Faiaʻoga o le Afioga a le Atua na Uunaʻia e Faataunuu lo Latou Tofiga

E FAITAU selau afe faiaʻoga na tauaofia mo le aʻotauina i masina na mavae atu nei. Na amata mai iā Me talu ai, ona latou aofia potopoto i le faitau selau o Tauaofiaga Itumalo o “Faiaʻoga o le Afioga a le Atua” a Molimau a Ieova i le lalolagi atoa. Na uunaʻia le ʻauusufono e aʻoaʻoina i latou, ina ia avea ma faiaʻoga e sili atu ona agavaa, ma ia faataunuu lo latou tofiga o ni faiaʻoga.

Pe sa e auai i se tasi o nei tauaofiaga? Pe afai o lea, e lē masalomia lou talisapaia o meaʻai susua faaleagaga na laulauina ai i nei faatasitasiga mo le tapuaʻia o le Atua moni, o Ieova. Aiseā la tatou te lē autaluina ai faatasi le polokalame e aʻoaʻoina ai o le tauaofiaga?

Aso Muamua—E Aogā le Tusi Paia Faagaeeina mo le Aʻoaʻo Atu

Na faafeiloaʻi ma le māfana e le taʻitaʻifono le ʻauusufono i le lauga e faapea, “Ia Aʻoaʻoina Outou, Faiaʻoga o le Afioga a le Atua.” I le aʻoaʻoina mai iā Ieova o le ‘Aʻoaʻo Silisili,’ na avea ai Iesu ma Faiaʻoga Sili. (Isaia 30:20; Mataio 19:16) Pe afai tatou te fia agaʻigaʻi i luma o ni faiaʻoga o le Afioga a le Atua, e tatau foʻi ona aʻoaʻoina i tatou e Ieova.

Na sosoo ai ma le lauga, “O Aʻoaʻoga Tau le Malo e Maua Mai ai Fua Lelei.” E ala i faatalatalanoaga ma ni faiaʻoga ua iai le poto masani o le Afioga a le Atua, na faamatilatilaina ai mea na olioli ai ma faamanuiaga o le faia ma soo.

Na sosoo ai ma se lauga na faagaeetia ai o lona matua, “Ia Faagaeeina e Ala i ‘Mea Matagofie a le Atua.’” I le senituri muamua, o “mea matagofie” na aofia ai le Malo o le Atua lea na uunaʻia ai tagata e gaoioi. (Galuega 2:11, NW) E tatou te mafai foʻi ona faagaeetia tagata ina ia faia ni gaoioiga e ala i le folafolaina atu o “mea matagofie” e pei o aʻoaʻoga a le Tusi Paia e uiga i le togiola, le toetū, ma le feagaiga fou.

O le isi lauga na faalaeiauina ai tagata uma, “Ia Fiafia i le Amiotonu a Ieova.” (Salamo 35:27) Ua fesoasoani iā i tatou ina ia tausisi i mea ua tonu ae ʻinoʻino i mea ua leaga, e ala i le suʻesuʻeina o le Tusi Paia, le teena ma le malosi o aafiaga e faaleagaina ai faaleagaga, ma ati aʻe le lotomaulalo. O na laasaga o le a fesoasoani ai e puipuia i tatou mai aumea leaga, o manatu faalelalolagi i meafaitino, ma faafiafiaga lē mamā ma le sauā.

O le lauga autū na faamatuaina, “Ua Saunia Atoatoa e Avea o ni Faiaʻoga o le Afioga a le Atua,” na faamanatu mai ai iā i tatou e faapea ua faaagavaaina i tatou e Ieova e avea ma ana faifeʻau e ala i lana Afioga, lona agaga paia, ma lana faalapotopotoga faalelalolagi. E tusa ai ma le faaaogāina o le Afioga a le Atua, na apoapoaʻi mai ai le failauga iā i tatou e faapea: “O lo tatou sini o le faaooina atu lea o le feʻau o le Tusi Paia ma ia pāʻia loto o la tatou ʻaufaalogologo.”

O le matua o le lauga faasolo muamua, o le “Aʻoaʻoina o i Tatou a o Tatou Aʻoaʻoina Atu Isi.” Na faamamafaina i le vaega amata le tatau ona tatou tausisia o tapulaa maualuluga tau amio faa-Kerisiano ia tatou te aʻoaʻoina ai isi. I le vaega na sosoo ai na faatonuina ai i tatou ina ia “talaʻitonuina le upu moni.” (2 Timoteo 2:15, LF) I le aʻoaʻoina o i tatou lava, e tāua ai le suʻesuʻeina totino o le Tusi Paia ma le filigā, e tusa lava po o le ā le umi na tatou auauna ai i le Atua. O le vaega mulimuli o le lauga faasolo na faaalia ai e faapea o loo mataʻitūina i tatou e le Tiapolo e saʻili uiga e pei o le faamaualuga, le agaga fia tutoʻatasi, le manatu o le fia viia, le fuā, le matauʻa, le lotoleaga, le ita faamoemoe, ma le saʻiliʻili masei. Peitaʻi, afai tatou te tetee atu ma le malosi i le Tiapolo, o le a ia sola ese ai ma i tatou. Ina ia tetee atu la iā te ia, e manaʻomia ai ona tatou tosina vavalalata atu i le Atua.—Iakopo 4:7, 8.

O le lauga ua fetaui lelei, “Ia Matuā ʻInoʻino i le Mala o Ata ma Faamatalaga o Faiga Matagā Faaleituaiga,” ua faailoa mai ai iā i tatou le auala e faafetaiaʻia ai ma le manuia lea faiga mataʻutia o loo faamataʻuina lo tatou tulaga faaleagaga. Na faapea mai le perofeta o Sapakuka e uiga iā Ieova: “E sili ona manino ou fofoga, e te le fia silasila i le amio leaga, e le mafai foi ona e silasila i le agasala.” (Sapakuka 1:13) E tatau ona tatou “ʻinoʻino i le leaga.” (Roma 12:9) Na timaʻia mātua ina ia vaavaaia le auala o loo faaaogāina ai e le fanau le Initineti ma ata o loo matamata ai i le televise. O i latou ua tauau ina taaʻina atu i ata ma faamatalaga o faiga matagā faaleituaiga, na taʻua e le failauga, e tatau ona tāpā se fesoasoani mai i se uō taʻumatuaina faaleagaga. O le a fesoasoani foʻi le mafaufau loloto ma le taulotoina o mau e pei o le Salamo 97:10; Mataio 5:28; 1 Korinito 9:27; Efeso 5:3, 12; Kolose 3:5; ma le 1 Tesalonia 4:4, 5.

O le isi lauga na sosoo ai, “Ia Leoleoina Outou e le Filemu Mai le Atua,” na faamāfanafanaina ai i tatou i le faamautinoaga e faapea, pe afai e lofia i tatou i popolega, e mafai ona tatou lafo atu a tatou avega iā Ieova. (Salamo 55:22) Pe afai tatou te sasaa atu o tatou loto i le Atua i le tatalo, o le a aumaia ai e Ieova iā i tatou “le filemu mai le Atua,” o le toʻafimālie lea i totonu e maua mai le faiā tautele ma ia.—Filipi 4:6, 7.

Na faaiʻuina le aso muamua i se tulaga e matuā olioli ai i le lauga, “Ua Faamatagofieina e Ieova Ona Tagata i le Malamalama,” lea na faamatalaina ai le faataunuuga o le Isaia mataupu e 60. A o faapouliuligiaina pea le lalolagi i aso nei, ua olioli ai “tagata ese”—le motu o tagata e toʻatele lea na aliaʻe mai o ē e pei ni mamoe—i le malamalama o Ieova faatasi ai ma Kerisiano faauuina. Na faamatalaina e le failauga e faasino atu i le fuaiupu e 19 ma le 20 e faapea: “E lē ‘goto’ ifo Ieova e pei o le la pe ‘mavae atu’ pei o le masina. O le a faaauau pea ona ia faamatagofieina ona tagata e ala i le faasusulu mai i ai o le malamalama. Maʻeu se faamautinoaga matagofie lenā mo i tatou a o tatou ola i aso e gata ai i lenei lalolagi pogisā!” I le faaiʻuga o le lauga, na faasilasila ai e le failauga le tatalaina o le tusi, Isaiah’s Prophecy—Light for All Mankind, Tusi e Lua. Po ua uma ona e faitauina lenei lomiga fou?

Aso Lona Lua—Ua Taʻuagavaaina Lelei e Aʻoaʻo Atu i Isi

I le sosoo ai ma le talanoaina o le mau o le aso lona lua, na tatou faalogologo ai ma le naunautaʻi i le lauga faasolo lona lua o le tauaofiaga, “O Faifeʻau ua Ala Mai ai le Avea o Isi ma Ē Talitonu.” Na faamatilatila e failauga o lenei lauga faasolo vaega taʻitasi e tolu e aofia ai le fesoasoani atu i tagata ina ia avea ma ē talitonu—le folafolaina atu o le feʻau o le Malo, le atiina aʻe o le naunau o ē na maua, ma aʻoaʻo ē naunau ina ia tausia le poloaʻiga a Keriso. E ala i le fesoasoani a faatalatalanoaga ma le toe faaataga o mea moni na tutupu, na mafai ai ona tatou iloa patino le auala e aʻoaʻoina ai isi e avea ma soo.

O le vaega na mulimuli mai ai o lona matua, “Ia Faaopoopo i Lou Onosai le Amio Atua.” Na faaalia e le failauga e faapea o le mea e sili ona taulia o lo tatou “tumau seia oo i le gataaga.” (Mataio 24:13) E tatau ona tatou faaaogā sauniuniga uma a le Atua—le tatalo, suʻesuʻega totino, sauniga ma le faiva—e atiina aʻe ai le tuutoina atu i le Atua. E manaʻomia ona tatou ʻalofia tuʻinanauga ma gaoioiga faalelalolagi mai le faasolosolo malie atu ina faalavelavea ma faaleagaina ai lo tatou tuutoina atu i le Atua.

Ae mafai faapefea e tagata o ē o loo tigāina ma mafatia i avega ona maua le faafouina i aso nei? O le lauga o le “Mauaina o le Mālōlōga i le Amoina o le Amo a Keriso” na taliina ai lenā fesili. Na valaaulia ma le agalelei e Iesu ona soo ina ia amoina lana amo ma aʻoaʻo mai iā te ia. (Mataio 11:28-30) E mafai ona tatou amoina le amo a Iesu e ala i le mulimulituʻi i lana faaaʻoaʻoga o le ola i se olaga e faigofie ma paleni. Na faamamafaina atili manatu autū o lenei lauga i faatalatalanoaga ma i latou o ē o loo faafaigofie le auala o ola ai.

O se tasi o mea matilatila o nei faatasitasiga tetele a Molimau a Ieova o le papatisoga lea mo ē fou ua tuuina atu e auauna i le Atua. O le uso na tauaaoina le lauga, “O le Papatisoga e Taʻitaʻia Atu ai i Faaeaga Sili i le Aʻoaʻo Atu,” na faafeiloaʻia ma le māfana le ʻaupapatiso ma valaauliaina i latou ina ia faia se sao i ni faaeaga e sili atu o le auaunaga. E mafai e faiaʻoga fou o le Afioga a le Atua faatoʻā papatiso o ē ua ausia agavaa faale-Tusi Paia, ona aapa atu mo matafaioi eseese i le faapotopotoga.

O le matua o le lauga muamua i lenā afiafi, “Ia Faataʻitaʻi i le Faiaʻoga Sili.” Na mātauliaina ma le faaeteete e Iesu lona Tamā mo se vaitaimi umi na iai i le lagi ma faataʻitaʻi iā te ia, lea na avea ai ma Faiaʻoga Sili. A o iai i le lalolagi, na ia faaaogā ai ni metotia uigā tau aʻoaʻo atu, e pei o le faia o fesili uigā ma faataʻitaʻiga faigofie ma ola. Na faavae e Iesu lana aʻoaʻoga mai le afioga a le Atua ma sa fetalai atu ma le aasa, māfana, faatasi ai ma le pule. Pe sa leʻi uunaʻia ai ea i tatou e faataʻitaʻi atu i le Faiaʻoga Sili?

O le isi lauga faagaeetia, “Po o E Lotomalie e Auauna Atu i Isi?,” na faalaeiauina ai i tatou e faataʻitaʻi i le faaaʻoaʻoga a Iesu i le auauna atu i isi tagata. (Ioane 13:12-15) Na uunaʻia tuusaʻo e le failauga tane agavaa ina ia faapei o Timoteo i le puʻeina o avanoa e fesoasoani ai i isi. (Filipi 2:20, 21) Na faalaeiauina mātua e faataʻitaʻi iā Elekana ma Hana i le fesoasoani atu i a latou fanau ina ia tuliloaina le faiva faataimi atoa. Na faapea foʻi ona apoapoaʻia le ʻautalavou ina ia faataʻitaʻi i le faaaʻoaʻoga a Iesu Keriso ma le talavou o Timoteo, e ala i le ofoina atu ma le lotomalie o i latou lava i le auaunaga. (1 Peteru 2:21) Na uunaʻia foʻi i tatou i upu a i latou o loo faaaogāina tatau avanoa e auauna ai i isi.

O le matua o le lauga faasolo lona tolu, “Ia Maua Atili Aogā Mai Aʻoaʻoga Faatiokarate.” Na faamamafa ai e le failauga muamua le aogā o le faateleina o lo tatou uaʻi atu. Ina ia faataunuu lenā sini, e mafai ona tatou amata i ni suʻesuʻega totino pupuu ona taumafai lea e faaumiumi atu na suʻesuʻega. Na ia faalaeiauina foʻi le aofia ina ia suʻeina mau ma fai ni faamaumauga a o faia sauniga. O le failauga lona lua na ia faamataaliaina i tatou i le manaʻoga mo le taofimau i “matua o upu e ola ai.” (2 Timoteo 1:13, 14) Ina ia puipuia i tatou mai faasalalauga i televise, leitiō ma nusipepa o amioga lē tatau, o filosofia faaletagata, o faitioga i le moni o le Tusi Paia ma aʻoaʻoga faaaposetate, e tatau ona faatauina mai le taimi mo suʻesuʻega totino ma le auai i sauniga. (Efeso 5:15, 16, NW) Na faamatilatilaina e le failauga faaiʻu o le lauga faasolo le manaʻoga mo le faatinoina o mea ua aʻoaʻoina ina ia mafai ai ona tatou mauaina atoatoa aogā mai aʻoaʻoga faatiokarate.—Filipi 4:9.

Maʻeu lo tatou fiafia e faalogologo i le lauga, “O Sauniuniga Fou mo lo Tatou Agaʻigaʻi i Luma Faaleagaga”! Na tatou olioli ina ua iloa ua lē o toe umi ae lomiaina loa se tusi fou e faaigoaina Benefit From Theocratic Ministry School Education (Ia Maua Aogā Mai Aʻoaʻoga o le Aʻoga o le Faiva Faatiokarate). Na faateleina lo tatou naunau a o otooto mai e le failauga mea o loo iai i le tusi. E tusa ai ma le vaega o le tusi lea o loo iai le tele o fautuaga mo le toleniina o le tautala, na ia faapea mai: “E lē o faaaogāina e lenei tusi aʻoga fou ia manatu faalelalolagi i le faatulagaina o nei vala e 53 e faatatau i le faitau lelei, le tautala, ma le aʻoaʻo atu. O loo faavae lava i mataupu silisili faale-Tusi Paia.” O le a faailoa mai e le tusi le auala na faataʻitaʻia ai e le ʻauperofeta, o Iesu ma lona ʻausoo tomai lelei e aʻoaʻo ai. Ioe, o lenei tusi aʻoga ma vala fou o le Aʻoga o le Faiva Faatiokarate, o le a fesoasoani faapitoa iā i tatou ina ia avea ai o ni faiaʻoga e sili atu ona lelei o le Afioga a le Atua.

Aso Lona Tolu—Ua Tatau Ona Avea ma Faiaʻoga pe a Fua i le Taimi

Ina ua māeʻa le talanoaina o le mau o le aso faaiʻu, na uaʻi atu ai ma le naunautaʻi tagata uma i le lauga faasolo mulimuli, “O le Valoaga a Malaki ua Sauniunia ai i Tatou mo le Aso o Ieova.” Na vavalo Malaki pe ā ma le selau tausaga ina ua mavae le toe foʻi o tagata Iutaia mai Papelonia. Na toe tafetafea atu foʻi i latou i faiga faaaposetasi ma faia amioleaga, ma faalumaina ai le suafa o Ieova e ala i le lē amanaʻiaina o ana tulafono amiotonu ma le aumaia o manu tauaso, pipili ma le mamaʻi e fai ai taulaga. E lē gata i lenā, na latou tatalaina a latou faaipoipoga ma a latou avā na fai a o talavou, atonu ina ia toe faaipoipo atu ai i fafine ese.

O le mataupu muamua o le valoaga a Malaki ua faamautinoa mai ai iā i tatou le alofa o Ieova mo ona tagata. Ua faamatilatila mai ai le manaʻoga mo le iai o le mataʻu ma le migao i le Atua faapea ai ma le faaalia o le talisapaia mo mea paia. E faatalitalia e Ieova i tatou ina ia avatu iā te ia le mea silisili tatou te mafaia, tapuaʻi atu iā te ia ma le alofa lē manatu faapito. O la tatou auaunaga paia e lē tau lava ina fai pea lava pea, ma e tatau iā i tatou ona tofu ma lana e tala atu i le Atua.

O le faatatauina o le mataupu lona lua o le Malaki i o tatou aso, na fesili mai ai le failauga lona lua o le lauga faasolo faapea: “Pe o tatou taʻitoʻatasi ea ma mataala ina ia ‘aunoa o tatou laugutu ma se amiolētonu’?” (Malaki 2:6) O i latou o loo taulamua i le aʻoaʻo atu e tatau ona faamautinoa o mea o loo latou fai atu ai e faavae mausalī mai le Afioga a le Atua. E tatau ona tatou ʻinoʻino i na faiga faaʻoleʻole e pei o le tatalaina o faaipoipoga ma le lē tonu.—Malaki 2:14-16.

I le talanoaina o le matua: “O Ai o le a Faasaoina i le Aso o Ieova?,” na fesoasoani mai ai le failauga mulimuli o le lauga faasolo e sauniunia i tatou mo le aso o Ieova. Na alaga le failauga e faapea: “Maʻeu le faalaeiauina ai o auauna a Ieova i le iloaina e faapea o le Malaki mataupu e 3, fuaiupu e 17, o loo iai sona faataunuuga sili iā i latou! E faapenei lona faitauina: ʻE fai . . . i latou maʻu oloa tāua, ua fetalai mai ai Ieova o ʻau, i le aso ua ou tofia; ou te alofa foʻi iā te i latou, e pei ona alofa o le tagata i lona atalii ua auauna ia te ia.’”

O le isi vala matilatila o le tauaofiaga, o le tala: “Ia Faaaloalo i le Pule a Ieova” na faatinoina i teuga faaanamua lea na faaata mai ai atalii o Koru. E ui i se uiga fouvale na iai o lo latou tamā iā Mose ma Arona, ae na tumau pea lo latou faamaoni iā Ieova ma ona sui. Ina ua faaumatia Koru ma ē na mulimuli atu iā te ia, sa faasaoina atalii o Koru. O le lauga na mulimuli mai ai o le “Gauaʻi ma le Faamaoni i le Pulega faale-Atua,” na faia ai se faatatauga o mea na taʻua i le tala iā i tatou taʻitoʻatasi. Na lapataʻia mai e le failauga vala e ono ia na lē taulau ai Koru ma i latou sa mulimuli atu iā te ia: o le lē lagolagoina ma le faamaoni o le pule a Ieova; sa pulea i latou e le faamaualuga, fia taʻutaʻua ma le fuā; o le taulaʻi atu i le tulaga lē lelei atoatoa o i latou sa tofia e Ieova; o le ati aʻe o se uiga faitio; o le lē faamalieina i o latou faaeaga i le auaunaga; ma le faasilisilia o faauōga po o faiā faaleaiga nai lo o le faamaoni iā Ieova.

O le matua o le lauga i le lautele, “O Ai o Loo Aʻoaʻoina Nuu Uma i le Upu Moni?” O le upu moni lea sa talanoaina, e lē o le upu moni i le tulaga lautele, ae o le upu moni e faatatau i fuafuaga a Ieova lea na molimau e faatatau i ai Iesu Keriso. Na iloiloina e le failauga le upu moni e fesootaʻi atu i talitonuga, le upu moni e faatatau i le auala e tapuaʻi ai, ma le upu moni e fesootaʻi atu i amioga totino. E ala i lenei faatusatusaga o Kerisiano i uluaʻi senituri ma Molimau a Ieova i aso nei, na matuā faamalosia ai lo tatou mautinoa e faapea o loo ‘ia te i tatou le Atua.’—1 Korinito 14:25.

Ina ua māeʻa le otootoga o le mataupu o le suʻesuʻega o Le Olomatamata mo le vaiaso, na uunaʻia ai faiaʻoga uma o le afioga a le Atua na i le aofia e faia ni gaoioiga a o faia le lauga faaiʻu, “Ia Faanatinati Ona Faataunuu lo Tatou Tofiga o le Aʻoaʻo Atu.” O se autaluga puupuu o le polokalame na faamamafaina ai le tāua o le faaaogāina o le Tusi Paia i le aʻoaʻo atu, i auala e mafai ai ona avea i tatou ma faiaʻoga agavaa, ma le manaʻoga ina ia iai le mautinoa i le upu moni lea o loo tatou aʻoaʻoina ai isi. Na apoapoaʻia i tatou e le failauga ina ia ‘matauina lo tatou alualu i luma’ ma ia ‘manatu e lē aunoa iā i tatou atoa ma la tatou aʻoaʻo atu.’—1 Timoteo 4:15, 16, NW.

Maʻeu se faigaʻai faaleagaga na tatou olioli ai i le Tauaofiaga Itumalo o “Faiaʻoga o le Afioga a le Atua”! Seʻi o tatou faataʻitaʻi i lo tatou Aʻoaʻo Sili, o Ieova, ma lo tatou Faiaʻoga Sili, o Iesu Keriso, i le aʻoaʻoina o isi i le afioga a le Atua.

[Pusa/Ata i le itulau 28]

O ni Lomiga Fou e Faamalieina ai Manaʻoga Faapitoa

Na mauaina ma le faagaeetia e le ʻauusufono o le Tauaofiaga Itumalo o “Faiaʻoga o le Afioga a le Atua,” ni lomiga se lua e tatau ona matuā aogā lava i le aʻoaʻoina o upu moni faale-Tusi Paia i tagata i ni vaega patino o le lalolagi. O le sāvali ua faaulutalaina, Pe e Iai Sou Agaga e Lē Mafai Ona Oti? o le a avea ma mea faigaluega aogā e amata ai talanoaga ma i latou e nonofo i atunuu e leai se eseesega i a latou gagana o le upu soul ma le spirit (agaga). Ua faamalamalama ma le manino mai e le sāvali fou e faapea o le malosi o le ola e eseese ma le meafaiola agaga, ma e lē avea tagata ma meafaiola agaga pe a maliliu.

O le polosiua A Satisfying Life—How to Attain It, sa tatalaina i le faaiʻuga o le aso lona lua o le tauaofiaga. Ua saunia lenei polosiua mo le fuafuaga e amataina ai suʻesuʻega faale-Tusi Paia ma i latou o ē e lē talitonu i Lē na Foafoaina Mea e faapea e iai ni ona uiga totino, ma e lē talitonu i se tusi na faagaeeina tauatua. Po ua mafai ea ona e faaaogāina nei lomiga fou i lau faiva?

[Ata i le itulau 26]

I Milan, i Italia, ma i tauaofiaga i le lalolagi atoa na papatisoina ai le faitau selau

[Ata i le itulau 29]

Na faagaeetia le aofia i le tala “Ia Faaaloalo i le Pule a Ieova”