Po o E Mataala i Taimi ua Tatou Iai?
O LE mataala i le tulaga lamatia e mafai ona iloa ai le eseesega i le ola ma le oti. E mafai ona faataitaia lea i le mea na tupu i ni motu se lua e iai mauga mu.
O le mauga o Pelée, lea na avea ma mauga mu sili ona matautia o le senituri lona 20, na pasae aʻe ia Me 8, 1902, i le motu o le Keripiane i Martinique. Na faaumatia ai toetoe lava o le toʻa 30,000 o tagata o Sagato Pierre, o se aai e i le auvaemauga o le mauga mu.
Ia Iuni 1991, na pa ai le mauga o Pinatubo i se tulaga sili ona maoae i lea senituri. Na tupu i se vaipanoa na tele le aofaiga o tagata Filipaina na nonofo ai ma pogai ai le maliliu o le toʻa 900. Ae i le taimi lea, e lua ni vala na fesoasoani i le faasaoina o le faitau afe o ola: (1) o le mataala i le tulaga lamatia ma le (2) lotomalie e gaoioi e ogatusa ma lapataiga.
Gaoioiga Talafeagai na Faasaoina ai Ola
Na toafilemu pea le mauga o Pinatubo mo le faitau selau o tausaga, peitai ina ua oo ia Aperila 1991, na amata loa ona iloa mai ai ni faailoga e iai se taimi o le a sasao ma pa aʻe ai. Na amata ona asuasu aʻe le tumutumu ma amata ona tafe mai ai se lava mai le mauga. Na lagona e ē na nonofo ai i lena vaipanoa ni lūlūga o le eleele, ma o se tulaga leaga e faamataʻu ai na amata ona aliae mai le mauga. Na mataʻituina e saienitisi mai le Iloiloga o Mauga Mu ma Lūlūga o le Eleele a Filipaina mea ia ma oo ai ina faailoa atu i taiulu o le malo e lelei pe a faatulai ese uma mai i latou e toʻa 35,000 o nonofo i nuu tulata ane i le mauga.
E manino le lē malilie o tagata e tuua faafuasei o latou aiga e aunoa ma se mafuaaga, ae na aveesea lea lē fiafia e se ata vitiō na matuā faaalia ai le matuia o le faaleagaina i le pa aʻe o se mauga mu. Na fetaui lelei le sosola ese a le toatele. I le lua aso mulimuli ane, ae pa aʻe loa le mauga ma felelei atu ai efuefu e tusa e lua kupita maila (8 kupita kilomita) le maualuga i le vanimonimo. O tafega o palapala vevela po o le lava mai le mauga mu na mulimuli ane maliliu ai le faitau selau. Peitai, e foliga mai e faitau afe na faasaoina ona na muai mataala tagata i le tulaga lamatia na iai ma gaoioi e ogatusa ma lapataiga.
Faasaoina Mai se Mala Faaletagata
I le uluai senituri o o tatou Aso Taatele, na fesagai ai foi Kerisiano na soifua i Ierusalema ma se filifiliga pe tatau ona latou tuua o latou aiga. O le sosola ese mai lena aai i le 66 T.A. na faasaoina ai i latou mai le faaumatiaga sa oo i isi tagata aumau ma le faitau afe o Iutaia o ē na ō mai i Ierusalema mo le Paseka o le 70 T.A. E silia i le miliona tagata na iai i totonu o lena aai sa papuipui atoa mo le faamanatuina o le Paseka i le taimi na siomia ai e autau a Roma ma leai ai se avanoa e toe sosola ese ai. O le oge, o fetauaiga i le po o ai e pule atoa ai ma osofaiga faifaipea a Roma na iu ai i se otigā tagata e silia ma le miliona.
O le mala na faaiuina le fouvale o Iutaia faasaga ia Roma sa lei tupu e aunoa ma le faailoaina atu muamua. I le faitau sefulu o tausaga muamua atu na valoia ai e Iesu Keriso o le a siosiomia Ierusalema. Na ia fetalai: “A iloa e outou ua siosiomia Ierusalema i ʻau o le taua, ia outou iloa i lea aso ua latalata lona faatafunaina. O lea aso, o e ua i Iutaia ia latou sosola i mauga; o e ua i totonu o lea aai, ia latou o ese; o e ua i le vao foi, aua neʻi latou o atu i totonu o le aai.” (Luka 21:20, 21) Na manino na faatonuga, ma sa matuā usitaia e soo o Iesu.
Ua lipotia mai e le tusitala o talafaasolopito o le senituri lona fa o Eusebius o Kaisareia e faapea, na gaoioi Kerisiano Iutaia uma i le lapataiga a Iesu. Ina ua toe solomuli ʻau a Roma mai la latou uluai siomiaina o Ierusalema i le 66 T.A., e toatele Kerisiano Iutaia na ō ese atu ma mau i le aai o Nuu Ese o Pela, i le itumalo o Roma o Perea. E ala i le mataala e tusa i o latou taimi ma gaoioi e tusa ai ma le lapataiga a Iesu, na sao ai i latou mai le mea ua faamatalaina o se “tasi o osofaiga pito sili atu ona matautia i le talafaasolopito atoa.”
I aso nei, e manaomia ai foi se mataala faapena. E faapena foi i gaoioiga iloga. O le a faamatalaina mai e le mataupu o sosoo ai le mafuaaga.
[Ē Ana le Ata i le itulau 3]
Godo-Foto, West Stock