Po o E Mafaufau i se Faaipoipoga?
Pe afai tatou te faatusatusaina le tulaga ese ua iai talagā faaipoipoga i le lalolagi aoao i se mafuie, o lona uiga la e ogatotonu ai lava le Iunaite Setete. I se tausaga e lei mamao atu, e sili atu i le tasi le miliona faaipoipoga na faamutaina ai iina—o se faatatauga e tusa ma le lua faaipoipoga e tatalaina i minute taitasi. Ae e lelei foi ona e iloa, e lē na o le Iunaite Setete o aafia i tulaga malaia ana faaipoipoga.
E TUSA ai ma se tasi suesuega, o le aofaiga o talagā faaipoipoga i Kanata, Egelani ma Uelese, Falani, Eleni, ma Holani ua sili atu i le faaluaina faaipoipoga tatala talu mai le 1970.
E tele mafuaaga tatou te talitonu ai e faapea, o le toatele o ulugalii na ala ona faaipoipo ona o le alofa o le tasi i le isi ma e mananao e nonofo faatasi i o latou olaga atoa. Ae peitai, o le mea e faanoanoa ai, o moomooga mo se faaipoipoga fiafia e masani ona pau ai lava iina—ua na o ni moomooga lē taulau. Ina ua toe iloa ane le mea moni, e toatele ua faapea mai, ua vave tele ona faaipoipo pe fapea foi, e sese le tagata ua faaipoipo i ai po o na mea uma e lua.
Aisea ua lē taulau ai le tele o faaipoipoga? Fai mai le tusitala o se tusi e uiga i faauooga: “O le mafuaaga autū lava, o le lē faia o se sauniuniga.” Ua ia faaopoopo mai e faapea: “A o matou talanoa ma ulugalii o loo iai i tulaga matuā faigata tau faaipoipoga, e lua lava ni lagona e matuā lofituina ai aʻu—o le tiga alofa ma le ita. Ou te tiga alofa ona o le lē taulau o o la moomooga mo se faiā faamalieina i lo la va. Ou te lagona le ita ona o lo la lē amanaiaina o le faigata o le fatuaiga.”
O le mea moni, e toatele ua faaipoipo e aunoa po o le itiiti foi o se iloa i le auala e mafai ona taulau manuia ai le faaipoipoga. Peitai, e lē o se mea e faateia ai lenei. Ua matauina e se tasi tagata faufautua e faapea: “E toafia ni o tatou tagata talavou e ulu atu i kolisi ma suesue e uiga i amioga a isumu ma pili, ae ua lē taulau ona iloa e uiga i amioga a ni tagata se toalua ua taʻua o le tane ma le avā?”
Po o e mafaufau e uiga i se faaipoipoga—pe e uiga i se faaipoipoga e te ono faia i le lumanai po o lau faaipoipoga lena ua e iai nei? Afai o lea, ua tatau la ona e iloa lelei e faapea, o se faiā moni mo le olaga atoa, e ese mamao mai i faiā na e faaatagia mai i ata tifaga, i faaaliga i televise, ma i tusi faitau o tala fatu e uiga i faiga e faaosofia ai le alofa fetosinaai. I le taimi lava e tasi, o le faaipoipoga a ni tagata taʻumatuaina se toalua o ē ua alofa moni le tasi i le isi, e mafai ona manatu i ai o se faamanuiaga mai le Atua. (Faataoto 18:22; 19:14) E mafai la faapefea ona e mautinoa ua e nofo sauni e faafetaiaia mea uma e manaomia i se faaipoipoga? O ā ni vala autū e tatau ona e manatunatu i ai i le filifilia o se paaga? Pe afai foi ua uma ona e faaipoipo, e mafai faapefea ona e faateleina le ono foliga mai e maua se fiafiaga e faavavau i lau faaipoipoga?