Lalolagi—Aisea ua Iai Ai?

E iai se fesili e manaomia ona e iloiloina: Pe na saunia ea lo tatou paneta matagofie e sē na Foafoaina Mea e atamai, o lē e iai sana fuafuaga mo le lalolagi ma tagata o iai? O le faamautinoaina o lena mataupu ina ia faamalieina ai lou lava loto, ua mafai ona fesoasoani ia te oe e te iloaina ai le mea o taofia e le lumanai mo lo tatou paneta.

E TOATELE saienitisi o ē suesue loloto i le vateatea ma lo tatou lalolagi ua vaaia faamaoniga e faasino atu i le soifua o Lē na Foafoaina Mea, ma o le Atua na faia nei mea uma. Seʻi mātau faamatalaga mai se tasi o i latou:

Ua tusia e le polofesa o Paul Davies i le tusi, The Mind of God e faapea: “O le iai o se vateatea e maopoopo ma sologa lelei, e iai ni fausaga lavelave e tumau ma maopoopo, e manaomia ai ni tulafono ma ni tulaga e matuā faapitoa lava.”

Ina ua uma ona talanoaina “le iai ona o le fetaui o mea na tutupu” faatasi, e pei ona mātauina e tagata suesue i le vateatea ma nisi saienitisi, ona faaopoopo mai ai lea o le polofesa o Davies e faapea: “I le iloiloina o nei mea uma, ua latou saunia mai ai se faamaoniga e maofa ai e faapea, o le ola e pei ona tatou iloa ai, e faalagolago atoatoa atu i tulafono tau le kalave po o malosiaga, faapea ma nisi o mea e foliga mai e tutupu faafuasei i tulafono moni tau malosiaga, ua filifilia e le natura mo le tele o vaega eseese e maua ai le telē, le malosi, le saoasaoa, ma isi mea faapena. . . . Ana seʻi mafai ona tatou faia le vaega a le Atua, ma filifilia ni malosiaga mo nei mea uma e tutupu faafuasei i le tau lava ina oomi o se seti o ni ki, o le a tatou iloa ai e toetoe lava o ki uma ua fuafuaina, o le a lē mafai ona toe maua ai se ola i le vateatea. I nisi o tulaga e foliga mai e pei lava ua matuā faatonutonuina lelei ma le matuā faaeteete ia ki eseese pe afai e mananao ia avea le vateatea ma nofoaga e faapena ona mafai ona uluola ai meaola o iai. . . . O le mea moni e oo lava i le faia o ni nai suiga laitiiti i le auala o loo faatulaga ai mea, e ono mafai ona lē mātauina ai e tagata le vateatea, e mautinoa lava o se mea moni e sili ona tāua.”

O le mea ua ia faailoa atu i le toatele o tagata e faapea, o lo tatou lalolagi faatasi ma le vateatea aoao, na saunia lea e Lē na Foafoaina Mea e iai ni ana fuafuaga. Afai o lea, e manaomia la ona tatou sailia po o le ā le mafuaaga na ia faia ai le lalolagi i le amataga. E manaomia foi ona tatou faamautinoaina, pe a mafai, po o le ā lana fuafuaga mo le lalolagi. I lenei fesootaiga, ua aliali mai ai se tulaga e peiseai e lē fetaui. E ui i le taatele o le manatu o le lē talitonu i le Atua, ae o le mea e maofa ai, o loo toatele pea le faitau aofai o tagata o loo tumau pea ona talitonu i Lē na Foafoaina Mea e sili ona atamai. O le tele o lotu a Kerisinetoma ua na ona taʻua lava le iai o se Atua e ona le malosi uma lava ma o Lē na Foafoaina lo tatou vateatea. Ae peitai, e seāseā lava ona talanoa ma le mautinoa ma talitonu se tasi o nei lotu e uiga i le lumanai o le lalolagi i fuafuaga a le Atua.

O le ā o Fai Mai ai le Tusi Paia?

O se faiga talafeagai le vaavaai atu i se puna o faamatalaga e talitonuina e tagata uma e faapea e sau mai Lē na Foafoaina Mea. O lena puna, o le Tusi Paia lea. O se tasi o faamatalaga aupito faigofie ma aupito manino o loo iai e faatatau i le lumanai o lo tatou lalolagi, o loo maua lea i le Failauga 1:4. E tatou te faitau ai e faapea: “E mavae atu le tasi tupulaga, a e sau le tasi tupulaga; a o le lalolagi e tumau lea e faavavau.” E matuā saʻolele lava le Tusi Paia i le faamatalaina o le mafuaaga na foafoaina ai e Ieova le Atua le lalolagi. Ua faaalia ai foi i lea e faapea, na ia tuuina le lalolagi i lona tulaga saʻo lelei i le vateatea ma e vasaga lelei foi ma lo tatou lā ina ia mafai ona maua ai pea le ola i le lalolagi. Na faagaeeina e le Atua e Ona le Malosi Uma Lava le perofeta anamua o Isaia e tusi e faapea: “Auā o loo faapea ona fetalai mai o Ieova, o le na faia le lagi; o ia lava o le Atua; o le tufuga o le na faia le lalolagi; o ia na faatumauina; na ia le faia fua, na ia faia ina ia āina, o aʻu o Ieova, a e leai se tasi.”—Isaia 45:18.

Ae faapefea taumafaiga a tagata e gaosia mea e faaumatia ai ola uma o i le lalolagi? I lona atamai e lē mafaatusalia, ua faalauiloa mai ai e le Atua e faapea, o le a ia faalaa mai a o lei mafai e tagata ona faaumatia ola uma o iai i lo tatou paneta. Mātau lenei folafolaga mautinoa o loo i le Faaaliga, le tusi mulimuli o le Tusi Paia e faapea: “Ua ita foi nuu, ona oo mai lea o lou toasa, ma ona po e faamasinoina ai e ua oti, ma taui ai i au auauna le au perofeta, ma le au paia, ma e ua matatau i lou suafa, o tagatānuu atoa ma alii, e fano ai foi i latou o e na fano ai le lalolagi.”—Faaaliga 11:18.

Ua faailoa mai e Ieova ia i tatou po o le ā lana uluai fuafuaga na foafoaina ai le lalolagi, lenei maatāua o loo i le vateatea, e pei ona faamatalaina ai e se tagata suesue i le vateatea na lele faataamilo i le lalolagi. Na fuafuaina e le Atua le lalolagi ia avea ma parataiso faalelalolagi e mafai ona aināina ma le olioli e tagata—o tane ma fafine—i latou uma lava o le a ola ai i le filemu ma le autasi. Sa ia fuafuaina ina ia mulimuli ane faatumuina le lalolagi e ala i le faatagaina o le uluai ulugalii ina ia fanauina mai ni a la fanau. Ina ia maua e le uluai ulugalii le fiafia ma le olioli, na faia ai e Ieova se vaega laitiiti lava o le lalolagi e avea ma parataiso. A o agaʻi ina faatoateleina aiga faaletagata i le faagasologa o tausaga ma senituri, o le a auaumalie foi ona faalauteleina atu le faatoaga o Etena seia oo ina faataunuuina le Kenese 1:28: “Ua fetalai atu le Atua ia te i laua, Ia fanafanau ia, ma ia uluola, ma ia tumu ai le lalolagi, ia faatoilalo i ai.”

E pei ona tatou vāai nei i le tulaga faanoanoa ua iai le lalolagi ma mea o aināina, po o lona uiga ea la ua lē taulau le uluai fuafuaga a le Atua mo le lalolagi? Po ua suia foi lana fuafuaga ma filifili ai e faapea, ona o le fouvale o le tagata, o le a ia faatagaina ai le paneta ina ia faaumatia atoatoa ma toe amata, e pei ona manatu ai? E leai, e mafai ona tatou mautinoa, e leai lava se mea e saʻo o na mea. Ua faailoa mai e le Tusi Paia ia i tatou e faapea, o le mea lava ua fuafuaina e Ieova, e oo lava ina faataunuuina i se taimi mulimuli ane, po o le ā lava le mea ua ia filifili e fai, e lē mafai e se tagata ona faaleaogaina, e oo lava i se mea e tupu e faafuasei. Ua ia faamautinoaina i tatou e faapea: “E faapea foi laʻu upu e alu atu ai loʻu gutu, e le foi mai fua ia te au; a e peitai e faia le mea ou te loto i ai, e manuia foi i le mea ou te auina atu ai.”—Isaia 55:11.

Ua Faalavelavea le Fuafuaga a le Atua, ae Lei Suia

Ona o le lē usiusitai o Atamu ma Eva ma le tuliesea mai o i laʻua mai le faatoaga o Etena, na manino mai ai o le fuafuaga a le Atua mo se lalolagi parataiso, o le a faataunuuina lava e aunoa ma i laʻua. Ae peitai, na faailoa ai e Ieova iina ma e iai le taimi e faapea, o le a faaauauina e nisi o le la fanau le faataunuuina o lana uluai poloaiga. E moni, e alu ai se taimi umi po o le tele foi o senituri, ae e leai se faailoaga o taʻu mai ai po o le ā le umi o le taimi o le a aafia ai i le faataunuuina o le uluai poloaiga e tusa lava pe sa faaauau uma e Atamu ma Eva ona ola lelei atoatoa. O le mea moni e faapea, e oo atu i le faaiuga o le Pulega Faameleniuma a Iesu Keriso—ua sili laitiiti atu i le afe tausaga mai le taimi nei—o le a faalauteleina atu ai le tulaga o le Parataiso o Etena i le lalolagi aoao ma o le a faatumuina le Lalolagi paneta i fanau fiafia ma olioli a le uluai ulugalii. E moni lava, o le tomai o Ieova i le avea o Sē Fai Fuafuaga lē masese, o le a faasilisilia lava e faavavau!

Ona faataunuuina ai lea o valoaga faaoso fiafia na faagaeeina e le Atua i le tele o tausaga ua mavae. O mau e pei o le Isaia 11:6-9 o le a faataunuuina i se tulaga matagofie: “E nofo faatasi le luko ma le tamai mamoe, e taoto foi le nameri faatasi ma le tamai ʻoti; e faatasi foi le tamai povi ma le leona taanoa atoa ma le manu peti, e taʻitaʻiina foi i latou e le tama itiiti. E aai faatasi le povi fafine ma le urosa, e taooto faatasi a laua tama; e ʻai foi e le leona ʻau o saito pei o le povi. E taalo foi le tama e lei teʻa ma le susu i le lua o le asipi, o le tama foi ua teʻa ma le susu, e tuu e ia lona lima i le lua o le gata uogo. Latou te le faia se mea leaga, latou te le faaumatia foi se mea i loʻu mauga paia uma; auā e tumu le lalolagi i le malamalama o Ieova, e pei ona ufitia o le iliti tai i le suāsami.”

O le lē lelei o le soifua maloloina ma maʻi e oo ai le oti o le a mavae, e faapea foi le oti. Pe e iai se mea e sili atu ona manino e pei o na upu faigofie o loo maua i le tusi mulimuli o le Tusi Paia? “Faauta, ua faatasi ma tagata le fale fetafai o le Atua, e mau foi o ia ma i latou; e fai foi i latou mona nuu, e ia te i latou le Atua lava, o lo latou Atua ia. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Faaaliga 21:3, 4.

Ioe, ia tatou loto tetele—o lo tatou Lalolagi paneta matagofie na fuafuaina ina ia tumau. Tau ia ina avea o se faaeaga mo oe le faasaoina atu mai le faaiuga o lenei faiga amioleaga o mea, atoa ma ana faiga uma ua faaleagaina ai le lalolagi. Ua matuā latalata mai lava le lalolagi fou mamā ua faia e le Atua. Ma o le toatele o ē pele o le a toe fagua mai le oti e ala i le vavega o le toetu. (Ioane 5:28, 29) E moni, ua iai lo tatou lalolagi ina ia faatumauina, ma e mafai ona tatou nonofo ai pea ma olioli ai.