E Mafai Ona Taulau Manuia Aiga e Mātuafai

PE E MAFAI ONA IAI NI AIGA E MĀTUAFAI E TAULAU MANUIA? IOE, AE MAISE LAVA PE A MANAtua e tagata uma o le aiga e faapea “o tusi paia uma lava e mai le Agaga o le Atua ia, e aoga foi ia e aʻoaʻo ai, e aoai ai, e faatonu ai, e faapoto ai foi i le amiotonu.” (2 Timoteo 3:16) Pe a faatatauina la e tagata uma mataupu silisili o le Tusi Paia, ona iai lea o sina faamautinoaga atoatoa o le taulau manuia.

Le Uiga Autū

E itiiti ni nai tulafono patino ua faataatia mai e le Tusi Paia ina ia pulea ai faiā faaletagata. E tele lava o loo ia faalaeiauina i tatou ina ia ati ae uiga ma amioga lelei lea e taitaia ai i tatou e gaoioi ma le atamai. O na amioga ma uiga lelei o le faavae lea mo se olaga faaleaiga fiafia.

Atonu e foliga mai e manino, peitai e tāua le faapea atu o le uiga autū e manaomia mo so o se aiga ina ia taulau manuia ai o le alofa. Na faapea mai le aposetolo o Paulo: “Aua neʻi faatagā alofa; . . . Ia fefaapelepeleai i le fealofani o uso.” (Roma 12:9, 10) Ua tele ina faaaogaseseina le upu “alofa,” ae o le uiga o loo faasino mai e Paulo iinei e faapitoa. O le alofa faaleatua, ma e “le uma.” (1 Korinito 13:8) O loo faamatalaina e le Tusi Paia faapea e lē manatu faapito ma e nofo sauni e auauna atu. E galue ma le tiotio mo le lelei o isi. E onosai ma agalelei, e lē matauʻa, e lē mitamitavale, pe faafefeteina. E lē sailia sona lava lelei. E nofo sauni e tuu atu le avanoa, e talitonu, e faamoemoe, e onosai i so o se mea e tulai mai.—1 Korinito 13:4-7.

O le alofa moni e fesoasoani e faatoʻafilemu ni feeseeseaiga ma autasia tagata o ē e eseese o latou talaaga ma o latou uiga. E fesoasoani e tineia āuga matuia o se talagā faaipoipoga po o le maliu o se mātua moni. Na faamatala mai e se tasi tamaloa o se tamāfai ona faafitauli moni lava: “Sa masani ona ou manatu mamafa i oʻu lava faalogona ma lē taulau ai ona ou iloiloina faalogona o laʻu fanaufai pe oo foi lava i faalogona o laʻu avā. Sa ao ona ou aʻoaʻoina ina ia faaitiitia loʻu itaitagofie. Ae sili ona tāua, sa tatau ona ou aʻoaʻoina ina ia ou lotomaulalo.” Na fesoasoani le alofa ia te ia ina ia faia suiga manaomia.

O le Matua Moni

E mafai ona fesoasoani le alofa e taulimaina ai le faiā a tamaiti ma lo latou matua moni lea ua leai. Na faamatala mai faapea lagona o se tasi tamāfai: “Sa ou manao ia alolofa muamua mai laʻu fanaufai ia te au. Pe a latou asiasi atu i lo latou tamā moni, sa faigata lava mo aʻu ona taofia le faaosoosoga o le faia o ni tala faitio e uiga ia te ia. Pe a latou foi mai ina ua maeʻa so latou aso fiafia ma lo latou tamā, ona leaga lea o oʻu faalogona. Ae a foi mai e lē lelei, ona ou fiafia lea. O le mea moni, sa ou popole neʻi lē alolofa mai laʻu fanaufai. O se tasi o mea e sili ona faigata o le iloaina lea ma taliaina o le vaega tāua a le tamā moni i olaga o laʻu fanaufai.”

O le alofa moni na fesoasoani i lenei tamāfai ina ia feagai ai ma le mea moni faapea e lē saʻo le faatalitalia o le mauaina “vave” o le alofa. E lē tatau ona ia lagona faapea ua teena o ia pe afai ua lē taliaina vave o ia e tamaiti. Na oo ina ia iloa e faapea atonu o le a lē mafai lava ona ia suia le tulaga o le tamā moni i loto o tamaiti. Ua leva ona iloa e tamaiti lo latou tamā moni mai lava o laiti, ae o lo latou tamāfai o lea faatoʻā sau, e tatau la ona ia galue ina ia maua le alofa o lana fanau. Na faailoa mai e le tagata suesue o Elizabeth Einstein le tulaga o loo tupu i le toatele i lona faapea mai: “E lē taitai mafai ona suia le matua moni—e lē mafai lava. E oo lava i se matua ua maliu po ua ia tiaia tamaiti o loo faatumauina pea se vaega tāua i olaga o tamaiti.”

Aoaiga—O se Mataupu Maaleale

Ua faaali mai e le Tusi Paia faapea e tāua aoaiga alofa mo le fanau, ma e aofia ai la ma fanaufai. (Faataoto 8:33) O le toatele o tagata popoto ua amata ona latou ioe i le manatu o le Tusi Paia i lenei mataupu. Na faapea mai le polofesa o Ceres Alves de Araújo: “O le mea ua masani ai le lē manao o se tasi e ola i tapulaa, ae e manaomia ona iai ni tapulaa. O le ‘leai’ o se upu lea e puipuia ai.”

Ae peitai, i totonu o se aiga e mātuafai, o le vaaiga i aoaiga e ono taʻitaʻia ai i ni maseiga matuiā. Ua uma ona fafau aʻe le fanaufai e lo latou matua lea ua leai. E aliali mai, e iai ni amio ma masani a tamaiti e ono faatiga i lo latou matuafai. Atonu foi latou te lē malamalama i le mafuaaga ua ala ai ona malolosi manatu o lo latou matuafai i nisi o mataupu. E faapefea la ona taulau manuia i le feagai ai ma se tulaga faapea? Ua timaʻi atu Paulo i Kerisiano: “Ia tausisi atu i le . . . alofa, ma le onosai ma le agamalu.” (1 Timoteo 6:11) E fesoasoani le alofa faa-Kerisiano i se matuafai faapea foi ma le fanaufai ina ia faaalia le agamalu ma le onosai a o taumafai e femalamalamaai. Afai e lē onosai le matuafai, e mafai e lona ‘ita, lotoa, ma upu leaga,’ ona vave faaleagaina ai se faiā ua faamautuina.—Efeso 4:31.

O le malamalama i le auala o le a fesoasoani ai i lenei faafitauli ua saunia mai lea e le perofeta o Mika. Na ia faapea mai: “Se a foi se mea e finagalo ai Ieova ia te oe, pe a le o ia mea, ia fai le amiotonu, ia naunau i le alofa, ma ia feooai ma lou Atua ma le loto faamaulalo?” (Mika 6:8) E tāua le faia o le amiotonu pe a faaoo atu aoaiga. Ae faapefea le alofa? Na tala mai se tasi toeaina Kerisiano e faapea e masani lava ona faigata ona fafagu i luga lana fanaufai i taeao o Aso Sa ina ia auai i le tapuaiga faatasi ma le faapotopotoga. Na i lo le ote ia i latou, sa ia taumafai e fai i le alofa. E alapo lava o ia, ma sauniuni le mālū taeao, ona avatu lea o sina mea inu mafanafana mo i latou taitoatasi. O le iuga, sa faafaigofie ona latou lolo atu e talia lana aioi atu ina ia nonofo i luga.

Na faia e le polofesa o Ana Luisa Vieira de Mattos se manatu matagofie e faapenei: “E lē o le ituaiga o aiga e tāua a o le lelei o loo iai le faiā. I aʻu suesuega ma le faaeteete ua ou matauina ai o talavou e iai faafitauli tau i amio e masani lava o le toatele e ō mai i aiga e vaivai le taʻitaʻiga faamātua, e leai ni tulafono ma leai foi ni fesootaiga.” Na ia faapea mai foi: “E tatau ona matuā faamamafa atu faapea o le tausia aʻe o fanau e manaomia ona faaaofia ai foi le fai atu e leai.” E faaopoopo atu i ai, na taʻua faapea e Drs. Emily ma John Visher: “O le mea moni, e faatoʻā aogā lava aoaiga pe afai e amanaia e le tagata o loo avatu i ai le aoaiga uiga ma le faiā ma lē o loo tuuina atu le aoaiga.”

O nei faamatalaga ua faafaigofie ai lava ona taliina le fesili po o ai i aiga e mātuafai e ao ona faaooina atu aoaiga. O ai e tatau ona fai atu e leai? Ina ua maeʻa ona talanoaina le mataupu, ua filifili ai nisi mātua e faapea, ina ia amata ai, e tatau i le matua moni ona avea ma lē na te avatuina aoaiga ina ia faataga ai se taimi mo le matuafai e ati ae ai se faiā vavalalata ma le fanau. Ia tuu atu se avanoa ina ia iloa e tamaiti latou te talitonu e alofa le matuafai ia i latou a o lei oo i le taimi na te avatuina ai aoaiga.

Ae faapefea pe afai o le matuafai o se tamā? Pe e lē o fai mai ea le Tusi Paia o le tamā o le ulu lea o le aiga? Ioe. (Efeso 5:22, 23; 6:1, 2) Peitai, atonu e manao se tamāfai e tuu atu i se tasi mo sina taimi le matafaioi o aoaiga, ae maise lava pe a aofia ai faasalaga. Atonu na te faatagaina tamaiti e usiusitai ‘i le upu a lo latou tinā’ a o ia faataatiaina le faavae mo i latou e ‘faalogo ai i le aʻoaʻo atu a lo latou tamā [fou].’ (Faataoto 1:8; 6:20; 31:1) Ua faaalia i faamaoniga faapea o le taunuuga mulimuli, e lē o faasagatau i le mataupu silisili o le tulaga ulu. E faaopoopo atu i ai, na faapea mai se tasi tamāfai: “Ou te manatua o aoaiga e aofia ai timaiga, faasaʻoga, ma otegiaga. Afai e tuuina atu i se auala saʻo, alofa, ma agalelei faatasi ai ma le lagolago atu o faataitaiga a mātua, e masani lava ona aogā.

E Manaomia e Mātua Ona Fesootai

Ua faapea mai le Faataoto 15:22: “E faaleaogaina mafaufauga pe a leai se filifiliga.” I totonu o se aiga e mātuafai, o talanoaga saoloto e toafilemu ma faalilolilo i le va o mātua e tāua. Na matauina e se tusitala o le nusipepa o le O Estado de S. Paulo e faapea: “E masani lava ona taumafai fanau e tofotofoina tapulaa ua uma ona faataatia e mātua.” Atonu e faaluaina le saʻo o lena mea i aiga e mātuafai. O lea la, e manaomia e mātua ona malilie faatasi i mataupu eseese ina ia iloa mai ai e tamaiti lo la autasi. Ae faapefea la, pe a gaoioi se matuafai i se auala ua lē tonu i le manatu o le matua moni? E tatau la ia i laua ona foia le faafitauli tau o i laua ae lē i luma o tamaiti.

Na tala mai e se tinā na toe faaipoipo e faapea: “O le mea e sili ona faigata i se tinā o le vaai atu lea o aoai mai e le tamāfai lana fanau, ae maise lava pe a ia manatu o loo ia gaoioi ma le lē saʻo ma soona mateletele. E momomo ai lona loto, ma ia manao ai e tu atu e puipuia lana fanau. O taimi faapena, e faigata ai lava ona tumau i le gauai atu i lana tane ma lagolagoina o ia.

“I se tasi mea na tupu, na talosaga atu ai laʻu fanau tama e toalua, e 12 tausaga ma le 14 tausaga i lo la tamāfai mo se faatagaga i se mea sa fia fai. Na vave lava ona ia teena ma tuua le potu e aunoa ma le faatagaina o i laua e faamatala mai le tāua o lenei mea mo i laua. Na amata ona tau fai melotagi le aualii, ma sa ou lē magagana. Na tilotilo mai le alii matua ma faapea mai: ‘Tinā, na e vaai i le mea sa ia faia?’ Na ou tali atu: ‘Ioe, o lea ou te iloa. Ae o ia lava o le ulu o le aiga, ma o loo taʻu mai e le Tusi Paia ia i tatou ina ia faaaloalo i le tulaga ulu.’ O i laua o ni tama lelei na la ioe i le mea na ou fai atu ai, ma maua ai sina o la toafilemu. I le afiafi lava lena, na ou faamatalaina ai lea mataupu i laʻu tane, ma ia iloa ai ua fai si ona pulepuletutū. Na ia alu atu loa i le potu o tama ma faatoese.

“E telē se aogā na matou aʻoaʻoina mai i lena mea na tupu. Na aʻoaʻoina ai e laʻu tane le faalogologo atu a o lei faia faaiuga. Na ou aʻoaʻoina le faasilisilia o le mataupu silisili o le tulaga ulu, e tusa lava pe ou te lagonaina ai le tiga. Na aʻoaʻoina ai e tama le tāua o le usiusitai. (Kolose 3:18, 19) O le faatoesega mai le loto a laʻu tane ua matou aʻoaʻoina ai le tāua o le lotomaulalo. (Faataoto 29:23) I aso nei, ua avea na tama e toalua ma ni toeaina Kerisiano.”

E iai mea sese o le a faia. O le a faia e tamaiti ni faaupuga po o ni gaoioiga e tiga. O omiga i taimi faapea, e taʻitaʻia atu ai mātuafai e gaoioi ma le lē tatau. Ae peitai, o nei upu faigofie, “Ou te faamalie atu, faamolemole faamagalo mai aʻu,” e telē sona aogā i le faaleleia o faalogona tiga.

Faamalosia o le Autasi Faaleaiga

E telē se taimi e faaalu ina ia ati ae se faiā mafana i totonu o se aiga mātuafai. Afai o oe o se matuafai, e manaomia ona e faaalia le tiga alofa. Ia malamalama, ma nofo sauni e faaalu se taimi ma le fanau. Ia taaalo faatasi ma le vaega laiti. Ia nofo sauni e talanoa atu i tamaiti matutua. Vaai ni avanoa e faifaimea faatasi ai—mo se faataitaiga, valaaulia le fanau e fesoasoani i galuega i le fale, e pei o le sauniunia o le taumafataga po o le fufuluina o le taavale. Ia valaaulia e lua tou te ō faatasi e fesoasoani ia te oe a o e alu atu i le maketi. E faaopoopo atu i ai, o nai gaoioiga itiiti e ono faaali atu ai le alofa o loo ia te oe. (O le mea moni, e tatau i tamāfai ona faaeteete, i le mataʻitūina lea o tapulaa tatau i le va ma o latou afafinefai ma ia aua neʻi faia i latou i se tulaga e lē toʻa lelei ai o latou faalogona. E tatau foi i tināfai ona manatua e iai foi tapulaa i le va ma fanautama.)

E mafai ona taulau manuia aiga e mātuafai. E toatele ua taulau. O aiga ua sili ona taulau o aiga ia o loo aofia ai tagata uma, ae maise lava mātua, i le atiina ae o ni manatu saʻo ma ni faamoemoega e mafai ona faataunuuina. Na tusi mai le aposetolo o Ioane: “Le au pele e, ia tatou fealofani; auā mai le Atua le alofa.” (1 Ioane 4:7) Ioe, o le alofa e sau mai le loto o le ala moni lea i le fiafia o se aiga e mātuafai.

[Ata i le itulau 7]

O AIGA O MĀTUAFAI E FIAFIA

e suesue faatasi le Afioga a le Atua . . .

e faaalu se taimi e faatasitasi ai . . .

e talanoa faatasi . . .

e galulue faatasi . . .