E Faapefea Ona E Iloa Aʻoaʻoga Moni?

I ITALIA, e tootuli ai se fafine i luma o le faatusa o Maria le tinā o Iesu, ma tatalo a o ia uuina i lona lima le losalio. I le faitau afe o maila i Initia, ua masani tagata Hinitū ona faatulaga ese se tamaʻi potu o se fale mo se sauniga faalotu, lea e ofoina atu ai mea manogi, fugālaau ma isi lava mea i faatusa o ni atua eseese. I Tibet, e vili ai e se tamāloa se uili tatalo, o se mea taavili o loo iai ni tatalo ua uma ona tusia. O lona talitonuga, o le tele o taimi e vili ai le uili, o le tele foʻi lenā o ana tatalo o loo fai.

Atonu ua e silafia ni aafiaga o lotu i tagata. Ua faapea mai le tusi, The Worldʻs Religions—Understanding the Living Faiths: “O loo faaauau pea ona aafia tagata o le lalolagi atoa i lotu.” Na taʻua e John Bowker i lana tusi, God—A Brief History e faapea: “Ua taaʻina e le Atua atunuu uma, e lē gata i le auala o loo fai ai a latou pulega, ae faapena foʻi i le faia o a latou tulafono. O loo taaʻina ai foʻi ma atunuu e lē talitonu i le Atua.”

Ioe, ua aafia olaga o le faitau miliona o tagata i lotu. Ua faaalia ai le iai o se faanaunauga ina ia tapuaʻi atu, ma le iai o se itu faaleagaga o tagata. I lana tusi The Undiscovered Self, ua taʻua ai e le fomaʻi lauiloa o mafaufau o Dr. Carl G. Jung, le iai o se manaʻoga i tagata e fia tapuaʻi atu i le pule mai lugā, ma ua ia faapea mai, “o lenā manaʻoga ua faaalia lea i uiga ma gaoioiga a tagata mai lava i le amataga.”

Ae peitaʻi, o le toʻatele o tagata e lē gata e lē talitonu i le Atua, ae e lē fiafia foʻi i lotu. O nisi ua manatu faapea talu ai e lē mafai e lotu ona faamalieina o latou manaʻoga faaleagaga. Ae i le isi itu, o le toʻatele lava o isi e aofia ai ma i latou o ē e lē talitonu i le Atua, ua alu lo latou taimi ma le malosi e saʻilia ai tupe, galuega, faamalieina o aiga, ma isi mea ua latou manatu i ai e tai pei o ni lotu.

A o faagasolo taimi, o taumafaiga a tagata ina ia faamalieina lo latou agaga fia tapuaʻi, ua māfua ai le tele ma le anoanoaʻi o lotu. O se faataʻitaʻiga, e ui lava o le tele o lotu e talitonu i le Atua, peitaʻi e taofi eseese uma e faatatau iā te ia. O nisi lotu ua latou faatāuaina le faaolataga. Peitaʻi, e matuā vala a latou aʻoaʻoga ma le uiga moni o le faaolataga, aemaise o le auala e maua ai. E faapefea la ona tatou iloaina aʻoaʻoga moni e faafiafia ai le Atua, pe a fua atu i le tele ma le anoanoaʻi o nei talitonuga eseese ua iai?