Vavega a Iesu—Ni Mea Moni Po o ni Talafatu?
“ONA latou au mai ai lea iā te ia [Iesu] o tagata e toʻatele ua uluitinoina e temoni; ona ia tulia ai lea o agaga i le upu lava, ua faamālōlōina foʻi e ia o i latou uma na mamaʻi.” (Mataio 8:16) “Ona tulaʻi lea o ia [Iesu], ma na vavao atu i le matagi, ua fetalai atu foʻi i le vai, ‘Faalologo ia, inā malū ia.’ Ona mate lea o le matagi, i le ua matuā malū.” (Mareko 4:39) O le ā sou taofi e faatatau i nei tala? Pe e te talitonu o ni mea moni na tutupu, pe e te manatu o ni tala faafaatusa po o ni tala o le vavau?
Ua matuā masalosalo le toʻatele i aso nei i le moni o vavega a Iesu. O le poto faaonapōnei e pei o faata vaai mamao ma faata e iloa ai mea ninii, saʻiliʻiliga o le vateatea ma oloa ua suia faasaienisi o latou natura, ua lē talitonu ai tagata i tala o ni vavega na tutupu ma gaoioiga ofoofogia a le Atua.
Ua manatu nisi e faatatau i tala o vavega e lē moni po o ni tala faafaatusa foʻi. E tusa ai ma se tusi ua faapea mai o loo faamatalaina le Iesu “moni,” o tala e faatatau i vavega a Keriso e na o ni “mea e faatosina tagata” i le faa-Kerisiano.
O isi ua manatu i vavega a Iesu e taufaasesē. O nisi taimi na tuuaʻia Iesu i le ʻolegiaina o tagata. E tusa ai ma Justin Martyr o le senituri lona lua T.A., “na oo ina taʻua Iesu o se tagata faitogafiti faamaneta ma o sē taufaasesē” e le ʻaufaitio. Ua faapea mai nisi e faatatau iā Iesu, “e leʻi faatinoina ana vavega o se perofeta Iutaia, ae o sē faitogafiti faamaneta, o se tasi na aʻoaʻoina i malumalu faapaupau.”
Pe Moni e Lē Mafai Ona Tutupu?
Atonu e te manatu faapea o na masalosaloga uma, o loo iai se māfuaaga autū e musuā ai tagata e talitonu i vavega. E faigatā ona latou taliaina le manatu e faapea e mafai e se mana e sili atu i lo tagata ona faia na vavega. Na faapea mai se talavou o lē na masalosalo i le iai o le Atua: “E matuā lē mafai lava ona tutupu ni vavega.” Na ia sii mai upu a le faifilosofia Sikotilani o David Hume i le senituri lona 18 e faapea: “O se vavega e solia ai tulafono faalenatura o mea.”
Ae peitaʻi, e faaeteete nisi e taʻu atu e faapea, e lē mafai ona tupu se mea e lē tusa ma le faalenatura. Ua taʻua e The World Book Encyclopedia se vavega “o se mea e tupu e lē mafai ona faamatalaina e ala i tulafono faalenatura.” Ae peitaʻi, e tusa ai ma lea faamatalaga, ana iai i le 100 tausaga ua mavae ni mea e pei o femalagaaʻiga i le vateatea, fesootaʻiga faauaealesi ma le faataamilo o satelite i le vateatea, e mautinoa e manatu i ai tagata o ni “vavega.” E mautinoa e lē atamai le manatu e faapea, e leʻi iai ni vavega ona e lē mafai ona tatou faamatalaina e tusa ma le poto faaonapōnei.
Pe afai tatou te suʻesuʻeina nisi o faamaoniga faale-Tusi Paia e fesootaʻi atu i vavega na faia e Iesu Keriso, o le ā o le a tatou mauaina? Po o vavega a Iesu o ni mea moni po o ni talafatu?