Fesili Mai le ʻAufaitau

O le ā le uiga o le tapuaʻi iā Ieova “i le agaga”?

A o molimau atu i se fafine o Samaria o lē na alu atu e utu vai i le vaipuna o Iakopo e lata ane i le aai o Sukara, na fetalai atu Iesu Keriso e faapea: “O le Atua o le agaga lava ia; o e tapuai ia te ia, e tatau ona tapuai atu ia i le agaga ma le faamaoni [“upu moni,” NW].” (Ioane 4:24) E ao ona avatu le tapuaʻiga moni ‘i le upu moni,’ o lona uiga e ao ona ōgatusa ma mea ua faaali mai e Ieova le Atua i le Tusi Paia e uiga iā te ia ma ana fuafuaga. E ao foʻi ona tatou auauna i le Atua i le agaga, o lona uiga, ia maelega ma ia uunaʻia e se loto ua tumu i le alofa ma le faatuatua. (Tito 2:14) Ae peitaʻi, o faamatalaga ia o loo siʻomia ai fetalaiga a Iesu e uiga i le ‘tapuai i le Atua ma le agaga,’ e sili atu mea e aofia ai na i lo le auala faalemafaufau o loo tatou auauna ai iā Ieova.

Sa leʻi talanoa Iesu ma le fafine i le vaieli e faatatau i le iai po o le leai foʻi o uiga maelega, i faiga tau tapuaʻiga. E oo lava i tapuaʻiga sesē e mafai ona faatinoina i lagona aasa ma le tuutoina i ai. Na i lo lenā, ina ua māeʻa ona taʻua e faapea o le Tamā e lē tapuaʻia i se mauga po o le malumalu i Ierusalema—o ni nofoaga faitino—sa uiga fetalaiga a Iesu i se auala fou o tapuaʻiga e faavae i le tulaga moni o le Atua. (Ioane 4:21) Sa ia tulei mai e faapea: “O le Atua o le agaga lava ia.” (Ioane 4:24) O le Atua moni e leai sona tino e mafai ona vaaia i mata pe tago atu i ai. E lē faavae aʻe le tapuaʻiga iā te ia i se malumalu faitino po o se mauga. O lea, sa taʻua e Iesu se vala o le tapuaʻiga e sili atu i lo mea o loo vaaia.

E ese mai i le tapuaʻi atu i le upu moni, e tatau foʻi i le tapuaʻiga e talileleia ona taʻitaʻia e le agaga paia—le mana galue lē vaaia o le Atua. Na faapea mai Paulo: “Auā e suesue ifo le Agaga [paia] i mea uma, o mea loloto foʻi a le Atua.” Na ia faaopoopo mai: “A ua maua e i matou e le o le agaga o lenei lalolagi, a o le agaga mai le Atua, ina ia matou iloa mea ua foaifuaina mai e le Atua ia te i matou.” (1 Korinito 2:8-12, LT ) Ina ia talileleia le tapuaʻiga i le Atua, e ao ona iā i tatou lona agaga ma ia taʻitaʻiina ai i tatou. E lē gata i lenā, e matuā tāua mo lo tatou agaga, po o lo tatou tulaga faalemafaufau, ona ōgatusa ma le agaga o le Atua e ala i le suʻesuʻeina ma le faatatauina o lana Afioga.

[Ata i le itulau 28]

Tapuaʻi i le Atua “i le agaga ma le upu moni”