Pe E te Manatua?
Pe na e fiafia e faitauina ia lomiga talu ai nei o Le Olomatamata? Aiseā e lē vaai ai pe mafai ona e taliina ia fesili nei?
• O le ā le Complutensian Polyglot, ma aiseā e aogā ai?
O se Tusi Paia lea sa faaliliuina, ma lomia i ni gagana eseese ma sa vaevaeina i ni vaega tutusa se lima, ma o se tusi e sili atu lea ona lelei na mauaina i lenā taimi i le gagana Eperu, Eleni, ma le Latina, faatasi ma ni vaega i le gagana Arama. O lenei Tusi Paia i gagana eseese o se laasaga sili lea ona auiluma na saunia ai se tusi e sili atu ona saʻo i uluaʻi gagana.—4/15, itulau 28-31.
• E faapefea ona faafiafia e tagata le Atua?
Talu ai o loo soifua moni lava Ieova, e iai iā te ia le tomai e mafaufau ai, faia lona finagalo, ma e iai foʻi ona faalogona. O ia o “le Atua fiafia” ma e fiafia e faataunuuina lana fuafuaga. (1 Timoteo 1:11, NW; Salamo 104:31) O le tele o lo tatou aʻoaʻoina o faalogona o le Atua, o le tele foʻi lea o lo tatou iloa o le mea e mafai ona tatou faia e faafiafia ai lona finagalo.—5/15, itulau 4-7.
• Aiseā na faataga ai e Tavita lana avā o Mekala e umia se tupua?
Ina ua taupulepule le tupu o Saulo e fasiotia Tavita, na fesoasoani Mekala e faasola o ia i le tuuina o se tupua i luga o le moega ua faafoliga e pei o se tane. Sa ia umia se tupua ona atonu sa lē atoatoa lona loto i le Atua. Atonu foʻi sa lē iloa e Tavita, pe atonu sa manatu Tavita ona o ia o le afafine o le tupu o Saulo. (1 Nofoaiga a Tupu 16:25, 26)—6/1, itulau 29.
• O le ā le vala autū o le poloaʻiga a le Atua e faatatau i le toto?
E ala i le mea na taʻu atu e le Atua ina ua mavae le Lolo, faapea le Tulafono na tuuina atu iā Mose, ma i le poloaʻiga lea e maua i le Galuega 15:28, 29, sa ia faasino atu i le taulaga na aafia ai le toto maligi o Iesu. E na o le toto lava lenā e mafai ona tatou maua ai le faamagaloina o agasala ma maua ai le filemu ma le Atua. (Kolose 1:20)—6/15, itulau 14-18.
• E fia vavega a Iesu ia o loo taʻua i le Tusi Paia?
O loo taʻua i le faamatalaga a Evagelia, le 35 o vavega a Iesu. Ae e lē o faailoa maia le aofaʻiga saʻo lava o vavega a Iesu, e aofia ai ma vavega e lē o lipotia mai. (Mataio 14:14)—7/15, itulau 5.