Soosoo Tauʻau i Matafaioi mo le Tausia o le Aiga

“TAMĀ . . . aua neʻi tou faaonoono atu i a outou fanau, a ia tausi atu i ai i aoaiga ma apoapoaiga a le Alii [Ieova].” (Efeso 6:4) I na upu faagaeeina, na tuuina atu ai ma le manino e le aposetolo o Paulo le matafaioi o le tausiaina o le aiga i lē e patino i ai—o le tamā lea.

I le tele o aiga e lē na o le tamā e tausiaina lana fanau. O lana avā, le tinā lea o lana fanau, e fiafia e tauaveina faatasi ma lana tane le avega. O lea, na folafola mai ai e le tupu o Solomona e faapea: “Loʻu atalii e, faalogo mai ia i le aʻoaʻo atu a lou tamā; aua foi e te tuulafoaiina le upu a lou tinā.”—Faataoto 1:8.

Tausiga Faaletino ma le Faaleagaga

O mātua e alolofa i a latou fanau e lē tuulafoaiina ma le loto i ai i latou. O le mea moni, o Kerisiano e faia faapea ua tutusa lea ma le faafitia o lo latou faatuatuaga, e pei ona faia i ai se faaiuga e tusa ma upu a Paulo ia Timoteo: “A e afai e le tausi e se tasi i lona aiga, afai foi e le sili ona tausi i e mau ma ia, ua faafitia e ia le faatuatua, e sili foi lona leaga i le ua le faatuatua.” (1 Timoteo 5:8) Ua iloaina e Kerisiano e faapea o le tausia aʻe o fanau i “aoaiga ma apoapoaiga a le Alii [Ieova]” e manaomia ai mea e sili atu nai lo le saunia o mea mo i latou i le itu faaletino.

Seʻi mafaufau i apoapoaiga a Mose i le nuu o Isaraelu ina ua latou tolauapi i fanua laugatasi o Moapi, a o toeitiiti lava ona latou ulufale atu i le Nuu Folafolaina. O iina na ia toe taʻu atu ai tulafono a le Atua ia i latou ma aʻoaʻo i latou e faapea: “Ia outou tuu nei upu i o outou loto ma o outou manatu.” (Teuteronome 11:18) Muamua atu na ia faamanatu atu ai ia i latou e tatau ona latou alolofa atu ia Ieova ma o latou loto atoa, agaga atoa ma le malosi atoa, ona faaopoopo atu lea i ai e faapea: “Ia i ai foi i lou loto o upu nei ou te fai atu ai ia te oe i le aso nei.” (Teuteronome 6:5, 6) Sa tāua mo mātua Isaraelu le faatagaina o upu o le Tulafono a le Atua e goto ifo i o latou loto. Faatasi ai ma loto ua faatumulia i le talisapaia faaleagaga, na mafai ai e mātua Isaraelu ona usitaia ma le uigā upu a Mose o loo sosoo mai: “Ia e matuā aʻoaʻo soo ai [i upu o le Tulafono a le Atua] i lau fanau, ma ia e tautalatala aʻi, pe a ē nofo i lou fale, pe a ē savali foi i le ala, pe a ē taoto, pe a ē tulai foi.”—Teuteronome 6:7; 11:19; faatusatusa i le Mataio 12:34, 35.

Mātau, o tamā sa “aʻoaʻo” na upu i a latou fanau ma “tautalatala aʻi.” Ua faamatalaina mai e le Merriam-Webster’s Collegiate Dictionary le “aʻoaʻo” o le “aʻoaʻoina ma faamamafa atu e ala i le toe taʻua pea lava pea po o apoapoaiga.” Pe a tautatala mātua e uiga i le Tulafono a le Atua i aso taitasi—i le taeao, aoauli, ma le po—e tele mea o le a faailoa atu ai i a latou fanau. A o matauina e talavou le alofa o mātua sa iai mo le Tulafono a le Atua, na iu ina uunaia ai foi i latou e atiina ae se faiā vavalalata ia Ieova. (Teuteronome 6:24, 25) O le mea e lelei ona matauina, na faatonu faapitoa atu e Mose ia tamā e aʻoaʻo a latou fanau ‘pe a latou nonofo i o latou fale.’ O na aʻoaʻoga sa avea ma vaega o le tausiga o le aiga. Ae faapefea i aso nei?

“Pe a Ē Nofo i Lou Fale”

“E lē faigofie,” o le tala lea a Ianeta, o se tinā Kerisiano e toʻafā lana fanau.a “E te manaomia le maumauai,” ua ioe i ai lana tane o Paulo. E pei lava o le toatele o isi mātua Molimau, o loo taumafai foi Paulo ma Ianeta e suesueina le Tusi Paia ma la laua fanau a itiiti mai e faatasi i le vaiaso. “Ma te taumafai e faia la matou talanoaga faale-Tusi Paia i le aiga i afiafi o Aso Gafua taitasi i le taimi ua faatulagaina,” na faamatala mai e Paulo, ma tautino e faapea: “Peitai e masani lava ona lē taulau.” I le avea ma se toeaina tofia i lana faapotopotoga, e iai nisi o taimi e toesea ai o ia e taulimaina ni mataupu faanatinati. O lana fanau matutua e toalua e auauna o ni faifeau faataimi atoa. Na la iloa ai o afiafi o taimi lelei ia e fesootai atu ai tagata i le faiva. O lea, i le avea o se aiga, ua latou fetuutuunaia ai le taimi mo la latou suesuega faaleaiga. “I nisi taimi e faia ai la matou suesuega i le taimi lava e maeʻa ai la matou meaʻai i le afiafi,” ua faamatala mai ai e Paulo.

E ui lava ua faataitaia ma le atamai e mātua le fetuunaia lea o taimi o a latou suesuega faaleaiga, ae latou te taumafai lava e tausisia le faia e lē aunoa. Na matauina e le teine o Clare e faapea: “Pe afai ua tatau ona suia le taimi o la matou suesuega, e masani lava ona faapipii e Tamā le taimi fou lea ua sui i ai i le faitotoa o le pusa aisa, ina ia matou iloa uma le taimi o le a faia ai.”

O le faatasitasi ai mo le suesuega faale-Tusi Paia a le aiga e lē aunoa ua saunia ai foi se avanoa lelei mo sui laiti o le aiga e faailoa atu ai o latou popolega ma o latou faafitauli i o latou mātua. O lena suesuega e aumaia ai ni iuga lelei pe afai o le a lē soona pipii atu i le tulaga e masani ai, lea e na ona faitau saʻo mai ai e ē iti ia tali i fesili o loo i lomiga faale-Tusi Paia o loo latou faaaogaina. “O a matou suesuega faaleaiga o se auala lea mo talanoaga,” na faamatalaina mai ai e Matini o lē e toalua ona atalii. Na ia faaopoopo mai: “Pe a outou faatasitasi e talanoaina se mataupu faale-Tusi Paia e faatasi i le vaiaso, e te iloaina ai le tulaga faaleagaga o loo iai lo outou aiga. E aliaʻe ai le tele o mea eseese i le talanoaga. E te iloa ai mea o loo tutupu i le aʻoga, ma e sili atu ona lelei, o le a e iloaina ai uiga o loo atiina ae e lau fanau.” Na ioe lana avā, o Sandra, ma lona lagona faapea e tele foi mea ua ia iloaina mai i le suesuega faaleaiga. Na ia taʻua mai: “A o faia e laʻu tane le suesuega, ou te aʻoaʻoina ai le tele o mea i le faalogologo atu i le auala e taliina ai e laʻu fanau tama ia ana fesili.” Ona toe faaopoopo atu lea o Sandra e fesoasoani ai i lana fanau. Na sili atu ona ia olioli i le suesuega ona sa ia auai ai ma le uigā. Ioe, o taimi o suesuega faaleaiga o se avanoa lelei lea e iloa ai e mātua mea o loo mafaufau i ai a latou fanau.—Faataoto 16:23; 20:5.

Ia Fetuutuunai ma ia Finafinau

Pe a oo mai i le taimi o la outou suesuega faaleaiga, e mafai ona e iloaina ai o le tasi tamaitiiti e mataalia ma naunau, ae o le isi e manaomia ona faaoleole ina ia uaʻi ma mauaina ai aogā. Ua faapea mai se tasi tinā Kerisiano: “O le olaga lena faaleaiga! E te iloaina le mea e tatau ona e faia o se matua. O lea pe afai e te maumauai i le faia o le suesuega faaleaiga, e fesoasoani mai Ieova ma aumaia ai iuga lelei.”

Atonu o le umi e uaʻi atu ai se tamaitiiti e ono telē le eseesega e tusa ai ma ona tausaga. O le matua e magafagafa, e ao ona vaavaai totoʻa i lenei mea. O se tasi ulugalii e toalima lana fanau, e i le va o le 6 i le 20 ma ona tupu tausaga le matutua. Na faapea mai le tamā, o Mikaele: “Tuu i ē pito sili ona laiti le avanoa e tali muamua mai ai i fesili. Ona tuu atu lea i tamaiti matutua e faaopoopo mai ma aumai manatu na latou sauniuni i ai.” O lenei auala magafagafa i le feagai ai ma a latou fanau e uunaia ai mātua e aʻoaʻoina le aogā o le manatunatu i isi. Na faapea mai Matini: “O le isi a ma tama atonu o loo malamalama, peitai o le isi tama e manaomia se fesoasoani tele ina ia malamalama ai i le manatu. Na oʻu iloaina ai o le suesuega ua avea o se auala e toleni ai mo le faataitaia o le onosai faa-Kerisiano ma isi fua o le agaga.”—Kalatia 5:22, 23; Filipi 2:4.

Ia sauniuni e faamasani lau fanau i tomai eseese ma le matutua ua iai. O Simona ma Mareko, ua talavou i le taimi nei, na iloaina a o la laiti sa la matuā olioli lava i le suesueina o le tusi Le Tagata Silisili o Ē Uma na Soifua Mai ma o la mātua. Na la manatuaina faapea: “Na matou faatinoina ma lo ma tamā vaega eseese na matou faitauina e pei lava o se tala.” E manatua pea e lo la tamā lona tootuli ifo e faatino le faataoto o le tuaoi Samaria ma ona atalii. (Luka 10:30-35) “O se mea moni ma e ese le mālie.”

O le toatele o tamaiti latou te tetee atu i le faasologa o le suesuega a le aiga. Pe e tatau ai ea la i lenei mea ona taofia ai mātua mai le faia o le suesuega pe a ua fuafuaina? Leai, e mautinoa e lē tatau. Ua tautino mai e faapea le Faataoto 22:15: “Ua fusifusia le valea i le loto o le tama [po o, le teine].” Na manatu se tasi o tinā nofo toatasi e faapea na ia lē taulau i le avea o sē faia le suesuega, i le tele o taimi, pe a faalavelavea e ni tuatuagia le talanoaga. Peitai sa ia finafinau lava. I le taimi nei, ua matuā faaaloalo atu lana fanau mo ia ma ua oo ina faatāuaina le alofa ma le manatu mamafa lea sa faaalia e ia e ala i le maumauai i le faia o le suesuega a le aiga e lē aunoa.

Fesoasoani i Tama ma Teine “Mātua Oti”

O toeaina Kerisiano e ao ona “leoleo i le lafu mamoe a le Atua.” (1 Peteru 5:2, 3) O asiasiga faavaitaimi i aiga i a latou faapotopotoga ua ofoina atu ai ia i latou avanoa e faamālō atu ai i mātua o loo soosoo tauʻau i o la tiute tauave faa-Kerisiano. O ai e gafa ma le matafaioi o le aʻoaʻoina o fanau a matua nonofo taitoatasi? Aua neʻi galo o le matafaioi mo le aʻoaʻoina o fanau e paʻū atu lea i le matua.

O le faautauta faa-Kerisiano o le a fesoasoani i toeaina e alofia ia tulaga e ono tulai mai lea e ono solia ai mataupu silisili pe afai latou te tauaveina le avega tauave a le matua ua toesea. E ui e toalua uso e ono mafai ona asiasi atu i se tuafafine Kerisiano o se matua nofo toatasi, ae o le a la iloiloina ma le faaeteete i taimi uma mea o loo la fuafuaina i le auala e lagolagoina ai le faatulagaga mo le suesuega faaleaiga. I nisi taimi, o le valaaulia o le fanau, (faapena foi ma le matua nofo toatasi) e auai atu i le suesuega a le aiga o le toeaina lava atonu e faamaonia ai le atiina ae ma le aogā. Peitai, aua neʻi galo o Ieova o lo tatou Tamā sili faalelagi. E mautinoa lona faatasi ai e taitaiina ma fesoasoani atu i le tinā pe a ia faia se suesuega ma lana fanau, tusa lava pe faia na o ia.

Ae faapefea le tulaga o se tagata talavou e fiafia i mea faaleagaga, ae o ona mātua e itiiti pe leai so la faaalia o le manatu mamafa mo lo la matafaioi faaleagaga? O auauna faamaoni a Ieova e manaomia ona lē taitai ona lotovaivai. “O le ua tigaina e tuuina o ia e ia ia te oe [Ieova le Atua]; o oe lava o le fesoasoani o le ua mātuaoti,” na pese ai le faisalamo. (Salamo 10:14) I le isi itu, o toeaina alolofa o le faapotopotoga o le a faia le mea sili latou te mafai e faalaeiauina ai mātua a o latou tausia a latou fanau. Latou te ono fautuaina se talanoaga faaleaiga ma auai e ofoina atu ni fautuaga aogā i le auala e suesue ai faatasi. O le mea moni, o le a latou lē aveeseina mai le matafaioi a mātua, o ē e ana le tiute tauave faale-Tusi Paia.

E manaomia le matuā lagolagosua atu i fanau e lē talitonu o latou mātua. Atonu e aogā le faaaofia o i latou i la outou suesuega faaleaiga pe afai e ioe i ai o latou mātua. O Ropati, lē ua avea nei ma tagata matua fai aiga, na auai atu i sauniga faa-Kerisiano ma ona mātua ina ua faatoʻā tolu ona tausaga. E na te manatuaina pea ma le fiafia na sauniga e oo lava i le taimi ua lē toe aufaatasi atu ai ona mātua i le faapotopotoga Kerisiano. Ina ua sefulu ona tausaga, na ia feiloai atu ai i se tamaitiiti Molimau o lē na avea o ia i sauniga. O mātua Molimau o lenei alii sa la fiafia e tausia Ropati i le avea ai o sē mātua oti faaleagaga i lalo o la la vaavaaiga ma mulimuli ane ai suesue ma ia. E faafetaia lenei tausiga alofa, ona na vave ai ona ia faia se agaigai i luma ma ua olioli nei o ia e auauna o se toeaina i totonu o le faapotopotoga.

Tusa lava pe teena e mātua le agaigai i luma o a latou fanau, e lē o tuulafoaiina i latou. E tumau pea le avea o Ieova ma Tamā faalelagi faamaoni. “O le Tamā ia o e ua mātuaoti, . . . o le Atua lea o loo i lona afioaga paia,” ua faapea mai ai le Salamo 68:5. E iloaina e tama ma teine mātua oti faaleagaga e mafai ona latou liliu atu ia te ia i le tatalo, ma o le a ia lagolagoina i latou. (Salamo 55:22; 146:9) O le faalapotopotoga a Ieova e pei o se tinā o loo faataunuuina ma le filigā lana matafaioi i le saunia o meaʻai faaleagaga e matuā olioli ai e ala mai i lomiga ma sauniga i le silia ma le 85,000 o faapotopotoga Kerisiano i le lalolagi aoao. O lea, faatasi ai ma le fesoasoani faaleagaga mai i lo tatou Tamā, o Ieova, ma lana faalapotopotoga e pei o se tina, e oo lava i ē “mātuaoti” o le a olioli i le tele o suesuega faale-Tusi Paia.

O mātua Kerisiano o loo faia suesuega faale-Tusi Paia e lē aunoa ma a latou fanau ua tatau i ai le faamālō. O mātua nofo toatasi o loo finafinau i le toleniina o a latou fanau iti i ala o Ieova ua talafeagai i ai se faamālō faapitoa ma viiviia mo a latou taumafaiga. (Faataoto 22:6) O i latou uma e faaalia le manatu mamafa mo fanau mātuaoti faaleagaga e iloa faapea e faafiafiaina ai lo tatou Tamā faalelagi o Ieova. O le tausia o manaoga faaleagaga o se aiga o se avega tauave mamafa. Ae ʻaua neʻi faapalapala, auā o ona po e tatau ai tatou te selesele mai ai, pe afai tatou te le faavaivai.’—Kalatia 6:9.

[Faaopoopoga i lalo]

[Ata i le itulau 23]

O se suesuega faaleaiga e saunia ai se avanoa lelei mo sui laiti o le aiga e faailoa atu ai i o latou mātua o latou popolega

[Ē Ana le Ata i le itulau 20]

Harper’s