666—E Lē na o se Mealilo Faigatā

“Ina ia lē mafaia ona faatau mai pe faatau atu e se tasi, tau lava o ē ua i ai le faailoga, po o le igoa o le manu feʻai, po o le faitau aofaʻi o lona igoa. O le mea lenei ua i ai le poto. O lē ua i ai le mafaufau inā faitau ia o ia i le faitau aofaʻi o le manu feʻai; auā o le faitau aofaʻi lea o le tagata; o lona faitau aofaʻi foʻi, E ono selau ma le onogafulu ma le ono.”—Faaaliga 13:17, 18.

E ITIITI ni nai mataupu faale-Tusi Paia ua faaosofia ai le naunau tele ma le manatu mamafa o tagata e faatatau i le valoaga e uiga i le faailoga uigaese, po o le igoa “o le manu feʻai,” le numera 666. I televise ma le initineti, faapea ata tifaga, tusi ma mekasini, ua avea ai le faailoga o le manufeʻai ma mataupu e tele ina talanoa i ai tagata.

Ua talitonu nisi, o le 666, o le faailoga lea o le anetikeriso lea e taʻua i le Tusi Paia. Ae ua faapea mai nisi, o le numera lea, ua faailoa ai se ituaiga o faailoga malosi, e pei o le tāina o se tatau, po o se isi mea e faailoa ai o lea tagata o se auauna a le manufeʻai. Ae ua manatu nisi, o le 666, o le faailoga lea o le pope a le Katoliko. I le suia o mataʻitusi o le tulaga aloaʻia o le pope, le Vicarius Filii Dei (le Sui o le Alo o le Atua) i fuainumera faa-Roma, ma toe fesuiaʻi itiiti ia fuainumera, ona latou maua ai lea o le fuainumera e 666. Ua faapea mai foʻi nisi, e mafai ona maua le fuainumera lava lea pe a fuafua atu i le igoa faa-Latina o le Emeperoa o Roma, o Diocletian, ma mai le faaliliuga faa-Eperu o le igoa o Kaisara Nero.a

Ae peitaʻi, o nei faamatalaga eseese, e matuā ese mamao lava mai le mea o fai mai ai le Tusi Paia e uiga i le faailoga o le manufeʻai, e pei o lea o le a tatou faitau i ai i le isi mataupu lea e sosoo mai. Ua faailoa mai e le Tusi Paia e faapea, o i latou e iai le faailoga o le manufeʻai, o le a tofo i le toʻasā mamafa o le Atua pe a ia aumaia le iʻuga i le faiga o mea o loo iai nei. (Faaaliga 14:9-11; 19:20) O lea la, o le malamalama i le uiga o le numera 666, e matuā sili mamao atu na i lo o le tau ina faamatalaina o se mealilo faigatā. O le mea e sili ona fiafia ai, ona e lē o natia e Ieova le Atua o le alofa lava ia, ma o le Puna o le malamalama faaleagaga mai ana auauna ia faamatalaga e uiga i lenei mataupu tāua.—2 Timoteo 3:16; 1 Ioane 1:5; 4:8.

[Faamatalaga pito i lalo]