Le Ierusalema e Tusa Moni ai ma Lona Igoa

“Ia outou olioli ma fiafia e faavavau i le mea ou te faia; auā faauta, ou te faia Ierusalema ma faafiafia.”—ISAIA 65:18.

1. Sa faapeī lagona o Esera e faatatau i le aai filifilia o le Atua?

ONA o ia o se tagata aʻoga mataalia o le Afioga a le Atua, sa pele ai i le faitaulaga o Esera le sootaga lea sa iai muamua i le va o Ierusalema ma le tapuaiga mamā a Ieova. (Teuteronome 12:5; Esera 7:27) O lona alofa mo le aai a le Atua ua faaalia mai i le vaega o le Tusi Paia lea na faagaeeina o ia e tusi—le Nofoaiga a Tupu Muamua ma le Lua, ma le Esera. I nei faamaumauga o talafaasolopito, o loo maua ai le igoa Ierusalema e toetoe lava a 25 pasene o le 800 taimi lea e aliai mai ai i le Tusi Paia atoa.

2. O le ā le uiga faavaloaga e mafai ona tatou iloa mai le uiga o le igoa Ierusalema?

² I le gagana Eperu o loo faaaogaina i le Tusi Paia, e mafai ona malamalama faapea o le upu “Ierusalema” e iai i le vala o le gagana Eperu e taʻua o le fuifuilua. O le fuifuilua e masani lava ona faaaogā mo mea e aumai i paga pe taʻi lua mai, e pei o mata, taliga, lima, ma vae. I lenei vala fuifuilua, e mafai ai ona manatu i le igoa Ierusalema faapea ua valoia mai ai le filemu o le a tofo i ai tagata o le Atua i se uiga e valalua—faaleagaga ma faaletino. E lē o faaali maia e le Tusi Paia pe na matuā malamalama atoatoa Esera i lenei mea. Peitai, i le avea o se faitaulaga, sa ia faia ai le mea e sili e fesoasoani ai i tagata Iutaia ina ia olioli i le filemu ma le Atua. Ma e mautinoa lona galue mamafa ina ia ola ai Ierusalema e ogatasi ma le uiga o lona igoa, o lona uiga, “E Maua Ai [po o se, Faavae] o le Filemu Valalua.”—Esera 7:6.

3. E fia tausaga ua mavae atu ae faatoʻā toe faailoaina mai ia i tatou galuega a Esera, ma i ā tulaga tatou te maua atu i ai o ia?

³ E lē o taʻu maia e le Tusi Paia po o fea sa iai Esera i le 12 tausaga lea na va aʻi lana asiasiga i Ierusalema ma le taunuu atu o Neemia i le aai. O le tulaga leaga faaleagaga o le atunuu i lena taimi e taʻu mai ai, sa lei iai iina Esera. Peitai, ua tatou iloa na toe auauna Esera o se faitaulaga faamaoni i Ierusalema ina ua maeʻa ona toe fausia pa o le aai.

Se Aso Matagofie o Faatasiga

4. O le ā le mea tāua e faatatau i le uluai aso o le masina lona fitu i Isaraelu?

⁴ Na fetaui tonu lava le maeʻa o pa o Ierusalema ma le taimi mo le tausamiga tāua o le masina o Etanima, le masina lona fitu o le kalena faalotu a Isaraelu. O le uluai aso o Etanima o se aso o le tausamiga faapitoa o le masina fou sa taʻua o le Tausamiga o Iligāpu. I lena aso, e ili ai e faitaulaga pu a o ofoina atu taulaga ia Ieova. (Numera 10:10; 29:1) O le aso lena sa sauniunia ai tagata Isaraelu mo le Aso faaletausaga o le Togisala lea e paʻū i le aso 10 o Etanima ma le Tausamiga olioli o le Aoaoina e amata mai le aso 15 e oo atu i le aso 21 o le masina lava lena.

5. (a) Na faapefea ona faaaogā lelei e Esera ma Neemia “le aso muamua i le masina e fitu”? (e) Aisea na fetagisi ai le fanauga a Isaraelu?

⁵ “I le aso muamua i le masina e fitu,” sa faapotopoto faatasi ai “le nuu uma,” e foliga mai sa uunaia e Neemia ma Esera le faia o lena mea. Sa aofia ai tane, fafine, ma “i latou uma o e atamamai i faalogo.” O lea, sa iai foi iina le fanauiti ma sa latou faalologo atu a o tū Esera i luga i le pulelaa ma faitau atu le Tulafono “e afua i le malama ae o le taeao ua oo i le aoauli.” (Neemia 8:1-4) Sa fai ma mālōlō le faitauina, ona fesoasoani lea o le au sa Levī i tagata ina ia latou malamalama i mea sa faitau atu. O lenei mea na ootia ai loto ma maligi loimata o le fanauga a Isaraelu ina ua latou iloa le matuā tele o lo latou lē usitaia faatasi ai ma o latou augatama o le Tulafono a le Atua.—Neemia 8:5-9.

6, 7. O le ā e mafai ona aʻoaʻoina e Kerisiano mai le mea na faia e Neemia e taofi ai le fetagisi o tagata Iutaia?

⁶ Peitai sa lē o se taimi lea mo ni fetagisiga faanoanoa. O se tausamiga, ma o lea faatoʻā maeʻa lava le galuega a tagata o le toe fausiaina o pa o Ierusalema. O lea na fesoasoani atu ai Neemia ia i latou ina ia saʻo o latou manatu i lona faapea atu: “Ina o ia outou, ina aai mea lololo, ma inu mea suamalie, ma ia outou ave tufaaga ia te i latou e lei saunia se mea mā latou; auā o le aso paia lenei i lo tatou Alii; aua neʻi tiga foi outou; auā o le fiafia ia Ieova o lo outou malosi lea.” Sa usiusitai, ona “o atu lea o le nuu uma e aai, ma inu, ma ave tufaaga, ma taufaiolioli tele, auā ua latou lagona upu na faailoa atu ia te i latou.”—Neemia 8:10-12.

⁷ E tele mea e mafai e tagata o le Atua i aso nei ona aʻoaʻoina mai lenei tala. O i latou ua maua faaeaga e faia ai ni vaega i sauniga ma fonotaga, e tatau ona latou manatua lena mea. E lē gata i le aumaia o fautuaga e faasaʻo ai lea e talafeagai i nisi o taimi, ae o na foi faatasitasiga e faamatilatila ai aogā ma faamanuiaga e maua pe a faatinoina mea o loo faafinagaloina e le Atua. E auina atu se faamālō mo galuega lelei ua faatinoina ma saunia se faalaeiauga ina ia tutumau ai. E tatau i tagata o le Atua ona latou tuua na faatasitasiga ma le olioli o le loto ona o aʻoaʻoga faamalosiau ua latou maua mai le Afioga a le Atua.—Eperu 10:24, 25.

Se Isi Faatasitasiga Olioli

8, 9. O le ā le faatasiga faapitoa na faia i le aso lona lua o le masina lona fitu, ma iu ai i le ā mo tagata o le Atua?

⁸ I le aso lona lua o lena masina faapitoa, “na faapotopotoina ai o matai sili o le nuu uma, o faitaulaga, ma sa Levī, ia Esera le tusiupu, ia aʻoaʻoina ai i latou i upu o le tulafono.” (Neemia 8:13) Sa agavaa lelei Esera na te taulimaina lenei faatasiga, talu ai “na saunia e [ia] lona loto e saili i le tulafono a Ieova ma fai ai, ma aʻoaʻo atu i Isaraelu i le tulafono, ma faamasinoga.” (Esera 7:10) E lē taumatea, o le faatasiga lenei sa faamatilatila ai vaipanoa sa manaomia ai e tagata o le Atua ona atili ai ona latou ogatusa ma le feagaiga o le Tulafono. O le popolega sa vave ona tulai mai o le manaoga lea ina ia faia sauniuniga talafeagai e faamanatu ai le Tausamiga o Faleapitaga o loo fotuai mai.

⁹ O lenei tausamiga e vaiaso le umi, sa faia i le auala saʻo, e ala i le nonofo uma o tagata i fale lē tumau sa faia i lālā ma lau o laau eseese. Sa faatutū e tagata nei faleapitaga i luga o taualuga mafola o o latou fale, i totonu o o latou lotoā, i totonu o lotoā o le malumalu, ma i totonu o malae o Ierusalema. (Neemia 8:15, 16) Maeu le lelei o lenei avanoa e faapotopoto faatasi ai tagata ma faitauina atu i ai le Tulafono a le Atua! (Faatusatusa i le Teuteronome 31:10-13.) Sa faia lenei mea i aso taitasi, “e afua i le aso muamua ua oo i le aso e iu ai” le tausamiga, ma maua ai ‘le matuā tele o le fiafia’ e tagata o le Atua.—Neemia 8:17, 18.

E Lē Tatau Ona Tatou Lafoaia le Fale o le Atua

10. Aisea na fuafuaina ai se faatasitasiga faapitoa i le aso 24 o le masina lona fitu?

¹⁰ E iai le taimi tatau ma le nofoaga tatau e faasaʻoina ai masei matuia o tagata o le Atua. E foliga mai ina ua iloa o le taimi tonu lea mo lena fuafuaga, ona fuafua ai lea e Esera ma Neemia se aso mo le anapogi, le aso 24 o le masina o Etanima. O iina sa toe faitau ai le Tulafono a le Atua, ma faia ai e tagata tautinoga o a latou agasala. Ona toe autalu lea e sa Levī feutagaiga alofa a le Atua ma ona tagata faalogogata, sa faia ni faailoaga matagofie o viiga ia Ieova, ma osia “le feagaiga moni” sa molimauina ina ua faamaufaailogaina e o latou alii, o tagata sa Levī, ma faitaulaga.—Neemia 9:1-38.

11. O le ā le “feagaiga moni” na malilie tagata Iutaia latou te tausia?

¹¹ Sa tauto tagata lautele o le a latou mulimuli atu i le “feagaiga moni” tusitusia. O le a latou “savavali i le tulafono a le Atua [“moni,” NW].” Ma sa latou malilie e lē faaipoipo atu i “tagata o le nuu.” (Neemia 10:28-30) E lē gata i lea, sa malilie tagata Iutaia ina ia latou tausia le Sapati, ia faia se meaalofa tau tupe i tausaga taitasi e lagolagoina ai le tapuaiga moni, ia laʻuina atu fafie mo le fata e fai ai taulaga, ia tuuina atu uluai tama o a latou mamoe ma povi mo taulaga, ma ia tuuina atu faapolopolo o fua o lo latou laueleele i potuʻai o le fale o le malumalu. E manino mai, sa latou maumauai ‘e lē tuua lava le fale o lo latou Atua.’—Neemia 10:32-39.

12. O le ā e aofia ai i le lē lafoaia o le fale o le Atua i aso nei?

¹² I aso nei, e tatau i tagata o Ieova ona faaeteete i le lafoaia o lo latou faaeaga o le ‘tuuina atu o le auaunaga paia’ i lotoā o le malumalu sili faaleagaga o Ieova. (Faaaliga 7:15) E aofia ai i lenei mea tatalo mai le loto e lē aunoa mo le faaauilumaina o le tapuaiga a Ieova. O le ola e ogatusa ma na tatalo e manaomia ai ni sauniuniga mo sauniga faa-Kerisiano ma faia ai ni sao, le auai i fuafuaga e talaʻia le tala lelei, ma le fesoasoani i ē loto fiafia e ala i le toe foi atu i ai ma, pe a mafai, ia faia ni suesuega faale-Tusi Paia ma i latou. O le toatele o tagata o ē lē mananao e manatu māmā i le fale o le Atua, ua latou faia meaalofa tau tupe i le galuega talaʻi ma le tausiaina o nofoaga o le tapuaiga moni. Atonu e mafai foi ona tatou lagolago atu i le fausiaina o ni nofoaga o loo manaomia vave mo sauniga, faapea ma le tausia mamā o na nofoaga. O se auala tāua e faaalia ai le alofa mo le fale faaleagaga o le Atua o le faatupuina lea o le filemu i le va o uso talitonu ma ia fesoasoani atu i so o se tasi o loo manaomia se fesoasoani i meafaitino pe i le itu faaleagaga.—Mataio 24:14; 28:19, 20; Eperu 13:15, 16.

Se Sauniga Olioli o le Tatalaga

13. O le ā le mataupu faanatinati sa manaomia ona uaʻi atu i ai a o lei faapaia le tatalaina o pa o Ierusalema, ma o le ā le faaaoaoga lelei na faataatia e le toatele?

¹³ O le “feagaiga moni” sa faamaufaailogaina i aso o Neemia na sauniunia ai tagata anamua o le Atua mo le aso o le tatalaga aloaia o pa o Ierusalema. Peitai sa iai se isi mataupu faanatinati sa manaomia pea ona uaʻi atu i ai. Ona o lea ua siomia nei e se pa telē e 12 ona faitotoa, sa manaomia ai e Ierusalema ni tagata se toatele. E ui sa iai ni tagata Isaraelu na nonofo ai iina, ae sa “valavala foi le aai ma le lautele; a ua toaitiiti tagata i ai.” (Neemia 7:4) Ina ia foia lenei faafitauli, ona fai lea e tagata “le vili, e au mai le tasi mai taitoasefulu e nofo i Ierusalema le aai paia.” O le talia fiafia o lenei faatulagaga na uunaia ai tagata e faamanuia atu i “tagata uma, [o] e na ofo fua e nonofo i Ierusalema.” (Neemia 11:1, 2) Maeu se faaaoaoga lelei mo tagata tapuai moni i aso nei o ē o loo mafai e o latou tulaga ona latou ō atu ai i vaipanoa o loo iai se manaoga tele mo se fesoasoani mai Kerisiano taʻumatuaina!

14. O le ā na tupu i le aso o le tatalaga aloaia o pa o Ierusalema?

¹⁴ E lei umi ae amata loa sauniuniga tāua mo le aso tele o le tatalaga aloaia o pa o Ierusalema. Sa faapotopoto mai tagata faimusika ma tagata pepese mai aai tuaoi o sa Iutā. Sa faatulaga i latou i ni aufaipese tetele se lua e peseina le faafetai, ona sosoo mai lea i tua o na vaega taitasi se solo o tagata savavali. (Neemia 12:27-31, 36, 38) Sa amata le solo a tagata pepese ma tagata savavali mai se vaega o le pa e sili ona mamao ese mai le malumalu, atonu e amata mai le Faitotoa o le Vanu (Valley Gate), ma savavali atu ai i itu o loo faafesagai seia oo ina latou fetaiai uma i le fale o le Atua. “Ua latou osia foi i lea aso o taulaga e tele, ma ua latou fiafia; auā ua faafiafia le Atua [“moni,” NW] ia te i latou i le fiafia tele; o fafine foi ma tama na latou fiafia; ua lagona foi le fiafia o Ierusalema i mea e mamao atu.”—Neemia 12:43.

15. Aisea sa lei avea ai le faapaiaina o le tatalaga o pa o Ierusalema ma pogai o le olioli tumau?

¹⁵ E lē o taʻu maia e le Tusi Paia le aso o lenei faamanatuga fiafia. E lē taumatea, o se vala matilatila lava lea, a leai o le taualuga, o le toe faafoisia o Ierusalema. O le mea moni, e tele galuega o le fausiaina sa manaomia ona faia i totonu o le aai. Na sau le taimi, na mou atu ai le tulaga lelei faaleagaga o tagatanuu o Ierusalema. Mo se faaaoaoga, i le taimi lona lua na asiasi atu ai Neemia i le aai, na ia iloa ai ua toe lafoaia foi le fale o le Atua ma ua toe faaipoipo atu tane Isaraelu i fafine faapaupau. (Neemia 13:6-11, 15, 23) O tulaga leaga nei sa faamautinoa mai i tusitusiga a le perofeta o Malaki. (Malaki 1:6-8; 2:11; 3:8) O lea la, sa lei avea le faapaiaina o pa o Ierusalema ma pogai o le olioli tumau.

Le Mafuaaga mo le Olioli e Faavavau

16. O ā mea e sili ona mataina o le a tutupu o loo nofo tatali atu i ai tagata o le Atua?

¹⁶ I aso nei, e moomoo tagata o Ieova mo le taimi o le a manumalo ai le Atua i ona fili uma. O le a amata lenei mea i le faaumatiaga o “Papelonia le aai tele”—o se aai faafaatusa o loo tuufaatasia ai ituaiga uma o lotu sese. (Faaaliga 18:2, 8) O le faaumatiaga o lotu sese o le a faailogaina ai le vaega muamua o le puapuaga tele o loo fotuai mai. (Mataio 24:21, 22) O loo i o tatou luma foi se mea e matuā tāua o le a tupu—le faaipoipoga faalelagi a le Alii o Iesu Keriso ma lana faatoanofotane o tagatanuu e 144,000 o le “Ierusalema Fou.” (Faaaliga 19:7; 21:2) E lē mafai ona tatou fai atu maʻoti po o afea o le a faamaeaina ai lena faaipoipoga faalelagi, ae mautinoa lava o le a avea o se mea e olioli ai.—Tagai i le Watchtower, Aokuso 15, 1990, itulau 30-31.

17. O le ā ua tatou iloa e faatatau i le faaatoaina o le Ierusalema Fou?

¹⁷ Ua tatou iloa ua matuā latalata mai le faaatoaina o le Ierusalema Fou. (Mataio 24:3, 7-14; Faaaliga 12:12) E lē pei o le aai o Ierusalema faalelalolagi, auā o le a lē tāitai ona avea ma pogai o faanoanoaga. E māfua lea talu ai o ona tagatanuu uma o ni soo ua faauuagagaina, ua tofotofoina, ma ua faamamāina, o Iesu Keriso. Ona o lo latou faamaoni seia oo i le oti, o le a taitoatasi ai ma faamaonia lo latou faamaoni atu e faavavau i le Pule Silisiliese Aoao, o Ieova le Atua. Ua iai se uiga tāua o lena mea mo isi uma o le fanau a tagata—o ē ola ma ē oti!

18. Aisea e tatau ai ona tatou ‘olioli ma fiafia e faavavau’?

¹⁸ Seʻi manatu i le mea o le a tupu pe a uaʻi mai le Ierusalema Fou i tagata o ē faaalia le faatuatua i le taulaga togiola a Iesu. “Faauta,” o le tusi mai lea a le aposetolo o Ioane. “Ua i ai le afioaga o le Atua faatasi ma tagata, e mau foi o ia ma i latou; e fai foi i latou mona nuu, e ia te i latou le Atua lava. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.” (Faaaliga 21:2-4) E lē gata i lea, o le a faaaogā e le Atua lenei faatulagaga pei se aai e siitia ai tagata i le lelei atoatoa. (Faaaliga 22:1, 2) Maeu ni mafuaaga matagofie e ‘olioli ma fiafia ai e faavavau i mea o loo faia nei e le Atua’!—Isaia 65:18.

19. O le ā le parataiso faaleagaga lea ua aoaoina atu i ai Kerisiano?

¹⁹ Ae peitai, e lē tau faatali tagata salamō i lena taimi mo le mauaina o fesoasoani mai le Atua. I le tausaga e 1919, na amata ai ona aoaoina e Ieova le vaega faaiu o le 144,000 i totonu o se parataiso faaleagaga, o iina o loo anoanoai ai fua o le agaga o le Atua—e pei o le alofa, le olioli, ma le filemu. (Kalatia 5:22, 23) O se vala mataina o lenei parataiso faaleagaga o le faatuatua lea o ē faauuina o loo aināina, o ē ua ofoofogia lo latou fua tele mai i le taulamua i le talaʻia o le tala lelei o le Malo o le Atua i le lalolagi ainā uma. (Mataio 21:43; 24:14) O le iuga, e toetoe lava ono miliona “isi mamoe” o loo iai le faamoemoe faalelalolagi, ua faatagaina foi e ulu atu i le parataiso faaleagaga ma olioli ai i galuega fua tele mai. (Ioane 10:16) Ua agavaa i latou mo lenei mea e ala i le tuuina atu o i latou lava ia Ieova le Atua e faavae i lo latou faatuatua i le taulaga togiola a lona Alo, o Iesu Keriso. O la latou aufaatasiga ma ē o le a avea ma sui o le Ierusalema Fou ua matuā faamaonia le faamanuiaina ai. O lea, e ala i ana feutagaiga ma Kerisiano faauuina, ua faataatia ai e Ieova se faavae mausalī mo “se lalolagi fou”—o se sosaiete o tagata e matataʻu i le Atua o ē o le a aināina le vaega faalelalolagi o le Malo faalelagi.—Isaia 65:17; 2 Peteru 3:13.

20. O le a faapefea ona ola le Ierusalema Fou e tusa ai ma le uiga o lona igoa?

²⁰ O tulaga filemu o loo olioli ai nei tagata o Ieova i lo latou parataiso faaleagaga o le a lē pine ona tofo lea i ai i se parataiso faaletino i luga o le lalolagi. O le a tupu lena mea pe a alu ifo le Ierusalema Fou mai le lagi ina ia faamanuia mai i le fanau a tagata. I se auala e valalua, o le a olioli ai tagata o le Atua i tulaga fifilemu na folafola mai i le Isaia 65:21-25. I le avea o ni tagata tapuai autasi a Ieova i totonu o se parataiso faaleagaga, ua tofo ai nei i latou o le vaega faauuina lea e lei ō atu i lo latou nofoaga i le Ierusalema Fou faalelagi, faatasi ai ma “isi mamoe” i le filemu mai le Atua. Ma o lena filemu o le a faasalafa atu i le Parataiso faaletino, pe a oo ina ‘faia le finagalo o le Atua i le lalolagi uma, e pei ona faia i le lagi.’ (Mataio 6:10) Ioe, o le a faamaonia le moni o le aai faamamaluina faalelagi o le Atua, e tusa ai o le igoa o Ierusalema e avea ma ‘Faavae [mausali] o le Filemu Valalua.’ O le a faavavau lava ona tumau, e avea ma mea e viiviia ai Lē Sili na Foafoaina, o Ieova le Atua, ma lana Tupu Faatoafaiava, o Iesu Keriso.

E te Manatua?

◻ O le ā na faataunuuina ina ua faapotopoto e Neemia tagata i Ierusalema?

◻ O le ā sa tatau ona faia e tagata Iutaia anamua ina ia latou lē manatu māmā ai i le fale o le Atua, ma o le ā ua valaauina i tatou e fai?

◻ Ua faapefea ona aafia “Ierusalema” i le aumaia o le olioli ma le filemu e faavavau?

[Ata i le itulau 23]

E foliga mai o le telē lea o pa o Ierusalema i le taimi o le faaumatiaga o le aai ma le taimi ina ua taitaia e Neemia le toe fausiaina o pa