Le Pogai ua Latou Liliu Atu ai i Faiga Sauā

O SE pepe, na fanau lē au i le 27 vaiaso i Denver, i Colorado, i le Iunaite Setete o Amerika. Na ola le tama, ma ina ua mavae le tolu masina i le falemai, na toe faafoi atu ai i lona aiga i ona mātua. I le tolu vaiaso mulimuli ane, na toe aumai ai le tama i le falemai. Aisea? Na matuā tigaina o ia ina ua faamanualia le faiʻai, ona sa soona lūlū ma le ita e lona tamā. Sa lē mafai e le tamā ona onosaia le tagi o le pepe. Na oo ai ina tauaso le tamaitiiti ma faaletonu lona tino. Sa mafai e vailaau faaonaponei ona faasaoina o ia mai se faaletonu i lona fanau mai, ae sa lē mafai ona faasaoina o ia mai le sauā o lona tamā.

E lē mafaitaulia le aofai o tamaiti ua faileagaina, fasia faamoʻamoʻa, pe fasiotia i se tasi o nofoaga aupito sili ona sauā i le lalolagi—o le aiga lea! I se faatatauga e faapea, i le na o le Iunaite Setete lava, e sili atu i le 5,000 tamaiti e oti i le tausaga ona o o latou lava mātua! Ma e lē na o tamaiti o aafia ai. E tusa ai ma le faamatalaga i le mekasini o le World Health, ua faapea mai, “o le faasauā i avā, o le mafuaaga autū lena o le faamanualia o fafine talavou” i le Iunaite Setete. Ae faapefea isi atunuu? “O le tasi vaetolu po o le sili atu foi i le ʻafa o fafine na suesueina [i atunuu tau atiae] ua lipotia mai ai le fasia e a latou paaga.” Ioe, ua faateleina le sauā, ae maise lava i le aiga.

E toatele tane ma avā e taumafai e faaleleia o latou feeseeseaiga i faiga sauā. I nisi o atunuu, e faaaogā ai e mātua ma faiaʻoga faiga sauā e faamatuu atu ai lo latou ita i tamaiti. Ua avea ma mea fiafia a tamaiti fia malolosi le filifilia o tamaiti vaivai e latou te faia i ai faiga sauā. Aisea ua matuā sauā ai tagata?

Le Pogai ua Sauā ai Tagata

Ua faapea mai nisi, o le natura lava o le tagata o le sauā. A o faaitiitia faiga sauā i le tulaga lautele i le Iunaite Setete, ae ua faateteleina i talavou. Ma ua faateleina le fiafia i faiga sauā. Ua faaluaina e fale televise autū e tolu le aofaiga o a latou tala i faiga sauā, ae faatoluina lo latou taʻua o fasioti tagata. Ioe, e alumia tele faiga sauā! Na faapea mai le fomai o le mafaufau o Karl Menninger: “E lē gata ina tatou faatagaina faiga sauā, ae ua avea foi ma ulutala o a tatou nusipepa. E faaaogā e le tasi vaetolu po o le tasi vaefa o a tatou polokalame i le televise na mea e faafiafia ai a tatou fanau. Ua tatou manatu māmā i ai! Aʻu uo pele e, ua tatou fiafia i ai.”

I ni suesuega faasaienisi na faia talu ai nei, ua faaopoopo mai ai e faapea, e tele aafiaga ua faia e le fausaga o le mafaufau ma le siomaga i uiga sauā o tagata. Ua faapea mai Dr. Markus J. Kruesi, o le Matata Tau i Suesuega o Tamaiti Solitulafono i le Iunivesite o Illinois: “O le mea lea ua amata ona iloa e i tatou uma e faapea, e tele ma anoanoai tamaiti ua afaina i aafiaga leaga o le siosiomaga, o le mea moni, ua māfua ai se mala o faiga sauā.” Ua taʻua foi i le tusi o le Inside the Brain e faapea: “O mea o loo tutupu i le siosiomaga ua māfua moni ai lava ona suia vaega ninii (molecules) o le faiʻai ua uunaia ai tagata e faia nei gaoioiga.” O mea e pei o “le faaletonu o le faavae o aiga, le faateleina o mātua ua nofo toatasi, le iai pea o le mativa, ma le faaaogaseseina pea o vailaau faasaina, ua mafai ona suia moni ai gaoioiga a le faiʻai i se uiga sauā—o se aafiaga sa manatu i ai muamua e lē mafai ona tupu.”

Ua faapea mai, o suiga i le faiʻai, e aofia ai le faaitiitia o le vailaau o le serotonin, o se vailaau i le faiʻai lea e manatu i ai e faapea, e na te taofiofia le fia sauā. Ua faaalia i suesuega e faapea, o le ʻava malosi, e mafai ona faaitiitia ai le malosi o le serotonin i le faiʻai, o lea ua maua ai se faavae faasaienisi o le sootaga ua leva ona iloa i le va o faiga sauā ma le faaaogaseseina o le ʻava malosi.

E iai foi se isi vala o loo aafia ai i le faateleina o faiga sauā i aso nei. “Ia manatua,” ua faamanatu mai e se tusi maufaatuatuaina o valoaga, le Tusi Paia e faapea, “o aso e gata ai o le a oo mai ai taimi faigata. O tagata o le a manatu faapito, mananao tele, mitavale, ma loto vii; . . . o le a agaleaga i latou, e lē alolofa, e tau faaleaga, e sauā, ma taufeai; o le a latou ʻinoʻino i le lelei; o le a avea ma ē taufaaʻoleʻole, soonafai, ma faafefeteina ona o le faamaualuga . . . Ia ʻalo ese mai tagata faapena.” (2 Timoteo 3:1-5, Today’s English Version) Ioe, o faiga sauā o loo tatou vaaia i aso nei, o se faataunuuga o le valoaga o le Tusi Paia e uiga i “aso e gata ai.”

E iai foi se isi mea ua avea faapitoa ai lenei taimi o se vaitaimi o faiga sauā. Ua faapea mai le Tusi Paia: “Oi talofa ia te oulua le fanua ma le sami, auā ua alu ifo ia te oulua le tiapolo ua lotoa tele, auā ua na iloa ua saasaa ona po.” (Faaaliga 12:12) Ua lafoina ifo mai le lagi le Tiapolo ma ana ʻau o temoni ma ua faasagasaga atu nei a latou faiga leaga i le fanau a tagata. Ona o “le taʻitaʻi o le au faipule i le va nimonimo [“ea,” NW],” ua faaaogā ai e le Tiapolo i se auala faatogafiti “le agaga lea o loo matuā galue nei i e ua faalogogata,” ua avea ai le lalolagi ma nofoaga ua faateleina ai faiga sauā.—Efeso 2:2.

E mafai la faapefea ona tatou faafetaiaia le “ea” o faiga sauā a le lalolagi i aso nei? Ma e mafai faapefea ona tatou foia ni feeseeseaiga e aunoa ma faiga sauā?

[Faamatalaga faaopoopo i le itulau 3]

E lē mafaitaulia le aofai o tamaiti ua faileagaina, fasia faamoʻamoʻa, pe fasiotia i se tasi o nofoaga aupito sili ona sauā i le lalolagi—o le aiga lea!