Ia Puipuimalu i Lou Igoa

O SE tamāloa na te tusiaina ni ata o ni fale matagofie na te faia se igoa mo ia lava o se tusiata poto tele. O se tamaʻitaʻi talavou o lē e maoaʻe lona atamai tau aʻoaʻoga o le a lauiloa o ia o se tagata aʻoga uigaese. E oo lava foʻi i se tagata e leai lava ma sana mea e fai e ono faaigoaina o ia o se tagata paiē. I le faamamafaina o le tāua o le faia o se igoa e taʻuleleia, ua faapea mai ai le Tusi Paia: “O se igoa lelei e sili atu lona tāua i lo ʻoa e tele, ma o se talaaga lelei e sili atu i lo ario ma auro.”—Faataoto 22:1, An American Translation.

E atiina aʻe se igoa lelei i ni nai gaoioiga a o faagasolo pea taimi. Ae e faaleagaina uma lena lelei, e se gaoioiga faavalevalea se tasi. Mo se faaaʻoaʻoga, o se gaoioiga lē pulea faaleituaiga se tasi, e mafai ona faaeleelea ai se talaaga lelei. I le mataupu lona 6 o le tusi o le Tusi Paia o Faataoto, o loo saunia mai ai e le tupu o Solomona o Isaraelu anamua se lapataʻiga faasaga i amio ma gaoioiga lea e mafai ona faaleagaina ai lo tatou talaaga faapea ma le faatamaʻia ai o la tatou faiā ma Ieova le Atua. E aofia ai i nei mea ni taʻutinoga e faia e aunoa ma le mafaufau lelei, le paiē, le faitogafiti, ma amioga lē mamā—o mea lava na e inosia e Ieova. O le utagiaina o lenei fautuaga o le a fesoasoani ia i tatou e puipuimalu ai lo tatou igoa lelei.

Ia E ʻAloese Mai Taʻutinoga Valea

Ua faatomua mai le mataupu lona 6 o le Faataoto i upu nei: “Loʻu atalii e, afai ua fai oe ma moni o lau uo; afai ua fetagofi i lima mo le tagata ese, ua maileia oe i upu a lou gutu; ua maua oe i upu a lou gutu. O lenei, loʻu atalii e, ia e faia le mea nei, ina ia laveaiina oe, pe a oo mai le pule a lau uo ia te oe; alu ia, ina ifo, ma e nati atu i lau uo.”—Faataoto 6:1-3.

O lenei faataoto o loo fautua mai i le aafia i feutagaʻiga faapisinisi ma isi, aemaise lava tagata ese. Ioe, sa ao i tagata Isaraelu ona ‘fesoasoani pe a oo ina mativa lo latou uso, ma ua na le toe lavā se mea.’ (Levitiko 25:35-38) Ae o nisi Isaraelu lē faautauta na latou aafia i faiga pisinisi e lē mautinoa ma le faamoemoe a maua mai ai ni tupe faasili se tele, ma na latou mauaina le lagolagosua tau tupe e ala i le faatalitonuina o isi ina ia ‘talitonu’ atu ia i latou, i le avea o i latou ma ē totogiina aitalafu. E ono tutupu foʻi ni tulaga faapena i aso nei. Mo se faaaʻoaʻoga, i faalapotopotoga tautupe, e ono manaʻomia ai se isi e toʻalua i le sainia o se nonogatupe a o leʻi pāsia se nonogatupe o loo latou manatu i ai e lē mautinoa. Pagā le valea o le faia o se maliega faatopetope faapena mo isi! Ioe, e ono lamatia ai lo tatou itu tau tamaoaiga, ma e oo lava foʻi ina aumaia ai se igoa leaga mai fale tupe ma isi kamupani e faia ai nonogatupe!

Ae faapefea pe a tatou oo i le tulaga o le faia lea o se gaoioiga na foliga muamua mai e atamai ae ina ua tilotilo atu i ai ma le totoʻa e aliali ane ai le valea? O le fautuaga la, ia aveesea le faamaualuga ma e “nati atu i lau uo”—faatasi ai ma talosaga lē motusia. E ao ona tatou faia mea uma tatou te mafaia ina ia faasaʻo ai le tulaga o mea. Na faailoa mai e se tasi tusi e faapea: “Ia faia so o se taumafaiga lava e mafai seʻia oo ina lua taufai malilie ma lē sa tetee mai e foʻia le mataupu, ina ia aua ai neʻi fafa atu se avega ia te oe po o lou aiga.” Ma e lē tatau ona faatuai ona faia faapea, auā na faaopoopo mai le tupu e faapea: “Aua neʻi moe ou mata, pe tulemoe ou laumata; ia e laveaiina oe e oe, e pei o le sevi ai le lima; e pei o le manu foi ai le lima o le fai manu.” (Faataoto 6:4, 5) E sili atu ai le ʻaloese mai se taʻutinoga lē atamai pe a mafai na i lo le maileia ai.

Ia Galue Maelega e Pei o le Loi

Na apoapoaʻi mai Solomona e faapea: “Le paie e, ina e alu i le loi, ia vaavaai i lana amio, ina ia poto ai oe.” O le ā le atamai e mafai ona tatou maua mai faiga a se loi lamoʻimoʻī? Na tali le tupu e faapea: “E leai sona taʻitaʻi, po o se leoleo, po o sē pule, a e saunia e ia ana mea e ʻai i le tausaga vevela, ma faaputuina ana mea e ʻai i ona po e selesele ai saito.”—Faataoto 6:6-8.

E ofoofogia le maopoopo ma e matilatila le felagolagomaʻi o le tasi loi i le tasi. O se tulaga faalenatura lo latou faaputuina o meaʻai mo le lumanaʻi. E “leai sona taʻitaʻi, po o se leoleo, po o sē pule.” E moni, o loo iai le loi fanau ua pei o se masiofo i le uiga faapea e tautuufua ma o ia o le tinā o lena vaega o loi. Na te lē tuuina atu ni faatonuga. E leai foʻi se fomeni na te faasinoina atu ia i latou ni mea e fai po o sē vaavaaia le galuega o fai pe alu atu e siaki i latou, ae e faaauau pea ona galulue ma le lē faavaivai loi.

I le pei o loi, pe lē tatau ea foʻi ona tatou galulue maelega? O le galulue mamafa ma le taumafai e faaleleia la tatou galuega e lelei tele mo i tatou e tusa lava pe o vaavaaia i tatou pe leai. Ioe, i aʻoga, i nofoaga o a tatou galuega, ma i le taimi foʻi o faia ai se sao i gaoioiga faaleagaga, e tatau ona tatou faia le mea sili tatou te mafaia. E pei lava ona maua e le loi aogā mai lona maelega, e faapena foʻi ona finagalo le Atua ina ia tatou ‘fiafia i mea lelei i a tatou galuega uma.’ (Failauga 3:13, 22; 5:18) O se lotofuatiaifo mamā ma le faamalieina totino o taui na o le galue mamafa.—Failauga 5:12.

I le faaaogāina o ni fesili faatupu manatu se lua, na taumafai ai Solomona e fafagu mai se tagata paiē mai le tautulemoe i le faapea atu: “Le paie e, e te taoto seia afea? Seʻi e tulai afea ai lou moe?” I le faataʻitaʻi atu i le tautala a le tagata paiē, na faaopoopo mai ai le tupu e faapea: “Seʻi toe itiiti sina moe, toe itiiti se matāmoe, toe itiiti se piilima e taoto ai, a e oo mai lou mativa e pei o le malaga; ma lou le tagolima pei o le tagata ua sauni lana auupega.” (Faataoto 6:9-11) A o taoto pea le tagata paiē, ae ua pei o le saoasaoa o le tagata faomea le oo ane o le mativa, ma e osofaʻia o ia e le oge pei o se tagata ua faaauupegaina. O le fanua o le tagata o lana masani o le paiē e vave lava ona faatumulia i vao ma vao ogoogo. (Faataoto 24:30, 31) E leʻi umi lava se taimi ae gau lana pisinisi. O le ā le umi o le a faapalepale ai pea le tagata e ana le galuega i le tagata nofo faatalanoa? Ma pe e mafai ona faatalitalia e se tamaitiiti e paiē e suʻesuʻe se lelei o lona tulaga i le aʻoga?

Ia Faamaoni

I le faamatalaina mai o se tasi ituaiga o amioga e faapea ona faaleagaina ai se talaaga o se tasi i le vā ma tagata ma lana faiā ma le Atua, na faaauau mai ai Solomona e faapea: “O le tagata ulavale, o le tagata agasala, o loo savali ia ma le gutu faapiopio; e genogeno ona mata; e tautalatala ona vae; e faasino i ona tamatamai lima. Ua i lona loto le faapiopio; na te fai togafiti leaga i aso uma; na te faatupuina maseiga.”—Faataoto 6:12-14.

O le auala lenei e faamatala ai se tagata taufaaʻoleʻole. O le tagata pepelo e taumafai lava e pupuni lona lē faamaoni. E faapefea? E lē na o le “gutu faapiopio” ae na te faaaogāina foʻi taga. Na taʻua e se tasi tagata atamai faapitoa e faapea: “O taga, le leo, ma e oo lava foʻi i faailoga vaaia o foliga o auala ia ua fuafuaina lelei e taufaavalea ai; i tua atu o foliga e faapei e faamaoni o loo lafi mai ai se mafaufau leaga ma se agaga lē lelei.” O se tagata faapena e leai se mea e aogā i ai, na te faia ni faufauga leaga ma e na o le mapuna aʻe ai o fefinauaʻiga i taimi uma lava. O le a le iʻuga o le a oo ia te ia?

“O le mea lea e faafuasei ai ona oo mai o lona malaia,” o le tali mai lea a le tupu o Isaraelu. “E faafuasei ona nutimomoia o ia, a e leai se fofo.” (Faataoto 6:15) Pe a oo ina faaalialia le tagata pepelo, ona vave lava lea ona faaleagaina lona talaaga. O ai o le a na ia toe faatuatuaina o ia? O lona iʻuga e mautinoa e faamalaiaina, auā o “e tala pepelo uma” o loo lisiina mai faatasi ma i latou o le a oo i ai le oti e faavavau. (Faaaliga 21:8) O lea i so o se tulaga lava, seʻi o tatou “amio lelei i mea uma lava.”—Eperu 13:18.

ʻInoʻino i Mea e Inosia e Ieova

ʻInoʻino i le leaga—maʻeu le avea o lena mea ma mea e taofia ai mai le faia o gaoioiga e faaleagaina ai o tatou talaaga! Pe lē tatau ea la ona tatou ati aʻe se ʻinoʻino i le leaga? Ae o le ā tonu lava le mea e ao ona tatou ʻinoʻino i ai? Na taʻua e Solomona e faapea: “O mea nei e ono ua inosia e Ieova; o lona fitu foi ua matuā inosia lava e ia; o mata faasiasia, o le laulaufaiva pepelo, ma lima e sasaa le toto o le ua le sala, o le loto e manatunatu i togafiti leaga, o vae e tele vavave ona taufetuli i le leaga, o le molimau pepelo, na te tautala i mea pepelo; ma le na te faatupu maseiga i uso.”—Faataoto 6:16-19.

O vala e fitu o loo taʻua i le faataoto o vala autu ma e aofia ai le toeitiiti lava o ituaiga uma o mea sesē. O “mata faasiasia” ma “le loto e manatunatu i togafiti leaga” o ni agasala e faatino i manatunatuga. “O le laulaufaiva pepelo” ma le “molimau pepelo” o le agasala lea i upu. O “lima e sasaa le toto o le ua le sala” ma “vae e tele vavave ona taufetuli i le leaga” o gaoioiga leaga ia. Ma o le mea e pito sili ona inosia ia Ieova o le ituaiga tagata lea e fiafia tele e faatupu ni feteenaʻiga i le va o tagata o ē na semanū e nonofo faatasi ma le filemu. O le faaopoopoina o le fuainumera mai le ono i le fitu ua manatu ai sa leʻi fuafuaina e faaiʻuina le lisi, auā o loo faaauau pea ona faateleina gaoioiga leaga a tagata.

E mautinoa, e manaʻomia mo i tatou ona ati aʻe se matuā ʻinoʻino mo mea e inosia e le Atua. Mo se faataʻitaʻiga, e ao ona tatou ʻalofia “mata faasiasia” po o so o se isi lava faaaliga o le faamaualuga. Ma o le faitala faatigā e mautinoa e ao ona ʻalofia, ona e faigofie ai lava ona faatupu ni “maseiga i uso.” O le faasalalauina o ni talasalatua lē alofa, ni faitioga lē saʻo, po o ni pepelo, atonu tatou te lē o “sasaa [ai] le toto o le ua le sala,” ae tatou te mautinoa e mafai ona faaleagaina ai le talaaga lelei o le isi tagata.

“Aua Neʻi Naunau Lou Loto i Lona Lalelei”

Ua amata nei e Solomona le vaega e sosoo ai o lana fautuaga e ala i lona faapea mai: “Loʻu atalii e, ia e tausi i poloaiga a lou tamā; aua foi e te tuulafoaiina le upu e aʻoaʻo atu a lou tinā; ia fusi ai e le aunoa i lou loto; ia asoa ai i lou ua.” O le māfuaaga? “A e savali, e taʻitaʻiina ai oe; a ē moe, e leoleoina ai oe; a ē ala, e tautala ai ma oe.”—Faataoto 6:20-22.

Pe e mafai ea ona puipuimalu i tatou mai mailei o feusuaʻiga lē mamā i le ola aʻe i le Tusi Paia? Ioe, e mafai. Ua faamautinoa mai ia i tatou e faapea: “O le poloaiga o le sulu lea; ma le upu e aʻoaʻo atu, o le malamalama lea; o aoaiga foi e aʻoaʻoina ai, o le ala o le ola lea, ina ia leoleo ia te oe ai le fafine amio leaga, ai le laulaufaiva molemole o le fafine ese.” (Faataoto 6:23, 24) Ia manatua le fautuaga a le Afioga a le Atua ma ia faaaogā e avea o se ‘sulu i o tatou vae, ma le malamalama i o tatou ala’ o le a fesoasoani lea ia i tatou e tetee atu i valaaulia faatosina a se tamaʻitaʻi leaga, po o se tamāloa leaga foʻi.—Salamo 119:105.

“Aua neʻi naunau lou loto i lona lalelei,” o le apoapoaʻi mai lea a le tupu poto, “aua neʻi maua oe i ona laumata.” Aiseā? “Auā e iu ina toe na o si fāsi areto ona o le fafine talitane; o le avā foi a le tasi tagata na te taumailei le ola aoga.”—Faataoto 6:25, 26.

Pe na uiga atu ea upu a Solomona i se fafine mulilua faapea o se fafine talitane? Atonu. Pe atonu sa ia faaeseeseina le tulaga o le faia o amioga lē mamā ma se fafine talitane ma le tulaga e iʻu i ai le faia o se mulilua ma le avā a se tasi tamāloa. O se tasi o loo iai se la faiā māfana ma se fafine talitane e mafai ona oo i le na o se “fāsi areto”—e matuā mativa masaesae. E ono aafia foʻi o ia i faamaʻi pipisi e tigā ma faamanualia ai ia e ala mai i feusuaʻiga, e aofia ai le faamaʻi oti o le AIDS. I le isi itu, o lē o loo ia saʻilia se faiā māfana ma se paaga faaipoipo a se tasi tagata o le a matuā lamatia lava o ia i le taimi lava lena i le Tulafono. O se fafine mulilua ua na tuua i se tulaga lamatia le “ola aoga” o lana paaga faapouliuli. Ua faapea mai se tasi tusi: “E lē na o le faapuupuuina o le olaga ona o ni amioga leaga. O le tagata agasala ua tatau i ai le faasalaga oti.” (Levitiko 20:10; Teuteronome 22:22) I so o se tulaga lava, e ui lava i lona lalelei faaletino, ae o se ituaiga fafine faapena e lē tatau ona faananau i ai.

‘Aua le Tuua le Afi i Lou Fatafata’

Ina ia faamamafa atili le mataʻutia o le mulilua, na fesili ai Solomona e faapea: “E ave ea e se tasi le afi i lona fatafata, a e le mu ai ona ofu? Afai e savali se tagata i luga o malala ola, e le mu ai ea ona vae?” I le faamatalaina o le uiga o le talafaatusa, na ia faapea mai ai: “E faapea foi le ua alu atu i le avā a le la te tuaoi; ai se tago ia te ia, e le faasaoina o ia.” (Faataoto 6:27-29) O se tagata agasala faapena e mautinoa le faasalaina.

Ua faamanatu mai ia i tatou e faapea: “E le inosia le gaoi pe a gaoi o ia e tali ai lona manava, ina ua fia ʻai.” E ui i lea, “a maua o ia, ona taui atu lea e ia e taifitu; na te avatu ai oloa uma o i lona fale.” (Faataoto 6:30, 31) I Isaraelu anamua, sa moomia mo se gaoi ona toe totogi atu mea na ia avea pe oo ai lava ina avea uma ana mea.a Paga la le sili atu ona talafeagai o se faasalaga mo se tagata ua mulilua, o lē e leai ma se faamolemolega mo lana mea ua fai!

Na taʻua e Solomona faapea: “O lē mulilua i le fafine ua leai sona mafaufau.” O le tagata e leai sona mafaufau na te lē faia ni filifiliga lelei, auā e “faaumatia e ia lona lava ola.” (Faataoto 6:32) I le foliga mai i fafo, e ono atagia mai ai o ia o se tagata e lelei lona talaaga, ae i le tagata i totonu e matuā leai lava se atiina aʻe lelei o iai.

E i ai nisi mea e aafia ai i le fua e selesele mai e le tagata mulilua. “Na te maua le fasiga ma le faamaina; o lona luma foi e le sōloiesea lea. Auā o le fuā o le ita tele lea o le tagata; na te le faasaoina foi o ia i le aso e taui ai ma sui. Na te le talia se togiola lava; na te le mafaia foi, e ui lava ina ua e faatele ni mea e avatu ai.”—Faataoto 6:33-35.

E mafai e le gaoi ona toe taui atu mea na ia gaoia, ae o sē na mulilua na te lē mafai ona toe totogi atu se taui o le mea ua ia faia. O le ā se taui e mafai ona ia ofoina atu i le tane lea ua ita? E tusa lava pe faafia ona ʻaiʻoi ae foliga mai e lē toe lagona se alofa i lē ua fai mea sesē mai lē ua faia i ai le agasala. E leai lava ma se avanoa e mafai ai e lē ua mulilua ona toe totogi atu se mea e suia ai lana agasala. O le a tumau le faalumaina ma le lē faaaloalogia ua fafa atu nei i lona lava igoa. E sili atu i lena, e leai ma se auala na te mafai ai ona togiolaina o ia lava pe faatau mai se saʻolotoga mai le faasalaga ua tatau ona oo ia te ia.

Maʻeu le atamai o le ʻaloese mai le mulilua faapea ma isi amioga ma uiga e mafai ona faaeleelea ai lo tatou igoa lelei ma e ono avatu ai le faalumaina i le Atua! Tau ina ia tatou faaeteete i le faia o taʻutinoga faavalevalea. Ia faamatagofie e le galue maelega ma le faamaoni lo tatou talaaga. Ma a o tatou tauivi e ʻinoʻino i mea e inosia e Ieova, seʻi tau ina ia tatou faia se igoa lelei ma ia atoa ai ma o tatou uso a tagata.

[Faamatalaga pito i lalo]

[Ata i le itulau 25]

Ia mataala i le sainia faatasi lea o se nonogatupe

[Ata i le itulau 26]

Ia galue maelega e pei o le loi

[Ata i le itulau 27]

Leoleo faasaga i le faitala faatigā