O i Tatou o Ni Ē Faatuatua

Faalauiloaina o le Malo o le Atua i Motu o Fiti

I SE tasi taimi, na talanoa atu ai Iesu Keriso e uiga i ni auala se lua. O le tasi e vatele ma e tau atu i le oti. O le isi e vaapiapi ae tau atu i le ola. (Mataio 7:13, 14) Ina ia mafai e tagata ona filifilia le ala saʻo, na fuafuaina ai e Ieova le Atua ina ia talaʻiina le tala lelei o le Malo i le lalolagi atoa. (Mataio 24:14) I lea, ua faalogo ai tagata i so o se mea lava i le feʻau o le Malo, ma ua filifilia ai e nisi le ola e ala i le avea “o ni e faatuatua e ola ai le agaga.” (Eperu 10:39) Ua matou valaaulia oe ina ia faitau e uiga i le filifilia o le ola e nisi i Fiti ma isi motu e tau lalata ane o le Pasefika i Saute.

Sa Latou Faatuatua ia Ieova

Sa muaʻi faalogo Mere i le feʻau o le Malo i le 1964 a o iai pea i le aʻoga. Ae ona o le nofo ese i se isi motu mamao ese, sa itiiti ai lava sana fesootaʻiga ma Molimau a Ieova. Ae peitaʻi, i se taimi mulimuli ane, sa mafai ai ona ia maua le poto saʻo o le Tusi Paia. I le taimi lena, na faaipoipo atu ai o ia i se tamāloa o se matai o lona ʻauaiga i lona nuu. Ona o le filifilia e Mere e ola e tusa ma mataupu silisili o le Tusi Paia, na faia ai e lana tane ma lona aiga ni faiga lē alofa ia te ia, ma sa inosia ai o ia e tagata o le nuu. Ae peitaʻi, na papatisoina o ia i le 1991.

E leʻi pine lava mulimuli ane, na amata ona faaalia ai e le tane a Mere o Iosua uiga agamalu ma oo ina nofo ai i talanoaga faale-Tusi Paia na faia e Mere ma la laʻua fanau. Na taofia e Iosua lona toe auai i le Lotu Metotisi. Ae ona o ia o se matai, sa ia taʻitaʻia ai pea fono faalevaiaso a le nuu. I manatu o tagata o le nuu, sa lē faamaoni Iosua, ona o le Lotu Metotisi sa o se vaega autū lea o le olaga faalenuu o Fiti. I lea, na uunaʻia ai e le faifeʻau ia Iosua ina ia toe foʻi atu i lana lotu sa iai muamua.

Sa faamautinoa atu ma le lototele e Iosua e faapea, o ia ma lona aiga ua uma ona fai la latou filifiliga ma ua maumauaʻi e tapuaʻi atu ia Ieova le Atua “i le agaga ma le faamaoni.” (Ioane 4:24) I se fono mulimuli ane a le nuu, na faapea atu ai le alii sili o le nuu, ia ō ese Iosua ma lona aiga mai le nuu ma ua faateʻaina. Na tuuina atu ia i latou aso e fitu e tuua ai le motu, ma lo latou fale, fanua ma faatoʻaga—ioe, o a latou mea uma na ola ai.

O uso faaleagaga i le tasi motu na fesoasoani ia Iosua ma lona aiga, sa fesoasoani ia i latou i se mea e nonofo ai ma se fanua e totō ai a latou faatoʻaga. Ua papatiso nei Iosua ma lona atalii matua, ma ua avea foʻi se isi atalii ma tagata talaʻi e leʻi papatisoina o le tala lelei. Na avea talu ai nei Mere ma paeonia sauatoa (o sē folafola faataimi atoa le Malo). O la latou filifiliga e auauna ia Ieova na iʻu i le leiloloa ai o ni tulaga tofi ma mea faitino, ae i le pei o le aposetolo o Paulo, e lē mafai ona faatusatusaina lenei mea i mea ua latou maua.—Filipi 3:8.

Se Filifiliga e Aafia ai le Lotofuatiaifo

O le faia o se filifiliga e mulimuli i se lotofuatiaifo ua aʻoaʻoina e le Tusi Paia, e manaʻomia ai le faatuatua ma le lototele. O le tulaga lena na oo i se tamaʻitaʻi talavou fou faatoʻā uma ona papatiso o Suraang, e nofo i Tarawa, o se tasi o motu o Kiripati. Na talosaga atu Suraang mo se faatagaga mai se tasi o vala o lana galuega i le avea o se tamaʻitaʻi tausimaʻi i le falemaʻi. Sa leʻi talileleia lana talosaga, ma na iʻu ina aauina atu o ia e galue i se falemaʻi laʻitiiti i se motu e tū mamao ese ma na lē mafai ai ona fesootaʻi atu o ia ma isi o lana faatuatuaga.

I lena motu, o le tū masani mo tagata fou uma faatoʻā taunuu atu ona faia se taulaga i “se agaga leaga” i le nuu. E talitonu tagata e faapea o le lē faia o se taulaga o le a iʻu ai i le oti. Talu ai sa musu Suraang e faatagaina le faia o lenei gaoioiga ifo i tupua mo ia ma lana vaega, sa faatalitalia ai e tagata o le nuu faapea o le a titinaina o ia e le agaga leaga. Ina ua lē afaina ia Suraang ma lana vaega, na tatalaina ai ni avanoa se tele mo ia e avatu ai se molimau lelei.

Ae sa leʻi uma ai iinā tofotofoga o Suraang. Sa manatu nisi tama talavou o lena motu e faapea o se luʻi mo i latou le taumafai e faasee tamaʻitaʻi talavou e asiasi atu ina ia faia amioga lē mamā. Ae peitaʻi, sa teena e Suraang a latou taumafaiga e maileia o ia i faiga faaleituaiga ma tausisia lona faamaoni i le Atua. O le mea moni, sa mafai ona ia auauna i le avea o se paeonia sauatoa, e ui lava sa manaʻomia ona ia nofosauni e galue i so o se taimi i le avea o se tamaʻitaʻi tausimaʻi e faigaluega mo le 24 itula i le aso.

A o leʻi faia se taumafataga e faamavae atu ai ia Suraang ina o le a ia tuua le motu, na taʻua ai e toeaina o le nuu e faapea, o ia o le misionare moni muamua lea ua asiasi mai ia i latou. Ona o lona tumau mausalī i mataupu silisili o le Tusi Paia, na talileleia ai e nisi i lena motu le feʻau o le Malo.

Luʻi Faaletino

O le tū mamao ese o nisi nuu ua manaʻomia ai e tagata o Ieova ona faia ni taumafaiga sili ina ia faia se sao i le faiva ma ia auai i sauniga faa-Kerisiano. Manatu i le faaaʻoaʻoga a ni Molimau papatisoina se toʻafā—e toʻatasi le tane ma fafine e toʻatolu—o ē ua faimalaga mo ni taimi uumi e ō atu ai i sauniga ma toe foʻi i o latou aiga. O la latou savaliga e sopoʻia ai ni vaitafe se tolu i malaga taʻitasi. Pe a loloto le vai, ona aau muamua lea o le uso i le isi itu, ae tosotoso atu i ona tua se ulo fai meaʻai telē e tuu uma ai a latou ato, tusi, ma lavalava o le sauniga. Ona toe foʻi mai lea o le uso ma fesoasoani i tuafāfine nei e toʻatolu.

O se isi vaega toʻaitiiti, o ē na auai i sauniga i se motu mamao ese o Nonouti i Kiripati, e fetaiaʻi ma luʻi eseese. O le fale lea e faia ai a latou sauniga e na o le toʻafitu pe toʻavalu tagata e ofi ai. O isi o ē auai e nonofo i fafo ma tau autilo atu i le uaea valavala fai pa moa lea e siʻo ai le fale. O le fale lea e fai ai sauniga e matuā iloa uma atu ai lava ia tagata o le nuu e ō atu ma ō mai mai o latou falesa tetele. O le mea moni, ua iloa e auauna a Ieova e faapea o tagata, ae lē o fale, e tāua moni lava i le silafaga a le Atua. (Hakai 2:7) E toʻatasi le tuafafine ua uma ona papatiso e nofo ai i le motu ae ua matua ma e lē mafai ona savali mamao. Peitaʻi ua fesoasoani se tamaʻitaʻi talavou e leʻi papatiso ia te ia e fetosoaʻi o ia i le faiva i se taavale toso. Maʻeu se talisapaia ua latou faaalia mo le upu moni!

Ua maumauaʻi pea le sili atu i le 2,100 o le ʻautalaʻi o loo auauna i motu o Fiti ina ia faaauau pea ona faalauiloa atu le tala lelei o le Malo o le Atua. Ma ua latou mautinoa e faapea, e toʻatele atu isi o le a avea ma “e faatuatua e ola ai le agaga.”

[Faafanua i le itulau 8]

(Tagaʻi i le lomiga mo le ata atoa)

Ausetalia

Fiti