‘Le Atua e, Aiseā na E Faataga ai Lenei Mea?’
O LOO manatua pea e Ricardo lo la nonofo ma lana avā o Maria, i le potu faatalitali i le ofisa o le fomaʻi.a Sa leai se isi o i laʻua na lototele e faitau i le iʻuga o le suʻesuʻega talu ai nei o Maria e le fomaʻi. O lea, na tatala ai e Ricardo le teutusi, ma na faasolo vave la laʻua vaai i faaupuga faafomaʻi o le lipoti. Na la mātauina ai le upu “kanesa,” ma na amata loa ona la fetagisi auā ua la iloa le uiga moni o lenā upu.
Na manatua e Ricardo e faapea: “E ese le agalelei o le fomaʻi, ae e mautinoa, sa ia iloa le matuiā o le tulaga o le maʻi, talu ai sa ia fai mai pea iā i maʻua ina ia ma faalagolago i le Atua.”
A o leʻi faia togafitiga e faaaogā ai ave o uila malolosi, na mātauina e le fomaʻi, ua tau lē mafai ona gaoioi le vae taumatau o Maria. Na faaalia i isi suʻesuʻega, ua sosolo le kanesa i lona faiʻai. Ina ua mavae le vaiaso e tasi, na taofia loa togafitiga o ave uila malolosi. Na oo ina lē iloa e Maria se mea ma maliu ai i le lua masina mulimuli ane. Na faapea mai Ricardo: “Sa ou fiafia ona ua muta ona mafatiaga, ae sa ou matuā misia lava o ia, o lea na ou lagona ai foʻi, maʻimau pe ana uma atu ai ma loʻu ola. E masani lava ona ou tagi atu i le Atua: ‘Aiseā na e faataga ai lenei mea e tupu?’”
E Tele Lava Fesili e Lāgā pe a Oo Mai Mala
E lē mafaitaulia tagata i le lalolagi aoao e pei o Ricardo e fesagaʻi ma tulaga moni o mafatiaga. O le tele o taimi, e teʻi lava ua aafia ai fua isi i mafatiaga. Seʻi mafaufau i faanoanoaga faamomoi loto na faapogaia ona o feteenaʻiga faifai pea i meatau ua malaia ai le fanau a tagata. Pe seʻi manatu foʻi i le tigā na lagona e le anoanoaʻi o fafine na tatoso faamalosia, le faaleagaina o tamaiti, o faiga sauā i aiga ma isi mea leaga ua faia e tagata. I le faagasologa o tala faasolopito, e foliga mai ua leai se tapulaa o faiga lē tonu, ma le faatigā o loo faia e tamāloloa ma fafine i le tasi i le isi. (Failauga 4:1-3) Ua atuatuvale foʻi tagata ua aafia i mala faalenatura po o maʻi tau i faalogona, le mafaufau ma le tino. E lētioa ona tuufesili le toʻatele o tagata: “Aiseā ua faataga ai e le Atua ia mafatiaga?”
E oo lava iā i latou e iai talitonuga faalotu, ua matuā faigatā ona faafesagaʻia ia mafatiaga. Atonu e te tau manatu foʻi oe i le pogai ua faataga ai e se Atua alofa e ona le malosi uma lava mafatiaga o tagata. O le mauaina o se tali moni faamalieloto i lenei fesili faigatā, e tāua ona e maua ai le filemu o le mafaufau faapea la tatou faiā ma le Atua. Ua saunia e le Tusi Paia se tali moni faapena. Faamolemole ia iloiloina le mea o fai mai ai le Tusi Paia i le mataupu lea e sosoo mai.
[Faamatalaga pito i lalo]
a Ua suia igoa.
[Ata i le itulau 3]
Sa taʻu mai pea e le fomaʻi iā i maʻua ina ia ma faalagolago i le Atua