Pe E te Manatua?
Pe na e talisapaia le faitauina o mataupu talu ai nei o Le Olomatamata? Ia, seʻi vaai pe mafai ona e taliina fesili o loo mulimuli mai:
• Aiseā e aogā ai le iloiloina o fesili na lāgā i le mataupu e 38 o Iopu e oo lava foʻi i aso nei?
O le tele o galuega ofoofogia o loo faauaʻi atu i ai i tatou e le Atua, e lē o mafai ona malamalama atoatoa i ai e oo lava i saienitisi i ona pō nei. O loo aofia ai ia le auala o loo faatumauina ai e le kalave le lalolagi i lona faataamilosaga, o le ā tonu lava le malamalama, le māfuaaga ua iai le lē mafaitaulia o ituaiga eseese o matāua o le kiona (snowflake), le auala o loo faia aʻe ai matāua, ma le auala o loo aofia ai le malosiaga (energy) i faititili.—4/15, itulau 4-11.
• O ā faataʻitaʻiga faale-Tusi Paia e mafai ona fesoasoani iā i tatou e fesagaʻia ai faalogona lē lelei?
O Asafo, Paruka, ma Naomi, na fesagaʻia ni vaitaimi o le lotovaivai po o isi faalogona lē mautinoa, ma o faamaumauga faale-Tusi Paia o lo latou taulau manuia i le fesagaʻia o na tulaga e mafai ona fesoasoani iā i tatou.—4/15, itulau 22-24.
• O ā nisi o auala aogā e fesoasoani ai i fafine Kerisiano ua oti a latou tane?
E mafai e uō ona ofo saʻo atu ma le agalelei se fesoasoani. O sui o le aiga po o isi foʻi e ono iai i se tulaga e ofoina atu ai ni fesoasoani tautupe po o fesoasoani faaletino, pe afai o loo manaʻomia moni lava. O aumea Kerisiano e mafai foʻi ona fesoasoani e ala i le ofoina atu o se faauōga alofa, le lagolagosua faaleagaga ma faamāfanafanaga.—5/1, itulau 5-7.
• Aiseā e tāua ai le faaipoipo “tau lava i le ua i le Alii,” e pei ona fautua mai ai le 1 Korinito 7:39?
O le faaipoipo atu i ē lē talitonu e masani lava ona faamaonia le lē taulau. E lē gata i lea, o le mulimuli atu i lenei fautuaga tauatua o se mataupu o le faamaoni atu lea iā Ieova le Atua. Pe a tatou usitaia le Afioga a le Atua, o le a lē faasalaina ai i tatou e o tatou loto. (1 Ioane 3:21, 22)—5/15, itulau 20-21.
• Talu ai o Ieova e na te faamagaloina a tatou agasala, aiseā la e faaali ai fua e Kerisiano agasala matuiā i toeaina o le faapotopotoga?
Ioe, e manaʻomia ona saʻili atu se Kerisiano iā Ieova mo le faamagaloga o agasala matuiā. (2 Samuelu 12:13) Ae e pei lava ona saunia e Natano le fesoasoani mo Tavita, e mafai foʻi e toeaina taʻumatuaina i le faapotopotoga ona fesoasoani i tagata agasala ua salamō. O le ō atu i toeaina e ōgatusa lea ma taʻiala o loo aumaia i le Iakopo 5:14, 15.—6/1, itulau 31.
• O ā faamaoniga o loo iai e tatau ai ona tatou tausia ē ua mātua oti ma fafine ua oti a latou tane o loo iai ni manaʻoga?
O faamaumauga mai talafaasolopito ua faaalia ai faapea, o le avatuina o lea tausiga na mātaulia ai le tapuaʻiga moni e lē gata i tagata Eperu anamua ae faapena foʻi ma uluaʻi Kerisiano. (Esoto 22:22, 23; Kalatia 2:9, 10; Iakopo 1:27) Na faaaofia e le aposetolo o Paulo faatonuga manino i le Tusi Paia mo Kerisiano i le avatuina o le tausiga o loo manaʻomia mo i latou ua oti a latou tane. (1 Timoteo 5:3-16)—6/15, itulau 9-11.
• O le ā le auala e mauaina ai se olaga e fiafia ma uigā?
E tatau ona tatou atiina aʻe ma tausia se faiā lelei ma Ieova, lo tatou Tamā faalelagi. O le suʻesuʻeina o le Tusi Paia o se fesoasoani tāua tele lea e faataunuuina tonu ai lenā tulaga.—7/1, itulau 4-5.
• Po o iai ea i tagata taʻitoʻatasi se agaga e lē mafai ona oti lea e ola pea pe a mavae le oti?
E ui ina talitonu nisi o tagata o le agaga—ae lē o le tagata—e lē mafai ona oti, ae e lē o lagolagoina e le Tusi Paia lenā manatu. O loo faaalia faapea pe a oti le tagata, e toe foʻi atu i le efuefu ma ua lē o toe ola lava. Ae o loo mafaia e le Atua ona toe faafoʻisia mai o ia i le ola, o lea e so o se faamoemoe mo le olaga i le lumanaʻi, e ala i le toetū, e faalagolago atu i le Atua. (Failauga 12:7)—7/15, itulau 3-6.
• O fea na iai Tanielu ina o tofotofoina Eperu e toʻatolu i le fanua laugatasi o Turu?
E lē o taʻua i le Tusi Paia. Atonu sa lē manaʻomia ona iai Tanielu i inā ona o lona tulaga maualuga, pe atonu na toesea o ia i ni tofiga faalemalo. Ae e tatou te mautinoa faapea sa leʻi malolo o ia i lona faamaoni iā Ieova.—8/1, itulau 31.