Talavou—Toleni o Outou Tomai e Mafaufau Ai!

“A o mea aano, mo tagata taʻumatuaina, o ē ua latou faaaogaina lo latou tomai e mafaufau ai, ua toleniina ai la ina ia tuueseese ai le lelei mai le leaga.”—EPERU 5:14, NW.

1, 2. (a) E faapefea i lo tatou tulaga i aso nei ona faatusatusa atu i Kerisiano anamua i Efeso? (e) O ā tomai e mafai ona puipuia ai oe mai lamatiaga, ma e faapefea ona e ati ae na tomai?

“O LENEI, ia faaeteete outou ina ia outou savavali ma le faautauta, aua neʻi faapei o e valelea, a ia faapei o e popoto; ia faaaogaina e outou aso o lenei olaga, auā o ona po nei ua leaga.” (Efeso 5:15, 16) Talu ona tusia e le aposetolo o Paulo na upu i le lua afe tausaga ua tuanai, ‘o loo alualu pea lava i luma le leaga o tagata amioleaga ma ē taupelopelo i se tulaga e sili atu ona leaga.’ Ua tatou ola nei i “aso faigata,” po o le taimi ua matuā “tumu i mea matautia,” e pei ona faaupuina ai e se isi faaliliuga.—2 Timoteo 3:1-5, 13; Phillips.

² Peitai, e mafai ona e alofia le afaina ai i mea matautia o loo natia i ou ala, e ala i le ati ae o le “faautauta, . . . poto ma le mafaufau.” (Faataoto 1:4) Fai mai le Faataoto 2:10-12: “A oo le poto i lou loto, ma ua mālie ia te oe le atamai; e faafeao le mafaufau ia te oe; e leoleo ia te oe le faautauta; ina ia laveai ia te oe ai le ala leaga; ai le tagata ua tautala i mea faapiopio.” Peitai e faapefea ona e ati ae na tomai? Fai mai le Eperu 5:14 (NW): “A o mea aano, mo tagata taʻumatuaina, o ē ua latou faaaogaina lo latou tomai e mafaufau ai, ua toleniina ai la ina ia tuueseese ai le lelei mai le leaga.” E pei lava o so o se tomai, ina ia lelei ona faaaogā tomai o se tasi e mafaufau ai e manaomia ona toleniina. O le upu Eleni sa faaaogā e Paulo o lona uiga moni lava o le ‘toleniina e pei o se tagata taalo.’ E faapefea ona e amata lena ituaiga toleniga?

Toleniina o Ou Tomai e Mafaufau Ai

3. E mafai faapefea ona e faaaogaina ou tomai e mafaufau ai pe a manaomia ona e faia se filifiliga?

³ Mātau mai o ou tomai e mafaufau ai—o lou agavaa e faavasega ai le saʻo mai le sese—e toleniina e ala i le “faaaogaina.” A faapea e tatau ona e faia se filifiliga, o le taumate o se mea, pe gaoioi ona ua faagaeetia, po o le tau lava ina mulimuli atu i tagata, e seāseā iu i se filifiliga atamai. Ina ia faia ni filifiliga atamai, e ao ona faaaogā ou tomai e mafaufau ai. E faapefea? Muamua, e ala i le iloiloina maeʻa o le mataupu ma ia iloa uma mea moni. Fai ni fesili pe a manaomia. Fuafua po o ā faaiuga eseese e mafai ona e faia. Fai mai le Faataoto 13:16: “O tagata mafaufau uma, e taitasi ma amio poto ia.” A uma lena, taumafai e faavasega po o ā tulafono o le Tusi Paia po o mataupu silisili e aafia ai i le mataupu. (Faataoto 3:5) Peitai, ina ia faia lenei mea, e ao ona iai sou malamalamaga i le Tusi Paia. O le pogai lena ua faalaeiau mai ai Paulo ia i tatou ina ia aai i “mea aano”—ia aʻoaʻo “le lautele, ma le umi, ma le loloto, ma le maualuga” o le upu moni.—Efeso 3:18.

4. Aisea e tāua ai le iloa o mataupu silisili a le Atua?

⁴ E tāua le faia faapea, talu ai tatou te lē lelei atoatoa, e faigofie ona agasala. (Kenese 8:21; Roma 5:12) Fai mai le Ieremia 17:9: “E sili le faaʻoleʻole o le loto i mea uma, ma ua matuā leaga lava.” A aunoa ma mataupu silisili faaleatua e taʻitaʻia i tatou, e mafai ona tatou faaseseina i tatou lava e manatu faapea e lelei se mea e leaga—ona e tuinanau i ai o tatou tino. (Faatusatusa i le Isaia 5:20.) Na tusi mai le faisalamo e faapea: “E faapefea ea ona faamamāina e le taulealea o lona ala? Ona ua tausi i ai e tusa ma lau afioga. O au feau ou te maua ai le lotomatala; o le mea lea ou te ʻinoʻino ai i ala pepelo uma lava.”—Salamo 119:9, 104.

5. (a) Aisea ua mulimuli atu ai nisi talavou i ala sese? (e) Na faapefea i se tasi teine talavou ona avea le upu moni ma ana mea totino?

⁵ Aisea ua mulimuli atu ai i ala sese nisi talavou sa tausia aʻe i aiga Kerisiano? Po ua māfua ea ona ‘latou te lei faamaonia ia i latou lava le lelei ma le mālie, ma le atoatoa o le finagalo o le Atua’? (Roma 12:2, NW) O nisi e ono auai ma o latou mātua i sauniga ma mafai ona latou maua nisi o aʻoaʻoga faavae o le Tusi Paia. Ae a fesiligia loa e aumai ni faamaoniga o o latou talitonuga po o le faamatala mai o nisi o mea loloto o le Afioga a le Atua, e matuā faateʻia ai i le papaʻu o lo latou poto. O talavou faapena e faigofie lava ona faaseseina. (Efeso 4:14) Afai o lou tulaga lena o loo iai, aisea e lē fai ai nei ni suiga? Na faapea mai se tasi tuafafine talavou: “Sa fai ni aʻu suesuega faaopoopo. Sa ou fesili ifo ia te au lava, ‘E faapefea ona ou iloa o le tapuaiga moni lenei? E faapefea ona ou mautinoa e iai se Atua e suafa ia Ieova?’”a O le suesueina ma le faaeteete o le Tusi Paia na faatalitonuina ai o ia e faapea o mea sa ia aʻoaʻoina mai ona mātua e matuā saʻo lava!—Faatusatusa i le Galuega 17:11.

6. E faapefea ona e faamautinoa “pe se a se mea e fiafia i ai le Alii,” o Ieova?

⁶ O le iai o sou iloa e uiga i mataupu silisili a Ieova, o le a faafaigofie ai ona “suesue outou pe se a se mea e fiafia i ai le Alii.” (Efeso 5:10) Peitai e faapefea pe a iai se mataupu patino e te lē o mautinoa le gaoioiga saʻo e fai i ai? Tatalo ia Ieova mo le taʻitaʻiga. (Salamo 119:144) Taumafai e talanoa le mataupu ma ou mātua po o se Kerisiano taʻumatuaina. (Faataoto 15:22; 27:17) E mafai foi ona maua taiala aogā i le faia o ni sailiiliga faaopoopo i le Tusi Paia atoa ma lomiga a le Olo Matamata. (Faataoto 2:3-5) O le tele lava o lou faaaogaina o ou tomai faalemafaufau, o le a atili ai ona faaleleia.

Faaalia le Faautauta i Faafiafiaga

7, 8. (a) E faapefea ona e faaaogaina ou tomai e mafaufau ai i le filifilia pe e te alu i se faatasiga pe leai? (e) O le ā le vaaiga a le Tusi Paia i faafiafiaga?

⁷ Seʻi tatou vaai atu nei loa pe faapefea ona e faaaogaina ou tomai e mafaufau ai i ni tulaga patino. Seʻi manatu mo se faaaoaoga, faapea o lea ua valaaulia mai oe i se faatasiga. Atonu ua e maua se pepa faalauiloa o loo faamatala ai taualumaga o le faatasitasiga. Ua taʻu mai ia te oe e toatele talavou Molimau o le a iai. Peitai e manaomia sina tupe e totogi ai tupe faaalu o le faatasiga. Pe tatau ona e alu i ai?

⁸ Ia, faaaogā ou tomai e mafaufau ai. Muamua, saili mai mea moni. O le ā le telē o le a iai lenei faatasiga? O ai o le a iai iina? O le ā le taimi e amata ai? O le ā le taimi e uma ai? O ā ni mea ua fuafuaina o le a fai ai? E faapefea ona vaavaaia? Ona sosoo ai lea ma le faia o ni sailiiliga faaopoopo, e ala i le vaai atu i ulutala, “Social Gatherings” (Faatasiga Faitele) ma le “Entertainment” (Faafiafiaga) i le Watch Tower Publications Index.b O le ā e ono faaalia mai e au sailiiliga faaopoopo? E mautinoa lava, e lē faasāina e Ieova le faatasitasi ina ia iai se taimi e fiafia ai. O le mea moni, o loo faapea mai le Failauga 8:15 e lē gata i le galue mamafa, ae “ua leai se mea lelei i le tagata i lalo o le la, na ona ia ʻai, ma inu, ma olioli.” E oo foi ia Iesu Keriso sa auai atu o ia i ni taumafataga faapitoa ma i se faaipoipoga. (Luka 5:27-29; Ioane 2:1-10) Pe a tausisia le paleni, e mafai ona aogā le auai i faatasiga faitele.

9, 10. (a) O ā lamatiaga e ono tulai mai i nisi faatasiga? (e) O ā fesili e te ono fesiligia ai oe lava a o e lei filifili pe e te alu i se faatasiga pe leai?

⁹ Peitai ane, o faatasiga faitele e lē lelei ona faamaopoopoina, e ono tulai mai ai ni faafitauli. I le 1 Korinito 10:8, tatou te faitau ai i ni aufaatasiga lē lelei na iu atu ai i le faitaaga ma fano ai i le aso e tasi le “lua sefulu o afe ma afe e tolu [o Isaraelu lē faamaoni].” O se tasi lapataiga aogā o loo maua i le Roma 13:13 e faapea: “Ia tatou savavali ma le matagofie e tusa i le ao; aua le poula ma le onā, aua le faitaaga ma le matāitu, aua le femisai ma le mataua.” (Faatusatusa i le 1 Peteru 4:3.) E moni, e leai se aofaiga patino e mafai ona faatulaga mai mo ē e mafai ona auai i se faatasitasiga. Ae ua faaalia i mea ua uma ona tutupu e faapea o le telē o se faatasitasiga, o le faigata foi lena ona pulea. O faatasitasiga laiti, e pulea lelei, e faafaigata ona avea ma “patī lē pulea.”—Kalatia 5:21, Byington.

¹⁰ E ono lāgā i au suesuega nisi fesili faaopoopo, e pei o le: Pe o le a iai ni Kerisiano matutua taʻumatuaina i le faatasiga? Ae maise lava, o ai o faatulagaina? Pe o le fuafuaga ea o le faatasiga ina ia faatasitasi ma tafafao faatasi i se auala ati ae po o le sailia ai o se lelei tau tupe mo se isi? Pe e iai ni faasāsāga po o ai e tatau ona auai? Afai o le faaiuga o le vaiaso e fai ai, pe o le a uma i se taimi talafeagai ina ia mafai ai e i latou o le a auai i le faatasiga ona auai i le faiva faa-Kerisiano i le aso e sosoo ai? Afai o le a iai ni musika ma siva, pe o le a tausisia ia talafeagai ma tapulaa faa-Kerisiano? (2 Korinito 6:3) Atonu e lē faigofie le fesiligiaina o na fesili. Peitai ua lapatai mai le Faataoto 22:3 e faapea: “O le ua faautauta, na te iloa atu le leaga, ma lafi ai; a o e ua faigofie, e o atu pea i latou, ona faasalaina ai lea.” Ioe, e mafai ona e alofia tulaga e lamatia ai pe a faaaogā ou tomai e mafaufau ai.

Ia Faautauta i le Fuafuaina o Au Aʻoaʻoga

11. E mafai faapefea ona faaaogā e talavou o latou tomai e mafaufau ai i le fuafuaina o lo latou lumanai?

¹¹ Ua faapea mai le Tusi Paia e atamai le fuafua mo le lumanai. (Faataoto 21:5) Po ua e talanoaina ea faatasi ma ou mātua lou lumanai? Atonu o e fuafua e ulu atu i le faiva faataimi atoa o se paeonia. O le mea moni lava, e leai se isi galuega e sili ona maua mai ai le loto malie moni. Afai o e ati ae se masaniga lelei o le suesue ma ati ae ni tomai lelei i le faiva, o loo e sauniuni la mo lenei galuega e faagaeeina ai. Po ua e mafaufau pe o le a faapefea ona e tausia oe lava i le faiva? Afai i le lumanai, e te filifili e tausia aʻe se aiga, pe o le a mafai ona e tausia lena tiute tauave faaopoopo? O le faia o ni faaiuga paleni, ma le talafeagai e uiga i mea faapena e manaomia ai le faaaogā o tomai e mafaufau ai.

12. (a) Ua faapefea e nisi aiga ona filifili e fetuunai atu i tulaga fesuiai o le tau o le soifuaga? (e) Po o le mauaina o nisi aʻoaʻoga faaopoopo e feteenai ma le avea o le paeonia ma se sini? Faamatala.

¹² I nisi vaipanoa e mafai lava ona e mauaina ni toleniga faapitoa mo se galuega po o se mātātā faapitoa. O nisi talavou ua aʻoaʻoina le tomai mai le pisinisi a le latou aiga po o le mauaina foi o le toleniga mai ni uo matutua o ē e iai ni a latou pisinisi. O nisi e ave ni mataupu faapitoa i le aʻoga o le a aogā mulimuli ane mo le sailia o tupe e ola ai. O vaipanoa e lē maua ai avanoa faapena, pe a maeʻa ona mafaufauina ma le faaeteete, e ono fuafua ai matua ina ia mauaina e a latou fanau se aʻoaʻoga faaopoopo pe a uma le aʻoga maualuga. O le fuafua mo le lumanai i lenei auala ina ia tausia ai tiute tauave faatagata matua ae maise lava ina ia mafai ai ona auai i le auaunaga paeonia mo se taimi umi e lē o feteenai ma le faamuamua o le Malo o le Atua. (Mataio 6:33) E lē taofia ai foi le paeonia ona o aʻoaʻoga faaopoopo. Mo se faaaoaoga, na iai se tasi talavou Molimau ua leva ona manao e paeonia. Ina ua uma mai lana aʻoga maualuga, sa faatulaga e ona mātua—o i laua foi o ni paeonia sauatoa—ina ia maua ni ana aʻoaʻoga faaopoopo. Sa mafai ona ia paeonia a o fai lana aʻoga, ma i le taimi nei ua iai lona tomai lea e mafai ona tausia ai o ia a o faaauau pea ona paeonia.

13. E tatau faapefea i aiga ona fuafua e tusa ai o aʻoaʻoga faaopoopo?

¹³ I le mataupu e faatatau i aʻoaʻoga faaopoopo, ua iai i aiga taitasi le aiā ma le tiute tauave e fai ai la latou lava filifiliga. Pe a lelei ona filifilia ituaiga aʻoaʻoga faapena, e mafai ona aogā moni lava. Ae mafai foi, ona avea o se mailei. Afai o e mafaufauina na ituaiga aʻoaʻoga, o le ā lou sini? Pe ina ia sauniunia ai oe e taulimaina tiute tauave faatagata matua i se auala faamamaluina? Pe ina ia e “sailia ea mo oe mea tetele”? (Ieremia 45:5; 2 Tesalonia 3:10; 1 Timoteo 5:8; 6:9) Ae faapefea le sailia o ni aʻoaʻoga faaopoopo e alu ese atu ai mai le aiga, atonu pe nofo tumau ai i le mea o fai ai le aʻoga? Pe atamai lena mea pe a manatu i le lapataiga a Paulo e faapea “o le feoai ma e amio leaga e leaga ai amio lelei”? (1 Korinito 15:33; 2 Timoteo 2:22) Ia manatua foi, “ua itiiti ona aso o totoe.” (1 Korinito 7:29) O le ā le tele o le taimi o le a e faaaluina i na ituaiga aʻoaʻoga? Pe o le a alu uma ai le taimi tele o lou talavou? Afai o le tulaga lena, o le a faapefea la ona e faatatauina le timaiga a le Tusi Paia “ia e manatua le na faia oe i ona po o lou taulealea”? (Failauga 12:1) E lē gata i lena, pe o aʻoaʻoga faapitoa ia e te faia e avanoa ai ni taimi mo gaoioiga tāua faa-Kerisiano e pei o le auai i sauniga, le auaunaga i le fanua, ma suesuega totino? (Mataio 24:14; Eperu 10:24, 25) Afai e lelei ou tomai e mafaufau ai, o le a lē tāitai ona e faagaloina sini faaleagaga a o outou sauniuni ma ou mātua mo lou lumanai.

Tausia le Mamalu o Tuugatala

14. (a) O ā mataupu silisili e ao ona taʻitaʻia ai se alii ma se tamaitai o loo tuutala a o latou faaalia le alofa o le tasi i le isi? (e) Ua faapefea ona faaalia e nisi alii ma tamaitai le lē faautauta lelei i lenei tulaga?

¹⁴ O le isi vaipanoa e manaomia tele ai ou tomai e mafaufau ai o le vaitaimi o tuugatala. O se mea e faalenatura le manao e faaali atu le alofa i se tasi e te manatu tele i ai. O le faigauo mamā a le alii ma le tamaitai o loo taʻua i le Pese a Solomona e aliali mai sa iai sina fefaaaliaiga o le alofa a o lei faaipoipo. (Pese a Solomona 1:2; 2:6; 8:5) I aso nei, e ono manatu faapena nisi alii ma tamaitai o loo tuutala, o le uulima, le feasogi, ma le fusifusi ua talafeagai e lē afaina, ae maise lava pe a tau lalata ina faaipoipo. Peitai ia manatua: “O le ua faatuatua i lona lava loto, o le vale ia.” (Faataoto 28:26) E faanoanoa lava ona e iai ni alii ma ni tamaitai sa faaalia le leai o se faautauta e ala i le tuu o i latou i tulaga e solia ai mataupu silisili faa-Kerisiano. Ua loloto ma ova le faaalia o le alofa ma ua lē pulea; ua iu ai i gaoioiga lē mamā ma oo ai lava i le faia o feusuaiga lē mamā faaleituaiga.

15, 16. O ā faaeteetega talafeagai e mafai e alii ma tamaitai o loo faia ni faigauo ona uia ina ia tumau ai le mamalu o a latou tuugatala?

¹⁵ Afai o loo e tuutala, e atamai mo oe ona alofia le tuua na o oulua ma lē ua fuafua lua te faaipoipo i ni tulaga lē talafeagai. O lea la atonu e lelei le lua fiafia e aumea faatasi a o faatasitasi ma nisi po o i nofoaga faitele. O nisi alii ma tamaitai o tuutala ua fuafua e iai sē talitaliuli. E lē gata i lena, manatunatu i upu o loo i le Hosea 4:1 e faapea: “O le . . . uaina, ma le uaina fou e aveeseina ai le loto.” E mafai e le ava malosi ona aafia ai le mafaufau lelei ma tataʻi atu ai se alii ma se tamaitai o loo tuutala e gaoioi i se auala e mulimuli ane la toe salamō ai.

¹⁶ Fai mai le Faataoto 13:10: “Na o le faamaualuga lava e tupu ai le misa; a o e filifili, e popoto i latou.” Ioe, ‘filifili faatasi’ ma talanoa le auala o le a oulua amio ai. Ia tuu ni tapulaa i auala e faaalia ai le alofa, ia taitasi ma faaaloalo i faalogona ma le loto fuatiaifo o le isi. (1 Korinito 13:5; 1 Tesalonia 4:3-7; 1 Peteru 3:16) Atonu e lē faigofie le talanoaina o lenei mataupu faaeteetegata i le taimi muamua, ae mafai ona alofia ai faafitauli matuia e tutupu mulimuli ane.

Aʻoaʻoina ‘Talu Lona Tamaitiiti’

17. Sa faapefea ona fai e Tavita Ieova ma ‘ona faatuatuaga talu lona tamaitiiti,’ ma o le ā le lesona o iai iina mo talavou i aso nei?

¹⁷ O le alofiaina o mailei a Satani e manaomia ai lou matuā faaeteete—ma i nisi taimi, ia matuā lototele. Ioe, e iai taimi atonu e te oo ai i ni feteenaiga, e lē gata mai i au aumea, ae i le lalolagi atoa. Na tatalo le faisalamo o Tavita e faapea: “Auā o oe lava o loʻu faamoemoega, le Alii e Ieova, o loʻu faatuatuaga oe talu ina ou tama itiiti. Le Atua e, na e aʻoaʻo mai ia te au talu ina ou tama itiiti; ua oo mai foi i nei ona po ua ou faaali atu ou vavega.” (Salamo 71:5, 17)c E lauiloa Tavita i lona lototele. Ae o le ā le taimi na ia ati ae ai le lototele? A o talavou lava! E oo lava a o lei lauiloa i le la fetaiaiga ma Koliata, sa faaalia e Tavita se ituaiga lototele uigaese i le puipuia o lafu a lona tamā—i le fasimatea lea o se leona ma se urosa. (1 Samuelu 17:34-37) Peitai, na viiviia atoatoa e Tavita Ieova mo le lototele sa ia faaalia, e ala i lona taʻua o Ia “o loʻu faatuatuaga oe talu ina ou tama itiiti.” O le tomai o Tavita e faalagolago atu ia Ieova na mafai ai ona ia tatalia so o se puapuaga na ia fesagaia. O le a e iloaina foi, pe afai e te faalagolago atu ia Ieova, o le a ia foaiina atu ia te oe le lototele ma le malosi e te ‘manumalo ai i le lalolagi.’—1 Ioane 5:4.

18. O le ā le timaiga ua tuuina atu mo talavou amioatua i aso nei?

¹⁸ E faitau afe talavou pei o oe ua uia se auala lototele ma o loo auauna nei o ni tagata talaʻi ua uma ona papatisoina o le tala lelei . Matou te faafetaia le Atua ona o lo outou faatuatua ma le loto tetele ia te outou talavou! Ia tutumau mausalī e sosola ese mai faiga piopio a lenei lalolagi. (2 Peteru 1:4) Ia faaauau ona faaaogā lou tomai e mafaufau ai. O le faia faapea e puipuia ai oe i le taimi nei mai mala ma faamautinoa ai lou faasaoina. O le mea moni, e pei ona o le a faaalia i le tatou mataupu mulimuli, o le a e faataulauina manuia ai lou olaga.

[Faaopoopoga i lalo]

Fesili mo le Autaluga

◻ E faapefea i se talavou ona toleniina ona tomai e mafaufau ai?

◻ E mafai faapefea e se talavou ona faaaogā ona tomai e mafaufau ai pe a auai i faatasitasiga faa-Kerisiano?

◻ O ā vala e ono iloiloina i le fuafuaina o aʻoaʻoga a se tasi?

◻ E faapefea i alii ma tamaitai o loo faia se tuugatala ona alofia le maileia i feusuaiga lē mamā?

[Ata i le itulau 15]

O le aʻoaʻo ia iloa fai sailiiliga faaopoopo o le a fesoasoani ia te oe e toleniina ai ou tomai e mafaufau ai

[Ata i le itulau 16]

O faatasitasiga e toalaiti e faigofie ona pulea ma e faafaigata ona avea ma poula e lē pulea

[Ata i le itulau 16]

E ao i mātua ona fesoasoani i a latou fanau i le fuafuaina o a latou aʻoaʻoga

[Ata i le itulau 17]

O le faia o se tuugatala i se nofoaga o loo toatele nisi o iai o se puipuiga lea