Pe E Te Manatua?

Po ua e mauaina ni aogā mai lomiga fou o Le Olomatamata? Aisea la e lē tofotofo ai mea o e manatuaina i fesili o loo mulimuli mai?

◻ O le ā le eseesega o “le aso o le Alii” ma “le aso o Ieova”? (Faaaliga 1:10; Ioelu 2:11)

O “le aso o le Alii” e aofia ai le faataunuuga o vaaiga e 16 na e faamatalaina i le mataupu 1 e oo i le 22 o le Faaaliga faapea ma mea mataina na tutupu ia sa valoia e Iesu i lana tali atu i le fesili a ona soo e faatatau i le faailoga o lona faatasi mai. I le tumutumuga o le aso o le Alii, o le a gapā mai ai le aso matautia o Ieova i le taimi o le a ia faaoo mai ai sala faafaamasinoga i le lalolagi leaga a Satani. (Mataio 24:3-14; Luka 21:11)—12/15, itulau 11.

◻ O ā nisi o vala mataina o le Tusi Paia a Makarios?

O le suafa Ieova e sili atu i le 3,500 taimi ona aliali mai i le Tusi Paia a Makarios. Na faapea mai se tasi tagata aʻoga o lomiga faalelotu a Rusia: “O [le] faaliliuga e pipiimau atu i tusitusiga faa-Eperu, ma o le gagana ua tusia ai le faaliliuga e lē filogia ma e talafeagai ma le mataupu.”—12/15, itulau 27.

◻ O le ā “le upu moni” lea na fetalai i ai Iesu e tuu saʻoloto ai i tatou? (Ioane 8:32)

I “le upu moni,” sa faauiga e Iesu i faamatalaga faagaeeina tauatua—ae maise lava faamatalaga e uiga i le finagalo o le Atua—lea ua faasaoina mo i tatou i le Tusi Paia.—1/1, itulau 3.

◻ O ai le Ieu ma le Ionatapa i ona po nei?

O loo faaāta e Ieu Iesu Keriso, lea o loo fai ma sui i le lalolagi “le Isaraelu [a] le Atua,” o Kerisiano faauuina. (Kalatia 6:16; Faaaliga 12:17) E pei lava ona sa agaʻi atu Ionatapa e faafetaiai ia Ieu, ua faapena foi ona ō mai le “motu o tagata e toatele” mai atunuu eseese e lagolago atu i sui o Iesu o loo iai i le lalolagi. (Faaaliga 7:9, 10; 2 Tupu 10:15)—1/1, itulau 13.

◻ O le ā le uiga o le ‘feoai ma le Atua’? (Kenese 5:24; 6:9, NW)

O le uiga o lenei mea e faapea o i latou o faia faapea, e pei o Enoka ma Noa, latou te amioaʻi i se uiga e avatu ai se faamaoniga o se faatuatua malosi i le Atua. Latou te faia mea e poloaiina ai i latou e Ieova e pulea ai o latou olaga ina ia ogatusa ma mea na latou iloa e uiga ia te ia mai ana feutagaiga ma tagata.—1/15, itulau 13.

◻ Aisea e fuafua mamao ai se tasi mo le taimi atonu e oti ai?

E mafai ona faapea atu, o le faia o na fuafuaga o se meaalofa lea i le aiga o se tasi. E faaalia ai le alofa. E faamaonia ai le faanaunauga e ‘saunia mea mo i latou o lou auaiga’ e ui lava e te lē o toe faatasi ma i latou. (1 Timoteo 5:8)—1/15, itulau 22.

◻ O le ā sa faataunuu e “le feagaiga tuai”? (2 Korinito 3:14)

Na faaāta mai ai le feagaiga fou, faatasi ai ma ona taulaga sa faifai pea, na faaalia ai le matuā manaomia e le tagata o se togiolaina mai le agasala ma le oti. Na avea o se “taʻitaʻitama . . . na te taʻitaʻiina i tatou ia Keriso.” (Kalatia 3:24)—2/1, itulau 14.

◻ I ā auala e faavavau ai le feagaiga fou (Eperu 13:20)

Muamua, e lē pei o le feagaiga o le Tulafono, o le a lē toe suia lava. Lona lua, e faavavau āuga o lona faagaoioiga. Ma lona tolu, o le a faaauau pea ona maua e tagatānuu o le Malo o le Atua iina i le lalolagi aogā mai le feagaiga fou a o faagasolo le Afe Tausaga.—2/1, itulau 22.

◻ O ā aogā e maua mai le loto faafetai?

O le lagona mafana lea e oo i se tagata ona o le loto faafetai, e saosaolaumea i lona fiafiaga ma le filemu. (Faatusatusa i le Faataoto 15:13, 15.) Ma i le avea o se uiga mautinoa, e puipuia e le loto faafetai se tasi mai i faalogona lē lelei e pei o le ita, loto leaga, ma le tetee.—2/15, itulau 4.

◻ O ā feagaiga ua faaaofia ai ē ua fanauagagaina?

O le feagaiga fou, lea ua osia e Ieova ma sui o Isaraelu faaleagaga, ma le feagaiga o le Malo lea ua osia e Iesu ma le vaega faauuina ia e mulimulitui i ona tulaga aao. (Luka 22:20, 28-30)—2/15, itulau 16.

◻ O ā tausamiga tetele e tolu ia na faatonuina tagata Isaraelu e auai ai?

O le Tausamiga o Areto Lē Faafefeteina, sa faia pe a faatoʻā mavae le Paseka o Nisani 14; o le Tausamiga o Vaiasosa, i le aso lona 50 mai ia Nisani 16; ma le Tausamiga o le Aoaoina, po o le Tausamiga o Faleapitaga, sa faia i le masina lona fitu. (Teuteronome 16:1-15)—3/1, itulau 8, 9.

◻ Aisea o se faaeaga ai le auai i faatasitasiga a Kerisiano?

Na fetalai Iesu: “O le mea ua faapotopoto ai se toalua, po o se toatolu i loʻu igoa, ou te i ai faatasi ma i latou.” (Mataio 18:20; 28:20) E lē gata i lea, o se auala tāua o loo faatinoina ai lena fafagaina faaleagaga e ala atu lea i sauniga a le faapotopotoga faapea foi i faatasitasiga tetele. (Mataio 24:45)—3/1, itulau 14.

◻ O fea na tupuga mai ai le igoa o Nimarota?

E toatele tagata atamamai faapitoa ua latou autasi i le manatu e faapea o le igoa o Nimarota e lei faaigoaina ai o ia ina ua fanau mai. Nai lo lea, na latou manatu i ai o se igoa na mulimuli ane ave i ai ina ia ogatusa ma ona uiga tetee na faaalia.—3/15, itulau 25.

◻ O le ā le tāua o le aiga i le sosaiete faaletagata?

O le aiga, o se mea e manaomia e tagata. Ua faaalia i le talafaasolopito e faapea, a o agaʻi ina masofa le faavae o aiga, ua faapena foi ona faavaivaia ai le malosi o nuu ma atunuu. O lea, e iai se āuga tuusaʻo o le aiga i le faatumauina o le sosaiete ma le lelei o fanau ma tupulaga i le lumanai.—4/1, itulau 6.

◻ O ā faamaoniga e tolu e faamaonia ai o le Tusi Paia e mai le Atua?

(1) E saʻo aʻiaʻi i mea faasaienisi; (2) o loo iai le tele o mataupu silisili e faavavau ona aogā mo le soifuaga i ona po nei; (3) o loo iai valoaga maʻoti ua faataunuuina, e pei ona faamaonia mai e mea moni i talafaasolopito.—4/1, itulau 15.