Faasalaga Faafaamasinoga na Faia i le Vanu e Faasalaina Ai

“Ia laga mai o nuu ese, ma o ae i le vanu o Iosefatu; auā ou te nofo ai e faamasino i nuu uma mai itu uma.”—IOELU 3:12.

1. Aisea ua vaaia ai e Ioelu le vao tagata e toatele ua faapotopoto i “le vanu e faasalaina ai”?

“E TOATELE lava tagata i le vanu e faasalaina ai”! O upu faamaniti tino na ua tatou faitau i ai i le Ioelu 3:14. Aisea ua faapotopoto ai lenei vao tagata e toatele? Ua tali mai Ioelu: “Ua latalata mai le aso o Ieova.” O le aso tele mo le faasilisilia o Ieova—o le aso o le faaooina atu o le sala faafaamasinoga i le vao tagata e toatele o ē teena le Malo ua faavaeina o le Atua e ala i le pule a Keriso Iesu. O lea ua oo mai le taimi o le a faamamulu ai e “agelu e toafa” o le Faaaliga mataupu e 7, “matagi e fa o le lalolagi,” ma iu ai i le “puapuaga tele, e leai sona tusa talu le amataga o le lalolagi, ua oo lava i ona po nei; e le toe faapea foi amuli.”—Faaaliga 7:1; Mataio 24:21.

2. (a) Aisea ua talafeagai ai ona taʻua le nofoaga e faaoo ai le faasalaga o le faamasinoga o “le vanu o Iosefatu”? (e) Na faapefea ona gaoioi ma le talafeagai Iosefatu ina ua fesagai ma osofaiga?

² I le Ioelu 3:12, ua taʻu mai ai, o le nofoaga e faaoo ai le faasalaga o le faamasinoga e taʻua o “le vanu o Iosefatu.” Ma le talafeagai lava, i se tasi o vaitaimi vevesi o le talafaasolopito o Iuta, na faia ai e Ieova se faasalaga faafaamasinoga iina, mo le tupu lelei o Iosefatu, lea o le uiga o lona igoa “o Ieova le Faamasino.” O se iloiloga o le mea sa tupu i lena taimi o le a fesoasoani ina ia tatou talisapaia atili ai le mea ua toeitiiti ona tupu lea i o tatou taimi. O loo maua le tala i le 2 Nofoaiga a Tupu mataupu e 20. I le fuaiupu 1 o lena mataupu, tatou te faitau ai e faapea “ona o mai ai lea o le fanauga a Moapi, ma le fanauga a Amoni, e faatasi ma i latou foi nisi o sa Amonī, e tau ma Iosefatu.” Na faapefea ona gaoioi Iosefatu? Na ia faia le mea e masani lava ona fai e auauna faamaoni a Ieova pe a feagai ma faigata. Na ia liliu atu ia Ieova mo le taitaiga, ma tatalo atu faatauanau: “Lo matou Atua e, e te le faamasino ea ia te i latou? Auā e leai so matou malosi e tetee i lenei vao tagata e toatele, ua o mai e tau ma i matou; ua matou le iloa foi se mea e fai; a ua faasaga atu i matou ia te oe.”—2 Nofoaiga a Tupu 20:12.

E Tali Ieova i se Tatalo

3. O ā faatonuga na tuuina atu e Ieova ia Iuta ina ua latou fesagai ma osofaiga mai nuu tuaoi?

³ A o “tutū Iuta uma i luma o Ieova, ma o latou tama iti, o a latou avā, ma a latou fanau,” na tuuina mai i ai e Ieova lana tali. (2 Nofoaiga a Tupu 20:13) E pei lava ona ia faaaogā lana “auauna faamaoni ma le mafaufau” i aso nei, sa faapena foi ona faapogaia e le Faafofoga sili o tatalo ia le perofeta sa Levī o Iaaseelu e faaoo mai ai Lana tali ia i latou na potopoto ai iina. (Mataio 24:45) Tatou te faitau atu ai: “O loo faapea ona fetalai mai o Ieova ia te outou, Aua neʻi fefefe, aua foi neʻi matatau outou, ona o lenei vao tagata e toatele; auā e le o lo outou taua lenei, a o lo le Atua. . . . E le tau outou i lenei taua; tutū ia outou, ma ia outou tumau, ma outou vaai atu i le olataga mai ia Ieova o loo ia te outou; . . . aua le fefefe, aua foi le matatau; ia o atu taeao ia te i latou; e ia te outou foi o Ieova.”—2 Nofoaiga a Tupu 20:15-17.

4. I le ā le itu na manaomia ai e Ieova ona tagata ina ia gaoioi, ae lē na o le nofonofo, ina ua latou fetaiai ma le luitau a le fili?

⁴ Sa iai ma isi mea na manaomia e Ieova mai le tupu o Iosefatu ma ona tagata nai lo le tau lava o le nonofo iina e aunoa ma se mea e faia, ma faatalitali se laveaiina faavavega. Sa ao ona latou taulamua i ni gaoioiga i le fesagaia o le luitau mai a le fili. Sa faaali atu e le tupu ma ‘tagata uma o Iuta, e oo i a latou tamaiti, o a latou avā ma o latou atalii,’ le faatuatua malosi a o latou usiusitai e ala i le vave usu i le taeao ma savavali atu e faafetaiaia ʻau a le fili. A o latou agaʻi atu, sa faaauau ona avatu e le tupu faatonuga faatiokarate ma faalaeiauga, i lona timai atu: “Ina faatuatua ia ia Ieova lo outou Atua, ona faatumauina lea o outou; ia outou faatuatua i ana perofeta, ona outou manuia ai lea.” (2 Nofoaiga a Tupu 20:20) Faatuatua ia Ieova! Faatuatua i ana perofeta! O le mea autū lea sa faalagolago i ai le taulau manuia. E faapena foi i aso nei, a o faaauau ona tatou mataalia i le auaunaga a Ieova, tau ina ia aua lava neʻi o tatou masalosalo auā o le a ia faia lo tatou faatuatua ina ia manumalo!

5. Ua faapefea ona gaoioi Molimau a Ieova i aso nei a o latou faamanū atu ia Ieova?

⁵ I le pei o tagata Iutaia i ona po o Iosefatu, e ao ona tatou “faamanū atu ia Ieova, auā e faavavau lava lona alofa.” Ma e faapefea ona tatou avatu lenei viiga? E ala i lo tatou talaʻia ma le maelega o le Malo! E pei lava o tagata Iutaia sa iai iina na “latou amata ona pepese ma vivii atu,” e ao foi la ona tatou faaopoopo atu galuega i lo tatou faatuatua. (2 Nofoaiga a Tupu 20:21, 22) Ioe, seʻi o tatou faaali atu le ituaiga faatuatua malosi lena a o sauniuni Ieova e amata gaoioi faasaga i ona fili! E ui lava ina foliga mai e umī le ala, ae tau ina ia tatou maumauai e tumau, ia ola le faatuatua, e pei ona faia e ona tagata manumalo i vaega faigata o le lalolagi i aso nei. I nisi atunuu o loo matuā mafatia i sauaga, o faiga sauā, o oge, ma le paʻū maulalo o tulaga tau tamaoaiga, o loo tofo ai auauna faamaoni a le Atua i ni iuga mataina, e pei ona lipotia mai e le 1998 Yearbook of Jehovah’s Witnesses.

E Laveaiina e Ieova Ona Tagata

6. Ua faapefea i se faatuatua malosi ona fesoasoani ina ia tumau ai pea ona tatou faamaoni i aso nei?

⁶ Sa taumafai atunuu faalemataʻu sa siomia ai Iuta ina ia soloiesea tagata o le Atua, peitai ona o le iai o se faatuatua mataina na tali atu ai auauna a Ieova e ala i le usuina o ona viiga. E mafai ona tatou faaalia se faatuatua faapena i aso nei. E ala i le faatumuina o o tatou olaga i galuega o viiga ia Ieova, tatou te faamalosia ai lo tatou ofutau faaleagaga, e aunoa ai ma se avanoa e faaofi mai ai gaoioiga taufaaʻoleʻole a Satani. (Efeso 6:11) O le faatuatua malosi o le a tapeina ai le faaosoosoga ina ia aafia i faafiafiaga lē mamā, le matapeapea i mea faitino, ma le leai o se manatu mamafa, e pei ona mataulia ai le lalolagi ua aunoa ma se lumanai lea o loo siomia ai i tatou. O lenei faatuatua malosi o le a faaauau ai pea ona tatou auauna ma le faamaoni faatasi ma “le auauna faamaoni ma le mafaufau” a o faaauau ona fafagaina i tatou i meaʻai faaleagaga o loo faasoa mai “i ona itu aso.”—Mataio 24:45.

7. Ua faapefea ona tali atu Molimau a Ieova i osofaiga eseese o loo faasagasaga ane ia i latou?

⁷ O lo tatou faatuatua e faavae i le Tusi Paia o le a faamalosia ai i tatou e tutū mausalī e tetee atu i gaoioiga ita ia o loo faaoso mai e i latou o ē faaalia le agaga o le “auauna leaga” e pei ona taʻua i le Mataio 24:48-51. I le faataunuuina o lenei valoaga i se auala mataina, o loo faaauau ai pea e aposetate ona faasalalau atu pepelo ma faamatalaga faatupu faalavelave i le tele o atunuu i aso nei, ua oo lava ina latou faifaimea faalilolilo ma nisi o loo iai i tulaga maualuluga i atunuu. I tulaga talafeagai, ua tali atu ai Molimau a Ieova, e pei ona faamatalaina i le Filipi 1:7, (NW) e ala i le ‘puipuia ma le faavaeina faaletulafono o le tala lelei.’ Mo se faaaoaoga, ia Setema 26, 1996, i se faamasinoga sa faia i Eleni, na aufaatasi uma ai faamasino e toʻaiva o le European Court of Human Rights (Faamasinoga o Aiā Tatau a Tagata i Europa), i Strasbourg, e faamautinoa mai e faapea “O Molimau a Ieova e aofia i le vaega e faamatalaina o ‘tapuaiga iloga,’ ” ua iai le aiā saʻoloto i manatu, le loto fuatiaifo, ma talitonuga, faatasi ai ma le aiā tatau e faalauiloa atu ai lo latou faatuatuaga. E faatatau i aposetate, ua faapea mai le iuga faafaamasinoga a le Atua: “A ua taunuu ia te i latou le upu faataoto moni, Ua toe foi le ulī i lona lava puaiga; i le ma lea, O le puaa na faataeleina ua toe foi ia e taafili i le palapala.”—2 Peteru 2:22.

8. I aso o Iosefatu, na faapefea ona avatu e Ieova lana sala faafaamasinoga i fili o Ona tagata?

⁸ I tuā i aso o Iosefatu, na avatu ai e Ieova le sala faafaamasinoga ia i latou o ē sa mananao e faaleagaina Ona tagata. Tatou te faitau ai: “Ona tuu atu lea e Ieova o ʻau ua tanu e tau ma le fanauga a Amoni, ma Moapi, ma le mauga o Seira, na o mai e tau ma Iuta; ua fāsia i latou. Auā na tulai le fanauga a Amoni ma Moapi e tau ma e nonofo i le mauga o Seira, e matuā fasioti ma faaumatia ai i latou; ua uma ona latou fāsia o e nonofo i Seira, ona fefasiai ai lea o i latou.” (2 Nofoaiga a Tupu 20:22, 23) Na faaigoa e tagata Iutaia lena nofoaga o le Vanu o Peraka, o le uiga o le upu Peraka o le “Faamanuia.” I aso nei foi, o le faaooina atu o le sala faafaamasinoga a Ieova i ona fili o le a iu ai i faamanuiaga sili mo ona lava tagata.

9, 10. O ai ua faaalia mai le tatau ia i latou o le sala matautia faafaamasinoga a Ieova?

⁹ Tatou te ono fesili, O ai i ona po nei o le a maua le sala matautia faafaamasinoga mai ia Ieova? Ina ia maua le tali i lena fesili, e tatau ona tatou toe foi atu i le valoaga a Ioelu. Ua tautala le Ioelu 3:3 i fili o ona tagata o ē “tuuina atu se tama e fai ma tau o se fafine talitane, ua avatu foi se teine ma tau o uaina.” Ioe, latou te vāai i auauna a le Atua e matuā maulalo lava ia i latou, o a latou fanau ua tutusa lo latou aogā ma le tau o se fafine talitane po o le tau o se fagu uaina. E ao ona latou tali atu mo lena mea.

¹⁰ E matuā tutusa lelei lea ma le faasalaga o i latou o ē faia le talitane faaleagaga. (Faaaliga 17:3-6) Ma o loo nofosala faapitoa lava i latou o ē faapogaia malo faapolotiki e sauaina Molimau a Ieova ma faalavelaveina la latou galuega, e pei ona faia e ni taʻitaʻi lotu faatupu faalavelave i Europa i Sasaʻe talu ai nei. Ua faaali mai e Ieova lona maumauai e taui atu i na tagata o loo faia na amioga leaga matautia.—Ioelu 3:4-8.

‘Ia Sauniuni le Taua!’

11. Ua faapefea ona luʻia e Ieova ona fili mo se taua?

¹¹ Ua sosoo ai ma le valaau atu o Ieova i ona tagata ina ia folafola atu lenei luitau i nuu ese: “Ia outou sauniuni le taua, ia outou lagaina tagata totoa, ia faalatalata mai, ma o ae o tagata tau uma lava.” (Ioelu 3:9) O le faasilasilaga lenei o se taua e uigaese—se taua amiotonu. E faalagolago atu Molimau faamaoni a Ieova i auupega faaleagaga a o latou tali atu i faamatalaga lē moni, i le avatuina o mea moni e faaleaogāina ai tala pepelo. (2 Korinito 10:4; Efeso 6:17) E lē o toe mamao, ona saunia lea e Ieova “le taua i le aso tele o le Atua e ona le malosi uma lava.” (Faaaliga 16:14) O le a faamamāina ese ai mai le lalolagi ē uma e tetee i le pule silisiliese a le Atua. E leai se vaega faaletino a ona tagata i le lalolagi e fai i lenei taua. I se uiga faaletino ma faafaatusa, ua latou ‘tuʻi a latou pelu e fai ma uamea o suotosina ma latou tao foi e fai ma polo e teu aʻi vine.’ (Isaia 2:4) I se faaeseesega, ua luʻia e Ieova atunuu tetee ina ia fai le tuufaafeagai: “Ia outou tuʻituʻi le uamea o outou suotosina e fai ma pelu, ma a outou polo teu vine e fai ma tao.” (Ioelu 3:10) Ua ia valaaulia i latou ina ia faaaogā uma so o se auupega lava o loo ia i latou. Peitai e lē mafai ona latou taulau, auā o le taua ma le manumalo e ā Ieova lea!

12, 13. (a) E ui lava ina faamutaina le Taua Faaupufai, ae ua faapefea ona faaalia e le tele o atunuu o loo iai pea ia i latou le uiga fai taua? (e) O le ā le mea e lē o sauniuni i ai atunuu?

¹² I le amataga o vaitausaga mai le 1990, na faalauiloa mai ai e atunuu, ua faamutaina le Taua Faaupufai. I le manatu atu i lena mea, po ua faataunuuina ea le sini autū o Malo Aufaatasi o le filemu ma le saogalemu? E matuā leai lava! O le ā ua taʻu mai ia i tatou e mea tutupu talu ai nei i Burundi, Malo Faatemokalasi o Congo, Irake, Liberia, Rwanda, Somalia, ma vaipanoa sa avea muamua ma Yugoslavia? Fai mai upu i le Ieremia 6:14 (NW), ua latou faapea ane: “ ‘E filemu! E filemu!’ ae leai se filemu.”

¹³ E ui lava ua tau fai ifo faiga taua i nisi atunuu, ae o loo faaauau pea ona tauva atunuu o loo i totonu o Malo Aufaatasi i le gaosia o auupega matautia faaonaponei mo taua. O nisi atunuu o loo tumau pea ona latou faaputuina auupega faaniukilia. O isi atunuu o loo latou faia auupega tau vailaau po o auupega ia e faaumatia ai meaola i se faaumatiaga e sili ona telē. A o faapotopotoina na atunuu i le nofoaga faafaatusa ua taʻua o Amaketo, e na te luiina i latou: “Ia faapea mai le ua vaivai, Ua malosi aʻu. Outou nuu uma e, ia outou faapotopoto, ma soloai mai, ia outou faapotopoto foi ai itu uma.” Ona faasalavei mai lea o Ioelu ma lana augani e faapea: “Ieova e, ia e faaoo ifo i lea mea au ʻau malolosi.”—Ioelu 3:10, 11.

E Puipuia e Ieova Ona Lava Tagata

14. O ai ʻau malolosi a Ieova?

¹⁴ O ai ʻau malolosi a Ieova? Pe tusa ma le 280 taimi o loo taʻua ai i le Tusi Paia le Atua moni o “Ieova o ʻau.” (2 Tupu 3:14) O nei ʻau, o agelu ia i le lagi o loo laulaututū ma sauni e fai faatonuga a Ieova. Ina ua taumafai Suria e puʻea Elisaia, na iu ina faapupulaina e Ieova mata o le auauna a Elisaia ina ia ona iloaina le pogai sa latou lē taulau manuia ai: “Faauta foi, ua tumu le mauga i solofanua ma kariota afi, ua latou vagavagai ia Elisaia.” (2 Tupu 6:17) Na fetalai Iesu semanū e mafai ona ia aioi atu i lona Tamā e auina mai ni “agelu e sili ona toatele i lekeona e sefulu ma le lua.” (Mataio 26:53) I le faamatalaina o le afio mai o Iesu e faaoo atu le faasalaga faafaamasinoga ia Amaketo, fai mai le Faaaliga: “O ʻau foi o i le lagi ua mulimuli atu ia te ia i luga o solofanua sisina, ua oofu i latou i le ie vavae sinasina ma le mamā. Ua alu atu foi le pelu maai nai lona fofoga ina ia taia aʻi e ia o nuu; e pule foi o ia ia te i latou i le tootoo uamea; e soli foi e ia le soligāvine o le toasa mamafa o le Atua e ona le malosi uma lava.” (Faaaliga 19:14, 15) O loo manino ona faamatalaina mai lena soligavine faafaatusa i upu e pei o “le soligavine tele o le toasa o le Atua.”—Faaaliga 14:17-20.

15. Ua faapefea ona faamatala mai e Ioelu le taua a Ieova faasaga i atunuu?

¹⁵ Na faapefea la, ona tali atu Ieova i le augani ane a Ioelu ina ia auina mai ʻau malolosi a le Atua? Na faataunuuina e pei ona taʻua i upu manino nei: “Ia laga mai o nuu ese, ma o ae i le vanu o Iosefatu; auā ou te nofo ai e faamasino i nuu uma mai itu uma. Ia outou tuu atu le selesaito, auā ua afu saito; o mai ia, ina outou o ifo; auā ua tumu le mea e soli ai vine, ua taumasuasua o latou tuugāuaina; auā ua tele lo latou leaga. E toatele lava tagata i le vanu e faasalaina ai, auā ua latalata mai le aso o Ieova i le vanu e faasalaina ai. E faapouliuligia le la ma le masina, o fetu foi e le toe fepulafi mai. E faataio foi Ieova mai Siona, e tulei ifo lona siufofoga ai Ierusalema; e luluina le lagi ma le lalolagi.”—Ioelu 3:12-16.

16. O ai o le a aofia i ē o le a faaoo atu i ai le sala faafaamasinoga a Ieova?

¹⁶ E pei lava ona mautinoa le uiga o le igoa o Iosefatu “O Ieova le Faamasino,” e faapena ona mautinoa o le a faasilisiliina atoatoa e le Atua, o Ieova, lana pule silisiliese pe a ia faaooina mai le sala faafaamasinoga. O loo faamatalaina e le valoaga i latou o le a oo i ai le faasalaga ogaoga e faapea o le ‘motu o tagata, motu o tagata i le vanu e faasalaina ai.’ So o se tasi e lagolagoina lotu sese o le a totoe mai o le a avea ma vaega o lena motu o tagata. O le a aofia ai foi ma i latou o loo faamatalaina i le Salamo lona lua—o nuu ese, o atunuu, o tupu o le lalolagi, ma alii maualuluga—o ē ua sili ia i latou le faiga o mea faapiopio a lenei lalolagi nai lo le auauna atu ma le mataʻu ia Ieova.’ E lē mananao i latou nei e ‘sogi atu i le atalii.’ (Salamo 2:1, 2, 11, 12) Latou te lē fia amanaia le avea o Iesu ma Tupu lagolago a Ieova. E faaopoopo atu i lena, o le vao tagata ua faailogaina mo le faaumatiaga o le a aofia ai tagata uma lava o le a faamasinoina e le Tupu faamamaluina o ni “ ʻoti.” (Mataio 25:33, 41) Pe a oo mai le taimi atofaina a Ieova e taalili ai le alaga mai le Ierusalema faalelagi, ona agaʻi atu loa lea o lana Tupu o tupu ua tofia, ina ia avatu lena faasalaga. O le a luluina moni lava le lagi ma le lalolagi! Ae e ui i lea, ua faamautinoa mai ia i tatou: “O Ieova, o le malu o ia o lona nuu, ma le ʻolo o le fanauga a Isaraelu.”—Ioelu 3:16.

17, 18. O ai o loo mataulia o le a faasaoina mai le puapuaga tele, ma o ā tulaga o le a latou olioli ai?

¹⁷ O loo taʻu mai i le Faaaliga 7:9-17 i latou o ē faasaoina mai le puapuaga tele e faapea o “se motu o tagata e toatele” ua faia aʻe ia i latou o ē faaalia le faatuatua i le mana e togiolaina ai o le toto o Iesu. E maua e i latou nei le puipuiga i le aso o Ieova, ae i le tuufaafeagai, o le a fetaiai le vao tagata i le valoaga a Ioelu ma le faasalaga matautia. Ua faapea atu Ioelu i ē faasaoina: “Tou te iloa foi o aʻu o Ieova lo outou Atua, o lē nofo i Siona loʻu mauga paia,” le afioaga faalelagi o Ieova.—Ioelu 3:17a.

¹⁸ Ona taʻu mai lea e le valoaga ia i tatou e faapea o le nofoaga o le Malo faalelagi o le Atua e tatau ona ‘avea ma nofoaga paia, o tagata ese foi latou te lē toe ui atu ai lava.’ (Ioelu 3:17e) I le lagi atoa foi ma le vaega faalelalolagi o lena Malo faalelagi, o le a lē iai ni tagata ese, auā o le a autasi tagata uma i le tapuaiga mamā.

19. Ua faapefea ona faamatalaina e Ioelu le fiafiaga faaparataiso o tagata o le Atua i aso nei?

¹⁹ E oo lava i aso nei, e anoanoai le filemu o loo iai i tagata o Ieova i le lalolagi. I lo latou tulaga autasi, ua latou faalauiloaina atu ai ana faamasinoga i le silia ma le 230 atunuu ma i le sili atu i le 300 gagana eseese. O loo matagofie ona valoia mai e Ioelu lo latou tulaga olaola, e faapea: “A oo foi i lea aso, ona tautulu mai lea o suāvine i mauga, e tafe foi le suāsusu i mauga iti, o alia uma foi o Iuta e tafe mai ai suāvai.” (Ioelu 3:18) Ioe, o le a faaauau ona liligi mai e Ieova i ona tagata tapuai i le lalolagi le anoanoai o faamanuiaga e olioli ai ma le tamaoaiga atoa ma le faateleina o vai o le upu moni tautele. O le a matuā faapaia atoatoa ai le pule silisiliese a Ieova i le vanu e faasalaina ai, ma o le a tele le olioli a o iai o ia faatasi ma ona tagata ua togiolaina.—Faaaliga 21:3, 4.

Pe E te Manatua?

◻ Na faapefea ona faasaoina e Ieova ona tagata i aso o Iosefatu?

◻ O ai e faamasinoina e Ieova ua tatau i ai le faaumatiaga i “le vanu e faasalaina ai”?

◻ O ai ʻau malolosi a le Atua ma o le ā le vaega o le a latou faia i le feteenaiga mulimuli?

◻ O ā fiafiaga o loo olioli ai tagata tapuai faamaoni?

[Ata i le itulau 21]

Na taʻu atu ia Iuta: ‘Aua neʻi fefefe, auā e lē o lo outou taua lenei, a o lo le Atua’

[Ata i le itulau 23]

Ua luʻia e Ieova ona fili ina ia ‘tuʻi a latou uamea o suotosina e fai ma pelu’

[Ata i le itulau 24]

O loo taʻu mai e le Tusi Paia se motu o tagata e toatele o ē faasaoina mai le puapuaga tele