O Fea e Maua ai Lou Saogalemu?

I se nuu laʻitiiti lava i Aferika i Sisifo, ua faamavae atu ai le talavou o Josué i lona aiga ma uō.a Ona ia malaga atu loa lea i le aai tele i le saʻilia o se olaga manuia tau tamaoaiga. Ae peitaʻi, e leʻi pine lava talu ona ia taunuu, ae amata loa ona mou atu lona faamoemoe ina ua ia iloa e lē fola i auro auala o le aai.

I LE TAUMAFAI e faamasani i le olaga i le aai, ua oo ai ina matuā lē fiafia Josué. E matuā ese mamao lava le olaga i le aai tele mai le mea sa ia manatu o le a i ai. I na taimi uma, e lagona ai e Josué lona toe fia foʻi i lona aiga ma ana uō i si ona nuu toʻafilemu ua ia tuua. Ae ua fefe o ia e faapea, o le a aamu mai nisi o le nuu iā te ia. Ua popole o ia e faapea: ‘O le a latou faapea mai, ou te lē mafaia se mea, talu ai ua leai saʻu mea e maua i le aai.’

O le mea e sili ona mamafa iā te ia, o le lagona lē fiafia atonu o le a oo i ona mātua. O loo faamoemoe atu i laʻua iā te ia mo se fesoasoani tautupe. A o taumafai ina ia manumalo i lenei faalogona mamafatū, ua faigaluega ovataimi ai Josué i se galuega faatauvaa, ae laʻitiiti lava si totogi na ia maua na i lo o le mea sa ia moemiti i ai. Ua ia lagona le vaivai mai le soona galue. Ma a o mavae atu vaiaso, ua agaʻi ina faaitiitia le taimi mo galuega faa-Kerisiano lea e matuā tāua iā te ia. O lea, ua ia lagona ai le faanoanoa ma le tuua toʻatasi ona ua mamao ese atu mai le māfana o lona aiga ma ana uō mamae. Ua ia iloa, e na te lē o mauaina i le aai le olaga saogalemu lea sa ia matuā faanaunau i ai.

E ui lava i le eseese o igoa ma nofoaga, ae o le tala faanoanoa i le mea na oo iā Josué, o loo tupu pea lava pea. E lē ona o le manatu faapito o Josué na naunau ai e faimalaga atu—sa na o le saʻilia lava o se olaga manuia. Sa manatu moni lava o ia, e sili atu ona lelei avanoa i le aai na i lo o si ona nuu laʻitiiti. E moni, i nisi taimi atonu e faaleleia ai e se tagata lona tulaga i mea faitino, ae lē faapea ai ua ia maua le saogalemu moni. O le mea moni, sa lē taunuu faamoemoega o Josué, ma atonu o le a faapena foʻi i le toʻatele o isi tagata o ē e taumafai e faia lenā mea. Ona o lea, ua tatou fesili ai la e faapea, ‘O le ā le saogalemu?’

E eseese tagata ma o latou lagona e uiga i le upu saogalemu. Ua faapea mai le tasi lomifefiloi, o le saogalemu o le “saʻoloto mai lamatiaga” po o le “saʻoloto mai le fefe ma le popole.” Ua iloa e le toʻatele o tagata e faapea, o le “saʻoloto [atoatoa] mai lamatiaga” e lē o maua i aso nei. Ua malilie lava i latou i le tau ina iai o se lagona saogalemu, e ui i tulaga e faamataʻuina ai atonu o loo siʻomia ai i latou.

Ae faapefea oe? O fea o e saʻili i ai mo se olaga saogalemu? Pe e maua i le aai ae lē o le nuu e pei ona manatu i ai Josué? Pe e maua i tupe, e tusa lava po o fea ma po o le ā foʻi le auala e te mauaina ai? Pe atonu e maua i le taumafai e siitia i se tulaga maualuga? E tusa lava po o fea e te talitonu e mafai ona maua ai lou saogalemu, ae o le ā le umi o le a tumau ai lenā olaga manuia mo oe ma lou aiga?

Seʻi o tatou talanoaina ni auala se tolu ua saʻili i ai le toʻatele o tagata mo le saogalemu—i le nuu e mau ai; o tupe; po o le tulaga i le olaga. Ona tatou iloiloina loa lea po o fea e maua ai le saogalemu moni e tumau.

[Faamatalaga pito i lalo]