Lipoti a Ē Faalauiloa le Malo

Ua Latou “Faalogo” i le Feʻau o le Malo i Pasili

INA ia faalauiloa le tala lelei o le Malo i tagata logonoa, ua taliaina ai e le toʻatele o Molimau a Ieova i Pasili le luʻi o le aʻoaʻoina o le Gagana Pasili e Faaaogā ai Taga. O a latou taumafaiga na aumaia ai ni iʻuga e sili ona lelei, e pei ona faaalia i mea na tutupu o loo mulimuli mai.

O Eva,a o se fafine logonoa i São Paulo, sa amata ona ia aʻoaʻoina le gagana e faaaogā ai taga ina ua latou sifi atu ma lana fanau e toʻatolu ma nonofo ma se tamāloa e logonoa foʻi. Sa feiloaʻi atu Eva ma lana uō tama i se vaega o Molimau e logonoa i nofoaga e fai ai faatauga, ma valaaulia ai i laʻua i se sauniga i le Maota o le Malo. Sa la taliaina le valaaulia ma le manatu o se faatasitasiga faasamasamanoa.

Ona o le lē tele o sona iloa i le gagana e faaaogā ai taga, o lea sa itiiti ai mea na talanoaina i le sauniga na malamalama i ai Eva. Mulimuli ane, sa valaaulia o ia e nisi o Molimau mo se taumafataga māmā i o latou aiga. Sa latou faaaogāina ata i le polosiua o le Olioli i le Ola i le Lalolagi e Faavavau!, e faamatala atu ai le folafolaga a le Atua i se lalolagi parataiso i le lumanaʻi. Sa fiafia Eva i mea na ia aʻoaʻoina ma amata ona auai e lē aunoa i sauniga.

E leʻi umi lava, ae tuua loa e Eva lana uō tama ina ia mafai ona ola e tusa ai ma tapulaa a le Tusi Paia. E ui lava i teteega malolosi mai lona aiga, ae sa ia faaauau pea ona agaʻigaʻi i luma faaleagaga ma papatisoina ai i le 1995. I le ono masina mulimuli ane, sa avea ai loa o ia o se paeonia po o sē e faalauiloa le Malo faataimi atoa. Talu mai lenā taimi na mafai ona ia fesoasoani atu i ni tagata logonoa se toʻafā ia oo atu i le tulaga o le tuuina atu ma le papatisoga.

Na soifua mai Kalo e logonoa. Mai lava i lona laʻitiiti sa aafia ai o ia i fualaau faasāina, amioga lē mamā ma le gaoi. Ona o le faamataʻuina e ni tagata o se kegi, sa ia sola atu ai loa i São Paulo ma nonofo faatasi ai ma Ioane mo sina taimi. I le pei o Kalo sa avea foʻi Ioane o se tagata logonoa ma sa ola i se olaga lē māmā.

I ni nai tausaga mulimuli ane, sa aʻoaʻoina ai e Kalo le feʻau o le Malo ma uunaia ai o ia e faamamā lona olaga ma lesitalaina faaletulafono lana faaipoipoga. Ina ua ausia faatulagaga manaʻomia faale-Tusi Paia, sa papatisoina loa Kalo, o se faailoga lea o lona tuuina atu iā Ieova. I lenā lava taimi, sa leʻi iloa ai e Kalo ua amata ona avea Ioane ma se tasi ua iloa le tala lelei ma ua faia foʻi ni suiga tetele i lona olaga. I le iloaina faapea e lē talia e Ieova le faaaogāina o faatusa faalelotu, o lea sa lafoaʻia ai e Ioane ana “faatusa.” Ina ua lafoaʻia lona olaga na iai muamua, na papatisoina ai loa Ioane.

Maʻeu le olioli o Kalo ma Ioane ina ua la feiloaʻi i le Maota o le Malo ma iloa ai suiga ua la faia! Ua avea uma nei i laʻua o ni ulu taʻumatuaina o aiga ma o loo auauna ma le maelega o ni ē e faalauiloa le Malo.

Ua iai nei i Pasili ni faapotopotoga e 30 o Gagana e Faaaogā ai Taga, ma ni vaega e 154 lea e sili atu i le 2,500 tagata talaʻi, ma pe tusa o le 1,500 o i latou e logonoa. I le Tauaofiaga Itumalo i Pasili i le 2001 o “Faiaʻoga o le Afioga a le Atua” mo tagata logonoa, e sili atu i le 3,000 i latou na auai, ma e 36 sa papatisoina ai. O le faamanuia a Ieova, tatou te faamoemoe o le a tele nisi tagata logonoa o le a taliaina le feʻau o le Malo.

[Faamatalaga pito i lalo]