Po Ua Lē Maalofia Ea le Lē Faamasinotonu?

“E ui i mea uma ua tutupu, ae ou te talitonu pea o loo matuā lelei lava loto o tagata. E lē mafai ona ou faatupuina ni oʻu faamoemoega i luga o se faavae o loo iai le fenuminumiai, o mafatiaga, ma le oti.”—Anne Frank.

O ANNE FRANK, o se teine talavou Iutaia e 15 ona tausaga, na ia tusiaina na upu faamomoiloto i lana tusi e faamaumau ai ana gaoioiga o aso taitasi (diary) a o toeitiiti lava oo i lona oti. E silia i le lua tausaga o lalafi lona aiga, i luga i se tamai potu i le tumutumu o se fale i Amsterdam. O ona faamoemoega mo se lalolagi e sili atu ona lelei na matuā taape uma ina ua faailoaina atu i Nasi e se tamaloa le mea sa latou lalafi ai. I le tausaga na sosoo ai, i le 1945, na oti ai Anne i le maʻi o le typhus i le nofoaga o faasalaga mamafa i Bergen-Belsen. E ono miliona isi tagata Iutaia na puapuagatia i se mala foi faapena.

O le faufauga sili ona leaga a Hitila ina ia fasiotia uma tagata o se ituaiga, atonu o se mea sili lea ona leaga i faiga faailoga ituaiga ua vaaia i lo tatou senituri, peitai e lē na o le pau lena. I le 1994, e silia i le ʻafa miliona tagata Tutsi na fasiotia i Rwanda, i le na o le pau le mafuaaga ona sa “ese” le ituaiga e tupuga mai ai. Ma a o faagasolo le Taua Muamua a le Lalolagi, e tusa ma le miliona tagata Armenia na maliliu i se feteenaiga i le va o ituaiga.

Vala Sili Ona Matautia o le Lē Faamasinotonu

O fefasiotiga i le va o ituaiga e lē na o le pau lena o le vala o le lē faamasinotonu. O faiga lē faamasinotonu i le soifuaga lautele ua matuā malaia ai le tusa o le tasivaelima o le fanau a tagata i le olaga mativa. O se isi mea ua sili atu ona leaga, ua faapea mai se vaega e faatāuaina aiā tatau a tagata ae tetee i faiga faapologa, e taʻua o le Anti-Slavery International, e silia i le 200,000,000 le aofai o tagata o loo i noanoataga o le pologa. Atonu ua sili atu ona toatele pologa i le lalolagi i aso nei nai lo o se isi lava taimi i le talafaasolopito. Atonu e lē o faatauina atu i latou i se faiga faatautuʻi i le lautele, peitai o tulaga o loo latou galulue ai ua sili atu ona leaga nai lo o tulaga sa iai le toatele o pologa i taimi anamua.

O faiga lē faamasinotonu faaletulafono ua aveesea ai aiā tatau a le faitau miliona o tagata. “O le solia o aiā tatau a tagata ua faia e toetoe lava o aso uma, i so o se vaipanoa o le lalolagi,” o le faamatalaga lea a le faalapotopotoga faava-o-malo o saʻolotoga a tagata taitoatasi (Amnesty International) i lana lipoti o le 1996. “O ē o loo sili ona aafia gofie ai o ē matitiva ma i latou ua lē tagolima, ae maise lava fafine, tamaiti, toeaiina ma loomatutua ma tagata sulufai.” Na taʻua e le lipoti: “I nisi atunuu, ua toetoe lava malepe ifo faavae o se malo, ma leai ai ni pulega faaletulafono e puipuia tagata vaivai mai ē malolosi.”

A o faagasolo le 1996, e faitau sefulu o afe i le silia i le selau atunuu na faasalaina ma fasiotia faamoʻamoʻa. Ma i tausaga talu ai nei, e faitau selau afe tagata e faafuaseʻi lava ona leiloloa, e foliga mai ua ave faamalosi a lē e vaega o leoleo e puipuia le saogalemu (security forces) po o vaega a tagata faatupu faalavelave. O le toatele o na tagata ua manatu i ai ua maliliu.

O le mea moni lava, o taua, e lē o ni mea saʻo, peitai o loo faateteleina ona iai i lea tulaga. O faiga taua i ona po nei o loo aafia ai tagata lautele, e aofia ai fafine ma tamaiti. Ma o lenei mea ua lē na o le pomuina o aai i faiga soonafai ua māfua ai. O loo faifai pea foi ona tatosoina faamalosi fafine ma teine i gaoioiga faavaegaʻau, ma e tele vaega tetee i le faiga malo ua latou ave faamalosi tamaiti ina ia toleni e fasiotia tagata. E tusa ai o se faamatalaga i na faiga, ua taʻua e le lipoti a Malo Aufaatasi sa faaulutalaina “Aafiaga o Fetauaiga Faaauupegaina i Tamaiti”: “Ua faatoateleina pea lava pea le aofaiga o tagata o le lalolagi ua aunoa ma ni amioga mamā.”

E leai se masalomia o lenei faaleagaina i amioga tatau ua maua mai ai se lalolagi ua tumu i le lē faamasinotonu—i lanu, i tulaga faaleolaga nei, i tulafono, po o vaegaʻau. O le mea moni, e lē fou lenei mea. I le silia i le luaafe limaselau tausaga ua mavae, na auē mai ai se perofeta Eperu e faapea: “Ua faaleaogaina . . . le tulafono, ua le faia foi le faamasinoga faamaoni; auā ua siosioina le ua amiotonu e le ua amio leaga, o le mea lea ua fai ai le faamasinoga faapiopio.” (Sapakuka 1:4) E ui ua leva ona taatele le lē faamasinotonu, ae tatau lava ona matilatila mai le 20 senituri o le vaitaimi lea ua oo atu ai le lē faamasinotonu i ona ooooga fou.

Pe Afaina le Lē Faamasinotonu?

E afaina pe afai o oe tonu lea ua pagatia ona o le lē faamasinotonu. E afaina ona ua faaleagaina ai le aiā a le toatele o tagata e maua ai lo latou fiafiaga. E afaina foi ona o le lē faamasinotonu ua masani ona tupu mai ai fetauaiga faamasaatoto, lea e atili ai ona faateteleina pea le lē faamasinotonu.

Ua matuā mausalī le fusia faatasi o le filemu ma le fiafia i le faamasinotonu, peitai o le lē faamasinotonu e tafiesea ai faamoemoega ma faaleaogaina ai vaaiga mautinoa. E pei lava ona iloa ma le faanoanoa e Anne Frank, e lē mafai e tagata ona faatupuina ni o latou faamoemoega i luga o se faavae o loo iai le fenuminumiai, o mafatiaga, ma le oti. I le pei o ia, tatou te faanaunau uma lava mo se mea e sili atu ona lelei.

O lenei faanaunauga ua taumafai ai tagata loto faamaoni ina ia maua sina faamasinotonu i le soifuaga masani o tagata. Ona o lena fuafuaga, ua faapea mai le Faalauiloaga Aoao o Aiā Tatau a Tagata, lea na talia i le 1948 e le Fono Aoao a Malo Aufaatasi: “O tagata uma lava na fananau mai e saʻoloto ma tutusa uma i o latou tulaga mamalu ma aiā tatau. Ua tuuina atu ia i latou mafuaaga ma se loto fuatiaifo ma e tatau ona gaoioi le tasi i le isi i se agaga alofa faaleuso.”

E mautinoa le mamalu o na upu, ae o loo mamao ese lava tagata mai le faatinoina o lena sini matagofie—se sosaiete faimea tonu o loo olioli ai tagata taitoatasi i aiā tutusa ma fegalegaleai tagata uma o se auuso e tasi. O le faatinoina o lenei sini, e pei ona faasino atu i ai upu tomua o le Faalauiloaga a Malo Aufaatasi, o le a avea o “le faavae o le saʻolotoga, le faamasinotonu, ma le filemu i le lalolagi.”

Po o le faamasinotonu ea ua matuā mautu o se vaega o le sosaiete faaletagata, e lē tāitai ai ona faamamāeseina? Pe o le a faavaeina lava se faavae mautū mo le saʻolotoga, le faamasinotonu, ma le filemu? Afai o le tulaga lena, o ai e mafai ona ia faatulagaina lena faavae ma faamautinoa o le a manuia ai tagata uma?

[Ē Ana le Ata i le itulau 3]

UPI/Corbis-Bettmann