Ua Latalata Mai le Aso o Ieova
“Outou toeaina e, ina faalogologo mai ia i lenei mea, o outou uma o e nonofo i le nuu.”—IOELU 1:2.
1, 2. Ona o le ā le tulaga sa iai i Iuta, na faagaee ai e Ieova Ioelu e faaleo atu lana valoaga malosi?
“AUE, le aso e! auā ua latalata mai le aso o Ieova, e oo mai e pei o se malaia ai Le e ona le malosi uma lava.” Maeu se faasilasilaga malosi! O le feau a le Atua i ona tagata na momoli atu e lana perofeta o Ioelu.
2 O upu na i le Ioelu 1:15 sa tusia i Iuta, e foliga mai pe tusa o le tausaga e 820 T.L.M. O le taimi lena o loo matagofie le laueleele i atumauga lanulauava. Sa fau ma soloi le saito ma fualaau ʻaina suamalie. Sa lava ma totoe le vao lanumeamata mo manu tataa. Ae ui i lea, sa iai se mea sa matuā faaletonu lava. Na lauolaola le tapuaiga ia Paala i Ierusalema ma le nuu o Iuta. Sa onanā tagata a o auai i faiga tau tapuaiga i lenei atua sese. (Faatusatusa i le 2 Nofoaiga a Tupu 21:4-6, 11.) Po o le a faataga ea e Ieova nei faiga uma e faaauau ai pea?
3. O le ā na lapatai i ai Ieova, ma o le ā sa tatau ona sauniuni i ai nuu ese?
3 E manino lava le faamatalaga a le Tusi Paia i le tusi o Ioelu e faatatau i le tali. O le a faasilisilia e Ieova le Atua lana pule silisiliese ma faapaia lona suafa paia. Na matuā latalata ane lava le aso o Ieova. Le aso lea o le a faaoo atu ai e le Atua le sala faafaamasinoga i nuu ese uma lava i le “vanu o Iosefatu.” (Ioelu 3:12) Tuu atu ia i latou e sauniuni e tau ma Lē e Ona le Malosi Uma Lava, o Ieova lea. Ua fesagaia foi e i tatou le aso tele o Ieova. O lea seʻi o tatou iloiloina totoʻa upu faavaloaga a Ioelu mo o tatou aso ma le taimi ua teʻa.
Osofaiga a Iniseti
4. O le ā le telē o le mea e tupu lea sa lapatai i ai Ioelu?
4 Na fetalai Ieova, e ala i lana perofeta e faapea: “Outou toeaina e, ina faalogologo mai ia i lenei mea, o outou uma o e nonofo i le nuu, ia outou liliu mai o outou taliga; pe na i ai le mea nei i ona po o outou, po o ona po o outou tamā? Ia outou talatala atu ai i la outou fanau; ia talatala foi la outou fanau i la latou fanau, ma la latou fanau i se tasi tupulaga.” (Ioelu 1:2, 3) Sa ao ona faatalitalia e toeaina ma tagata uma se mea e lei tupu muamua i le vaitaimi o lo latou soifuaga po o le taimi foi o o latou augatamā. Ona o le matautia o le tulaga o le a iai, o le a talatala atu ai e oo lava i le tupulaga e tolu! O le ā lenei mea mataina sa tupu? Ina ia tatou iloaina, seʻi o tatou manatunatu faapea o loo tatou iai iina i le taimi o Ioelu.
5, 6. (a) Faamatala mai le mala lea o loo valoia e Ioelu. (e) O ai e Pogai mai ai lena mala?
5 Faalogo! Ua lagona atu e Ioelu se gogolo mai se mea mamao. Ua pogisa le lagi, ma o lena leo paū ua faateteleina a o agaʻi ina faatetele mai le pogisa i luga aʻe. Ona oo mai ai lea o se ao e pei o se asu. O se autau a ni iniseti e faitau miliona. Ma pagā se faatamaiaga ua latou faapogaia! Seʻi iloilo nei le Ioelu 1:4. O nei iniseti na osofai mai e lē na o sē akerise e felelei. Oi, e leai! O loo ō mai ai foi ma isi sē, o sē aleka e fetolofi mai, e leai ni apaau. Ona o loo momoli mai e le matagi, ua faafuasei ai ona oo mai sē, ma o o latou leo ua pei o le taalili o kariota. (Ioelu 2:5) Ona o lo latou matuā ʻai tetele, ua vave ai lava ona faaliliuina e le faitau miliona o i latou se parataiso e avea ma mea gaogao i se taimi puupuu lava.
6 O loo aofia ai foi i le osofaiga ia katapila—o laasaga na e amata mai ai lelefua ma pepe. E mafai e se vaega tele o nei katapila fia ʻaai ona latou atiina vaega taitasi uma o lau o laau seia oo lava ina matuā faaleagaina laau ʻaina lanumeamata. Ma o le tele o mea e totoe mai ia i latou, o le a ʻaiina uma e sē. Ma po o ā lava o le a totoe mai sē, e mautinoa e matuā faamaeʻaeʻa uma e mogamoga o loo gaoioi vave mai. Ae mātau mai le mea lenei: I le Ioelu mataupu e 2, fuaiupu e 11, ua faamatala ai e le Atua le ʻau a sē e faapea “o ana au.” Ioe, o ia e Pogai mai ai le mala o sē ia o le a matuā faatamaiaina le laueleele ma faapogaia ai se oge tele. O afea? A o toeitiiti lava oo mai “le aso o Ieova.”
“Ala Mai ia Outou ua Onā”!
7. (a) O le ā le tulaga sa iai taʻitaʻi lotu o Iuta? (e) Ua faapefea ona iai taʻitaʻi lotu o Kerisinetoma i aso nei i se tulaga e tutusa ma lea na iai taʻitaʻi lotu o Iuta?
7 Ua faailoa mai le motu o tagata amio lē pulea, o taʻitaʻi lotu i Iuta ina ua aumai le poloaiga: “Ala mai ia outou ua onā, ma fetagisi; ia uio foi outou uma o e inu uaina, auā tou te le toe feinu lava i le suāvine.” (Ioelu 1:5) Ioe, na faatonu atu i ē onanā faaleagaga i Iuta e “ala mai,” aua le toe feinu i le suavine. Peitai aua neʻi manatu o lenei mea ua na o se faamatalaga faatalafaasolopito anamua. I le taimi nei lava, a o lei oo mai le aso tele o Ieova, ua matuā gula i se uiga faafaatusa taʻitaʻi lotu o Kerisinetoma i le uaina suamalie ua faigata ai ona latou malamalama i lenei faatonuga mai Lē Silisili Ona Maualuga. Pagā le faateia o le a latou oo i ai pe a oo ina fafagu i latou mai i lo latou onanā faaleagaga e le aso tele ma le matautia o Ieova!
8, 9. (a) Ua faapefea ona faamatala mai e Ioelu ʻau o sē ma āuga o la latou mala? (e) O ai o loo fai ma sui o sē i aso nei?
8 Seʻi tagai atu i lena ʻau tele o sē! “Ua alu ae le nuu ese i loʻu laueleele, e malolosi i latou, e le mafaitaulia lava; o latou nifo o nifo o leona ia, ua i ai foi gao peiseai o gao o se leona tele. Ua fano ia te i latou laʻu vine, ua foʻea e i latou laʻu mati, ua matuā foʻea lava e i latou, ua lafotuina foi; ua sinasina ai ona la. Ia e tagiaue, e pei o se taupou ua fusia i le ie talatala ona o lana tane sa fai a o teine muli o ia.”—Ioelu 1:6-8.
9 Po o lenei ea mea ua na o se valoaga e faatatau i “se nuu” o sē, o se ʻau o sē o loo vagaia Iuta? E leai, e sili atu mea o loo aofia ai nai lo lena. I le Ioelu 1:6 ma le Faaaliga 9:7, o loo taufai faaātaina ai iina tagata o le Atua i sē. O le ʻau o sē i ona po nei e leai se isi nai lo le autau o sē faauuina a Ieova, lea ua aufaatasi atu i ai le silia i le 5,600,000 o “isi mamoe” a Iesu. (Ioane 10:16) Pe e te lē o fiafia ea e avea o se vaega o lenei ʻau tele o ē tapuai ia Ieova?
10. O le ā le aafiaga o le mala o sē i luga o Iuta?
10 I le Ioelu 1:9-12, tatou te faitau ai i ni aafiaga o le mala o sē. O le mulimuli atu o le isi ʻau i le isi ʻau ua faatinoina ai se faatamaiaga atoatoa o le nuu. Ona ua leai le saito, le uaina, ma le suauu, ua lē mafai ai e faitaulaga lē faamaoni ona faaauau a latou gaoioiga. E oo lava i le laueleele ua faanoanoa, auā ua faatamaia e sē le saito sa iai, o laau sa fua maia fua suamalie ua tuua e aunoa ma ni fua. Ona ua faaleagaina le vine, ua lē toe iai la se uaina mo le au ʻai ʻava a Paala o ē sa onanā foi faaleagaga.
‘Le Au Faitaulaga e, ia Outou Faanoanoa’
11, 12. (a) O ai o loo faapea mai o faitaulaga a le Atua i aso nei? (e) Ua faapefea ona aafia taʻitaʻi lotu o Kerisinetoma i le mala o sē faaonaponei?
11 Faafofoga atu i le feau a le Atua mo na faitaulaga faatuiese: “Le au faitaulaga e, ia outou fufusi ia te outou ma faanoanoa; ia uio outou o e auauna i le fata faitaulaga.” (Ioelu 1:13) I le uluai faataunuuga o le valoaga a Ioelu, sa auauna ai faitaulaga a sa Levī i le fata faitaulaga. Ae faapefea le faataunuuga mulimuli? I aso nei, ua manatu ai taʻitaʻi lotu o Kerisinetoma faapea o loo ia i latou le pule e auauna ai i le fata faitaulaga a le Atua, i le faapea mai o i latou o ana faifeau, o ana “faitaulaga.” Peitai, o le ā o loo tupu nei ona o lea ua amata ona gaoioi sē faaonaponei a le Atua?
12 Pe a vaaia e “faitaulaga” a Kerisinetoma tagata o Ieova o gaoioi ma faalogo atu i la latou lapataiga o le faamasinoga tauatua, latou te matuā feita ma fitivale. Latou te tatuʻi o latou fatafata i le popole ma le feita i āuga e faaumatia ai o le feau o le Malo. Ma latou te uio a o ō ese atu a latou lafu mai ia i latou. A o faasolo ina faaitiitia le auala e maua ai lo latou tamaoaiga, o le a latou ofu ai i le po i le ie talatala, ma faanoanoa ona o le aveesea o a latou tupe. Ua lē o toe umi nei, ona aveesea foi lea o a latou galuega o ni faitaulaga! O le mea moni, ua taʻu atu e le Atua ia i latou ia latou faanoanoa i le po atoa auā ua lata mai lo latou iuga.
13. Po o le a talia ea e Kerisinetoma atoa le lapataiga a Ieova?
13 E tusa ai ma le Ioelu 1:14, na pau lava lo latou faamoemoe o le salamō lea ma alalaga atu ‘ia Ieova mo se fesoasoani.’ Pe mafai ea ona tatou faatalitalia le vasega atoa o taʻitaʻi lotu o Kerisinetoma o le a liliu atu ia Ieova? O le mea moni e leai! Atonu e utagia e nisi mai ia i latou nei le lapataiga a Ieova. Peitai o le tulaga mafatia faaleagaga o nei taʻitaʻi lotu atoa ma o latou tagata lotu o le a faaauau pea. Na valoia e le perofeta o Amosa: “O loo faapea mai le Alii o Ieova, Faauta, e oo mai aso ou te tuuina atu ai le oge i le nuu; e le se oge i mea e ʻai, po o se gālala i le fia inu vai, a o le oge i le faalogologo i afioga a Ieova.” (Amosa 8:11) I le isi itu, maeu lo tatou faafetai mo le tamaoaiga o faigaai faaleagaga ua saunia ma le alofa e le Atua e ala mai i “le auauna faamaoni ma le mafaufau”!—Mataio 24:45-47.
14. O le ā le mea o loo fai ai ma faailoilo le mala o sē?
14 O le mala o sē sa fai ma o loo fai ma faailoilo o se mea. O le ā? O loo manino le taʻuina mai e Ioelu ia i tatou, i lona faapea mai: “Aue, le aso e! auā ua latalata mai le aso o Ieova, e oo mai e pei o se malaia ai Le e ona le malosi uma lava.” (Ioelu 1:15) O le osofaiga i le lalolagi aoao a ʻau o sē a le Atua i aso nei ua matuā manino ona faailoa mai ai le lata tele mai o le aso tele ma le matautia o Ieova. E mautinoa, o loo moomoo tagata uma e saʻo o latou loto mo lena aso faapitoa e faatulaga ai mea, pe a aumaia le sala faafaamasinoga i ē amioleaga ma manumalo aʻiaʻi ai Ieova o le Pule Silisiliese Aoao.
15. I le vaai atu i le tulaga malaia o le laufanua, ua faapefea ona gaoioi i latou o ē utagiaina lapataiga tauatua?
15 E pei ona faaalia i le Ioelu 1:16-20, na aveesea meaʻai mai ia Iuta anamua. Faapena foi le olioli. Na matuā faagaogaoina fale sa teu ai oloa, o fale saito na oo ina lepetia. Sa leai ni vao e ʻaai ai manu auā na faatamaia e sē le vao i laufanua, ua taase solo povi ae fano lafu mamoe. Pagā se mala matautia! A o iai i lena tulaga, o le ā na tupu ia Ioelu? E tusa ai ma le fuaiupu e 19, na ia faapea mai: “Ieova e, ou te valaau ia te oe.” I aso foi nei, e toatele o loo latou utagia lapataiga tauatua ma alalaga atu ia Ieova le Atua i le faatuatua.
“O le a Oo Mai le Aso o Ieova”
16. Aisea e tatau ai ona tetemu “i latou uma o e nonofo i le nuu”?
16 Faafofoga atu i le faatonuga lenei mai le Atua: “Ia outou ilia le pu i Siona, ia taalili i loʻu mauga paia, ia tetemu i latou uma o e nonofo i le nuu.” (Ioelu 2:1) Aisea e gaoioi ai faapea? Ua tali mai le valoaga: “Auā o le a oo mai le aso o Ieova, auā ua latalata mai. O le aso pouliuli ma le pogisa, o le aso malumalu ma le pogisa lava, e pei o le malamalama o le taeao ona sosolo i mauga.” (Ioelu 2:1, 2) O loo iai se uiga moni o le faanatinati e fesootai atu i le aso tele o Ieova.
17. Na faapefea ona aafia le laueleele ma tagata o Iuta ona o le mala o sē?
17 Seʻi tau ina mānatu i le malosi na iai i le faaaliga na oo i le perofeta a o faaleagaina e na sē faatāmaʻi le nuu e pei o le parataiso o Etena e avea ma nofoaga tuufua ua lafoaia. Seʻi faalogo atu i le faamatalaina o le ʻau a sē: “E tino mai i latou e faapei ona tino mai o solofanua; pei o e tietie i solofanua, e faapea lava ona latou taufetuli. Latou te taufaioso, e pei o le taalili o kariota i tumutumu mauga, e pei o le taalili o le mu o le afi e susunuina ai tagutugutu o saito, e pei o le nuu malosi ua pae tau. E gatete tagata i luma ia te i latou, e sesega mata o tagata uma.” (Ioelu 2:4-6) I le taimi o mala o sē i aso o Ioelu, sa faateteleina le lilivau o tagata tapuai ia Paala, ma na iloa atu i o latou foliga faailoga o le popole.
18, 19. Ua faapefea ona faatusaina gaoioiga a tagata o le Atua i aso nei i se mala o sē?
18 E leai se mea na taofia ai le ō mai ma le maopoopo ma le malolosi o sē. Latou te taufetuli e “pei o tagata totoa” ma feaei foi i aupa. Afai ‘e paʻūū nisi o i latou ona o tao, e lē liliu ese isi o i latou mai le mea o agaʻi atu i ai.’ (Ioelu 2:7, 8) Maeu le manino ona faaāta faavaloaga mai o le ʻau o sē faafaatusa i aso nei a le Atua! I aso foi nei, o loo faaauau ai ona agaʻi pea i luma ʻau o sē a Ieova. E leai se “aupa” o teteega e mafai ona liliu ese ai i latou. Latou te lē faagutugutulua i lo latou faamaoni i le Atua ae ua loto malilie e fesagai ma le oti, e pei ona faia e le faitau afe o Molimau o ē ‘na maliliu i tao’ ona o le mumusu e malolo atu ia Hitila i le taimi a o iai i le pulega a Nasi i Siamani.
19 Ua avatu e ʻau o sē i ona po nei a le Atua se molimau maeʻaeʻa i “le aai” o Kerisinetoma. (Ioelu 2:9) Ua latou faia faapea i le lalolagi atoa. O loo faaauau pea ona latou feaei i so o se lavelave, ulu atu i le faitau miliona o aiga, faalatalata atu i tagata i magaala, talanoa atu ia i latou i telefoni, ma faafesootaia i latou i so o se auala e mafai ai a o latou folafola atu le feau a Ieova. O le mea moni, ua latou tufatufa atu le faitau piliona o lomiga faale-Tusi Paia, ma o le a faaauau pea ona tufa atu le tele ma tele o isi tusi i la latou faiva e lē mataofia—e lē gata i le lautele ae faapena foi mai lea fale i lea fale.—Galuega 20:20, 21.
20. O ai o loo lagolagoina sē faaonaponei, faatasi ai ma ā iuga?
20 Ua faaalia i le Ioelu 2:10 e faapea o lenei ʻau toatele o sē, ua pei o se ao e mafai ona punitia ai le la, le masina, ma fetu. (Faatusatusa i le Isaia 60:8.) Po o iai ea se taumatematega po o ai o i tua o lenei autau malolosi? E ese mai le gogolo o sē lava latou, o loo tatou lagona atu upu nei o le Ioelu 2:11: “O Ieova foi na te tulei mai lona siufofoga i ana ʻau; auā e matuā tele lava lana itu taua; auā e malosi o ia le na te faataunuuina lana afioga; auā e mamafa le aso o Ieova, e matuā matautia, po o ai se na te mafaia ona talia?” Ioe, o loo auina atu nei e Ieova le Atua lana ʻau o sē—a o lei oo mai lona aso tele.
‘E Lē Faatuai Mai Ieova’
21. O le ā o le a iu i ai pe a “sau le aso o le Alii [Ieova] pei o se gaoi”?
21 I le pei o Ioelu, na tautala foi le aposetolo o Peteru i le aso tele o Ieova. Na ia tusi: “E sau le aso o le Alii [Ieova] pei o se gaoi, e mavaeeseina ai le lagi ma le gogolo tele, e teʻa eseese ai foi o mea na fai aʻi ina ua mu; o le lalolagi foi ma galuega o i ai e susunuina lava.” (2 Peteru 3:10) I lalo o le taitaiga a Satani le Tiapolo, ua pulea ai le “lalolagi” o tagata e liliu ese mai le Atua, e “lagi” o faiga malo amioleaga. (Efeso 6:12; 1 Ioane 5:19) O nei lagi ma le lalolagi faafaatusa o le a lē sao mai le aasa o le toatamai tauatua i le aso tele o Ieova. Nai lo lea, o le a suia i ‘lagi fou ma le lalolagi fou lea o loo tatou faatalitalia e pei o lana na folafola mai, e mau ai ē amiotonu.’—2 Peteru 3:13.
22, 23. (a) O ā o tatou uiga e tatau ona iai ona o le faaalia ma le alofa mutimutivale e Ieova o lona onosai? (e) O ā o tatou uiga e tatau ona iai i le latalata mai o le aso o Ieova?
22 Ona o le anoanoai o mea i aso nei e faatosina ese ai ma tofotofoina ai le faatuatua, e tatou te ono lē amanaiaina ai le faanatinati ua iai o tatou taimi. Peitai a o faaauau pea ona agaʻi i luma sē faafaatusa, e toatele tagata ua tali mai i le feau o le Malo. E ui o loo faataga e le Atua se taimi mo lenei mea, ae ao ona aua neʻi fenumiai ia i tatou lona onosai ma le faatuai. “E le faatuai mai le Alii i le mea na folafolaina mai, faapei o le manatu a isi tagata i le faatuai; a e peitai ua onosai mai lava o ia ia te outou, ona ua le finagalo ia fano se tasi, a ia oo uma lava i le salamo.”—2 Peteru 3:9.
23 A o tatou faatalitali atu i le aso tele o Ieova, seʻi o tatou teu loto upu a Peteru o loo faamauina i le 2 Peteru 3:11, 12 e faapea: “O lenei, o le a teʻa eseese nei mea uma, pe faapefea la outou amio e tatau ai i le amio lelei ma le amio Atua; o loo faatalitali ma naunau atu ia aulia mai le aso o le Atua, e teʻa eseese ai le lagi ina ua mu, e liu suāvai foi o mea na fai aʻi ina ua mu?” O nei gaoioiga ma mea tutupu e aofia ai le tatau ona tatou ō faatasi ma le ʻau o sē a Ieova e ala i le faia o se sao faifai pea ma le uigā i le talaʻia o le tala lelei o le Malo a o lei oo mai le iuga.—Mareko 13:10.
24, 25. (a) E faapefea ona e tali atu i le faaeaga o le faia o se sao i le galuega a ʻau o sē a Ieova? (e) O le ā le fesili uigā ua lāgā e Ioelu?
24 O le a lē taofia lava le galuega a ʻau o sē a le Atua seia amata le aso tele o Ieova. O le iai moni ma le lē mataofia o nei sē o se faamaoniga mataina lea faapea ua lata tele mai le aso o Ieova. Pe e te lē o fiafia ea e auauna faatasi ai ma sē faauuina a le Atua ma a latou aumea i se osofaiga faaiu a o lei oo mai le aso tele ma le matautia o Ieova?
25 Maeu le uigaese o le a iai le aso o Ieova! E letioa ona lāgā le fesili: “Po o ai se na te mafaia on talia?” (Ioelu 2:11) O lenei fesili ma le tele o isi fesili o le a talanoaina i matapu e lua o loo sosoo mai.
Pe Mafai Ona E Faamatala?
◻ Aisea na lapatai atu ai Ieova e faatatau i se mala o iniseti o le a oo ia Iuta?
◻ I le faataunuuga faaonaponei o le valoaga a Ioelu, o ai sē a Ieova?
◻ O ā uiga o loo faaalia e taʻitaʻi o Kerisinetoma i le mala o sē, ma e mafai faapefea e nisi o i latou ona sosola ese mai ona iuga?
◻ O le ā le telē ua oo i ai le mala o sē a o faagasolo le 20 senituri, ma o le a faaauau pea seia afea?
[Ata i le itulau 9]
O le mala o iniseti sa fai ma faailoilo o se isi mea e sili atu ona matautia
[Ē Ana le Ata]
Laau e leai ni fua: FAO photo/G. Singh
[Ata i le itulau 10]
O loo faapogaia e Ieova le Atua le mala o sē faaonaponei
[Ē Ana le Ata i le itulau 8]
Sē: FAO photo/G. Tortoli; ʻau o sē: FAO photo/Desert Locust Survey