O Faifeʻau e Toʻalua o Ē na Talisapaia Tusitusiga a Russell

I LE 1891, na asia ai Europa mo le uluaʻi taimi e Charles Taze Russell, o sē na faia se galuega iloga mo Kerisiano moni o ē na tapuaʻi iā Ieova. E tusa ai o nisi o lipoti e faapea a o mālōlō i Pinerolo i Italia, na feiloaʻi atu ai Russell i le polofesa o Daniele Rivoire, o sē na avea muamua ma faifeʻau o se vaega faalelotu e taʻua o Ualetenese (Waldenses).a E ui lava sa faifaimea faatasi Rivoire ma tagata Ualetenese ina ua ia tuua lana faiva, ae sa iā te ia se uiga e saʻiliʻili atili ma na ia faitauina le tele o lomiga na tusia e C.T. Russell.

I le 1903, na faaliliuina ai e Rivoire le tusi a Russell, The Divine Plan of the Ages i le faa-Italia ma sa ia faaaogā ana lava tupe e lomiaina ai. Na lomia lenei tusi e muamua mamao atu na i lo le kopi lea na lomia aloaʻia i le faa-Italia. I le faatomuaga o le tusi, na tusi ai Rivoire e faapea: “Ua matou tuuina atu lenei lomiga i le puipuiga a le Alii. Tau ina faamanuiaina e ia e ui lava i ni tulaga faaletonu, ina ia mafai ai ona saosaolaumea i le faapaiaina o lona suafa e sili ona paia ma faalaeiauina ai lana fanau e tautatala i le gagana Italia ina ia matuā tuutoina atu. E ala i lo latou faitauina o lenei tusi, talosia ia talisapaia e o latou loto le loloto o lona tamaoaiga, le atamai, ma le poto o le fuafuaga a le Atua ma lona alofa, ia faafetaia le Atua lava ia, lea o lona alofa tunoa na mafai ai ona lomiaina lenei tusi.”

Na amata ai foʻi ona faaliliuina e Rivoire le Zion’s Watchtower and Herald of Christ’s Presence i le faa-Italia. O lenei mekasini, o le uluaʻi kopi lenā o Le Olomatamata, sa faafā ona lomia i le 1903. E ui lava sa leʻi avea le polofesa o Rivoire ma Tagata Aʻoga o le Tusi Paia, lea na taʻua ai Molimau a Ieova i lenā taimi, ae na ia faaalia le matuā naunau i le faasalalauina atu o le feʻau o le Tusi Paia e pei ona faamatalaina ai i lomiga a Tagata Aʻoga o le Tusi Paia.

“Na Foliga Mai e Pei ua Paʻūʻū Ese Atu ni Una ma Oʻu Mata”

O le isi faifeʻau Ualetenese na faatāuaina lomiga a Russell o Guiseppe Banchetti. Na aʻoaʻoina o ia i le lotu Ualetenese e lona tāma lea na liliu ese mai le Lotu Katoliko. I le 1894, na avea ai Giuseppe ma faifeʻau ma galue ai i vaega eseese o tagata Ualetenese i Apulia ma Abruzzi ma i motu o Elba ma Sicily.

Na lomia aloaʻia le kopi o le Divine Plan of the Ages a Russell i le faa-Italia i le1905. Na tusia ai e Banchetti se faamatalaga mataʻina o le tusi. Na maua lea i le lomiga a le Porotesano o le La Rivista Cristiana. Na tusi Banchetti e faapea, o le tusi a Russell “o se tusi e sili ona faamalamalamaina ai ma o se taʻiala mautinoa e ono mafai ona mauaina e se Kerisiano e amata ai se suʻesuʻega e aogā ma faamanuiaina o le Tusi Paia . . . O le taimi lava na ou faitauina ai, na foliga mai e pei ua paʻūʻū ese atu ni una ma oʻu mata, ma iloa ai e sili atu ona saʻo ma faigofie le auala e ui atu ai i le Atua. E oo lava i ni mea na foliga mai o ni feteenaʻiga ua tele lava ina mou ese atu. O aʻoaʻoga sa faigatā muamua ae ua foliga mai ua faigofie ma taliainagofie. O mea na lē muaʻi malamalama i ai ae o lenei ua manino. Na oo ina ou matuā manino i le fuafuaga mataʻina o le faaolataga o le lalolagi iā Keriso, lea na faalaeiauina ai aʻu e alaga e pei o le Aposetolo: “Aue! le loloto o le tamaoaiga o le poto atoa ma le silafaga a le Atua.”—Roma 11:33.

E pei ona taʻua e Remigio Cumunetti i le 1925, na faaalia ai e Banchetti lona “auai pe ioeina” o le galuega a Tagata Aʻoga o le Tusi Paia ma sa “faatalitonuina atoatoa” i aʻoaʻoga e pei ona faamatalaina mai e i latou. Na taumafai foʻi Banchetti e faalauiloa atu na aʻoaʻoga i lana lava auala.

Na faamaonia mai i tusitusiga a Banchetti e faapea, e pei o Molimau a Ieova, na ia talitonu o le a iai le toetū i le lalolagi, e pei ona aʻoaʻoina mai e le Tusi Paia. Na ia ioe foʻi faatasi ma Tagata Aʻoga o le Tusi Paia ina ua ia faamatalaina e faapea, o le tausaga lea na maliu ai Iesu ua uma ona faatulaga e le Atua ma na faailoaina mai e le Atua i le valoaga a Tanielu o vaiasosa e 70. (Tanielu 9:24-27) E sili atu i le faatasi ona faaalia lona lē ioe i aʻoaʻoga a lana lotu, na talitonu o ia o le Faamanatuga o le Maliu o Iesu Keriso e tatau ona faamanatuina faatasi i le tausaga, “le aso tonu lea e paʻū i ai le faamanatuga.” (Luka 22:19, 20) Na ia teena le manatu o Darwin e faatatau i le evolusione, ma na ia faamautinoaina mai e faapea o Kerisiano moni, e lē tatau ona auai i taua a le lalolagi.—Isaia 2:4.

I le isi taimi, na talanoaina ai e Banchetti ma le tagata e igoa iā J. Campbell Wall tusitusiga a Russell. I le tali atu i faitioga a Wall, na faapea atu ai Banchetti: “Ou te mautinoa afai e te faitauina tusi e ono a Russell, o le a e maua ai le olioli e malosi ma loloto, ma o le a e matuā faafetai ai iā te aʻu ma se faalogona loloto. Ou te lē faaalialia i aʻoaʻoga; ae na oʻu faitauina na tusi i le sefulu ma le tasi tausaga ua mavae, ma ou te faafetai ai i le Atua i aso uma i le faaooina mai iā te aʻu o lenā malamalama ma na faamāfanafanaga e ala i galuega na faavaeina atoatoa ma le mausalī i le Tusi Paia.”

“Ia Faalogo, Faalogo, Faalogo”

Ua ao ona mātauina e faapea o nei faifeʻau Ualetenese e toʻalua—o Danielle Rivoire ma Giuseppe Banchetti—na faaalia le talisapaia o le auala na faamatalaina ai e Russell le Tusi Paia. Na tusi Banchetti: “Ou te faapea atu e leai ma se tasi o i tatou o Faievagelia, e oo lava i a tatou faifeʻau po o faifeʻau faapolofesa, e leai lava se tasi na te iloaina mea uma. E leai, e matuā tele isi mea e ao ona aʻoaʻoina . . . . [E tatau ona tatou] . . . faatali ma faalogologo, aua le manatu ua tatou iloaina mea uma, ma aua le teenaina mea ua ofoina mai tatou te suʻesuʻe i ai. Na i lo o lea, ia faalogo, faalogo, faalogo.”

I tausaga uma, e faitau afe e faalogo i le feʻau o le Malo lea e faaooina atu i o latou aiga e Molimau a Ieova. Ua tali mai tagata loto fetuutuunaʻi i so o se nofoaga o ē o loo galala i upu moni o le Tusi Paia i le valaaulia a Iesu: ‘Sau ma mulimuli mai ia te au.’—Mareko 10:17-21; Faaaliga 22:17.

[Faamatalaga pito i lalo]

[Ata i le itulau 28]

Le polofesa o Daniele Rivore

[Ata i le itulau 29]

Giuseppe Banchetti

[Faamatalaga i Ata]

Banchetti: La Luce, Aperila 14, 1926