Pe Tatau Ona Ou Talosaga Atu i Loʻu Uso mo se Nogatupe?

O LOO maʻi le atalii laitiiti o Simona, ma o loo manaomia vave ni vailaau faafomai. Ae peitai, e matuā mativa lava Simona ma na te lē gafatia le tau o vai. O le ā se mea e mafai ona ia faia? Ia, o se uso Kerisiano e igoa ia Mikaele, e sili atu ona lelei lona tulaga tautupe na i lo o Simona. Atonu o le a faaune atu e Mikaele le tupe ia te ia. Ae peitai, i le loto o Simona, ua ia iloa ailoga e mafai ona ia toe totogiina le nogatupe.a

Ua talosaga atu Simona ia Mikaele, ma ua fesagai nei Mikaele ma se filifiliga faigata. Ua ia iloa lelei lava o loo manaomia moni se tupe, ae e masalosalo o ia o le a lē mafai e Simona ona toe totogi atu le tupe, auā o loo tauivi foi Simona ma le faafitauli tau i le fafagaina o lona aiga. O le ā la le mea e tatau ona fai e Mikaele?

I le tele o atunuu, e mafai e tagata ona leiloa faafuasei mea e tausia ai o latou aiga, ma iloa ai ua leai ni a latou tupe po o ni inisiua e mafai ai ona totogi pili o tausiga faafomai. Atonu e lē mafai ona fai ni nogatupe i faletupe, pe e matuā tetelē foi pasene. Pe a tupu mai se faalavelave faafuasei, e peiseai e na o le pau lava le vaifofo, o le faia lea o se nogatupe. Ae peitai, a o lei talosaga atu mo se nogatupe, e iai ni mataupu tāua e manaomia ona manatunatu lelei i ai.

Ia Muai Fuafua Lelei

Ua saunia e le Tusi Paia taiala mo lē e faaune atu ma lē nono. O le utagia o lenei fautuaga, o le a mafai ai ona tatou alofia le tele o le lē femalamalamaai ma faalogona tiga.

Mo se faataitaiga, ua faamanatu mai e le Tusi Paia ia i tatou e faapea e lē tatau ona tatou manatu māmā i le mataupu o le nonoina mai o tupe. Na uunaia e le aposetolo o Paulo Kerisiano i Roma e faapea: “Aua neʻi ia te outou se mea e tasi a se tasi tagata; a e tau lava o le fealofani; auā ai sē alofa atu i se tasi tagata, ua atoatoa ona faia e ia o le tulafono.” (Roma 13:8) O le mea moni, e na o le pau lava le aitalafu e tatau i se Kerisiano ona nofo aitalafu ai i isi, o le alofa. I lea, e mafai ona tatou fesili ifo ia i tatou lava, ‘Pe e tatau moni lava ona faia o lenei nogatupe?’

Afai o le tali o le ioe, o se mea atamai la le manatunatu i iuga o le faia o se aitalafu. Na faaalia e Iesu Keriso e faapea o filifiliga tāua, e manaomia ai ona mafaufau ma faia ma le faaeteete fuafuaga. Sa ia fesili atu i ona soo: “O ai foi so outou ua fia fai se ʻolo, e le muai nofo i lalo e faitau tupe e totogi aʻi, po ua lava ana mea e faauma ai?” (Luka 14:28) E faatatauina lenei mataupu silisili pe a manatu e talosaga atu i se uso mo se nogatupe. O le faitauina o le tau o se nogatupe, o lona uiga o le fuafuaina lea o le auala ma le taimi o le a tatou toe totogi atu ai lea nogatupe.

E iai le aiā a lē na faaune atu le tupe e iloa ai po o le a faapefea ma o afea o le a toe totogi atu ai le nogatupe. O le fuafua ma le faaeteete o mea, o le a mafai ai ona tatou tuuina atu ia te ia ni tali maʻoti. Po ua tatou faitauina ea le tau o le toe totogia atu o le nogatupe i se vaitaimi talafeagai? O le mea moni, o le a faigofie lava ona fai atu i lo tatou uso: “O le a ou toe totogia vave atu lava. Ua e iloa e mafai ona e faatuatuaina aʻu.” Ae pe lē tatau ea ona tatou taulimaina na mataupu i se isi auala e sili atu ona faaalia ai lo tatou maufaatuatuaina? E tatau ona tatou maumauai mai lava i le amataga ina ia toe totogi le nogatupe, talu ai o le mea lena e manaomia e Ieova mai ia i tatou. Ua faapea mai le Salamo 37:21: “Ua no mea le tagata amio leaga, a e le toe taui atu ai.”

O le fuafuaina o le auala ma le taimi o le a tatou toe totogi atu ai le nogatupe, ua faamanatu mai ai ia i tatou lava le mamafa o le tautinoga lea ua tatou faia. O lenei mea e faaitiitia ai le ono faia o ni aitalafu e lē manaomia. E iai aogā pe afai e mafai ona tatou alofia le faia o ni aitalafu. Ua lapatai mai le Faataoto 22:7 e faapea: “E auauna foi lē no mea i le ua au mai ai ana mea.” E tusa lava po o lē faaune atu ma lē no mea o ni uso faaleagaga uma i laua, ae o le a iai lava sina aafiaga o le la faiā ona o se nogatupe. O ni feeseeseaiga ona o ni nogatupe, ua oo lava ina saveu ai le filemu i nisi faapotopotoga.

Faamatala le Mafuaaga e Manaomia ai le Tupe

E iai i lē na te faaune atu le tupe le aiā e iloa ai le auala moni o le a tatou faaaogaina ai le tupe lea ua nono. E lē gata i lenei nogatupe, ae po o tatou aitalafuina foi ni tupe mai isi tagata? Afai e faapena, e tatau ona tatou faamanino atu, auā o le auala lea o le a aafia ai lo tatou mafaia ona totogiina o lea nogatupe.

E tāua faapitoa lava le faia o se faaeseesega i le va o le nogatupe mo se pisinisi ma se nogatupe mo le faafetaiaia o se manaoga faafuasei ua tulai mai. E leai se tiute tauave faale-Tusi Paia o se uso e nono atu ai ni tupe mo se taumafaiga o se pisinisi, ae e ia te ia se lagona alofa e fia fesoasoani atu pe afai o se isi uso, e lē o sona sese, ua lē mafai ai ona ia totogia mea manaomia e pei o meaʻai, lavalava, po o vailaau mo le tausiga faafomai. O le tautala saʻo ma le faamaoni i nei mataupu o le a fesoasoani e taofia ai ni feeseeseaiga.—Efeso 4:25.

Fai se Maliega Tusitusia

O le iai o se maliega tusitusia, o se laasaga tāua lea e mafai ona tatou alofia ai ni feeseeseaiga i le lumanai. E faigofie ona galo ni auiliiliga patino o se maliega seiloga ua tusitusia. E manaomia ona tusia i lalo le aofai o tupe na nonoina, ma le taimi e tatau ai ona toe totogi mai. E fautuaina foi ina ia sainia uma e lē nono ma lē faaune atu le maliega ma ia tofu i laua taitoatasi ma se kopi totino e teu. Ua faailoa mai e le Tusi Paia e faapea, o maliega tau tupe e tatau ona tusitusia ma faamauina. I se taimi puupuu lava a o lei faaumatia e Papelonia ia Ierusalema, na faatonu atu ai e Ieova ia Ieremia ina ia faatau mai se fasi fanua mai se tasi o ona aiga. E mafai ona tatou maua aogā mai le autaluina o lea taualumaga.

Na faapea mai Ieremia: “Ona ou faatauina lea mai ia Hanameali, le atalii o le uso o loʻu tamā, o le fanua o loo i Anatota, ma ou fuatia ia te ia o tupe, o sekeli ario e sefulu ma le fitu. Ona ou tusia lea i le tusi, ma ou faamaufaailogaina ai, ma ou amia mai molimau, ma ou fuatia le ario i le fua faatautau. Ona ou ave ai lea o le tusi o le faatau, o le ua faamaufaailogaina e tusa ma le poloaiga ma tulafono, atoa ma le ua le faamauina; ua ou ave foi le tusi o le faatau ia Paruka, le atalii o Neria, le atalii o Maaseia, i luma o Hanameali, le atalii o le uso o loʻu tamā, i luma foi o molimau na tusi i le tusi o le faatau, i luma foi o tagata Iuta uma sa nonofo i le lotoā o le fale puipui.” (Ieremia 32:9-12) E ui lava o lenei faaaoaoga e faatatau i le faatau mai ae lē o se nogatupe, ae ua faaalia i lea mea le tāua o le taulimaina o maliega tautupe i se auala manino ma le saʻo.—Tagai i le Watchtower, Me 1, 1973, itulau 287-288.

Pe a mapuna aʻe ni tulaga faigata, e tatau i Kerisiano ona taumafai e foia na faigata ina ia ogatasi ma le fautuaga a Iesu o loo faamauina i le Mataio 18:15-17. Ae na faapea mai se tasi o toeaina na taumafai e fesoasoani atu i mataupu faapena: “E toetoe lava o mataupu uma faapena, sa leai se maliega tusitusia. O le iuga, sa leai se malamalamaga manino i le va o itu e lua i le auala sa tatau ona toe totogia ai le nogatupe. Ua ou mautinoa o le faia o ni maliega tusitusia i nei mataupu, o se faailoga lea o le alofa ae lē o le lē maufaatuatuaina.”

O le taimi lava e tatou te faia ai se maliega, e tatau lava ona tatou taumafai moni e tausisia a tatou upu. Na apoapoai mai Iesu e faapea: ‘Ia avea lau upu Ioe, ma Ioe. O le Leai, ia Leai; auā o upu e sili i na upu, e mai lē o leaga ia.’ (Mataio 5:37) Afai e iai se faafitauli lē mailoa ua taofia ai i tatou mai le toe totogiina atu o le nogatupe e pei ona fuafuaina ai, e tatau lava ona tatou vave faailoa atu lea tulaga i lē na faaune maia le tupe. Atonu o le a ia faatagaina i tatou e togitogi atu le nogatupe i se aofaiga itiiti mo se taimi e umi atu.

Peitai, o ni tulaga lē manuia e lē avea ma o tatou alofaga i le lē faia o a tatou tiute tauave. O se tagata e mataʻu ia Ieova e na te faia le mea aupito sili e faataunuu ai lana upu. (Salamo 15:4) E ui atonu o le a lē iu nei mea i le auala lea na tatou faatalitalia, ae e tatau lava ona tatou nofo sauni e faia ni faataulagaina ina ia mafai ai ona toe totogiina atu a tatou aitalafu, auā o la tatou matafaioi faa-Kerisiano lena.

Ia Faaeteete i le Faaune Atu o Tupe

O le mea moni, e lē na o lē no mea e manaomia ona fuafua ma le faaeteete. O se uso foi o loo toai atu i ai le nogatupe, e tatau foi ona fuafua tatau le taunuuga o le faia faapea. A o lei faaune atu ni tupe, tatou te atamamai pe a faaalu se taimi e iloilo totoʻa ai ma le faaeteete le mataupu. Ua uunaia e le Tusi Paia le manaomia ona faaeteete i le faapea mai: “Aua neʻi fai oe ma so latou o e lūlūlima, pe fai oe ma faamaoniga i mea ua aitalafu ai.”—Faataoto 22:26, NW.

A o e lei ioe atu, ia manatunatu i le mea e ono tupu pe afai o le a lē mafai e le uso ona toe totogi atu le tupe ia te oe. Po o le a e oo ai i se faafitauli matuia tautupe? E ui lava atonu o iai faanaunauga sili ona lelei o le uso, ae e mafai ona suia tulaga, pe ono sese foi lana fuafuaga. Ua faamanatu mai ia i tatou uma lava e le Iakopo 4:14 e faapea: “E le iloa e outou se mea e tupu a taeao. Auā pe se a lo outou ola? O le puao lava lea, ua aliali mai i se itu aso itiiti, ona mou ai lea.”—Faatusatusa i le Failauga 9:11.

Ae maise lava i le tulaga o nogatupe mo pisinisi, o se mea atamai pe a manatunatu i le talaaga o lē no tupe. Pe e lauiloa o ia i le maufaatuatuaina ma faamoemoeina, pe e lē agavaa o ia i le taulimaina o tupe? Po o fai ma ana masani le alu atu i uso eseese i le faapotopotoga ma talosagaina ni tupe? O se mea atamai le manatua o upu nei: “O le ua faigofie, e talia e ia upu uma; a o le ua mafaufau, ua faautauta o ia i lona ala.”—Faataoto 14:15.

I nisi taimi, atonu e lē mo le lelei foi o lē no tupe le faamatuu atu i ai o se nogatupe. E ono faigofie ona avea ma avega mamafa ia te ia, ma lē maua ai lona olioli. Pe tatou te mananao ia avea lena uso ma a tatou “pologa”? Po o le a aafia la tatou faiā ona o se nogatupe, ma oo ai ina lē mautonu pe māsiasi ai foi pe afai ua lē mafai ona ia toe totogi atu le nogatupe?

Afai o iai moni se manaoga, pe mafai ona tatou mafaufau e faia se meaalofa na i lo le faaune atu e tusa lava pe itiiti i lo le mea na faatalosagaina? Ua faalaeiau mai le Tusi Paia ia i tatou ina ia alolofa pe a tatou vaai atu ua matitiva o tatou uso. Na pese le faisalamo e faapea: “O le tagata amiotonu, ua amio alofa ia, ma foai fua ana mea.” (Salamo 37:21) E tatau ona uunaia i tatou e le alofa e faia le mea tatou te mafaia e avatu ai se fesoasoani aogā i uso matitiva.—Iakopo 2:15, 16.

Ia Fuafua ma le Faaeteete Au Gaoioiga

Ona o nogatupe o se avanoa tele lea e māfua ai feteenaiga, tatou te ono manatu la i ai o se mea mulimuli lea e tatau ona faia na i lo o le manatu i ai o se mea faigofie. E pei ona matauina i le amataga, e tatau i lē nono tupe ona tautala saʻo i lē na te faaune atu tupe, i le faia lea o se maliega tusitusia i le auala ma le taimi o le a toe totogi ai. Ma ina neʻi iai se tulaga faigata moni, o le avatua la o se meaalofa atonu o le vaifofo sili lea.

E lei nonoina atu e Mikaele ia Simona le tupe na ia talosaga ane ai. Na i lo o lea, na avatu e Mikaele ia te ia se tupe itiiti e fai ma meaalofa. Sa matuā loto faafetai Simona mo lea fesoasoani i le totogiina o le talavai a lona atalii. Ma sa fiafia Mikaele ona sa mafai ona faaalia lona alofa faaleuso i se auala aogā. (Faataoto 14:21; Galuega 20:35) O loo vaavaai uma atu i luma Mikaele ma Simona i le pulega o le Malo, o le taimi lea ‘o le a laveaiina ai e Keriso lē mativa i lona alaga mai’ ma e lē toe fai mai foi se tasi, ‘ua ou maʻi.’ (Salamo 72:12; Isaia 33:24) A o lei oo atu i lena taimi, seʻi o tatou iloiloina ma le faaeteete o tatou laasaga pe afai o le a faamalosia i tatou e talosaga atu i se uso mo se nogatupe.

[Faaopoopoga i lalo]

[Ata i le itulau 25]

O le faia o ni maliega tusitusia mo ni nogatupe, o se faailoga lea o le alofa, ae lē o le lē maufaatuatuaina