Ua Iu Lava—Ina Iai le Faamasinogatonu mo Tagata Uma

“O le a matuā tauivi la matou pulega e faalogologo atu i ni auala fou . . . i leo o le puapuagatia, i leo o le fememeai, i leo ua mafatia ona o le lē uaʻi atu. . . . O le mea e manaomia, o le faatino loa o mea ua uma ona tusitusia i le tulafono: ia faamautinoa ai loa, e pei ona fananau mai tagata uma e tutusa lo latou mamalu i le silafaga a le Atua, e tatau foi ona faapena le tutusa uma o lo latou mamalu i le vaaiga a tagata.”—Le lauga a le peresitene o le Iunaite Setete o Richard Milhous Nixon, i le amataga o lana pulega ia Ianuari 20, 1969.

PE A tulai mai i tofiga ni tupu, ni peresitene, ma ni palemia, latou te masani lava ona talanoa e uiga i le faamasinotonu. Sa lei ese mai ai lē na avea muamua ma peresitene o le Iunaite Setete, o Richard Nixon. Peitai na mou atu le uigā o ana upu logomālie a o matauina le tulaga moni na iai le talafaasolopito. E ui i sana tautoga mai e ‘faatino le tulafono,’ ae na mulimuli ane nofosala Nixon i lona solia o le tulafono ma faamalosia ai ona faatulai ese mai lona tofiga. I le tolusefulu tausaga mulimuli ane, sa matuā lagonaina pea ‘leo o le puapuagatia, le fememeai, ma le mafatia.’

O le faalogologo atu i na leo ma le tau foiaina o o latou mafatiaga e lē o se galuega faigofie, e pei ona iloa nei e le anoano o taʻitaʻi o loo faanaunau mo se lelei. ‘O le faamasinotonu mo tagata uma’ ua faamaonia o se sini e faigata ona faataunuuina. E ui i lea, i le tele o senituri ua tuanai atu, sa faia ai se folafolaga e aogā ona tatou uaʻi atu i ai—o se folafolaga tutasi e faatatau i le faamasinotonu.

E ala i lana perofeta o Isaia, ua faamautinoa ai e le Atua i Ona tagata e faapea, o le a ia auina mai mo i latou se “auauna” o le a tofia lava e ia. Na fetalai Ieova ia i latou: “Ua ou tuuina atu loʻu Agaga i ona luga; na te avatua le faamasinoga [“tonu,” NW] mo nuu ese.” (Isaia 42:1-3) E leai se pule faaletagata e mafai ona fai maia se folafolaga mataina faapena, o se folafolaga o le a uiga i se faamasinotonu e faavavau mo nuu uma. Pe mafai ea ona maufaatuatuaina lenei folafolaga? Pe mafai ona taunuu moni se sini uigaese faapena?

Se Folafolaga e Mafai Ona Tatou Maufaatuatuaina

E gata le maufaatuatuaina o se folafolaga i le talitonuina o le tagata na faia mai. I lena la itu, e leai lava se isi nai lo o le Atua e Ona le Malosi Uma o lē na folafola mai faapea, o le a faamautūina e lana “auauna” le faamasinogatonu i le lalolagi aoao. I le lē pei o le ʻau faipolotiki, e lē manatu māmā Ieova i ana folafolaga. ‘E lē mafai ona pepelo o ia,’ ua taʻutino mai ai e le Tusi Paia ia i tatou. (Eperu 6:18) “E pei ona ou manatu e faapea lava ona taunuu,” ua matuā faamamafa mai ai e le Atua.—Isaia 14:24.

O lo tatou mautinoa i lena folafolaga ua faamausalīina foi e le talaaga o le “auauna” na filifilia a le Atua, o Iesu Keriso. O ia o lē o le a faamautūina le faamasinotonu e tatau ona alofa i le faamasinotonu ma ola aʻe e tusa ai. Na faataatia e Iesu se talaaga lē ponā o se tagata e ‘fiafia [alofa] i le amiotonu ae ʻinoʻino i le amioleaga.’ (Eperu 1:9) O mea na ia fetalai ai, o le auala na ia soifua ai, ma le auala foi na ia maliu ai, o mea uma na e faamaonia ai o ia moni o se tagata amiotonu. I le maliu o Iesu, na faagaeetia ai se fitafita Roma, o lē e foliga sa ia molimauina le faamasinoga o Iesu ma lona faasalaina, e faapea mai: “E moni, o le tagata amiotonu lenei.”—Luka 23:47.

E ese mai lona ola lava o ia i se olaga amiotonu, ae na lē talia foi e Iesu faiga lē faamasinotonu sa taatele i ona aso. Na te lei faia lena mea, i ni teteega po o ni fouvalega, ae ala i lona aʻoaʻo atu o le faamasinotonu moni i tagata uma o ē na faalogologo ia te ia. O lana Lauga i luga o le Mauga o se faamalamalamaga sili lena o le auala e tatau ona faatino ai le faamasinotonu ma le amiotonu.—Mataio, mataupu 5-7.

Na faatino e Iesu mea na ia talaʻia. Sa lei ʻinoʻino o ia i lepela matitiva, o “ē sa lē mafai ona paʻi” atu i ai tagata Iutaia. Nai lo lea, na ia talanoa atu ia i latou, paʻi atu ia i latou, ma oo foi lava ina faamaloloina i latou. (Mareko 1:40-42) O tagata uma na ia feiloai atu i ai, e iai tagata matitiva ma ē puapuagatia, sa tāua uma ia te ia. (Mataio 9:36) Na ia fetalai atu ia i latou: “Ia outou o mai ia te au, o outou uma o e tigaina ma mafatia i avega, o aʻu foi e malolo ai outou.”—Mataio 11:28.

Ae o le sili o na mea uma, na lē faatagaina e Iesu faiga lē faamasinotonu sa faia i ona taimi e faaaafia pe faatiga ai lona finagalo. Sa lē tāitai ona ia taui atu le leaga i le leaga. (1 Peteru 2:22, 23) E oo lava i le taimi o ona tiga matuitui, sa ia tatalo atu i lona Tamā faalelagi mo se lelei o fitafita tonu lava ia na faasatauroina o ia. Na ia aioi atu: “Loʻu Tamā e, ia e faamagaloina atu ia te i latou; auā ua latou le iloa le mea ua latou faia.” (Luka 23:34) E mautinoa, ‘sa faamanino lelei atu e Iesu i nuu uma le uiga moni o le faamasinogatonu.’ (Mataio 12:18) O le ā la se isi faamaoniga ua tatou maua e sili atu nai lo le faaaoaoga ola a lona lava Alo, e iloa ai o le finagalo o le Atua ia faavaeina se lalolagi fai mea tonu?

E Mafai Ona Manumalo i le Lē Faamasinotonu

Ua iai foi i le lalolagi i aso nei faamaoniga moni e iloa ai e mafai ona manumalo i le lē faamasinotonu. Ua tauivi malosi Molimau a Ieova o ni tagata taitoatasi, ma o se faalapotopotoga, e faatoilaloina faiga faaituau, faailogalanu, feitagaiga i le va o ituaiga, ma faiga sauā. Seʻi manatu i le faaaoaoga o loo mulimuli mai.

Sa talitonu Pedroa o le faia o gaoioiga tetee ua na o le pau lena o le auala e aumai ai le faamasinotonu i le atunuu o Basque, o se vaipanoa o Sepania sa nofo ai o ia. O le mafuaaga lena na avea ai o ia ma se sui auai o le faalapotopotoga o tagata faatupu faalavelave, ma auina atu ai o ia i Falani mo ni aʻoaʻoga i gaoioiga faavaegaʻau nanā. Ina ua maeʻa ana aʻoaʻoga, na faatonuina o ia e faatulaga se vaega o tagata faatupu faalavelave e faapa se pomu i fale o leoleo. Ua maeʻa ona sauniunia uma e lana vaega pomu e faaaogā ae puʻeina loa o ia e leoleo. E 18 masina o iai o ia i le falepuipui, ae oo lava i na taimi na loka ai, sa faaauau pea ana gaoioiga faapolotiki, e ala i le auai i ni faalāina tetee ma i se tasi taimi na ia taseleiina ai ona tapulima.

Sa iai le talitonuga o Pedro faapea o loo ia tau mo le faamasinotonu. Mulimuli ane na iu ina ia iloa Ieova ma ana fuafuaga. A o iai Pedro i le falepuipui, na amata ona suesueina e lana avā le Tusi Paia ma Molimau a Ieova, ma ina ua tatala mai o ia, sa valaaulia o ia e lana avā ina ia auai i se tasi o a latou sauniga. Na matuā fiafia o ia i le faatasiga o lea na ia talosaga ai loa e faia sana suesuega faale-Tusi Paia, o le suesuega lea na taitaia ai o ia i le faia o suiga tetele i lana vaaiga ma manatu ma le auala na ola ai. O le iuga, i le 1989, na papatiso faatasi ai Pedro ma lana avā.

Ua faapea mai Pedro: “Ou te faafetai ia Ieova ona ou te lei fasiotia lava se tagata i taimi sa avea ai aʻu o se tagata faatupu faalavelave. O lenei ua ou faaaogaina le pelu a le agaga o le Atua, le Tusi Paia lea, e avatu ai i tagata se feau o le filemu moni ma le faamasinotonu—le tala lelei o le Malo o le Atua.” E lei leva tele atu, na toe asiasi atu ai Pedro, o lē ua avea nei o se toeaina o Molimau a Ieova, i fale tonu lava ia sa ia fuafua e faatamaʻia. Ae i lea taimi, sa ia alu atu ma se fuafuaga e talaʻi i ai le feau o le filemu i aiga o loo nonofo ai iina.

Ua faia e Molimau a Ieova nei suiga ona o loo latou moomoo mo se lalolagi amiotonu. (2 Peteru 3:13) E ui ina latou faatuatua aʻiaʻi i le folafolaga a le Atua e aumaia lenei tulaga, ae ua latou iloa foi o la latou matafaioi o le ola ia ogatusa ma lena faamasinotonu. Ua faaalia manino mai e le Tusi Paia ia i tatou e faapea, o loo faatalitalia e le Atua le faia o la tatou vaega.

Luluina Fatu o le Amiotonu

O le mea moni, pe a fesagai ma faiga lē faamasinotonu, tatou te ono fia alaga atu: “O ifea le Atua, o lē faamasino [“tonu,” NW]?” O le alaga lena a tagata Iutaia i aso o Malaki. (Malaki 2:17) Pe na tāua ea i le Atua a latou faitioga? E leai, nai lo lea sa “faatiga” i ona lagona talu ai, e faaopoopo atu i isi mea, o i latou lava foi sa latou faaʻoleʻole i a latou avā o ē ua loomatutua, na latou faateʻa i ai i ni mafuaaga e matuā leai se tāua. Sa faaalia e Ieova lona manatu mamafa i ‘avā na latou faia a o taulealea, o ē na latou faaʻoleʻole i ai, e ui o a latou paaga ia ma avā o a latou feagaiga.’—Malaki 2:14.

Pe mafai ona tatou faitio ma le saʻo i ni faiga lē faamasinotonu pe afai o i tatou lava foi o loo gaoioi ma le lē tonu? Peitai, pe afai tatou te taumafai e faataitai ia Iesu e ala i le liaʻi ese mai o tatou loto o uiga faailogatagata ma feitagaiga i le va o ituaiga, e ala i le lē faailogatagata ae ia alolofa atu i tagata uma, ma e ala i le lē taui atu le leaga i le leaga, ona tatou faaalia ai lea o loo tatou alolofa moni i le faamasinotonu.

Afai tatou te fia seleseleina le faamasinotonu, ua faalaeiauina i tatou e le Tusi Paia ina ia ‘lūlū fatu o le amiotonu.’ (Hosea 10:12) E tusa lava po o le ā le foliga itiiti mai, ae tāua uma lava ni gaoioiga tatou te taitoatasi ma fai ina ia manumalo ai i le lē faamasinotonu. E pei ona tusia e Matini Luteru King, Jr., i lana tusi a o falepuipui sa faaulutalaina Letter From Birmingham Jail, “o le lē faamasinotonu i so o se mea, o se faamataʻuga lea i le faamasinotonu i mea uma.” O i latou o loo “saili le amiotonu” o tagata ia ua filifilia e le Atua e fai mo latou tofi lana lalolagi fou amiotonu ua lē pine ona oo mai lea.—Sefanaia 2:3.

E lē mafai ona tatou faavae aʻe o tatou faamoemoega mo se faamasinotonu i luga o faavae maluelue o folafolaga a tagata, peitai e mafai ona tatou faatuatua i le afioga a Lē na Faia i tatou e alofa. O le pogai lena na fetalai ai Iesu i ona soo ina ia tatalo atu pea mo le Malo o le Atua ia oo mai. (Mataio 6:9, 10) O Iesu, le Tupu tofia o lea Malo, o le a “laveai e ia o lē mativa i lona alaga mai; atoa ma le ua puapuagatia, ma le ua leai sona fesoasoani. E alofa atu ia i le ua vaivai ma le ua mativa; e faaola lava e ia e ua matitiva.”—Salamo 72:12, 13.

E mautinoa lava, e lē faavavau ona iai faiga lē faamasinotonu. O le pulega a Keriso i luga o le lalolagi uma o le a na faatoilaloina e faavavau faiga lē faamasinotonu, e pei ona faamautinoa mai e le Atua ia i tatou e ala i lana perofeta o Ieremia: “E oo mai ona po o le a ou faataunuuina ai le folafolaga na ou folafolaina . . . O ia ona po o le a ou filifilia ai e fai ma tupu lē amiotonu e tupuga mai ia Tavita. O le a faia foi e lena tupu le mea ua tonu ma saʻo i le nuu uma.”—Ieremia 33:14, 15, TEV.

[Faaopoopoga i lalo]