Se Pule Faamaualuga na Aveesea Lona Malo
NA TUSIA e le perofeta o Tanielu le “faia e Pelesara le tupu le faigāʻai tele ma alii e toaafe sa ia te ia, ua na inu uaina foi i luma o le toaafe.” Peitai, a o faagasolo le faigāʻai tele, “ona liua lea o fofoga o le tupu, ua atuatuvale o ia i lona manatunatu, ua tatalaina sootaga o lona papatua, o ona tulivae foi ua faafetoʻai le tasi i le tasi.” O le po lava lea “na fasiotia ai Pelesara le tupu o Kaletaia. Na maua le malo e Tariu le Metai.”—Tanielu 5:1, 6, 30, 31.
O ai Pelesara? Na faapefea ona taʻua o ia “o le tupu o Kaletaia”? O le ā tonu lava lona tulaga i le Malo o Papelonia? Na faapefea ona aveesea le malo mai ia te ia?
O se Suitupu po o se Tupu?
O loo faasino atu Tanielu ia Nepukanesa faapea o le tamā o Pelesara. (Tanielu 5:2, 11, 18, 22) Peitai, o lenei faiā e lē faaletino. Ua faapea mai le tusi na tusia e Raymond P. Dougherty, o le Nabonidus and Belshazzar, atonu o Nepukanesa o le tamā o lona tinā, o Nitocris. Atonu foi ona o Nepukanesa, o ia lea na muamua nofo i le nofoalii, e faigofie foi la ona taʻua o le “tamā” o Pelesara i le faasolo atu i le nofoalii. (Faatusatusa i le Kenese 28:10, 13.) Po o le ā lava le tulaga, ae o faamatalaga sa tusia i nisi o fagu omea sa mauaina i le itu i saute o Irake i le 19 senituri o loo faaalia ai o Pelesara o le atalii matua o Naponita, le tupu o Papelonia.
Ona o faamatalaga i le Tanielu mataupu e 5 o loo taulai atu i mea na tutupu i le po na paʻū ai le malo o Papelonia i le 539 T.L.M., e lē o faamatalaina ai pe na faapefea ona oo ina maua e Pelesara le aiā tautupu e pule ai. Ae o faamatalaga mai le au suesue o mea na totoe i le eleele mai anamua ua maua ai sina malamalamaga i le faiā a Naponita ma Pelesara. Na taʻua e Alan Millard, o se tagata suesue i toega o mea i le eleele ma e iai lona poto faapitoa i gagana a tagata na tupuga mai ia Semu e faapea: “O loo faaalia i tusitusiga a Papelonia e faapea o Naponita o se pule e faamautu i se mea e tasi.” Ua faaopoopo mai Millard e faapea: “E ui lava na te lei teena atua o Papelonia, ae sa . . . sili ona ia uaʻi atu i le atua o le masina i isi aai, o Uro ma Harana. Mo ni nai tausaga o lana pulega, e lei nofo Naponita i Papelonia; ae sa nofo mamao ese atu i laufanua lafulemu i le toafa o Teima [po o Tema] i le itu i matu o Arapi.” E aliali mai la, o le tele o taimi o le nofoaiga a Naponita sa nofo ese ai mai le laumua, o Papelonia. O taimi la e alu ese ai, e avea ai Pelesara ma pule.
Ina ia faamanino atili le tulaga moni na iai Pelesara, na taʻua e se faamatalaga tusitusia lea sa taʻua o le “Faamatalaga Patino e Faatatau ia Naponita” e faapea: “Sa ia [Naponita] tuuina atu le ‘Vaegaau’ i lona [atalii] matua, le ulumatua, sa ia [Naponita] pulea fitafita uma i le atunuu e ala atu i lana [Pelesara] (faatonuga). Sa ia faamatuuina atu (le pule uma), na [ia] faatuatuaina atu le tulaga tau tupu ia te ia [Pelesara].” O lea la o Pelesara o se suitupu.
Ae, pe sa mafai ona taʻua se suitupu o se tupu? O se faatagata o se pule anamua sa maua i le itu i matū o Suria i se tausaga o tausaga e amata mai i le 1970 e oo i le 1979, sa faaalia ai e faapea o se faiga e masani ai mo se pule le taʻua o ia o se tupu, e ui lava o lona tofiga e maulalo ifo. O le faatusa lea na maua o le faatusa o se pule mai Kosane ma sa tusia i le gagana Asuria ma le Arama. O le tusitusiga i le gagana Asuria sa taʻua ai le tamaloa o le kovana o Kosane, ae i le gagana Arama lea e tutusa lelei sa taʻua ai le tamaloa o le tupu. O lea la e lē o se mea e lē masani ai le taʻua o Pelesara o le perenise i tusitusiga aloaia a Papelonia ae taʻua o le tupu i tusitusiga Arama a Tanielu.
O faatulagaga o le pulega tuufaatasi a Naponita ma Pelesara sa faaauau seʻi oo lava i aso mulimuli o le Pulega a Naponita i Papelonia. O lea i le po tonu lava o le paʻū o Papelonia, na ofo atu ai e Pelesara o le a fai Tanielu ma pule lona tolu i le malo, ae lē o le lona lua.—Tanielu 5:16.
O se Suitupu Faamaualuga ma le Soona Mautinoa Naua
O mea na tutupu i le taimi mulimuli lava o le pulega a Pelesara ua faaalia ai o ia o se perenise faamaualuga ma le soona mautinoa naua. Ina ua oo mai le iuga o lana pule ia Oketopa 5, 539 T.L.M., sa sulufai atu Naponita i Borsippa, ina ua faatoilaloina e autau a Metai ma Peresia. O le taimi lea ua siomia ai Papelonia. Peitai sa malosi pea le faalagolago o Pelesara i puipui maualuluga sa siomia ai le aai, o lea i le po lava lena, na ia faia ai “se faigāʻai tele ma alii e toaafe sa ia te ia.” Na taʻua e Herodotus, o se tusitala Eleni i le senituri e lima T.L.M. e faapea, i totonu o le aai “i le taimi lea, sa sisiva ma taufai olioli tagata uma.”
Ae, i tua atu o pa o Papelonia, sa matuā mataalia autau a Metai ma Peresia. I le taitaiga a Kuresa, na latou faatafe ese atu ai le vai o le vaitafe o le Eufirate, lea sa tafe mai i le ogatotonu o le aai. Sa nofo sauni ana fitafita e āsa atu i le vai i le taimi lava e maulalo ai le maui a le suavai. O le a latou feaei ma ulu atu i le aai e ui atu i faitotoa apamemea o lona pa o loo matalatala i luga aʻe o le vai.
Pe ana seʻi amanaia e Pelesara gaoioiga sa faia i tua atu o le aai, semanū na te tapunia ia faitotoa apamemea, faatulaga ona tagata malolosi i luga o le pa i autafa o le vai, ma puea le fili. Na i lo lena, ina ua faasuāavā i le uaina, na fai atu ai Pelesara faamaualuga ina ia aumai ipu ia na aumai mai le malumalu o Ieova. Ona latou feinu ai lea a o vivii atu i atua o Papelonia, o ia, o ana mālō, o ana avā, ma ana palake. Ona faafuasei lea ona aliali mai faavavega se lima ma amata ona tusia se tusilima i le puipui o le maota o le tupu. Ona o le tetemū i le fefe, na valaau ai Pelesara i ona tagata popoto uma ina ia faamatala mai le uiga o le feʻau. Peitai e lei “mafaia i latou ona faitau o le tusi, ma faailoa i le tupu lona uiga.” Mulimuli ane, “ona aumaia lea o Tanielu i luma o le tupu.” I lalo o le faagaeega tauatua, na faamatala atu ai ma le lototele e le perofeta a Ieova le uiga o le feʻau faavavega, lea na valoia ai le paʻū o Papelonia ia Metai ma Peresia.—Tanielu 5:2-28.
Sa faigofie lava ona maua e Metai ma Peresia le aai, ma e lei aulia e Pelesara le taeao na sosoo ai. I lona maliu la, atoa ma le siilima ane o Naponita ia Kuresa, na muta ai iina le Malo o Papelonia lea sa pule ai Naponita.
[Ata i le itulau 8]
Ua faamatala e Tanielu le feau o le faaumatiaga mo le Malo o Papelonia