Timoteo—‘Le Atalii Moni i le Faatuatua’

SA LAITIITI lava Timoteo ina ua filifilia o ia e le aposetolo Kerisiano o Paulo e avea ma ana aumea faimalaga. O lenei mea na amata ai se faiā faapaaga lea sa faaauau pea mo ni tausaga e 15. O lea faiā na atiina ae i nei tane e toalua, na mafai ai ona taʻua e Paulo Timoteo “o loʻu atalii pele lea ma le faamaoni i le Alii” ma o “loʻu lava atalii [moni] i le faatuatua.”—1 Korinito 4:17; 1 Timoteo 1:2.

O ā uiga totino o Timoteo na matuā fiafia ai Paulo ia te ia? Na faapefea ona avea Timoteo ma aumea sili ona aogā? Ma o ā ni lesona aogā e mafai ona tatou aʻoaʻoina mai faamaumauga faagaeeina o gaoioiga a Timoteo?

Na Filifilia e Paulo

Na maua e Paulo le soo talavou o Timoteo ina o asiasi atu le aposetolo i Lusa (ua avea o Take i aso nei) i lana malaga faamisionare lona lua pe tusa ma le 50 T.A. E foliga mai po o le sefuluvalu i le sefuluiva pe ina ua faatoʻā 20 ma ona tupu ona tausaga, sa tauleleia ai Timoteo e Kerisiano i Lusa ma Ikonio. (Galuega 16:1-3) Sa ola o ia e tusa ma lona igoa, o lona uiga “O Lē e Āva i le Atua.” Mai lava i lona laitiiti, na aʻoaʻoina ai Timoteo i le Tusi Paia e Loi le tinā o lona tinā, ma Eunike lona tinā. (2 Timoteo 1:5; 3:14, 15) E lē taumatea na la talia le Faa-Kerisiano i le taimi o le uluai asiasiga a Paulo i lo latou aai i le lua tausaga muamua atu. O lea la, e ala i le gaoioiga a le agaga paia, na faaalia ai i se tasi valoaga le tulaga o le a iai le lumanai o Timoteo. (1 Timoteo 1:18) I le ogatasi ma lena taʻitaʻiga, na faaee ai e Paulo ma toeaina o le faapotopotoga o latou lima i luga o le taulealea talavou, ma faapea ona tofia ai o ia mo se auaunaga faapitoa, ma na filifilia ai o ia e le aposetolo e avea ma ana aumea faamisionare.—1 Timoteo 4:14; 2 Timoteo 1:6.

Talu ai o lona tamā o se tagata Eleni e lē talitonu, sa lei peritomeina ai la Timoteo. O le mea moni, e lē o se manaoga faa-Kerisiano lena mea. Ae peitai, ina ia aua neʻi tausuai tagata Iutaia ia o le a la asiasi atu i ai, o lea na gauai atu ai Timoteo e faia lenei gaoioiga tiga.—Galuega 16:3.

Pe sa manatu muamua ia Timoteo o se tagata Iutaia? Ua finau mai nisi tagata aʻoga e faapea, e tusa ai ma manatu o tagata maualuluga faarapi, “o le talaaga o se tamaitiiti e fanau mai i se faaipoipoga e ese le nuu o le tamā, e fuafua lea talaaga e ala i lona tinā, ae lē o lona tamā.” O lona uiga, “o se fafine Iutaia, na te fanaua mai ni tamaiti Iutaia.” Peitai, ua fesiligia e le tusitala o Shaye Cohen pe “sa iai lena tulafono faarapi e faatatau i tagata i le uluai senituri T.A.” ma pe sa usitaia e tagata Iutaia i Asia Itiiti lena tulafono. Ina ua uma ona iloiloina le faamaoniga faatalafaasolopito, na ia faia ai se faaiuga e faapea, pe a faaipoipo atu tane o Nuu Ese i fafine Isaraelu, “o fanau mai nei faaipoipoga sa manatu i ai o tamaiti Isaraelu pe afai e nonofo le aiga faatasi ma tagata Isaraelu. Sa faamaonia le gafa e ala i le tinā pe afai e nonofo le ulugalii faaipoipo i le atunuu o le tinā. Ae afai e siitia atu i se isi atunuu le fafine Isaraelu e nonofo ai ma lana tane o Nuu Ese, sa manatu la i lana fanau o ni tamaiti o Nuu Ese.” Ae ui i lea, atonu sa avea le eseese o atunuu o mātua o Timoteo ma auala aogā i le galuega talaʻi. Atonu sa leai ni faafitauli ia te ia i le talaʻi atu i tagata Iutaia po o Nuu Ese, atonu sa mafai ai ona ia faaleleia feeseeseaiga sa iai i lo latou va.

O le asiasiga a Paulo i Lusa na avea ma faailoga o le suia atoatoa o le olaga o Timoteo. O le loto malie o lenei tama talavou e mulimuli i le taʻitaʻiga a le agaga paia ma felagolagomai ma le loto maulalo ma toeaina Kerisiano na iu ai i faamanuiaga ma faaeaga sili i le auaunaga. Pe sa ia iloa i lena taimi pe leai, ae i le taʻitaʻiga a Paulo, na faaaogā ai mulimuli ane Timoteo i ni tofiga tāua faatiokarate, ma aveese mamao atu ai o ia mai lona aiga ma avatu i Roma, le laumua o le emepaea.

Na Faaauiluma e Timoteo Manaoga o le Malo

E na o se vaega o faamaumauga o gaoioiga a Timoteo o loo tatou maua, ae sa faimalaga mamao atu lava o ia ina ia faaauilumaina manaoga o le Malo. O le uluai malaga lava a Timoteo faatasi ma Paulo ma Sila i le 50 T.A., na oo atu ai o ia i Asia Itiiti ma oo atu ai i Europa. Iina na auai atu ai o ia i talaʻiga sa faia i Filipi, Tesalonia, ma Perea. Ina ua uma teteega ia na pogai ai ona alu atu Paulo i Atenai, na tuua ai Timoteo ma Sila i Perea e vaavaaia se vaega o le au soo lea na faavaeina ai iina. (Galuega 16:6–17:14) Mulimuli ane, na auina atu ai e Paulo Timoteo i Tesalonia ina ia faamalosiau i le faapotopotoga fou iina. Na avatu ai e Timoteo se tala lelei e uiga i le agaigai i luma o le faapotopotoga ina ua la feiloai ma Paulo i Korinito.—Galuega 18:5; 1 Tesalonia 3:1-7.

E lē o taʻu maia i le Tusi Paia po o le ā le umi na nofo ai Timoteo faatasi ma tagata Korinito. (2 Korinito 1:19) Ae peitai, atonu po o le 55 T.A., sa manatu ai Paulo e toe auina atu o ia ia i latou ona sa ia maua ni tala e faateʻia ai e uiga i lo latou tulaga. (1 Korinito 4:17; 16:10) Mulimuli ane, na aauina atu ai o ia faatasi ma Erato mai Efeso i Maketonia. Ma sa toe faatasi atu Timoteo ia Paulo i Korinito, a o tusi atu ai Paulo iina i Kerisiano i Roma.—Galuega 19:22; Roma 16:21.

Na tuua e Timoteo ma isi faatasi ma Paulo ia Korinito ina ua malaga atu o ia i Ierusalema, ma na latou ō atu faatasi ma le aposetolo e oo i Teroa. E lē o iloa pe sa faaauau ona malaga atu Timoteo i Ierusalema. Ae o loo taʻua lona igoa i le faatomuaga o tusi e tolu a Paulo na tusia mai le falepuipui i Roma i le tusa ma le 60-61 T.A.a (Galuega 20:4; Filipi 1:1; Kolose 1:1; Filemoni 1) Na fuafuaina e Paulo e aauina atu Timoteo mai Roma i Filipi. (Filipi 2:19) Ma ina ua tatalaina Paulo mai le falepuipui, sa nofo ai pea Timoteo i Efeso ona o le faatonuga a le aposetolo.—1 Timoteo 1:3.

Talu ai o faigamalaga i le uluai senituri sa lē faigofie pe lagomalū foi, o le loto naunau la o Timoteo e faia le tele o na faigamalaga mo faapotopotoga, sa ave moni i ai le faamālō. (Tagai i le pusa i Le Olomatamata o Aokuso 15, 1996, itulau 29.) Iloilo tau o se tasi o ana faigamalaga lata mai ma le mea o faailoa mai ai ia i tatou e uiga ia Timoteo i na faigamalaga.

Malamalamaga i Uiga o Timoteo

Sa faatasi Timoteo ma Paulo i Roma ina o tusi atu le aposetolo mai le falepuipui i Kerisiano o loo sauaina i Filipi i le faapea atu: “Ou te faamoemoe i le Alii o Iesu ou te vave auina atu Timoteo ia te outou, ina ia fiafia au nei foi, pe a aʻu iloa se tala ia te outou; auā e le o ia te au se tasi ma te loto faatasi, na te tausia faamaoni mea e manuia ai outou. Auā e saili e i latou uma a latou lava mea, e le o mea a Keriso Iesu. A ua outou iloa lona faamaoni, na ia auauna faatasi ma aʻu i le tala lelei, e pei o se atalii i lona tamā.”—Filipi 1:1, 13, 28-30; 2:19-22.

O na upu sa faamatilatila ai le manatu mamafa o Timoteo i uso talitonu. Seʻi vaganā ai na alu o ia i se vaa, ae o se malaga faapena, sa faaalu ai le 40 aso e savali ai mai Roma i Filipi, e uia le alavaa puupuu e sopoia le Sami Ateria, ma le isi 40 aso e toe foi atu ai i Roma. Sa nofo sauni Timoteo e faia na mea uma e auauna ai i ona uso ma tuafāfine.

E ui ina mamao mea sa faimalaga i ai Timoteo, ae i nisi taimi sa lē lelei lona soifua maloloina. E foliga mai sa iai se faafitauli i lona manava ma oo ina ‘tupu soo lona maʻi.’ (1 Timoteo 5:23) Peitai sa ia faamalosi ona o le tala lelei. E lētioa ona iai lena faiā māfana a Paulo ma Timoteo!

I le taʻitaʻiga a le aposetolo ae maise foi o mea na la tofo faatasi i ai, e foliga mai na oo ina faaatagia ai e Timoteo uiga o Paulo. I lea, na mafai ai ona taʻu atu e Paulo ia te ia e faapea: “A o oe, ua e iloa lelei o laʻu aʻoaʻoga, o laʻu amio, o le loto mau, o le faatuatua, o le faapalepale; o le alofa, ma le onosai, o sauaga ma mea tiga, o mea ia na oo mai ia te au i Anetioka, ma Ikonio, ma Lusa; o sauaga faapena na tigaina ai aʻu.” Sa maligi faatasi loimata o Timoteo ma Paulo, ma sa manatua pea e Paulo Timoteo i ana tatalo, ma na la auauna faatasi i le faaauilumaina o manaoga o le Malo.—2 Timoteo 1:3, 4; 3:10, 11, LF.

Na faalaeiau e Paulo Timoteo ina ia ‘aua neʻi manatu faatauvaa se tasi i lona talavou.’ E ono faaalia i lenei mea e faapea, e pei sa matamuli Timoteo, ma lē mautonu i le faatinoina o lana pule. (1 Timoteo 4:12; 1 Korinito 16:10, 11) Ae peitai, ua mafai ona ia auauna na o ia lava, ma sa mafai ona auina atu ma le mautinoa o ia e Paulo i galuega faapitoa. (1 Tesalonia 3:1, 2) Ina ua iloa e Paulo le manaomia o se vaavaaiga malosi faatiokarate i le faapotopotoga i Efeso, na ia uunaia ai Timoteo ina ia nofo ai pea iina ina ia “vavao atu i nisi, aua foi neʻi latou aʻoaʻo i mataupu ese.” (1 Timoteo 1:3) E ui ina tuuina atu i ai le tele o tiute tauave, ae peitai, sa loto maulalo pea Timoteo. Ma e ui lava i se uiga matamuli sa ia te ia, ae sa lototele pea o ia. Mo se faataitaiga, na alu o ia i Roma e fesoasoani ia Paulo, o lē sa faamasinoina ona o lona faatuatua. O le mea moni, sa pagatia foi Timoteo lava ia i se vaitaimi i le faafalepuipuiina, e foliga mai i le mafuaaga lava e tasi.—Eperu 13:23.

E lē taumatea le tele o mea na aʻoaʻoina e Timoteo mai ia Paulo. O le manatu maualuga o le aposetolo i lana aumea na la galulue faatasi, ua matuā faamaonia e ala i le mea moni e faapea, na tusia e Paulo ni tusi faagaeeina tauatua se lua ia Timoteo ia o loo maua i Tusitusiga Kerisiano Eleni. I le tusa ma le 65 T.A., ina ua iloa e Paulo ua lata lona maliu faamaturo, na ia toe valaaulia ai foi Timoteo. (2 Timoteo 4:6, 9) E lē o faailoa maia i le Tusi Paia pe na mafai ona toe vaai Timoteo ia Paulo a o lei faasalaina le aposetolo i le oti.

Ia Faaavanoa Oe!

E tele mea e mafai ona aʻoaʻoina mai le faaaoaoga lelei a Timoteo. Sa tele ni aogā na ia maua mai le auaufaatasi ma Paulo, i le tuputupu aʻe o se talavou matamuli e avea o se ovasia. E mafai e tane ma fafine talavou Kerisiano ona maua le tele o aogā mai aufaatasiga faapena i aso nei. Ma afai latou te faia le auaunaga ia Ieova ma a latou galuega, o le a tele galuega aogā mo i latou e faia. (1 Korinito 15:58) Atonu e mafai ona avea i latou ma paeonia, po o tagata talaʻi faataimi atoa i a latou faapotopotoga, pe e mafai foi ona latou auauna i nofoaga o loo manaomia tele ai le fesoasoani mo ni ē folafola le Malo. O isi mea e tele e mafai ona fai, o le galuega faamisionare i se isi atunuu po o le auaunaga i le ofisa ulu i le lalolagi o le Sosaiete o le Olo Matamata po o se tasi o ona lālā. Ma o le mea moni, e mafai e Kerisiano uma ona faaalia le agaga e pei o lea na faaalia e Timoteo, e ala i le tuuina atu ma le tagata atoa i le auaunaga ia Ieova.

Po o e faanaunau e faaauau pea ona e tuputupu aʻe faaleagaga, ina ia e aogā i le faalapotopotoga a Ieova i so o se vala lava atonu e manatu i ai o ia ua talafeagai? O lea la, ia fai loa e pei ona faia e Timoteo. Ia faaavanoa oe i le tele e mafai ai. O ai na te iloa po o ā ni faaeaga o le auaunaga atonu o le a tatala mai mo oe i le lumanai?

[Faaopoopoga i lalo]

[Ata i le itulau 31]

“Auā e le o ia te au se tasi ma te loto faatasi”