Savavali Faatasi ma le Atua—A o Taulai Atu i le Faavavau
“Tatou te savavali i le suafa o Ieova lo tatou Atua e faavavau faavavau lava.”—MIKA 4:5.
1. Aisea e mafai ai ona taʻua Ieova o le “Tupu o le faavavau”?
E LEI iai se amataga o Ieova le Atua. Ua talafeagai lelei ona taʻua o ia o “Lē ua mai anamuā ona aso,” auā o lona soifuaga e lē tāitai ona maua i tuā sona amataga mai. (Tanielu 7:9, 13) O le a olioli foi Ieova i le lumanai e faavavau. E na o ia lava o le “Tupu o le faavavau.” (Faaaliga 10:6; 15:3, NW) Ma i lana silafaga, e tutusa le afe o tausaga ma le “aso ananafi ina o mavae atu, ma se leoleoga i le po.”—Salamo 90:4.
2. (a) O le ā le fuafuaga a le Atua mo tagata usiusitai? (e) O le ā e tatau ona faaautū atu i ai o tatou faamoemoega ma fuafuaga?
2 Talu ai o Lē Foai Ola, e faavavau o ia, sa mafai ai ona ia folafola atu i le uluai ulugalii faaletagata, o Atamu ma Eva, le faamoemoe o le ola e faavavau i le Parataiso. E ui i lea, ona ua lē usiusitai, sa melea ai e Atamu le aiā i le mauaina o le ola e faavavau, ma tuufaasolo mai ai le agasala ma le oti i ana fanau. (Roma 5:12) Peitai, sa lei faalavelavea ai i le fouvale a Atamu le uluai fuafuaga a le Atua. O le finagalo o Ieova ina ia ola e faavavau tagata usiusitai, ma o le a mautinoa lona faataunuuina o lana fuafuaga. (Isaia 55:11) Maeu la le fetaui, o le faaautū o o tatou faamoemoega ma fuafuaga i le auauna ia Ieova a o taulai atu o tatou mafaufau i le faavavau. A o tatou mananao e manatuaina pea “le aso o Ieova,” e matuā tāua foi ona manatua, o lo tatou sini ina ia savavali faatasi ma le Atua e faavavau.—2 Peteru 3:12, NW.
E Gaoioi Ieova i Ona Po ua Tuupoina
3. E faapefea ona tatou iloa e iai “ona po” ua tuupoina a Ieova e faataunuu ai ana fuafuaga?
3 I le avea ma i latou o loo savavali faatasi ma le Atua, tatou te matuā naunau atu ai e faataunuuina lona finagalo. Ua tatou iloa o Ieova o le Tausi Taimi Sili, ma ua tatou mautinoa e lē tāitai ona lē taulau o ia i le faataunuuina o ana fuafuaga i ona aso ua tuupoina. Mo se faaaoaoga, ina “ua oo atu i le faaatoaga o tausaga, ona auina mai lea e le Atua o lona Alo.” (Kalatia 4:4) Sa taʻu atu i le aposetolo o Ioane e faapea sa iai “ona po” mo le faataunuuga o mea faavaloaga na ia vaaia i faaaliga. (Faaaliga 1:1-3) E iai “ona po e faamasinoina ai e ua oti.” (Faaaliga 11:18) I le silia ma le 1,900 tausaga ua mavae, na faagaeeina ai le aposetolo o Paulo e taʻu mai faapea “ua faatuina e [le Atua] le aso e faamasinoina ai le lalolagi ma le tonu.”—Galuega 17:31.
4. E faapefea ona tatou iloa e finagalo Ieova ina ia aumaia le iuga i lenei faiga amioleaga o mea?
4 O le a aumaia e Ieova le iuga i lenei faiga amioleaga o mea, talu ai ua faalumaina lona suafa i le lalolagi i aso nei. Ua tupu olaola le amioleaga. (Salamo 92:7) E ala i a latou upu ma gaoioiga, ua latou fāifai atu ai i le Atua, ma e matuā tiga ia te ia lona silasila mai o faileagaina ma sauāina ana auauna. (Sakaria 2:8) E letioa a fuafuaina e Ieova faapea, e lē pine ona faaiuina lea o le faalapotopotoga aoao a Satani! Ua filifilia lelei lava e le Atua le taimi o le a tupu ai lenei mea, ma ua faamanino mai e le faataunuuga o valoaga a le Tusi Paia e faapea, o loo tatou ola nei i “ona po o le iuga.” (Tanielu 12:4) Ua toe o se āga ona gaoioi lea o ia mo le faamanuiaina o i latou uma e alolofa ia te ia.
5. Na faapeī manatu o Lota ma Sapakuka i tulaga sa siomia ai i laua?
5 Sa faanaunau auauna anamua a Ieova e fia vāai i le mutaaga o le amioleaga. O Lota le tagata amiotonu, “sa tiga i le amio faamatāitu a e faaletaupulea.” (2 Peteru 2:7) Ona o le loto tiga o le perofeta o Sapakuka i tulaga sa siomia ai o ia, o lea na ia augani atu ai: “Ieova e, ou te valaau seia afea, a e te le faafofoga mai; ou te alaga atu ia te oe ona o le sauaga, a e te le faaola mai? Se a ea le mea ua e faaali mai ai ia te au le amio leaga, ma e silasila i le puapuaga? e i oʻu luma le faatafunaina ma le saua, e i ai foi le fefinauaiga ma le faatupuina o le misa.”—Sapakuka 1:2, 3.
6. O le ā na fetalai ai Ieova i lana tali mai i le tatalo a Sapakuka, ma o le ā e mafai ona tatou aʻoaʻoina mai lenei mea?
6 O upu nei o se vaega na tali mai ai Ieova ia Sapakuka: “O le faaaliga ua tuuina mo ona aso ua tuupoina, a e tautala mai pe a oo i le iuga, e le pepelo lava; e ui lava ina tuai mai, a ia faatalitali pea i ai; auā e oo mai lava, e le faatuai mai.” (Sapakuka 2:3) O lea sa faailoa mai e le Atua faapea, o le a gaoioi o ia i “ona aso ua tuupoina.” E ui atonu e foliga o loo faatuai mai, ae o le a faataunuuina e Ieova lana fuafuaga—e oo mai lava!—2 Peteru 3:9.
Auauna ma le Maelega e Lē Faavaivai
7. E ui sa lei silafia tonu e Iesu po o afea e oo mai ai le aso o Ieova, ae na faapefea ona ia faaauauina pea ana galuega?
7 Po o le iloaina ea o le taimi tonu o fuafuaga a Ieova, o se mea e matuā manaomia ina ia tatou savavali maelega ai faatasi ma le Atua? E leai, e lē o le tulaga lena. Seʻi manatu i ni faaaoaoga. Sa matuā naunau Iesu i le taimi o le a faia ai le finagalo o le Atua i le lalolagi e pei ona faia i le lagi. O le mea moni, sa aʻoaʻo e Keriso ona soo ia tatalo: “Lo matou Tamā e, o i le lagi, Ia paia lou suafa. Ia oo mai lou malo, Ia faia lou finagalo, I le lalolagi e pei ona faia i le lagi.” (Mataio 6:9, 10) E ui sa silafia e Iesu o le a taliina mai lenei faatalosaga, peitai sa ia lei silafia le taimi tonu e faataunuuina ai na mea. I lana valoaga sili e faatatau i le iuga o lenei faiga o mea, na ia fetalai ai: “A o leea aso ma lea itu aso e le iloa e se tasi, e le iloa lava e agelu i le lagi, e le iloa foi e le Atalii, ua na o le Tamā lava.” (Mataio 24:36) Talu ai o Iesu Keriso o loo faaautū i ai le galueaiina o fuafuaga a le Atua, o le a aofia tonu ai o ia i le faaooina mai o le sala i fili o lona Tamā faalelagi. Peitai, a o iai Iesu i le lalolagi, e oo lava ia te ia, sa ia lei silafia le taimi o le a gaoioi ai le Atua. Pe na faapogaia ai ea e lena mea se faaitiitia o lona maelega i le auaunaga a Ieova? E mautinoa lava e leai! A o vaavaai atu i le matuā tinoū o Iesu e faamamā le malumalu, “ona manatu ai lea o ona soo i le upu ua tusia, Ua ʻaina lava aʻu i le manao tele i lou fale.” (Ioane 2:17; Salamo 69:9) Sa uaʻi atoatoa atu Iesu i le faia o le galuega na auina mai o ia e fai, ma sa ia faia ma le maelega e lē faavaivai. Sa ia auauna foi i le Atua a o taulai atu i le faavavau.
8, 9. Ina ua fesiligia e soo le toe fuataiina o le Malo, o le ā na taʻu atu ia i latou, ma sa faapeī le latou tali mai i ai?
8 O le tulaga moni foi lena sa iai soo o Keriso. Sa feiloai atu Iesu ia i latou a o toe o se āga afio aʻe o ia i le lagi. Ua faapea mai le tala: “Ua potopoto i latou, ona latou fesili ai lea ia te ia, ua faapea mai, ‘Le Alii e, o ona po nei ea e te toe fuatai mai ai le malo ia Isaraelu?’” I le faapei o lo latou Matai, sa latou faanaunau ina ia oo mai le Malo. Peitai, na tali atu i ai Iesu: “E le tusa ona outou iloa o ona po ma ona tausaga, ua tuu e le Tamā i lana lava pule. A e peitai, o le a maua e outou le mana, pe a afio ifo le Agaga Paia i luga ia te outou; e fai foi outou ma molimau ia te au i Ierusalema, ma Iutaia uma lava, ma Samaria, e oo lava i le tuluʻiga o le lalolagi.”—Galuega 1:6-8.
9 E leai se mea e iloa ai faapea sa lotovaivai le ausoo i lenei tali. Na i lo lea, sa matuā faateleina mea na latou faia ma le maelega i le galuega talaʻi. E na o ni nai vaiaso, ae ua latou faatumulia Ierusalema i a latou aʻoaʻoga. (Galuega 5:28) Ma i totonu o le 30 tausaga, sa latou faalautele atu ai la latou galuega talaʻi i se mamao na mafai ai ona faapea mai Paulo, sa talaʻiina atu le tala lelei “i tagata uma lava i le lalolagi.” (Kolose 1:23) E ui sa lei ‘toe fuatai mai [le Malo] ia Isaraelu’ e pei ona sa faatalitalia ai ma le sese e le ausoo, ma sa lei faavaeina foi i le lagi i le taimi a o soifua i latou, peitai sa latou auauna atu pea ia Ieova ma le maelega a o taulai atu i le faavavau.
Iloiloina Uunaiga o o Tatou Loto
10. O le lē iloaina o le taimi o le a faaumatia ai e le Atua le faiga o mea a Satani ua avea lea o se avanoa tatou te faamaonia atu ai le ā?
10 O loo faanaunau foi auauna i aso nei a Ieova e fia vāai atu i le iuga o lenei faiga amioleaga o mea. Peitai, e lē o lo tatou popolega autū le faasaoina atu o i tatou i le lalolagi fou folafolaina a le Atua. Tatou te fia vaai atu ua faapaiaina le suafa o Ieova ma faaeaina lana pule silisili ese. Ona o lenei mea, ua mafai ai ona tatou olioli ona e lē o taʻuina mai e le Atua ia i tatou le ‘aso ma le itu aso’ ua faatulaga mo le faaumatiaga o le faiga o mea a Satani. Ua avea lenei o se avanoa tatou te faamaonia atu ai lo tatou filifili maumauai e savavali faatasi ma le Atua seia oo i le faavavau, talu ai tatou te alolofa ia te ia, ae lē o ni o tatou sini manatu faapito e gata mai.
11, 12. I le ā le itu na luʻia ai le faamaoni o Iopu, ma e faapefea ona fesootai mai lena luʻi ia i tatou?
11 O le tausisia o lo tatou faamaoni i le Atua e fesoasoani foi e faamaonia ai sa sese le Tiapolo ina ua ia tuuaʻia faapea o le tagata amiotonu o Iopu—ma isi tagata e pei o ia—o loo auauna i le Atua ona o ni faanaunauga manatu faapito. Ina ua uma ona faamatala e Ieova lana auauna o Iopu o se tagata e sao lana amio, e amiotonu, ma mataʻu i le Atua, ona teena lea e Satani le moni o lena mea i le faapea mai: “Ua mataʻu fua ea Iopu i le Atua? ua e le siosiomia ea i le aupa o ia, ma lona fale, atoa ma ana mea uma i itu uma? ua e faamanuia le galuega a ona lima, ua e faateleina foi ana manu i le fanua. A e peitai ia e aapa atu lou aao, ma e tago atu i ana mea uma, pe na te le faifai ai ea ia te oe i ou lava luma?” (Iopu 1:8-11) O le tausia pea e Iopu o lona faamaoni e ui i puapuaga, sa ia faamaonia ai le sese o lenei moliaga leaga.
12 I le tausisi atu foi faapena i se ala faamaoni, e mafai ai ona tatou faaleaogaina so o se tuuaʻiga faasatani faapea, e na o le pau le mafuaaga tatou te auauna ai i le Atua auā ua tatou iloa ua latalata mai se taui. O le lē iloaina o le taimi tonu o le a faaoo mai ai le toasa o le Atua i ē amioleaga, ua tatou maua ai se avanoa e faamaonia atu ai tatou te alolofa moni ia Ieova ma mananao e savavali faatasi ma ia e faavavau. E faaalia ai o loo tatou faamaoni i le Atua ma faatuatua atu i lana auala o loo faafoeina ai mataupu. E lē gata i lea, o le lē iloaina o le aso ma le itu aso, e fesoasoani lea ina ia tatou mataalia ai pea ma mataala faaleagaga auā ua tatou iloa e ono oo mai le iuga i so o se taimi lava, e pei o se gaoi i le po. (Mataio 24:42-44) E ala i le savavali faatasi ma Ieova i aso taitasi, ua tatou faafiafia ai lona finagalo ma avatu ai se tali i le Tiapolo, o lē o loo faifai atu ia te ia.—Faataoto 27:11.
Ia Fuafua mo le Faavavau!
13. O le ā ua faaalia mai e le Tusi Paia e faatatau i le fuafua mo le lumanai?
13 Ua iloa e i latou o loo savavali faatasi ma le Atua le atamai ona faia o ni fuafuaga talafeagai mo le lumanai. I le vaai atu i faafitauli ma tulaga faatapulaa ona o le soifuaga matua, ua taumafai ai le toatele o tagata e faaaogā lelei lo latou talavou ma le malosi ina ia mautu i latou i le itu tau tupe pe a oo ina matutua. Ae faapefea la, lo tatou lumanai faaleagaga lea e sili atu ona tāua? Ua faapea mai le Faataoto 21:5: “O mafaufauga o e filigā i galuega, na o le mau mea e iu i ai; a o mafaufauga o e faataalise uma lava, e iu ai na o le mativa.” O le fuafua mamao a o taulai atu i le faavavau e aogā moni lava. Talu ai tatou te lē iloa tonu le taimi o le a oo mai ai le iuga o lenei faiga o mea, e manaomia ai ona tatou manatunatu i o tatou manaoga i le lumanai. Ae ia tatou paleni ma faamuamua manaoga tauatua i le olaga. O tagata e leai se faatuatua e ono faapea mai o le avea o le faia o le finagalo o le Atua ma taulaiga o le olaga o se tasi e lē o se tofa mamao. Ae pe moni lena?
14, 15. (a) O le ā le talafaatusa sa taʻua e Iesu e faatatau i fuafuaga mo le lumanai? (e) Aisea sa leai ai se tofa mamao i le tagata mauoa i le talafaatusa a Iesu?
14 Sa taʻua e Iesu se talafaatusa o loo faamalamalamaina ai lenei mataupu. Na ia fetalai mai: “Na fua tele mai le fanua o le tasi tagata mauoa; ona manatunatu ifo lea o ia, ua faapea, Se a se mea ou te faia, auā e leai saʻu mea e faaputu ai aʻu fua? Ua fai ane foi o ia, O lenei le mea ou te faia; ou te saʻena oʻu fale saito, a e faia ia tele; ou te faaputu i ai aʻu fua ma aʻu mea lelei uma. Ou te fai ifo foi i loʻu agaga, Loʻu agaga e, ua ia te oe mea lelei e tele ua teuina mo tausaga e tele; ina nofonofo filemu ia, ina ʻai ia, ma inu ma ia e olioli. A ua fetalai atu le Atua ia te ia, O oe na le vale, e aamiina atu lou agaga nai ia te oe i le po nanei; a e fai ma ai mea ia ua e saunia? O loo faapea foi lē faaputu oa ia te ia, a e le mauoa i le Atua.”—Luka 12:16-21.
15 Pe na faapea mai ea le manatu o Iesu sa lē tatau i le tagata mauoa ona galue i se taumafaiga ina ia malupuipuia ai lona lumanai faaletino? E leai, auā e lagolagoina e le Tusi Paia le galue mamafa. (2 Tesalonia 3:10) O le mea sese a le tagata mauoa, talu ai sa ia lei faia mea talafeagai ina ia ‘mauoa ai i le Atua.’ E tusa lava pe sa mafai ona ia olioli i lona tamaoaiga faaletino mo le tele o tausaga, ae o le a iu lava ina oti o ia. Sa leai sona tofa mamao, sa lei mafaufau i le faavavau.
16. Aisea e mafai ai ona tatou faalagolago atu ma le mautinoa ia Ieova mo se lumanai mautu?
16 O le savavali faatasi ma Ieova a o taulai atu i le faavavau e lē gata e aogā ae o se faautaga mamao foi. O le auala sili ona lelei lea e fuafua ai mo le lumanai. E ui e atamai le faia o ni fuafuaga aogā e tusa ai o aʻoaʻoga, o galuega, ma tiute tauave faaleaiga, ae tatau ona tatou manatua pea, e lē tāitai ona lafoaia e Ieova ana auauna faamaoni. Na pese faapea le tupu o Tavita: “Ua ou toeaina aʻu nei, sa aʻu taulealea; a ou te lei iloa se tagata amiotonu na lafoaiina, po o ana fanau ua ʻaiisi i latou.” (Salamo 37:25) Na faapena foi ona faamautinoa mai e Iesu, o le a saunia e le Atua mea mo i latou uma o loo muai saili le Malo ma savavali i ala amiotonu o Ieova.—Mataio 6:33.
17. E faapefea ona tatou iloa ua latalata mai le iuga?
17 E ui o loo tatou auauna atu i le Atua ma taulai atu i le faavavau, ae ia tatou mafaufau pea i le aso o Ieova. O le faataunuuga o valoaga a le Tusi Paia ua molimau manino i le latalata mai o lena aso. Ua mataulia lenei senituri i taua, o faamaʻi, o mafuie, ma oge, faatasi ai ma le sauaina o Kerisiano moni ma le talaʻia i le lalolagi aoao o le tala lelei o le Malo o le Atua. O nei mea uma, o vala uma ia o le taimi o le iuga o lenei faiga amioleaga o mea. (Mataio 24:7-14; Luka 21:11) Ua tumu le lalolagi i tagata “e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i mātua, o e le faafetai, o e amio leaga, o e le lotoaiga, o e le ma faaleleia, o e faatuaupua, o e le taofi manao o le tino, o e faasaua, o e inoino i le amio lelei, o e faalata, o e soona fai, o e ua faafefeteina, o e ua tele le manao i mea faafiafia a e leai se manao i le Atua.” (2 Timoteo 3:1-5) I nei aso faigata e gata ai, ua faigata ai le olaga mo i tatou o auauna a Ieova. Maeu lo tatou faanaunau atu mo le aso o le a tafiesea ai e le Malo o Ieova mea leaga uma! Ae i le taimi nei, seʻi o tatou maumauai pea e savavali faatasi ma le Atua a o taulai atu i le faavavau.
Auauna a o Taulai Atu i le Ola e Lē Uma
18, 19. O le ā e faaalia ai sa auauna atu i le Atua tagata faatuatua anamua a o taulai atu i le faavavau?
18 A o tatou savavali faatasi ma Ieova, seʻi teu i o tatou mafaufau le faatuatua o Apelu, Enoka, Noa, Aperaamo, ma Sara. Ina ua uma ona taʻua i latou na, ona tusi mai lea o Paulo: “Na oti i latou nei uma lava o faatuatua, e lei maua mea na folafolaina, a ua iloa ai e i latou a e mamao, ma latou talia ma le fiafia, ma latou taʻutino mai o tagata ese i latou ma le āumau i le lalolagi.” (Eperu 11:13) O na tagata faatuatua sa “latou naunau lava i le nuu e sili ona lelei, o le faalelagi lea.” (Eperu 11:16) Ona o le faatuatua, na latou tulimataia ai se nofoaga e sili atu ona lelei i lalo o le pulega o le Malo Faa-Mesia a le Atua. E mafai ona tatou mautinoa o le a tauia e le Atua i latou i le ola e faavavau i lena nofoaga e sili atu ona lelei—le Parataiso faalelalolagi i le pulega a le Malo.—Eperu 11:39, 40.
19 Sa faaalia e le perofeta o Mika le naunautaiga o tagata o Ieova ina ia tapuai atu e faavavau i le Atua. Na ia tusi mai: “O nuu uma e taitasi ma savali i le igoa o latou atua, o i tatou foi, tatou te savavali i le suafa o Ieova lo tatou Atua e faavavau faavavau lava.” (Mika 4:5) Sa auauna ma le faamaoni Mika ia Ieova seia oo lava i lona maliu. Pe a toe faatuina aʻe i le lalolagi fou, e lē taumatea o le a faaauau pea ona savavali faatasi lena perofeta ma le Atua seia oo i le faavavau. Maeu se faaaoaoga lelei mo i tatou o loo ola i le lotolotoi o taimi o le iuga!
20. O le ā e tatau ona avea ma a tatou filifiliga?
20 E talisapaia e Ieova le alofa o loo tatou faaalia mo lona suafa. (Eperu 6:10) Ua ia silafia e faigata mo i tatou ona tausisia le faamaoni atu ia te ia a o iai i lenei lalolagi o loo pulea e le Tiapolo. A o “mavae atu foi le lalolagi,” e na o “lē fai le finagalo o le Atua, e tumau lea e faavavau.” (1 Ioane 2:17; 5:19) O lea, faatasi ai ma le fesoasoani a Ieova, seʻi o tatou filifili e onosaia puapuaga o loo tatou fesagai mai lea aso i lea aso. Tau ina ia taulai atu o tatou mafaufauga ma ala o o tatou olaga i faamanuiaga ofoofogia ua folafola mai e lo tatou Tamā alofa faalelagi. E mafai ona fai mo tatou nei faamanuiaga pe a tatou savavali pea faatasi ma le Atua a o taulai atu i le faavavau.—Iuta 20, 21.
E Faapefea Ona E Tali?
◻ O le ā le fuafuaga a le Atua mo tagata usiusitai?
◻ Aisea e lei oo ai ina gaoioi Ieova e aumaia le iuga i le lalolagi faalēmataʻu?
◻ Aisea e lē tatau ai ona faaitiitia lo tatou maelega, ona o le lē iloa tonu o le taimi o le a gaoioi ai le Atua?
◻ O ā nisi o aogā o le savavali faatasi ma le Atua a o taulai atu i le faavavau?
[Ata i le itulau 17]
O le savavali faatasi ma le Atua e manaomia ai lo tatou auauna atu ma le maelega ia te ia e pei ona sa faia e uluai soo o Keriso