Po ua E Faia le Upu Moni ma Au Lava Meatotino?

“Ia liliuina i le toe fuataiina o outou loto, ina ia outou suesue pe se a le finagalo o le Atua, o mea ua lelei, ma le mālie, ma le atoatoa.”—ROMA 12:2.

1, 2. Aiseā e lē faigofie ai le avea o se Kerisiano moni i aso nei?

O LE avea o se Kerisiano moni i nei aso e gata ai—nei “aso faigata”—e lē faigofie. (2 Timoteo 3:1) O le mea moni lava, ina ia mulimuli atu i le faaaʻoaʻoga a Keriso, e tatau i se tasi ona manumalo mai le lalolagi. (1 Ioane 5:4) Seʻi manatua le fetalaiga a Iesu e faatatau i le ala faa-Kerisiano: “Ia outou ulu atu i le faitotoa va apiapi; auā e va tele le faitotoa, e lautele foi le ala e tau atu i le malaia, e toatele foi i latou o e ui atu ai. Auā e va apiapi le faitotoa, e lauitiiti foi le ala e tau atu i le ola, e toaitiiti foi i latou o e maua.” Na ia fetalai foʻi: “A fia mulimuli mai se tasi ia te au, ia faafiti o ia ia te ia, ma ave lona satauro i aso fai soo, i le mulimuli mai [“ai pea,” NW] ia te au.”—Mataio 7:13, 14; Luka 9:23, LF.

² Pe afai ua maua le ala vaapiapi i le ola, o le luʻi e sosoo mai i se Kerisiano o le taumafai e tumau ai. Aiseā ua avea ai o se luʻi lena mea? Auā o lo tatou tuuina atu ma le papatisoga ua avea ai i tatou ma taulaʻiga o gaoioiga faaʻoleʻole a Satani, po o togafiti e lē iloagofie. (Efeso 6:11; faaopoopoga i le pito i lalo, NW) E na te mātauina mai o tatou vaivaiga ma saʻili e faaaogā na vaivaiga i se taumafaiga e faaleaga ai lo tatou itu faaleagaga. Manatua foʻi, sa ia taumafai e faatoʻilaloina Iesu, aiseā la o le a ia lē faia ai foʻi faapena ia i tatou?—Mataio 4:1-11.

Mailei Faaʻoleʻole a Satani

3. Na faapefea ona totō e Satani masalosaloga i le mafaufau o Eva?

³ O se tasi o maunu e faaaogā e Satani o le totō lea o masalosaloga i o tatou mafaufau. E na te saʻilia ni itu o loo vaivai ai i lo tatou ofutau faaleagaga. Mai lava i le amataga, sa ia faaaogā lena mailei ia Eva, i le fesili atu: “E moni ea, na fetalai mai le Atua, lua te le aai i laau uma o le faatoaga?” (Kenese 3:1) I se isi faaupuga, sa faapea atu Satani, ‘Pe mafai moni ea ona avatu e le Atua lena faasāsāga ia te oulua? Faamata e na te taofia maia se mea e sili ona lelei mo oulua? Auā, e silafia e le Atua o le aso lava lua te aai ai i le laau o le a pupula ai o oulua mata ma avea ai oulua e pei o le Atua, e iloa le lelei ma le leaga!’ Na totō e Satani se fatu o le masalosalo ma sa faatalitali i le taimi o le a tupu aʻe ai.—Kenese 3:5.

4. O ā masalosaloga e ono aafia ai nisi i aso nei?

⁴ E faapefea ona faaaogā e Satani lenei mailei i aso nei? Pe afai tatou te lafoaʻia la tatou faitauga Tusi Paia, a tatou suʻesuʻega totino, a tatou tatalo, ma la tatou faiva faa-Kerisiano ma sauniga, e ono tatou nonofo faatalanoa ai i ni masalosaloga e lāgā mai e isi. Mo se faaaʻoaʻoga: “E faapefea ona tatou iloa o le upu moni lenei e pei ona sa aʻoaʻoina mai e Iesu?” “Po o aso moni ea nei e gata ai? Aemaise, o lenei ua tatou iai i le lona 21 o senituri.” “Po ua tatou tau lalata atu ea ia Amaketo, pe o mamao pea lava i le lumanaʻi?” Pe afai e mapuna aʻe na masalosaloga, o le ā e mafai ona tatou faia e aveesea ai?

5, 6. O le ā e ao ona tatou fai pe a oso aʻe ni masalosaloga?

⁵ Na aumaia e Iakopo se fautuaga atamai ina ua ia tusi mai: “Afai ua leai se poto i so outou, ina ole atu [“pea,” NW] ia i le Atua, o lē foai tele mai i tagata uma ma le le toe taʻutaʻua; ona foaiina mai ai lea ia te ia. A ia ole atu [pea] ma le faatuatua, aua lava neʻi masalosalo; auā o lē masalosalo e tusa ia ma le peau o le sami ua sousou i le matagi ma felafolafoaiina. Aua lava neʻi manatu lea tagata na te maua se mea e tasi mai le Alii; o le tagata faalotolotolua e faaletumau ia i ona ala uma.”—Iakopo 1:5-8.

⁶ O le ā la, e ao ona tatou fai? E tatau ona tatou “ole atu pea . . . i le Atua” i le tatalo mo le faatuatua ma le malamalama ma faamalosia a tatou taumafaiga i suʻesuʻega totino e faatatau i so o se fesili po o ni masalosaloga. E mafai foʻi ona tatou ole atu mo se fesoasoani mai ia i latou o ē malolosi i le faatuatua, i le aunoa ma se masalosalo o le a foaʻi mai e Ieova le lagolagosua tatou te manaʻomia. Na faapea mai foʻi Iakopo: “O le mea lea ia outou gauai ai i le Atua; ia outou tetee atu i le tiapolo, ona sola ese ai lea o ia ia te outou. Ia outou faalatalata atu i le Atua, ona faalatalata mai lea o ia ia te outou.” Ioe, o le a mou atu o tatou masalosaloga a o tatou faalatalata i le Atua e ala i suʻesuʻega ma tatalo.—Iakopo 4:7, 8.

7, 8. O ā nisi o vala manaʻomia autū e iloa ai le ituaiga o tapuaʻiga sa aʻoaʻo mai e Iesu, ma o ai o latou ausiaina nei vala manaʻomia?

⁷ Seʻi fai ma faaaʻoaʻoga, le fesili: E faapefea ona tatou iloa o loo tatou faatinoina le ituaiga o tapuaʻiga lea na aʻoaʻo mai e Iesu? Ina ia taliina lenei fesili, o ā vala manaʻomia e ao ona iloiloina? Ua faasino mai e le Tusi Paia e faapea, e tatau i Kerisiano moni ona fealofani. (Ioane 13:34, 35) E ao ona latou faapaiaina le suafa o le Atua, o Ieova lea. (Isaia 12:4, 5; Mataio 6:9) Ma e ao ona latou faailoa atu lena suafa.—Esoto 3:15; Ioane 17:26.

⁸ O se isi vala e mātaulia ai le tapuaʻiga moni o le faaaloalo i le Afioga a le Atua, le Tusi Paia. O se tusi e tutasi o loo faaalia maia le uiga totino o le Atua ma ana fuafuaga. (Ioane 17:17; 2 Timoteo 3:16, 17) E lē gata i lea, e folafola atu e Kerisiano moni le Malo o le Atua ua na o lea le faamoemoe o tagata mo le ola e faavavau i se lalolagi parataiso. (Mareko 13:10; Faaaliga 21:1-4) Ua latou vavae ese mai pea i polotiki faapiʻopiʻo a lenei lalolagi ma ona ala o le olaga e faaleagaina ai. (Ioane 15:19; Iakopo 1:27; 4:4) O ai i aso nei o loo latou ausia moni lava nei vala manaʻomia? Ua faamautinoa e mea moni faapea e na o le tasi lava le tali—o Molimau a Ieova.

Ae Faapefea pe a Iai Pea ni Masalosaloga?

9, 10. O le ā e mafai ona tatou faia ina ia manumalo ai mai ni masalosaloga ua iai?

⁹ Ae faapefea pe a teʻi ua matuā lofia i tatou i ni masalosaloga? O le ā la se mea e tatau ona tatou faia? Ua saunia mai e le tupu poto o Solomona le tali: “Loʻu atalii e, afai e te talia aʻu upu, ma e teu i lou loto aʻu poloaiga, e uai atu ai ou taliga i le poto, e faasaga atu ai lou loto i le faautauta; afai lava e te valaau atu i le atamai, ma e leo tele atu i le faautauta; afai e te sailiili ia te ia, e pei ona sailiili i le ario; afai e te suesue i ai, pei ona suesue i le oloa lilo; ona e lagona ai lea o le mataʻu ia Ieova, ma e maua ai le poto i le Atua.”—Faataoto 2:1-5.

¹⁰ Po ua lē o se manatu ea lena e matuā maofa ai? Pe afai tatou te lotomalie e matuā uaʻi atu i le atamai o le Atua, o le a tatou “maua ai le poto i le Atua.” Ioe, e mafai ona tatou maua le poto e uiga i le Alii Pule Silisili Ese aoao pe afai tatou te lotomalilie e talia ma faapelepele i ana afioga. O lona uiga, ia saʻili atu ia Ieova i le tatalo ma e ala i suʻesuʻega totino. O le oloa lilo a lana Afioga e mafai ona tafiesea ai so o se masalosaloga ma fesoasoani ia i tatou ia iloa le malamalama o le upu moni.

11. Na aafia faapefea le auauna a Elisaia i ni masalosaloga?

¹¹ O se faaaʻoaʻoga manino o le auala na mafai ai e se tatalo ona fesoasoani i se auauna a le Atua o lē na fefe ma masalosalo foʻi, ua faamatalaina i le 2 Tupu 6:11-18. Sa leʻi iai i le auauna a Elisaia se malamalamaga faaleagaga. Sa lē mafai ona ia malamalama o lea sa iai iinā ʻau faalelagi e lagolago ane i le perofeta a le Atua, o lē na osofaʻia mai e le ʻautau a Suria. O le mataʻu tele o le auauna na ia alaga ai: “Aue! le alii e, pe faapefea se mea tatou te fai aʻi?” Na faapefea ona tali atu Elisaia? “Aua e te fefe, auā e toatele ua ia te i tatou i e ua ia te i latou.” Ae sa ao faapefea ona faatalitonu le auauna? Sa leʻi mafai ona ia iloa atu ʻautau faalelagi.

12. (a) Na faapefea ona foʻia masalosaloga o le auauna? (e) E faapefea ona tatou foʻia so o se masalosaloga e ono oo ia i tatou?

¹² “Ona tatalo ai lea o Elisaia, ua faapea atu, Ieova e, ia e faapupula i ona mata ina ia na iloa. Ona faapupulaina lea e Ieova o mata o le taulealea, ona iloa ai lea e ia, faauta foi, ua tumu le mauga i solofanua ma kariota afi, ua latou vagavagai ia Elisaia.” I lena tulaga, ona o Ieova na mafai ai e le auauna ona ia vaai atu i ʻau faalelagi ia sa latou puipuia Elisaia. E ui i lea, e lē tatau ona tatou faatalitalia lena ituaiga o fesoasoani tauatua i aso nei. Manatua, sa leʻi iai i lena auauna a le perofeta le Tusi Paia atoa e suʻesuʻe i ai ina ia faamalosia lona faatuatua. Ua ia i tatou le Tusi Paia. Pe afai tatou te faaaogā lelei, e mafai ona faamalosia ai faapena lo tatou faatuatua. Mo se faaaʻoaʻoga, atonu tatou te mafaufau loloto i tala eseese o loo faamatala mai ai le iai o Ieova i lona afioaga i le lagi. O nei tala e mautinoa ai lava le iai o le faalapotopotoga faalelagi a Ieova o loo lagolagoina ana auauna i le galuega tau aʻoaʻoga i le lalolagi aoao i aso nei.—Isaia 6:1-4; Esekielu 1:4-28; Tanielu 7:9, 10; Faaaliga 4:1-11; 14:6, 7.

Faaeteete i Togafiti a Satani!

13. E ala i ā auala ua taumafai ai Satani e faavaivaia lo tatou pipii mau i le upu moni?

¹³ O ā nisi auala a Satani e faavaivaia ai lo tatou itu faaleagaga ma lo tatou pipii mau i le upu moni? O se tasi o auala o amioga lē mamā, i ona vala eseese uma. I le lalolagi o loo faananau atu i feusuaʻiga i aso nei, o le mea ua taʻua o se faanunumi (se faaupuga e tau faamāmā ai le lē faamaoni i le faaipoipoga) po o se paaga o le pō (le faitaaga e faia ma le lē manatu mamafa i ai) ua avea o se mataupufai o aso taʻitasi a se tupulaga ua mafuli i mea faafiafia, ua faananau atu i faafiafiaga e tusa lava po o ā mea e aafia ai. O loo uunaʻia atili e tifaga, televise, ma vitiō lenei ituaiga o olaga. O ata ma faamatalaga o amioga lē mamā faaleituaiga ua faatumulia ai faasalalauga, aemaise le Initineti. O le fia iloa lava e oo ai i faaosoosoga.—1 Tesalonia 4:3-5; Iakopo 1:13-15.

14. Aiseā ua paʻūʻū ai nisi Kerisiano i togafiti a Satani?

¹⁴ O nisi Kerisiano ua lolo atu i lo latou fia iloa ma ua faaleagaina ai o latou mafaufau ma loto e ala i le matamata i ata o faiga matagā faaleituaiga e talatuu mai po o le matuā matagā lava. O i latou lava ua māfua ai ona latou paʻūʻū atu i mailei faatosina a Satani. O le faia faapea ua masani ona taʻitaʻia ai i le faavaatuʻia faaleagaga. Ua lē taulau ia i latou na ona tumau pea i lo latou “faatamameamea i le leaga.” E leʻi avea i latou o ni “tagata matutua i le mafaufau.” (1 Korinito 14:20) I tausaga taʻitasi, e faitau afe ua mafatia i āuga o le lē usiusitai i mataupu silisili ma tapulaa o le Afioga a le Atua. Ua latou lafoaʻia le ofuina ma le tausisia o lo latou “ofutau atoatoa mai le Atua.”—Efeso 6:10-13; Kolose 3:5-10; 1 Timoteo 1:18, 19.

Ia Faapelepele i Mea o ia i Tatou

15. Aiseā atonu ua faigatā ai i nisi ona latou talisapaia lo latou tofi faaleagaga?

¹⁵ Na fetalai Iesu: “E iloa foi e outou le mea moni, e tuu saʻoloto foi outou e le upu moni.” (Ioane 8:32) O le toʻatele o Molimau sa tatau ona latou vavae ese mai le ituaiga o olaga sa ola muamua ai, ma faalapotopotoga faalotu sa auai atu muamua i ai. O lea, atonu ua sili atu ai lo latou naunau e talisapaia le saʻolotoga ua aumaia e le upu moni. Ae i le isi itu, o nisi talavou o ē na tausia aʻe e mātua o loo i le upu moni, atonu e faigatā ona latou talisapaia lo latou tofi faaleagaga. E leʻi avea muamua lava i latou ma se vaega o lotu sesē po o se vaega o lenei lalolagi lea o loo faamamafaina le saʻilia o faafiafiaga, le pulea e fualaau faasāina, ma ana amioga lē mamā. O le iʻuga, e ono lē taulau ai ona latou iloa le eseesega matuā manino lava i le vā o lo tatou parataiso faaleagaga ma le lalolagi leaga a Satani. O nisi ua oo lava ina latou lolo atu i le faaosoosoga e tofo i mea oona a le lalolagi ina ia iloa ai po o le ā se mea ua latou misia!—1 Ioane 2:15-17; Faaaliga 18:1-5.

16. (a) O ā fesili tatou te ono fesiligia ai i tatou lava? (e) O ā mea ua aʻoaʻoina ai ma faalaeiauina i tatou e fai?

¹⁶ Pe tatou te mananaʻo moni lava e susunu o tatou tamatamaʻilima ina ia iloa ai le tigā ma le mafatiaga? Pe lē mafai ea ona tatou iloa mai mea leaga ua oo i isi? Pe manaʻomia ea ona tatou liliu atu i “le palapala” o lenei lalolagi ina ia iloa ai po ua tatou misia mai ai se mea? (2 Peteru 2:20-22) Na faamanatu atu e Peteru i Kerisiano o le uluaʻi senituri o ē na avea muamua o se vaega o le lalolagi a Satani e faapea: “Ua lava ia aso ua mavae na fai ai e outou le manao o e faapaupau, o savavali i le faamatāitu ma tuʻinanau, ma le inu tele i uaina, ma poula, ma inugāava, ma le ifo i tupua e soli ai tulafono.” E mautinoa lava, e lē manaʻomia ona tatou tofo i le “ulavale silisili” a le lalolagi ina ia iloa ai pe faapeʻī le matuā paʻū maulalo e mafai ona oo i ai le olaga. (1 Peteru 4:3, 4, LF) Na i lo lea, ua aʻoaʻoina i tatou i tapulaa maualuluga tau amio a Ieova i o tatou Maota o le Malo, lea ua avea ma nofoaga tutotonu o aʻoaʻoga faale-Tusi Paia. Ma ua faalaeiauina i tatou ina ia faaaogā lo tatou tomai faalemafaufau e faamaonia ai ia i tatou lava e faapea o le upu moni lea ua ia i tatou, ma avea ai le upu moni o sa tatou lava meatotino.—Iosua 1:8; Roma 12:1, 2; 2 Timoteo 3:14-17.

Lo Tatou Igoa ua Lē na o se Taʻu

17. E mafai faapefea ona avea i tatou o ni Molimau uigā a Ieova?

¹⁷ Pe afai tatou te avea le upu moni o sa tatou lava meatotino, o le a tatou taumafai ai e tufa atu i isi i avanoa uma e maua. E lē o le uiga o lenei mea faapea o le a tatou taumafai e uunaʻi faamalosi le upu moni i tagata e lē o naunau fiafia mai. (Mataio 7:6) Na i lo lea, o le a tatou lē matamumuli e faailoa atu o i tatou o Molimau a Ieova. Pe a faaalia e se tagata sina naunau e ala i le lāgā mai o se fesili faamaoni pe talia foʻi se lomiga faale-Tusi Paia, o le a tatou nofosauni ma sauniuni e tufa atu i ai lo tatou faamoemoe. O le mea moni, e manaʻomia ai i lenei itu le iai pea ia i tatou o ni lomiga e tusa lava po o fea tatou te iai—i le fale, i le galuega, i le aʻoga, i le faleoloa, pe i nofoaga o faiga mālōlōga ma faafiafiaga.—1 Peteru 3:15.

18. E mafai faapefea e le faailoa manino atu o i tatou o Kerisiano ona aogā tele i o tatou olaga?

¹⁸ Pe a manino ona tatou faailoa atu i tatou o ni Kerisiano, o le a tatou faamalosia ai lo tatou puipuiga mai osofaʻiga faatogafiti a Satani. Pe afai e faia se patī o se asofanau po o se patī o le Kirisimasi po o se lūlū a le ofisa, e masani ona faapea mai aumea faigaluega, “Aua le popole fua ia te ia. O ia o se Molimau a Ieova.” O le māfuaaga foʻi lena, atonu o le a lē soona faia ai e tagata ni a latou tausuaga matagā a o tatou iai. O lea, o lo tatou faailoa atu o lo tatou tulaga faa-Kerisiano e aogā tele i o tatou olaga, e pei lava ona taʻua e le aposetolo o Peteru e faapea: “O ai foi na te agaleaga ia te outou, pe afai tou te faaaʻoaʻo i le lelei? A e afai e tigaina outou ona o le amiotonu, amuia outou.”—1 Peteru 3:13, 14.

19. E faapefea ona tatou iloa ua leva ona tatou iai i aso e gata ai?

¹⁹ O le isi aogā o le avea o le upu moni ma a tatou lava meatotino, o le a tatou matuā talitonu ai o aso moni lava nei e gata ai o lenei faiga o mea. O le a tatou iloa ai le tele o valoaga o le Tusi Paia o loo faasolo atu i o latou tumutumuga i o tatou taimi.a O le lapataʻiga a Paulo faapea “o ona aso e gata ai e oo mai ai aso faigata” ua matuā faamaonia lava i mea mataʻutia na tutupu i le senituri ua mavae atu. (2 Timoteo 3:1-5; Mareko 13:3-37) E iai se mataupu i se nusipepa talu ai nei e faatatau i le lona 20 senituri sa faaulutala mai, “O le a Manatuaina Faapea o le Tupulaga o Faiga Faanuupō.” Na taʻua e le mataupu: “Sa faamaonia le avea o le 1999 ma tausaga aupito sili ona fasioti tagata i le ʻafa lona lua o le senituri aupito sili ona fasioti tagata.”

20. O le taimi lenei mo le ā le gaoioiga?

²⁰ E lē o se taimi lenei e faatalatū ai. Ua matuā manino mai lava faamanuiaga a Ieova i le galuega tau aʻoaʻoga sili ona telē o le Tusi Paia sa leʻi faapea muamua ona faia i le lalolagi aoao e fai ma molimau i nuu uma. (Mataio 24:14) Ia avea le upu moni ma au lava meatotino, ma ia tufa atu i isi. O lou lumanaʻi e faavavau e faalagolago i mea e te faia i le taimi nei. O le faatuutuu o le a lē mauaina ai faamanuiaga a Ieova. (Luka 9:62) Na i lo lea, o le taimi lenei “ia outou tumau, ma le le faagaeetia, ia alualu lo outou faamalosi i le galuega a le Alii ma le le aunoa, ina ua outou iloa e le se mea faaleaoga lo outou tautiga i le Alii.”—1 Korinito 15:58.

[Faamatalaga pito i lalo]

Pe E te Manatua?

• E mafai faapefea ona tatou faateʻa ese masalosaloga?

• O le ā e mafai ona tatou aʻoaʻoina mai le faaaʻoaʻoga a le auauna a Elisaia?

• O ā faaosoosoga tau amio e tatau ona faaauau pea ona tatou leoleomalu mai ai?

• Aiseā e tatau ai ona tatou faailoa manino atu o i tatou o Molimau a Ieova?

[Ata i le itulau 10]

O suʻesuʻega faale-Tusi Paia ma tatalo e lē aunoa, e mafai ona fesoasoani ia i tatou e faateʻa ese ai masalosaloga

[Ata i le itulau 11]

Na foʻia masalosaloga o le auauna a Elisaia ina ua vaai i se faaaliga

[Ata i le itulau 12]

Ua aʻoaʻoina i tatou i tapulaa maualuluga a Ieova tau amio, i Maota o le Malo, e pei o le maota lenei i Benin