Vaai i Mea e Pei Ona Silasila i ai le Atua

I LE aso 14 o Setema 2002, i Niu Ioka i le Iunaite Setete o Amerika, o se aso māfanafana lea ma le susulu manaia o le lā. O le aso lenā, na faapotopoto ai se motu o tagata faavaomalo e toʻa 6,521 i le Nofoaga Tutotonu Tauaʻoaʻoga i Patterson, ma isi fale e lua o Molimau a Ieova i Brooklyn ma Wallkill. Na faapotopoto ai le motu o tagata e molimauina le faauuga o le vasega lona 113 o le Aʻoga Faale-Tusi Paia a le Olomatamata o Kiliata. E 14 atunuu na ō mai ai tagata aʻoga, ma na latou faaaluina le lima masina ua mavae e sauniuni ai mo le auaunaga faamisionare i atunuu e 19 ia na tofia i ai i latou.

O Carey Barber, ua sili atu i le 97 tausaga o lona soifuaga ma o se sui o le Vaega Pule o Molimau a Ieova, na avea ma taʻitaʻifono o le polokalame. Na ia tataʻi atu manatu i le tele o mea lelei ua maua mai i le Aʻoga o Kiliata lea ua toeitiiti nei atoa le 60 tausaga talu ona faavaeina, ma ua faaauupegaina ai le faitau afe o tagata e ō atu i le galuega faamisionare. Na taʻua e le uso o Barber e faapea: “E lē o ni talausui e fai atu nei e faapea, ua iai ni iʻuga sili ona mataʻina ua maua mai i le toleniga atili o i latou. O le mea moni, e faitau selau afe ē agamalu i le lalolagi atoa ua tuuina atu o latou ola iā Ieova, ma ua talisapaia lana tapuaʻiga moni ma le auaunaga paia ona o le fesoasoani atu o misionare ua uma ona toleniina, iā i latou.”

Ae latou te leʻi ō atu i Kiliata, na faaalia e le toʻatele o tagata aʻoga le naunau e faalauteleina la latou faiva. E sili atu i le tausaga o aʻoaʻoina e se tasi ulugalii le gagana Saina ona o le taumafai ia oo atu i aiga o le anoanoaʻi o tagata Saina o loo i Kanata. O se tasi ulugalii, na aʻoaʻoina e i laʻua lava le gagana Alapania ma iʻu ai ina malaga atu i inā e aʻoaʻoina le toʻatele o tagata lotofiafia i le Tusi Paia. O isi i le vasega, na ō mai i Kiliata mai Hungary, Guatemala, ma le Dominican Republic, o atunuu ia na ō atu i ai ina ia auauna i nofoaga o loo manaʻomia tele ai ni faiaʻoga o le Afioga a le Atua.

O lea, a o leʻi ō atu i o latou tofiga i Aferika, Europa i Sasaʻe, Amerika Tutotonu, Amerika i Saute, ma Sasaʻe Mamao, na faalaeiauina le ʻaufaauu uma ina ia iloa, e tatau ona latou manatuaina le Atua i mea uma latou te faia.

Vaai i Mea e Pei Ona Silasila i ai le Atua

Ina ua uma ana saunoaga amata, ona faafeiloaʻi atu lea e le uso o Barber ia Maxwell Lloyd, o se sui o le Komiti o le Lālā i le Iunaite Setete. Sa ia faatāuaina le matua e faapea: “Ia Vaai i Mea e Pei Ona Silasila i ai le Atua.” Na faauaʻi e le uso o Lloyd manatu i faaaʻoaʻoga a Tavita ma le Alo o le Atua, o Iesu. (1 Samuelu 24:6; 26:11; Luka 22:42) Ina ua uma ona faamanatu atu i tagata aʻoga e faapea, o le lima masina lea na latou suʻesuʻeina ai le Tusi Paia, na toleniina ai i latou ina ia vaai i mea e pei ona silasila i ai le Atua, ona fesili atu lea o le failauga: “Pe a faia suʻesuʻega faale-Tusi Paia ma tagata i o outou tofiga fou, po o le a outou fesoasoani iā i latou e vaai i mea e pei ona silasila i ai le Atua?” Ma e faatatau i le fautuaina o isi, na ia fautua atu ai i tagata aʻoga e faapea: “Aua tou te faapea atu, ‘O loʻu manatu, Ou te lagona . . .’ Na i lo o lenā, fesoasoani iā i latou e vaai po o le ā le silafaga a le Atua. Pe a māeʻa lenei aʻoga, o le a avea outou o se faamanuiaga moni iā i latou o le a outou auaufaatasi i o outou tofiga.”

E tusa ai ma le faasologa o le polokalame, na sosoo ai ma Gerrit Lösch, o se sui o le Vaega Pule. Sa ia talanoa i le matua “Ou te iā te Oe,” sa ia faamanatu atu le tele o taimi na fetalai atu ai Ieova i ana auauna faamaoni, ‘Ou te iā te oe.’ (Kenese 26:23, 24; 28:15; Iosua 1:5; Ieremia 1:7, 8) I aso nei, e mafai ona iā i tatou lenā lava mautinoa e uiga iā Ieova pe afai e tatou te tumau i le faamaoni. Na faapea mai le uso o Lösch: “Pe e te popole pe faamata o le a e mauaina ni tagata e tou te suʻesuʻe i le Tusi Paia? Ia manatua, na fetalai Ieova, ‘Ou te iā te oe.’ Pe e te popole e uiga i le lē lava o mea faaletino? Na fetalai Ieova: ‘Ou te lē tuua lava oe, ou te lē tuulafoaʻi lava iā te oe.’ (Eperu 13:15) Na faaiʻu le lauga a le uso o Lösch i le faamanatu atu i tagata aʻoga e faapea, na folafola mai e Iesu o le a faatasi ma ona soo faamaoni i le galuega o le faia o soo.—Mataio 28:20.

O le matua o le lauga a le faiaʻoga o Kiliata, o Lawrence Bowen e faapea: “Po o le a E Lagona le Saogalemu i le Afi?” Sa ia taʻua e faapea, ona o le finauga lea na lāgā i Etena, o i latou uma la e naunau e tuutoina atoatoa atu iā Ieova, e fesagaʻi ma mea faigatā, ma i nisi taimi, o tofotofoga e pei o le afi. Sa ia faalaeiauina le ʻaufaauu ina ia mulimuli i le faaaʻoaʻoga a Iesu, o lē na maua le saogalemu moni i le faalagolago atoatoa atu iā Ieova ma talia tofotofoga aasa na faatagaina e Ieova ina ia faaatoatoa ai le usiusitai o lona Alo. (Eperu 5:8, 9) E mafai ona faatusaina Ieova i se tagata tunu auro, o lē e na te tuuina atu le aasa talafeagai o le afi e aveesea ai mea lē mamā. O le mea moni, o le tofotofoina o le faatuatua i le afi, e maua ai le saogalemu e sili mamao atu na i lo o le auro ua faamamāina. Aiseā? Na faapea mai le uso o Bowen: “Auā o le faatuatua ua faamamāina e mafai ona lavatia so o se tofotofoga, ma e faaauupegaina ai i tatou ina ia tumau seʻia oo lava i ‘le gataaga.’”—Mataio 24:13.

Na fesili atu le isi faiaʻoga o Kiliata o Mark Noumair, e faapea: “Po o le a Faapelepeleina Outou?” Sa faaautū lana lauga i upu o le 1 Samuelu 2:26, lea e faamatalaina ai Samuelu e faapea “ua faapelepeleina e Ieova atoa foʻi ma tagata.” Ina ua uma ona talanoaina le faaaʻoaʻoga a Samuelu, na taʻua e le uso o Noumair, o lē na faaaluina le sili atu ma le 10 tausaga i le auaunaga faamisionare i Aferika: “E mafai foʻi ona matuā pele outou i le Atua pe a outou pipiimau ma le faamaoni i le galuega ua ia tofia atu iā te outou e faia. Ua ia tuuina atu iā te outou se tofiga faamisionare matuā tāua.” Ona faalaeiau atu lea e le uso o Noumair le vasega na faauuina ina ia manatu i o latou tofiga o se mea paia mai le Atua ua tuuina atu i la latou tausiga, ma ia manatu e pei ona manatu i ai le Atua i le tauaveina o o latou tofiga.

A o iai i le aʻoga, na maua ai e tagata aʻoga le tele o avanoa i faaiʻuga o vaiaso e talanoa ai ma tagata i lea vaipanoa e uiga i “vavega o le Atua” ia e faailoa mai i le Tusi Paia. (Galuega 2:11) O le mea moni, e sefulu gagana eseese sa mafai ona latou tautala ai e uiga i nei mea. O le isi faiaʻoga o Kiliata, o Wallace Liverance, i lana matua e faapea, “‘O Vavega o le Atua’ ua Uunaʻia ai Tagata e Faia ni Gaoioiga,” na ia faatalanoaina ai ni tagata aʻoga o ē na faamatalaina mai mea na tutupu i a latou auaunaga. Sa ia faapea mai: “O le agaga, na faagaeetia ai i latou sa i le potu i luga i le Aso Penetekoso e tautala e uiga ‘i vavega o le Atua.’ O le agaga foʻi lea o loo galue i aso nei i auauna faamaoni uma lava a le Atua.” Na oo foʻi ina uunaʻia ai nisi e aʻoaʻoina ni gagana fou ona o le manatu ina ia molimau atu i nisi tagata e toʻatele.

Fautuaga Aogā Ina ia Vaai i Mea e Pei Ona Silasila i ai le Atua

Ina ua uma lauga amata, na faatalanoa ai loa e Gary Breaux ma William Young, o ni sui o le ʻaufaigaluega o le lālā i le Iunaite Setete ia sui o komiti o lālā eseese i atunuu ia o loo auauna ai misionare i le taimi nei, faapea ma se ulugalii ua 41 tausaga talu ona auai i le auaunaga faamisionare. O se tasi mea na mātauina: “O i latou sa lē mananaʻo i ni meafaitino se tele, e nonofo umi i o latou tofiga. Sa tepa taulaʻi i le pogai na latou ō mai ai. Ua latou iloa na ō mai e talaʻi le tala lelei ma fesoasoani i tagata ina ia iloa Ieova.”

Na faaiʻuina e David Splane, o se tasi foʻi sui o le Vaega Pule le polokalame i se lauga e faapea le matua, “E Tou te Lē o Ō Mamao!” O le ā na uiga i ai lenā manatu, ae o le mea moni o le toʻa 46 o le ʻaufaauu sa aauina atu i atunuu i le lalolagi aoao? Na ia faamatala mai e faapea: “E tusa lava po o fea o le lalolagi e tou te ō i ai, o le a outou iai pea i le fale o le Atua tau lava ina ia tumau lo outou faamaoni.” Ioe, o Kerisiano faamaoni uma lava, e tusa lava po o fea e latou te nonofo ai, o loo auauna i se vaega o le malumalu faaleagaga po o le fale o le Atua, lea na faavaeina i le taimi o le papatisoga o Iesu i le uluaʻi senituri. (Eperu 9:9) Maʻeu le faamāfanafanaina ai o i latou na auai i le iloa o loo latalata mai Ieova i ana auauna faamaoni uma i le lalolagi! E pei lava ona naunau Ieova iā Iesu a o iai i le lalolagi, e faapena foʻi ona naunau o Ia iā i tatou uma ma la tatou auaunaga iā te Ia, e tusa lava po o fea o tatou iai. O lea, e tusa ai ma le tapuaʻiga, e tatou te lē o vavamamao o le tasi mai le isi, faapea Ieova ma Iesu.

Ina ua uma ona faailoa atu ia moomooga alofa mai le lalolagi aoao, le faasilasilaina atu o tofiga, ma le faitauina o tusi mai le vasega e faailoa atu ai lo latou talisapaia o le toleniga na maua i Kiliata, na faaiʻuina ai ma le manuia e le taʻitaʻifono le polokalame. Sa ia faalaeiauina misionare ina ia tumau pea i a latou galuega lelei ma ia olioli i le auaunaga iā Ieova.—Filipi 3:1.

[Pusa i le itulau 23]

FAAMAUMAUGA O LE VASEGA

Aofaʻi o atunuu o loo iai o latou sui: 14

Aofaʻi o atunuu ua tofia i ai: 19

Aofaʻi o tagata aʻoga: 46

Faatatauga o tausaga: 35.0

Faatatauga o tausaga i le upu moni: 17.2

Faatatauga o tausaga i le faiva faataimi atoa: 13.7

[Ata i le itulau 24]

Vasega Faauu Lona 113 o le Aʻoga Faale-Tusi Paia a le Olomatamata o Kiliata

I le lisi i lalo, o laina e amata mai luma i tua, ma o igoa e lisi mai i le itu tauagavale i le taumatau i laina taʻitasi.

(1) Ligthart, M.; Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris S; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.