Na Latou Faia le Finagalo o Ieova

Ua Tauia le Faamaoni o Iopu

O IOPU o se tagata e agaalofa, o sē e tausia fafine ua feoti a latou tane, o ē ua aumatuā, ma ē ua puapuagatia. (Iopu 29:12-17; 31:16-21) Peitai i se tulaga faafuasei, na oo ai ia te ia ni mafatiaga ogaoga, na aveesea ai lona tamaoaiga, o lana fanau, ma lona soifua maloloina. O le mea e faanoanoa ai, ona o lenei tagata amio faatamalii sa avea ma poutū e fesoasoani atu i ē mafatia, sa itiiti se fesoasoani na ia mauaina i le taimi ua ia manaomia. E oo i lana lava avā na faapea atu ia te ia ‘ina ia faifai i le Atua ma oti ai.’ Sa lei saunia foi e ana “uo” o Elifasa, Pilitati, ma Sofara se faamafanafanaga. Nai lo lena, na latou faauiga atu faapea na agasala Iopu ma o lea ua māfua ai lona puapuaga.—Iopu 2:9; 4:7, 8; 8:5, 6; 11:13-15.

E ui i le tele o mafatiaga, ae sa tumau pea Iopu i le faamaoni. Ona o lena, na iu ai ina faasalafa atu le alofa mutimutivale o Ieova ia Iopu ma faamanuiaina ai o ia. O le tala i le auala na ia faia ai faapea ua saunia ai se faamautinoaga i auauna faamaoni uma a le Atua e faapea e iai le taimi o le a tauia ai foi i latou.

Taʻumamāina Mai Tuua‘iga ma le Toe Faafoisiaga

Muamua lava, na aoaia e Ieova Elifasa, Pilitati, ma Sofara. I le fetalai atu ia Elifasa, e mautinoa o ia e pito matua, na ia faapea atu: “Ua tupu loʻu ita ia te oe, ma au uo e toalua; ina ua outou le tautalatala ma le tonu ia te au, e faapei o laʻu auauna o Iopu. O le mea lea ia outou ave ai povi poa taanoa e fitu, ma mamoe poa e fitu, ma outou o ane i laʻu auauna o Iopu; ia outou fai aʻi le taulaga mu mo outou; ona tatalo lea o laʻu auauna o Iopu mo outou.” (Iopu 42:7, 8) Mafaufau po o le ā ua taʻu mai e lenei mea!

Sa manaomia e Ieova se taulaga telē mai ia Elifasa, Pilitati, ma Sofara, atonu ina ia faailoa atu ai ia i latou le matuia o la latou agasala. O le mea moni, tusa lava pe na fuafuaina pe e lei fuafuaina, ae na latou upuleagaina lava le Atua e ala i le faapea mai “ua le faalagolago o ia i ana auauna” ma o lea na lei afaina ai ia te ia pe e faamaoni atu Iopu pe leai. Na oo lava ina faapea mai Elifasa ua sili atu le aogā o le lelefua i le silafaga a le Atua nai lo Iopu! (Iopu 4:18, 19; 22:2, 3) E lētioa ona fetalai Ieova e faapea: “Ua outou le tautalatala ma le tonu ia te au”!

Peitai e lē na o le pau ai lena. Sa agasala foi Elifasa, Pilitati, ma Sofara faasaga ia Iopu lava ia e ala i le taʻuina atu ia te ia faapea o ona faafitauli e māfua lava ona o ia. O a latou tuuaʻiga lē faavaea ma le matuā leai o se faalogona alofa na faaosofia ai lagona tiga ma le loto mafatia o Iopu, lea na māfua ai ona tagi o ia e faapea: “Tou te faatigaina ea loʻu loto, ma outou tuʻimomomoina aʻu i upu seia afea?” (Iopu 10:1; 19:2) Seʻi mafaufau i le masiasi o foliga faaalia o nei tagata e toatolu ina ua latou ofoina atu ia Iopu se taulaga mo a latou agasala!

Peitai sa lei tatau ona vaai atu ma le faaamuamu Iopu i lo latou faatoilaloina. O le mea moni, na manaomia e Ieova Iopu ina ia tatalo mo ē na tuuaʻia o ia. Na faia e Iopu e pei lava ona faatonuina ai o ia, ma o lea na faamanuiaina ai o ia. Muamua lava, na aveesea e Ieova lona maʻi matautia. Ona ō mai ai lea o uso o Iopu, o ona tuafāfine, ma ana aumea sa iai muamua e faamafanafana ia te ia, ma “ua foai mai foi ia te ia e i latou taitoatasi le tupe e tasi, taitoatasi foi ma le mama auro e tasi.”a E lē gata i lena, “sa ia te ia [Iopu] mamoe e sefulu afe ma afe e fa, ma kamela e ono afe, ma povi e lua afe, ma asini fafine e tasi le afe.”b Ma e manino mai na toe lelei foi Iopu ma lana avā. Mulimuli ane, na faamanuiaina ai Iopu i atalii e toafitu ma afafine e toatolu, ma sa ia soifua pea e vaai i tupulaga e fa o ē na tupuga mai ia te ia.—Iopu 42:10-17.

Lesona mo i Tatou

Ua faataatia e Iopu se faaaoaoga mataina mo auauna a le Atua i aso nei. Na avea o ia o sē ua “sao lana amio ma le amiotonu,” o se tagata na fiafia Ieova e taʻua o “laʻu auauna.” (Iopu 1:8; 42:7, 8) E ui i lea, e lē o le uiga o lenei mea faapea o Iopu sa lelei atoatoa. Na iai se taimi a o faagasolo ona tofotofoga, na sese ai lona manatu faapea o le Atua o le pogai lea o lona puapuaga. Na oo lava ina ia faitioina le auala a le Atua e feagai ai ma tagata. (Iopu 27:2; 30:20, 21) Ma sa ia tauamiotonuina o ia lava nai lo le Atua. (Iopu 32:2) Peitai sa musu Iopu e tetee atu i Lē na Foafoaina Mea, ma sa ia taliaina ma le loto maulalo faasaʻoga mai le Atua. “Ua ou tautala atu ma loʻu le mafaufau,” na ia tautino mai. “Ua ou ʻinoʻino ai ia te au, ua ou salamo foi i le efuefu ma le lefulefu.”—Iopu 42:3, 6.

Pe a i lalo o tofotofoga atonu foi tatou te ono mafaufau, tautatala, pe gaoioi foi i se auala e lē talafeagai. (Faatusatusa i le Failauga 7:7.) E ui i lea, pe afai e loloto lo tatou alofa mo le Atua, o le a tatou lē fouvale faasaga ia te ia pe tigā talu ai e na te faatagaina i tatou e tofo i faigata. Nai lo lena, o le a tatou tumau i lo tatou faamaoni ma o le a mulimuli ane ai seleseleina faamanuiaga sili. Na faapea mai le faisalamo e faatatau ia Ieova: “E te alofa faamaoni oe i le ua alofa faamaoni.”—Salamo 18:25, NW.

A o lei faafoisia le tulaga soifua maloloina lelei o Iopu, na manaomia e Ieova ona ia tatalo mo i latou na agasala ia te ia. Maeu se faaaoaoga lelei mo i tatou! E manaomia e Ieova ona tatou faamagalo ia i latou o ē agasala mai ia te i tatou a o lei faamagaloina a tatou lava agasala. (Mataio 6:12; Efeso 4:32) Pe afai la tatou te lē loto malilie e faamagalo isi ae o loo iai se faavae talafeagai e faia ai faapea, pe mafai ea ona tatou faatalitalia ma le tonu Ieova e alofa mutimutivale mai ia i tatou?—Mataio 18:21-35.

O i tatou uma lava e feagai ma tofotofoga mai lea taimi i lea taimi. (2 Timoteo 3:12) Peitai, i le pei o Iopu e mafai ona tatou tumau i le faamaoni. E ala i le faia faapea, o le a tatou seleseleina ai se taui sili. Na tusi Iakopo e faapea: “Faauta, ua tatou taʻuamuia i e onosai. Ua outou faalogologo i le onosai o Iopu, ua outou iloa foi le iuga i la le Alii, ina ua mutimuti vale tele le Alii ma le alofa naunau.”—Iakopo 5:11.

[Faaopoopoga i lalo]