Fesili Mai le ʻAu Faitau

O le ā le vaaiga a Molimau a Ieova i le palota?

E iai mataupu silisili manino ua aumaia i le Tusi Paia ua mafai ai e auauna a le Atua ona maua se vaaiga saʻo i lenei mataupu. Peitaʻi, e aliali mai e leai se mataupu silisili o feteenaʻi ma le faiga masani lava ia o le palota. Mo se faataʻitaʻiga, e leai se māfuaaga o le a lē tatau ai e se komiti o faatonu ona faia se palota ina ia taunuu ai i ni faaiʻuga e aafia ai la latou faalapotopotoga. E masani ona faia e faapotopotoga a Molimau a Ieova ni faaiʻuga e faatatau i taimi o sauniga ma le faaaogāina o tupe a le faapotopotoga i le faia lea o se palota e faailoa mai i se siigalima.

Ae e faapefea la le palota i faiga palota faapolotiki? O le mea moni, i nisi atunuu faatemokalasi, pe ā ma le 50 pasene o le faitau aofaʻi o tagata e lē ō e palota i le aso o le faiga palota. O Molimau a Ieova lava ia, latou te lē aiā fua i aiā tatau a isi e palota ai; e faapena foʻi ona latou lē faia lava se mea e tetee atu ai faasaga i faiga palota. Latou te faaaloalo ma felagolagomaʻi ma faipule o ē ua tofia mai i na faiga palota. (Roma 13:1-7) Ae i le tulaga pe o le a latou taʻitoʻatasi ma palota mo se tasi o tauvā i le faiga palota, e taʻitoʻatasi lava le Molimau a Ieova ia ma faia le faaiʻuga e faavae i lona loto fuatiaifo ua aʻoaʻoina i le Tusi Paia, ma malamalama lelei i lona tiute tauave i le Atua ma i le Faiga Malo. (Mataio 22:21; 1 Peteru 3:16) I le faia o lenei filifiliga totino, e iloilo totoʻa e Molimau nisi o vala nei.

Muamua, na fetalai Iesu Keriso e faatatau i ona soo e faapea: “E le ni o le lalolagi i latou, faapei o aʻu, ou te le so le lalolagi aʻu.” (Ioane 17:14) E matuā manatu mamafa Molimau a Ieova i lenei mataupu silisili. I le avea ai “e le ni o le lalolagi,” latou te solitū ai i mataupufai faapolotiki a le lalolagi.—Ioane 18:36.

Lona lua, na faapea ifo le aposetolo o Paulo ia te ia lava o le “sāvali” po o le amepasa o loo fai ma sui o Keriso i tagata i ona aso. (Efeso 6:20; 2 Korinito 5:20) E talitonu Molimau a Ieova ua faapaleina nei Keriso Iesu e avea ma Tupu o le Malo faalelagi o le Atua, ma i le avea o i latou e pei o sāvali po o amepasa, e tatau ona faalauiloa atu lenei mea i atunuu. (Mataio 24:14; Faaaliga 11:15) E faatalitalia e tatau i amepasa ona solitū, ma latou te lē faalavelave fua i mataupu o le vāifale o atunuu o loo faapea ona aauina atu i ai i latou. I le avea ai ma sui o le Malo faalelagi o le Atua, ua lagona ai e Molimau a Ieova se tiutefai faapena o le lē faalavelave fua i mataupufai faapolotiki a atunuu o latou nonofo ai.

O se vala lona tolu e ao ona manatunatu i ai e faapea, o ē e iai se vaegafai i le palotaina o se tagata i le tofi e ono tuuaʻia foʻi i le mea e faia e lea tagata. (Faatusatusa i le 1 Timoteo 5:22.) E ao i Kerisiano ona manatunatu ma le faaeteete pe latou te mananaʻo e amoina lena tiute tauave.

Lona fa, e faatāua tele e Molimau a Ieova lo latou autasi faa-Kerisiano. (Kolose 3:14) Pe a oo ina aafia lotu i mataupufai faapolotiki, e masani lava ona iʻu ina fevaevaeaʻi ai ona sui. I le faataʻitaʻi atu ia Iesu Keriso, e ʻalofia e Molimau a Ieova le aafia i mataupufai faapolotiki ma faapea ai ona faatumauina lo latou autasi faa-Kerisiano.—Mataio 12:25; Ioane 6:15; 18:36, 37.

Lona lima ma o le vala mulimuli foʻi lea, o lo latou taumamao mai le aafia i mataupufai faapolotiki e avatu ai i Molimau a Ieova le saʻolotoga e tautatala atu ai ma le feʻau tāua o le Malo i tagata o so o se vaega faaupufai faapolotiki.—Eperu 10:35.

E tusa ai ma mataupu silisili faale-Tusi Paia ua faatulaga mai luga, i le tele o atunuu, e faia e Molimau a Ieova se filifiliga totino a le tagata lava ia ina ia lē aafia i faiga palota faapolotiki, ma o lo latou saʻolotoga e faia ai lea faaiʻuga e lagolagoina e le tulafono o le atunuu. Ae faapefea pe a faamalosia e le tulafono tagatānuu ina ia palota? I tulaga faapea, e tuu atu i Molimau taʻitoʻatasi lava ia e fai se faaiʻuga mai lona ia lava loto fuatiaifo e faavae mai le Tusi Paia i le auala e taulimaina ai le mataupu. Pe afai e filifili se tasi e alu atu i le fale e fai ai le palota, o lana lava lea faaiʻuga. O lana gaoioiga e fai i totonu o le fale e fai ai le palota e i le va o ia ma Lē na Foafoaina o ia.

Ua faapea mai le lomiga o Novema 15, 1950, o le Watchtower, i le itulau 445 ma le 446: “I vaipanoa ua faamalosia ai e Kaisara ona tagatānuu e ao ona palota . . . e mafai e [Molimau] ona ō atu i le mea o fai ai le palota ma ulu atu i le potu e fai ai palota. O iinā ua faatonuina ai i latou e faailoga a latou pepa palota po o le tusi ai o le itu latou te iai. E faia e le ʻau palota mea latou te loto i ai i a latou pepa palota. O iinā la, i luma o le silafaga a le Atua, e tatau ai i ana molimau ona gaoioi e ōgatusa ma ana poloaʻiga ma tusa ai ma lo latou faatuatuaga. E lē o sa matou tiute tauave le faatonuina o i latou po o le ā le mea e fai i le pepa palota.”

E faapefea pe afai e maumauaʻi le tane lē talitonu a se fafine Kerisiano ina ia alu lana avā e palota? E gauaʻi atu o ia i lana tane, e pei ona gauaʻi atu Kerisiano i faipule silisili. (Efeso 5:22; 1 Peteru 2:13-17) Pe afai e usiusitaʻi o ia i lana tane ma alu ai i le fale o loo fai ai le palota, o lana lava lea filifiliga totino. E leai se tasi e tatau ona faitioina o ia.—Faatusatusa i le Roma 14:4.

Ae faapefea atunuu e lē o faamalosia e le tulafono le tatau ona palota ae o le a tupu ai le ʻinoʻino ia i latou o ē e lē ō atu i le fale e faia ai le palota—atonu e tuu atu ai foʻi i latou i se tulaga e lamatia ai faaletino? I se isi foʻi tulaga, e faapefea pe afai e lē faamalosia faaletulafono tagata taʻitoʻatasi ia palota, ae o le a iai ni vala e matuā faasala mamafa ai pe afai latou te lē ō atu i le fale o fai ai le palota? I tulaga faapea ma nisi foʻi tulaga e tali tutusa, e tatau ai i se Kerisiano ona faia lana lava faaiʻuga. “E taitasi ma ave i lana lava avega.”—Kalatia 6:5.

Atonu e iai tagata o ē tausuai pe a latou mātauina i le taimi o le faiga palota i o latou atunuu, e iai nisi o Molimau a Ieova e ō atu i le fale o fai ai le palota ae e lē o ō atu i ai isi Molimau. Atonu latou te faapea mai, ‘E lē taotasi Molimau a Ieova i se mea e tasi.’ Peitaʻi, e ao i tagata ona latou iloa, o mataupu e tuu atu i le loto fuatiaifo o le tagata lava ia e pei o lenei mataupu, e taʻitoʻatasi le Kerisiano ma fai lana ia lava faaiʻuga i luma o Ieova le Atua.—Roma 14:12.

Po o ā lava faaiʻuga totino e faia e Molimau a Ieova a o feagai ai ma tulaga eseese, latou te matuā faaeteete i le tausia o lo latou solitū faa-Kerisiano ma le saʻolotoga e tautala ai. I mea uma lava, latou te faalagolago atu ia Ieova le Atua e faamalosia i latou, foaʻi mai le atamai ia i latou, ma fesoasoani ia i latou ina ia ʻalofia ai le faagutugutulua i lo latou faatuatuaga i so o se auala lava. Ua faapea ai ona latou faaalia le mautinoa i upu a le faisalamo: “O oe lava loʻu papa, ma loʻu ʻolo; ia e taʻitaʻi mai ma tausi ia te au ona o lou suafa.”—Salamo 31:3.