Meaalofa e Fiafia i ai le Atua — Lomiga Faale-Tusi Paia I LE INITANETI

Meaalofa e Fiafia i ai le Atua

E LĒ o se tala fiafia lenei tala. Na foua e le tupu tamaʻitaʻi o Atalia le nofoālii o Iuta e ala i se faufauga leaga ma le fasioti tagata. Na sesē lona manatu e faapea, ua fasiotia uma alo o le tupu, o lea na ia faia ai loa o ia ma tupu. O se tasi o alo tamaʻitaʻi e igoa iā Iosapa, na alofa o ia iā Ieova ma naunau i ana tulafono, na ia lototele ma nanā se alo o le tupu, le pepe o Ioasa. Sa nātia e Iosapa ma lana tane, o le ositaulaga sili o Ieoiata lenei suli mo le ono tausaga i lo latou nofoaga i le malumalu.—2 Tupu 11:1-3.

Ina ua fitu tausaga o Ioasa, na nofo sauni ai le Ositaulaga Sili o Ieoiata, e faataunuu lana fuafuaga ina ia aveesea le tupu tamaʻitaʻi lea na faoa le nofoālii i se auala leaga. Na ia aumaia le tama lea sa ia natia, ma faapaleina e fai ma tupu tonu o le malo. Na ave e leoleo le tupu tamaʻitaʻi amioleaga o Atalia i fafo o le lotoa o le malumalu ma fasiotia ai. O lea, na aumaia ai se mapusaga ma le olioli tele i tagata. E ala i a la gaoioiga, na matuā fesoasoani ai Ieoiata ma Iosapa i le toe faafoʻisiaina o le tapuaʻiga mamā i le laueleele o Iuta. Ae o le sili o na mea, na la fesoasoani atu i le toe faaauauina o le gafa tautupu o Tavita, lea e oo atu i le Mesia.—2 Tupu 11:4-21.

Na faatino e le tupu fou se galuega tāua e faafiafia ai le finagalo o le Atua. Sa matuā manaʻomia lava ona toe faafou le malumalu o Ieova. O le fia maualuga o Atalia ma manaʻo e na o ia e avea ma tupu i Iuta, na iʻu e lē gata i le lē vaavaaia lelei o le malumalu, ae sa gaoia foʻi mea na iai. Na naunau Ioasa e toe faaleleia mea ua leaga o le malumalu. E aunoa ma se faatuai, na ia faatonuina le aumaia o tupe mo le galuega o le malumalu o Ieova. Na ia faapea atu: “O tupe uma o mea e faapaiaina e aumaia i le fale o Ieova, o tupe a tagata taʻitoʻatasi ua faitaulia, o tupe o togiola e faapei ona faatatauina le tagata, ma tupe uma e manatu i ai le loto o le tagata e au mai i le fale o Ieova, O ositaulaga ia taʻitasi ma talia ia tupe i tagata ua latou masani, ma ia latou toe faasoo i mea ua lepetia o le fale, i mea uma e iloa ai se mea ua lepetia.”—2 Tupu 12:4, 5.

Na foaʻi ma le lotomalie tagata. Peitaʻi, e leʻi faataunuuina ma le lotoatoa e faitaulaga lo latou tiute ina ia faafou le malumalu. O lea, na filifili ai le tupu e na te tauaaoina le mataupu ma faatonuina foaʻi uma ina ia tuu saʻo i se pusa faapitoa. Na ia tofia Ieoiata na te vaavaaia, ma ua taʻua i le tala: “Ona ave ai lea e Ieoiata le ositaulaga o le atolaau, ua fai foʻi le gutu i lona ufi, ona tuu ai lea i tafatafa o le fata faitaulaga i le itu taumatau o le tagata e ulu mai i le fale o Ieova; ona fafao lea i ai e faitaulaga na leoleo i le faitotoʻa o tupe uma na aumaia i le fale o Ieova. Ua latou iloa e tele tupe i le atolaau, ona ō ae ai lea o le tusiupu a le tupu ma le ositaulaga sili, ua fafao i taga, ma faitau i tupe na maua i le fale o Ieova. Ona la avatu ai lea o tupe na faitauina iā te i latou ua fai le galuega ē na leoleo i le fale o Ieova; ua latou tuu atu ai i tufuga, ma tufuga ati fale, ē na galulue i le fale o Ieova, o ē ati pa foʻi, ma ē talai maa; e faatau aʻi foʻi laau ma maa talai e faasoo aʻi mea ua lepetia o le fale o Ieova, atoa ma mea uma na avatu mo le fale e faasoo aʻi.”—2 Tupu 12:9-12.

Sa tali atu ma le lotoatoa tagata. Na toe fausia le malumalu o le tapuaʻiga iā Ieova, ina ia toe faaauau lana tapuaʻiga i se tulaga mamalu. Na faaaogā lelei meaalofa tautupe. Na faamautinoa e le tupu o Ioasa lenā tulaga!

I aso nei, ua tagatagaʻi lelei le faalapotopotoga vaaia a Ieova, po ua faaaogā lelei foaʻi tautupe mo le faaauiluma o le tapuaʻiga a Ieova. Ua tali atu i ai ma le lotoatoa Kerisiano e pei o tagata Isaraelu anamua. Atonu o oe o se tasi o i latou na foaʻi mo le agaʻi i luma o le auaunaga o le Malo i le tausaga faaleauaunaga ua tuanaʻi atu. Seʻi o tatou mātauina nisi o auala o loo faaaogā ai lo outou aao foaʻi.

MEA NA LOMIA

O lomiga o mulimuli mai na lomia mo suʻesuʻega ma faasalalauina atu i le lalolagi atoa:

• Tusi: 47,490,247

• Tamaʻitusi: 6,834,740

• Polosiua: 167,854,462

• Kalena: 5,405,955

• Mekasini: 1,179,266,348

• Sāvali: 440,995,740

• Vitiō: 3,168,611

O loo lomiaina lomiga i Aferika, Amerika i Mātū, Amerika Tutotonu, Amerika i Saute, Asia, Europa ma isi motu o le Pasefika—i atunuu e 19.

“O loʻu igoa o Katelyn May. E valu oʻu tausaga. E iai laʻu $28 (US), ma oʻu te manaʻo e auina atu e fesoasoani i le totogiina o masini lomitusi. O lo outou tuafafine laʻitiiti, o Katelyn.”

“Sa faia se talanoaga a lo matou aiga e uiga i masini lomitusi fou. Na filifili la ma fanau e 11 ma le 9 tausaga e aumai se tupe mai i la laʻua teugātupe e fai ai la laʻua foaʻi. E ma te fiafia e auina faatasi la maʻua foaʻi ma le foaʻi a la ma fanau.”

FAUGĀFALE

O nisi nei o faugāfale sa faia e lagolagosua ai i le galuega a Molimau a Ieova:

• O Maota o le Malo i atunuu e lē tagolima: 2,180

• Maota Fono: 15

• Lālā: 10

• ʻAufaigaluega tauofo i le auaunaga faataimi atoa: 2,342

“O le faaiʻuga o le vaiaso lenei e faia ai la matou uluaʻi sauniga i lo matou Maota o le Malo fou. Ua matou fiafia ona ua maua se maota talafeagai e vivii atu ai i lo tatou Tamā, o Ieova le Atua. E matou te faafetai iā Ieova ma outou, ona o le uaʻi mai i o matou manaʻoga e ala i le fausia o nisi Maota o le Malo. O le mea moni, o lo matou Maota o le Malo o se mea matuā matagofie i lenei vaipanoa.”—Chile.

“E matuā talisapaia e uso ma tuafāfine le fesoasoani na auina mai e le faalapotopotoga a Ieova. E oo mai i le asō, o loo matou talanoa pea e uiga i taimi mananaia a o matou faatasi ma le ʻaufaufale.”—Moldova.

“Talu ai nei lava, na ma faamanatuina ai ma laʻu avā le 35 tausaga talu ona ma faaipoipo. Na ma filifili po o le ā se mea e avatu e le isi i le tasi, ma na ma manatu ai e toe faafoʻi atu se mea iā Ieova ma lana faalapotopotoga, auā ana lē seanoa la latou fesoasoani, semanū e lē taulau la ma faaipoipoga. Ma te fiafia e auina atu lenei tupe e fesoasoani i le fausia o se Maota o le Malo i se tasi o atunuu e lē tagolima.”

“Na ou maua talu ai nei lava se meaalofa tupe, ma talu ai e faaleai ni mea ou te “manaʻo” i ai, ma e lē tele foʻi ni mea o oʻu “manaʻomia,” ou te manaʻo ai e auina atu le tupe lenei e fesoasoani mo le fausiaina o Maota o le Malo, ia o loo matuā manaʻomia i le tele o atunuu.”

FESOASOANI I TAIMI O MALA

I nei aso e gata ai, ua masani ona oo mai mala e aunoa ma ni lapataʻiga. Ua faia e le toʻatele o Molimau a Ieova ni meaalofa faaopoopo ina ia mafai ona fesoasoani i o latou uso i vaipanoa o loo mafatia. O se faamanatuga, o fesoasoani laveaʻi mo mala faalenatura, e ao ona auina atu o se vaega o le galuega i le lalolagi aoao. O nisi nei o atunuu na fesoasoani i ai Molimau a Ieova i tagata na afāina i mala:

• Aferika

• Asia

• Vaega o le Karipiane

• Motu o le Pasefika

“Ma te faafetai tele atu lava ma laʻu tane mo le auina mai o fesoasoani mo mea na faaleagaina i le afā. Ua mafai ona fai se taualuga fou o lo matou fale. Ma te matuā talisapaia lava le lo outou vave fesoasoani mai.”

“O loʻu igoa o Connor ma e 11 oʻu tausaga. Na ou manaʻo e fesoasoani ina ua tupu le tsunami. Ou te faamoemoe o le a fesoasoani lenei meaalofa i oʻu uso ma tuafāfine.”

AUAUNA FAAPITOA FAATAIMI ATOA

Ua auauna faataimi atoa nisi Kerisiano i le galuega faaevagelia po o i Peteli. Ua lagolagoina nisi o ē o loo auauna faataimi atoa e ala i foaʻi tauofo, ma o nisi nei o i latou:

• Misionare: 2,635

• Ovasia Femalagaaʻi: 5,325

• Tagata Peteli: 20,092

“Ona e lē mafai ona ou auauna i Peteli i le taimi nei [se tama e lima tausaga], ou te fia auina atu lenei meaalofa ma oʻu alofaaga. Pe a ou matua, ou te fia galue mamafa i Peteli.”

Faaauilumaina o Aʻoaʻoga a le Tusi Paia

Na faatonuina e Iesu ona soo e “ō atu e fai nuu uma lava ma soo.” (Mataio 28:19) Ua maelega Molimau a Ieova e talaʻi ma aʻoaʻo atu le feʻau o le Tusi Paia i atunuu e 235 ona o le usiusitai i ana fetalaiga. Ua latou lomia ma faasalalau atu lomiga faale-Tusi Paia i gagana e 413.

O le mea moni, o le foaʻi sili ona tāua e mafai ona faia e se Kerisiano, o le fesoasoani lea i le toʻatele o tagata e iloa le Atua ma Lona finagalo. Ua masani ona faaaogā e Molimau a Ieova o latou taimi ma lo latou malosi e fesoasoani ai i isi. Ua latou faia foʻi ma le agalelei foaʻi tautupe. Ua mafai e a latou foaʻi i auala eseese ona fesoasoani i le iloaina ai o le suafa o Ieova ma lona finagalo i le lalolagi atoa. Tau ina ia faaauau ona faamanuia Ieova i nei taumafaiga e fesoasoani i isi ina ia aʻoaʻo atili e uiga iā te ia. (Faataoto 19:17) O lenā lotomalie e fesoasoani, ua faafiafia ai le finagalo o Ieova!—Eperu 13:15, 16.

[Pusa i le itulau 28-30]

Auala ua Filifilia e Nisi e Faia ai Foaʻi

MEAALOFA MO LE GALUEGA I LE LALOLAGI AOAO

E toʻatele tagata ua faaagaga se vaega tupe e lafo i pusa o loo faailogaina o “Meaalofa mo le Galuega i le Lalolagi Aoao.—Mataio 24:14.”

I masina taʻitasi, e avatu ai e faapotopotoga nei tupe i le ofisa o le lālā o Molimau a Ieova o loo vaavaaia o latou atunuu. E mafai foʻi ona auina saʻo atu foaʻi tauofo o tupe i le Watch Tower Bible and Tract Society of Pennsylvania, Attention Treasurer’s Office, 25 Columbia Heights, Brooklyn, New York 11201-2483, po o le ofisa o le lālā o Molimau a Ieova o loo vaavaaia lou atunuu. E ao ona tusia le igoa “Watch Tower” i se siaki pe a fia faia se foaʻi i lenā auala. E mafai foʻi ona foaʻi atu jewelry po o isi mea tāua. O na foaʻi e tatau ona auina atu faatasi ma se tusi puupuu e faamanino atu ai o lenā foaʻi e leai ni tuutuuga.

FUAFUAGA O FOAʻI E IAI TUUTUUGA

E mafai ona foaʻi atu se tupe e teuina i lalo o se āiāiga faapitoa ma le Watch Tower mo le faaaogāina i le lalolagi aoao. Ae e mafai ona toe faafoʻi atu lenā foaʻi i lē e ana le tupe pe a ia manaʻomia. Mo nisi faamatalaga, faamolemole faafesootaʻi le Treasurer’s Office i le tuatusi o loo taʻua i luga.

FUAFUAGA O FOAʻI FAAMEAALOFA

E lē gata i foaʻi tuusaʻo tautupe, ae e iai isi auala e faia ai foaʻi ina ia fesoasoani mo le galuega talaʻi i le lalolagi aoao. E aofia ai mea nei:

Inisiua: E mafai ona avea le Watch Tower ma faalapotopotoga e uili atu i ai le taui po o le polisia o le inisiua o le ola o se tasi, po o taui e maua pe a litaea po o le penisione.

Teugātupe i le Faletupe: O teugātupe i le faletupe, pepa o teugātupe, po o teugātupe e maua e le tagata pe a litaea, e mafai ona tuu faamavaega mo le Watch Tower, e tusa ai ma faatulagaga manaʻomia a le faletupe o le atunuu.

Tupe Faafaigaluega (Stock) ma Pepa Faamaonia mo Tupe (Bond): O nei mea e mafai ona foaʻi faameaalofa tuusaʻo atu i le Watch Tower.

Fanua ma Fale: E mafai ona foaʻi atu au mea totino e pei o fanua po o fale, e ala i le foaʻi saʻo atu, po o le tuu foʻi o le fale po o le fanua e nofo ai pea lē e ana, seʻia oo ina maliu. Ia faafesootaʻi le ofisa o le lālā i lou atunuu a o leʻi faapepaina faaletulafono so o se fanua o le a foaʻi atu.

Tupe Faameaalofa e Iai Tuutuuga (Gift Annuity): O tupe faameaalofa e iai tuutuuga ua fuafuaina e se tasi e avatu tupe po o stocks po o bonds i se faapotopotoga faaletulafono o loo faaaogāina e le Watchtower. Ae e maua e lē e ana le foaʻi faameaalofa, po o se tasi ua ia tofia, se aofaʻiga patino o se tupe e avatu i ai i tausaga taʻitasi a o soifua pea o ia. O le a faaitiitia le lāfoga e totogi e le tagata na faia le foaʻi, i le tausaga tonu na faamautū ai lea fuafuaga.

Uili ma Mavaega: E mafai ona faaui atu meatotino po o se vaega tupe i le Watch Tower e ala i se uili ua faia e tusa ai ma le tulafono, pe avea foʻi le Watch Tower ma lē e mauaina le taui o se feagaiga o se teugātupe ua tuu faamavaega. O se teugātupe ua ▸ tuu faamavaega e faia mo le manuia o se faalapotopotoga faalelotu, e ono maua mai ai nisi fesoasoani tau lāfoga.

E pei ona faailoa mai i le faaupuga “foaʻi faameaalofa” o nei ituaiga o foaʻi, e manaʻomia ai ona fuafua lelei e lē e ana le foaʻi. Ina ia fesoasoani i ē o loo naunau e fesoasoani i le galuega a Molimau a Ieova i le lalolagi aoao e ala i nisi o foaʻi faameaalofa, ua saunia ai se polosiua i le faa-Peretania ma le faa-Sepania o le Charitable Planning to Benefit Kingdom Service Worldwide. Na tusia le polosiua ina ia tali atu ai i le tele o fesili ua oo mai e tusa ai ma meaalofa, uili, ma mavaega. Ina ua uma ona faitauina le polosiua ma talanoa faatasi ma a latou loia po o tagata faufautua tau i lāfoga, ua mafai ai e le toʻatele ona lagolagoina gaoioiga fesoasoani faalelotu a Molimau a Ieova i le lalolagi aoao, ma maua aogā foʻi tau lāfoga. E mafai ona maua lenei polosiua mai le Charitable Planning Office pe a talosaga mo se kopi.

Mo nisi faamatalaga atili, e mafai ona e faafesootaʻi atu le Charitable Planning Office, e ala i lou tusi atu pe telefoni atu foʻi i le tuatusi o loo taʻua i lalo, po o le faafesootaʻi o le ofisa o le lālā o Molimau a Ieova i lou atunuu.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telefoni: (845) 306-0707

[Faamatalaga i Ata i le itulau 27]

Faithful video: Stalin: U.S. Army photo