma mo se mafuaaga e lē mailoa. O le faailoilo lena mo Kerisiano ina ia tuua ai le aai, auā na fetalai Iesu: “A iloa e outou ua siosiomia Ierusalema i ʻau o le taua, ia outou iloa i lea aso ua latalata lona faatafunaina. O lea aso, o e ua i Iutaia ia latou sosola i mauga; o e ua i totonu o lea aai, ia latou o ese; o e ua i le vao foi, aua neʻi latou o atu i totonu o le aai.” (Luka 21:20, 21) O i latou sa iai le faatuatua moni na latou tuua Ierusalema ma le vaipanoa na siosiomia ae sosola ese atu mo le faasaoina.

Āuga o le Leai o se Faatuatua

9, 10. (a) Na faapefea ona faaalia e taʻitaʻi lotu le leai o so latou faatuatua ia Iesu? (e) O ā āuga o le leai o se faatuatua?

⁹ O le ā na faia e i latou sa lei iai le faatuatua moni? Latou te lei sosola ese ina ua latou maua le avanoa. Na latou manatu e mafai e o latou taʻitaʻi ona faasaoina i latou. Peitai, sa iai foi i na taʻitaʻi ma o latou soo le faamaoniga o le tulaga faa-Mesia o Iesu. Aisea la na latou lē talia ai mea na ia fetalai ai? Talu ai le leaga o o latou loto. Na aliali lenei mea i se taimi muamua atu ina ua latou vaaia le toatele o tagata lautele o lolofi atu ia Iesu ina ua uma ona ia faatuina aʻe Lasalo mai le oti. Ua faamatala mai e le Ioane 11:47, 48 e faapea: “Ona faapotopoto lea o le fono [Saniterini; le faamasinoga maualuga a Iutaia] e le au ositaulaga sili ma le au faresaio, ua latou faapea ane, ‘Se a sa tatou mea e fai? Auā ua faia faailoga e tele e lea tagata [Iesu]. Afai e faapenei ona tatou tuu ai pea o ia, e talia o ia e tagata uma lava; e o mai foi tagata Roma, ona faaumatia lea o la tatou nei mea atoa ma lo tatou nuu.’” Fai mai le fuaiupu e 53: “Talu foi i lea aso ua latou taupulepule ai e fasioti ia te ia.”

¹⁰ Maeu se vavega ofoofogia na faatino e Iesu—le toe faatuina o Lasalo mai le oti! Peitai na mananao taʻitaʻi lotu e fasiotia Iesu ona o le faia o lena mea. Na toe aliali atili o latou uiga sili ona leaga ina “ua taupulepule le au ositaulaga sili, e fasioti foi ia Lasalo. Auā e toatele Iutaia na o ese ona o ia, ma latou faatuatua ia Iesu.” (Ioane 12:10, 11) O lea faatoʻā uma lava ona faatuina mai Lasalo mai le oti, ae ua mananao na ositaulaga e toe oti o ia! Sa latou lei popole i le finagalo o le Atua po o se lelei o tagata. Sa manatu faapito i latou, na popole i o latou tulaga ma o latou lelei. “Ua sili lo latou manao i le viiga mai tagata, i le viiga mai le Atua.” (Ioane 12:43) Ae na faasalaina i latou ona o le leai o so latou faatuatua. I le tausaga e 70 T.A., na toe taliu ane ai autau a Roma ma faaumatia lo latou nofoaga ma lo latou nuu, faapea foi le toatele o i latou.

Le Faatuatua o Loo Faaalia i o Tatou Taimi

11. I le amatamataga mai o lenei senituri, na faapefea ona faataitaia mai le faatuatua moni?

¹¹ I lenei senituri, ua iai foi le toatele o tane ma fafine sa faatuatua moni. Mo se faataitaiga, i tuā i uluai tausaga mai le 1900, sa faatalitalia ai e tagata lautele se lumanai filemu, ma le sololelei. I le taimi lava e tasi, o i latou na faatuatua ia Ieova sa faasilasila atu i ai faapea, ua latalata ona ulu atu tagata i ona taimi sili ona matautia o faalavelave. O le mea lena na valoia i le Afioga a le Atua i le Mataio mataupu e 24, 2 Timoteo mataupu e 3, ma isi lava mau. O mea na fai mai ai na tagata o le faatuatua na tutupu moni lava, i le amata mai i le 1914 i le Taua Muamua a le Lalolagi. Na ulu moni atu lava le lalolagi i “aso e gata ai” ia na valoia faatasi ma “aso faigata.” (2 Timoteo 3:1) Aisea na iloa ai i tuā iina e auauna a Ieova le mea moni e faatatau i tulaga o le lalolagi ae sa lē iloa e isi? Talu ai, i le pei o Iosua, sa latou faatuatua e leai se upu e tasi o fetalaiga a Ieova e lē faataunuuina.

12. I aso nei, o le ā le folafolaga a Ieova o loo faatuatua atoatoa atu i ai ana auauna?

¹² I aso nei, ua toeitiiti atoa le ono miliona o auauna a Ieova i le lalolagi aoao ua tuu atu lo latou faatuatua ia te ia. Ua latou iloa mai faamaoniga o le faataunuuga o le afioga faavaloaga a le Atua e faapea, e lē o toe umi ona ia aumaia lea o le iuga i lenei faiga o mea sauā, ma le lē mamā. O lea ua latou mautinoa ai ua latalata mai le taimi o le a latou vaaia ai le faatinoina o le 1 Ioane 2:17, lea ua faapea mai: “E mavae atu foi le lalolagi, atoa ma lona tuʻinanau, a o lē fai le finagalo o le Atua, e tumau lea e faavavau.” E faatuatua atoatoa ana auauna o le a faataunuuina e Ieova lenei folafolaga.

13. O le ā le telē e mafai ona e faatuatua ai ia Ieova?

¹³ O le ā le telē e mafai ona e faatuatua ai ia Ieova? E mafai ona e matuā faatuatua atoatoa atu ia te ia! E tusa lava pe maumau ai lou ola i le taimi nei ona o le auauna atu ia te ia, ae o le a ia toe faafoi atu ia te oe se ola e sili atu ona lelei i le toetu. Ua faamautinoa mai e Iesu ia i tatou: “E oo mai le aso e faalogo ai i lona leo o i latou uma ua i tuugamau [lona uiga, o loo manatua e le Atua], ma latou o mai ai.” (Ioane 5:28, 29) E te iloa se fomaʻi, se taʻitaʻi faapolotiki, se saienitisi, se tagata faipisinisi, po o se isi lava tagata e mafai ona ia faia lena mea? Ua faaalia e o latou talaaga ua tuanai e latou te lē mafaia. E mafai e Ieova, ma o le a ia faia!

Se Lumanai Ofoofogia mo Ē Faatuatua

14. O le ā le lumanai ofoofogia ua folafola mai e le Afioga a le Atua i ē faatuatua?

¹⁴ Na faataitaia mai e Iesu le mautinoa o le iai o le lalolagi fou i lalo o le Malo faalelagi o le Atua, i le faapea mai: “Amuia ē agamalu; auā e fai mo latou tofi le nuu [“lalolagi,” NW].” (Mataio 5:5) Ua toe faamalosia ai e lena mea le folafolaga a le Atua o loo faamauina i le Salamo 37:29: “E fai lava le nuu [“lalolagi,” NW] mo tagata amiotonu, e nonofo ai pea i latou.” Ma a o toeitiiti lava maliu Iesu ina ua faaalia ane e se pagota lona faatuatua ia te ia, na fetalai atu ai Iesu i le tamaloa: “O le a ta faatasi ma oe i le Parataiso.” (Luka 23:43, NW) Ioe, talu ai o Iesu o le Tupu o le Malo o le Atua, o le a ia faamautinoa ai ua faatuina aʻe lenei tamaloa i le ola i luga o le lalolagi ma maua le avanoa e ola ai e faavavau i lena Parataiso. I aso nei, o i latou o ē faatuatua atu i le Malo o Ieova e mafai foi ona latou tulimatai atu ina ia ola i le Parataiso pe a “sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga.”—Faaaliga 21:4.

15, 16. Aisea o le a matuā filemu ai le olaga i le lalolagi fou?

¹⁵ Seʻi faaāta i o tatou mafaufau lo tatou iai i lena lalolagi fou. Seʻi faapea o lea ua tatou ola ai iina. E lē umi lava, ae tatou matauina i so o se vaipanoa tagata fiafia o loo nonofo faatasi i le matuā fifilemu. O loo olioli i latou i tulaga e tutusa ma ia na faamatalaina i le Isaia 14:7: “Ua mapu le lalolagi uma, ua filemu lava; ua latou alalaga ma le fiafia.” Aisea ua latou faapea ai? O se tasi o mafuaaga, ua matauina le lē toe iai o ni loka o faitotoa o fale. E lē toe manaomia, auā e lē toe iai ni solitulafono po o ni faiga sauā. Ua pei lava o le mea na fetalai ai le Afioga a le Atua o le a iai: “E taitasi ma nofo i lalo o lona vine, ma lalo o lona mati; e leai foi se na te faamatau mai.”—Mika 4:4.

¹⁶ E lē toe iai foi ni taua, auā i lenei lalolagi fou, e faasāina ai taua. E suia auupega uma e avea ma meafaigaluega o le filemu. I se uiga atoatoa, ua faataunuuina ai le Isaia 2:4: “Ona latou tuʻi ai lea i a latou pelu e fai ma uamea o suotosina, o latou tao foi e fai ma polo e teu aʻi vine; e le sii atu le pelu e le tasi nuu i le tasi nuu, latou te le toe aʻoaʻo foi i taua.” Ae, o le mea lena o loo tatou faatalitalia! Aisea? Talu ai e toatele tagata e ʻaināina le lalolagi fou na latou aʻoaʻoina le faia o lena mea a o auauna i le Atua i le lalolagi tuai.

17. O ā tulaga o le soifuaga o le a iai i lalo o le Malo o le Atua?

¹⁷ O le isi foi mea e te matauina o le leai o se mativa. E leai se tasi e nofo i se tamai fale matagā pe ofu i ni lavalava masaesae, pe leai se aiga e nofo ai. E tofu tagata taitoatasi ma fale talafeagai ma laufanua ua teuteuina lelei o loo iai ni laau ma fugalaau matagofie. (Isaia 35:1, 2; 65:21, 22; Esekielu 34:27) Ma e leai se matelaina auā ua faataunuuina e le Atua lana folafolaga e faapea o le a anoanoai taumafa mo tagata uma: “O le a anoanoai taumafa o saito i le lalolagi; o le a fau ma soloi i tumutumu lava o mauga.” (Salamo 72:16, NW) Ioe, i le taitaiga a le Malo o le Atua, e faasalafa atu ai se parataiso matagofie i le lalolagi aoao, e pei lava ona fuafuaina e le Atua i tuā i Etena.—Kenese 2:8.

18. I le lalolagi fou, o ā mea o le a lē toe faamataʻuina ai tagata?

¹⁸ E te maofa foi i le malaulau o le malosi ua iai i tagata taitoatasi uma. Ua māfua lenei mea auā ua ia i latou nei ni tino ma ni mafaufau e lelei atoatoa. E lē toe iai ni maʻi, ni tiga, po o le oti. E leai se tasi e faaaogaina se nofoa faataavalevale pe faataotolia i se falemai. O le a mou ese atu e faavavau na mea uma. (Isaia 33:24; 35:5, 6) Ioe, e lē toe iai se manu e fai ma faamataʻu, auā ua faafilemuina i latou e le mana o le Atua!—Isaia 11:6-8; 65:25; Esekielu 34:25.

19. Aisea o le a avea ai aso taitasi i le lalolagi fou o se mea e “faafiafia” ai?

¹⁹ Maeu se sosaiete matagofie ua faia aʻe e i latou faatuatua e ʻaināina lenei lalolagi fou! O lo latou malosi ma o latou tomai ma le tamaoaiga o le laueleele ua tuuina atu mo mea aogā, ae lē mo ni mea e faaleaga ai; le felagolagomai ma isi, ae lē ina ia faatavā ma i latou. Ma o tagata uma e te feiloai i ai o se tasi e mafai ona e faatuatuaina auā, e pei ona folafola mai e le Atua, o tagata uma ua avea ma ‘tagata ua aʻoaʻoina e Ieova.’ (Isaia 54:13) Talu ai ua pulea tagata uma e tulafono a le Atua, ua “tumu [ai] le lalolagi i le malamalama o Ieova, e pei ona ufitia o le iliti tai i le suāsami.” (Isaia 11:9) E moni lava, o aso taitasi i lenei lalolagi fou ua faapei o le mea na fai mai ai le Salamo 37:11 o le a iai, o se aso e “faafiafia” ai.

Ua Faamautinoa Mai se Lumanai Fiafia

20. O le ā e ao ona tatou fai ina ia olioli ai i se lumanai filemu?

²⁰ O le ā e ao ona tatou faia ina ia avea ai ma vaega o lena lumanai fiafia? Ua taʻu mai ia i tatou e le Isaia 55:6 e faapea: “Ia outou saili ia Ieova manū o mafai ona maua o ia; ia outou valaau ia te ia manū o latalata mai o ia.” Ma a o tatou saili, e tatau ona faapei a tatou amio o lea na faamatalaina e le Salamo 143:10: “Ia e aʻoaʻo mai ia te au e fai lou finagalo; auā o oe lava loʻu Atua.” O i latou o ē faia lenei mea e mafai ona latou savavali ma le lē ponā i luma o Ieova i nei aso e gata ai ma tulimatai atu i se lumanai matagofie. “Ina mafaufau ia i le ua sao lana amio, ma vaavaai i le ua amiotonu; auā o le iuga o lea tagata o le manuia lava lea. A e fano faatasi o e solitulafono; o le iuga o e amio leaga o le malaia lava lea.”—Salamo 37:37, 38.

21, 22. O le ā o loo faatulagaina e le Atua i aso nei, ma ua faapefea ona faataunuuina le toleniga?

²¹ I le taimi nei lava o loo valaaulia ai e Ieova mai atunuu taitasi i latou o ē mananao e faia lona finagalo. O loo ia faatulagaina i latou ina ia faavae aʻe ai lana sosaiete fou o ē o le a ola i le lalolagi, e pei ona muai taʻu mai e le valoaga a le Tusi Paia: “O aso e gata ai [le taimi lea o loo tatou ola ai nei], . . . E o mai lava nuu e tele, ma latou faapea ane, O mai ia, tatou o ae ia i le mauga o Ieova [lana tapuaiga moni ua faasilisilia], . . . e aʻoaʻo mai foi o ia ia te i tatou i ona ala, ona tatou savavali ai lea i ona ala.”—Isaia 2:2, 3.

²² Ua faamatala e le Faaaliga 7:9 i latou nei o “le motu o tagata e toatele mai atu nuu uma, ma aiga, ma nuu, ma gagana eseese.” Ua faapea mai le fuaiupu e 14: “O i latou ia o e o mai nai le puapuaga tele,” ua faasaoina mai le iuga o le faiga o mea o loo iai nei. O lenei faavae mo le lalolagi fou ua toeitiiti nei oo atu i le ono miliona lona faitau aofai, faatasi ai ma le toatele o ē fou o loo avea ma vaega o lena faavae i tausaga taitasi. O nei auauna faamaoni uma a Ieova ua toleniina i latou mo le ola i lana lalolagi fou. O loo latou aʻoaʻoina tomai faaleagaga ma isi tomai manaomia ina ia faaliliuina ai lenei lalolagi e avea ma parataiso. Ma ua latou faatuatua atoatoa atu o le a avea le Parataiso o se mea moni auā “e faamaoni o ia ua folafola mai.”—Eperu 10:23.

Manatu Autū mo le Autaluga

◻ O ā āuga na aumaia i le uluai senituri ona o le leai o se faatuatua?

◻ O le ā le telē e mafai e auauna a le Atua ona faatuatua ai ia te ia?

◻ O le ā le lumanai o loo taofia mai mo ē faatuatua?

◻ O le ā e ao ona tatou fai ina ia faamautinoa ai se lumanai fiafia mo i tatou lava i le lalolagi fou a le Atua?

[Ata i le itulau 18]

I le taimi nei lava o loo fauina e Ieova se faavae o se sosaiete fou o ē o le a ola i le lalolagi