E Mafai Faapefea Ona E Faaalia le Lotomaulalo Moni?

O LE lotomaulalo moni e tautele i fofoga o le Atua. Na tusi mai Iakopo: “E tetee atu le Atua i e faamaualuga, a e foai mai le alofa tunoa i e faamaulalo.” (Iakopo 4:6) Iinei sa ono faasino atu Iakopo i nisi o manatu o loo faamatalaina mai i Tusitusiga Eperu. “O loo maualuga Ieova, a e silasila mai o ia i le ua faamaulalo; a o le ua faamaualuga, e silafia mamao mai e ia.” “E faamaulaloina mata faasiasia o tagata nuu; e faamaulaloina foi le faamaualuga o alii; na o Ieova lava e viia.” “O e tauemu e tauemua foi i latou e ia [le Atua]; a e foai mai e ia le alofa tunoa i e agamalu.”—Salamo 138:6; Isaia 2:11; Faataoto 3:34.

Na faalaeiauina foi e le aposetolo o Peteru le lotomaulalo. Na ia tusi mai: “Ia oofu outou uma lava i le loto maulalo o le tasi i le tasi; auā, E tetee atu le Atua i e faamaualuluga, a e foaiina mai le alofa tunoa i e faamaulalo.”—1 Peteru 5:5.

Faaaoaoga a Keriso o le Lotomaulalo

Atonu e te ono fesili mai, O le ā se tāua po o se aogā i le avea ma sē lotomaulalo? Mo le tagata o loo tauivi ina ia avea ma Kerisiano moni e faavae mai ai i lena mea le tali—ina ia lotomaulalo e tatau ona pei o Keriso. Na faaalia e Iesu lona lotomaulalo i le taliaina o le faaeaga tutasi o le tuua o le nofoaga i le lagi ae afio mai i le lalolagi ma avea ma se tagata faatauvaa, e maulalo ifo i agelu. (Eperu 2:7) E ui lava o ia o le Alo o le Atua, ae na ia onosaia le anoanoai o le faalumaina sa faaoo atu ia te ia mai ona fili faalelotu. Sa tausisia pea lona toʻafilemu i le taimi o ona tofotofoga, e ui ina sa mafai ona valaau atu i lekeona o agelu e fesoasoani mai.—Mataio 26:53.

Mulimuli ane, na faalumaina ai Iesu i lona maliu faataugā i luga o le satauro, ae sa tumau pea i le faamaoni i lona Tamā. O lea, sa tusi ai Paulo ona o ia: “Ia ia te outou foi lea lava manatu sa ia Keriso Iesu, o ia sa uiga faatasi ma le Atua, e lei manatu ia o se mea faoa ina ia tusa lava o ia ma le Atua; a ua faamaulalo e ia ia te ia, ua uiga o ia faatasi ma le pologa, ina ua faia o ia faapei o se tagata; na iloa foi o ia ua tino mai i le tagata, ua faamaulalo e ia ia te ia, ua na anaana ua oo ina maliu, o le maliu lea i le satauro.”—Filipi 2:5-8, LT.

O lea, e faapefea ona tatou faaali atu le lotomaulalo moni? I tulaga e faatinoina ai, e faapefea ona tatou tali atu i se auala agamalu na i lo le faamaualuga?

Le Auala e Tali Atu ai se Tagata Agamalu

Seʻi o tatou mafaufau la i le lotomaulalo i le faatulagaga i le galuega, a lē o le galuega faaletino po o le auaunaga faa-Kerisiano. Ina ia taulau manuia se galuega e fai, atonu e manaomia ona iai ni ovasia, pule, po o ni pule lagolago. E tatau ona iai se isi e faia faaiuga. E faapefea ona e tali atu i ai? Pe e te manatu ifo faapea, “O le ā lana aiā e taʻu mai ai ia te au le mea e fai? Ua leva atu ona ou iai i le galuega lenei na i lo ia.” Ioe, afai e te faamaualuga, o le a iai ia te oe le loto tiga i le gauai atu. Ae i le isi itu, o le tagata agamalu e tauivi ina ia “aua neʻi faia se mea e tasi ma le finau vale, ma le mitamita fua; a ia taitasi . . . ma manatu ma le loto maulalo, ua sili nisi.”—Filipi 2:3.

E faapefea ona e tali atu pe a aumai se fautuaga mai se tagata talavou po o se fafine? Afai e te lotomaulalo, o le a e manatunatu i ai. Afai e te faamaualuga, o le a e ita ma teena ai lava i lena taimi. Pe e sili ia te oe lou mauaina o le viiga ma tala faaʻoleʻole ia e taitaia atu ai i le faaleagaina o oe, po o le mauaina o fautuaga aogā mo le atiina ae o oe?—Faataoto 27:9; 29:5.

Pe e mafai ona e faafetaiaia le luʻi o mafatiaga? O le lotomaulalo o le a mafai ai ona e faafesagaia tulaga faigata ma tumau ai, e pei ona sa faia e Iopu. Afai e te faamaualuga, o le a oo ina e lē fiafia ma teena tulaga matuia e oo mai ae taliaina manatu lē migao.—Iopu 1:22; 2:10; 27:2-5.

O le Lotomaulalo e Alofa ma Faamagalo

Ua faafaigata mo nisi tagata ona faapea atu, “Ou te faamalie atu. Ua ou sese. Sa saʻo oe.” Aisea? Ua matuā ova le faamaualuga! Ae peitai, e masani lava o se faatoesega moni lava e taofia ai se finauga faaleulugalii.

Pe e te lotomalie e faamagalo atu pe a faatiga mai se tasi ia te oe? Ia, pe ona o lou faamaualuga, o le a e teulotoina ai lava lena mea, pe atonu mo se taimi umi, ma e lē fia tautala ai i lē sa faatiga mai? Pe o le a faaauau ai pea le teulotoina o le feeseeseaiga i se taumafaiga ina ia toe taui atu? Ua fasiotia nisi o tagata i ni feeseeseaiga ua leva ona teulotoina. I nisi, o le faitala taufaaleaga e faaleagaina ai ua fai ma a latou auupega. I le tuufaafeagai, o se tagata lotomaulalo e alofa ma faamagalo. Aisea? Auā o le alofa e lē matauina le leaga. Sa finagalo Ieova e faamagaloina le fanauga a Isaraelu pe afai latou te foloina i totonu lo latou faamaualuga. Sa lotomalie le soo o Iesu e faaauau pea ona faamagalo!—Ioelu 2:12-14; Mataio 18:21, 22; 1 Korinito 13:5.

O le tagata lotomaulalo ‘e tausolomua ona ava o le tasi i le isi.’ (Roma 12:10) Ua faitauina faapenei i le New International Version: “Ia maualuga ia te oe le ava i isi.” Pe e te viia isi ma talisapaia o latou agavaa ma o latou tomai? Pe, po o e taumafai lava e saili se masei o isi ina ia faaleaga ai o latou tulaga? Ioe, pe o mafai ona viia ma le faamaoni isi tagata? Afai e faafaigata mo oe ona faia faapea, atonu la o le lē saogalemu totino ma le faamaualuga o loo avea ma ou faafitauli.

O le tagata faamaualuga e lē lavā onosai. A o le tagata lotomaulalo e onosai ma faapalepale. Ae faapefea oe? Pe e oo ia te oe le loto tiga i so o se faiga lē lelei e oo ia te oe? O se gaoioiga faapena o le tuufaafeagai lena o le faapalepale. Afai e te lotomaulalo, o le a e lē manatu faamaualuga la ia te oe. Ia manatua le mea na tupu i soo o Iesu ina ua latou soona faatāuaina i latou lava—na oo ai ina matuā aasa le finauga po o ai e sili ona tāua o i latou. Sa galo ia i latou o i latou uma “o auauna le aoga”!—Luka 17:10; 22:24; Mareko 10:35-37, 41.

Na faamatalaina e Voltaire o se tusitala Falani le agamalu o le “faamaulalo o le agaga . . . e alofia ai le faamaualuga.” Ioe, o le agamalu o le lotomaulalo lea. O se tagata e lotomaulalo, e loto agamalu, e lē faamaualuga. E matuā faaaloalo o ia ma āva.

O lea la, aisea e tauivi ai ina ia lotomaulalo? Auā e taliaina e le Atua le lotomaulalo ma e fesoasoani ia i tatou e maua ai taiala tauatua. Ona o le lotomaulalo o Tanielu, na manatu ai Ieova i le perofeta o se “ua alofateleina” ma auina atu ia te ia le agelu ma se faaaliga! (Tanielu 9:23; 10:11, 19) O le lotomaulalo e maua ai taui e tele. E mauaina ai uo moni e alolofa ia te oe. Ae sili i na mea uma, e maua ai faamanuiaga a Ieova. “O le taui o le faamaulalo ma le mataʻu ia Ieova, o le oloa lea, ma le viiga, ma le ola.”—Faataoto 22:4.

[Ata i le itulau 7]

O se faatoesega lotomaulalo e sologa lelei ai le olaga