Fesili Mai le ʻAufaitau
Pe sa faaaogā ea e Iosefa, o se auauna faamaoni a Ieova se ipu e iite ai e pei ona faaalia i le Kenese 44:5?
E leai se māfuaaga e talitonu ai sa faaaogā e Iosefa so o se faiga faataulāitu.
Ua faaalia i le Tusi Paia le malamalamaga moni o Iosefa i le faaaogāina o mana faataulāitu e fia iloa ai le lumanaʻi. Muamua atu, ina ua faatonuina o ia e faamatala le faalepō a Farao, na ia maumauaʻi e na o le Atua e mafai ona “faaalia” mea i le lumanaʻi. O le iʻuga, na oo ina iloa e Farao o le Atua sa tapuaʻi i ai Iosefa, o le Atua moni, e lē o se mana faataulāitu, na fesoasoani iā Iosefa ina ia iloa faamatalaga e uiga i le lumanaʻi. (Kenese 41:16, 25, 28, 32, 39) I le Tulafono na tuuina mulimuli ane iā Mose, na faasā ai e Ieova faiga faataulāitu, ma ua faamautinoa e na o Ia e na te valoia le lumanaʻi.—Teuteronome 18:10-12.
Aiseā na faaalia ai e Iosefa e ala i lana auauna lona faaaogāina o le ipu e ‘iite ai’?a (Kenese 44:5) E ao ona tatou iloiloina tulaga o mea na ala ai ona faia lenei faaupuga.
Sa malaga atu uso o Iosefa i Aikupito ina ia maua mai ni meaʻai ona ua tetele le oge. I tausaga muamua atu, na faatau atu ai e uso lava ia o Iosefa o ia e fai ma pologa. E aunoa ma so latou iloa, sa latou fesiligia le fesoasoani mai i lo latou lava uso, o lē ua avea ma pule i le faasoasoaina o meaʻai i Aikupito. E leʻi faailoaina e Iosefa o ia iā i latou. Na i lo lea, na ia tofotofo i latou. Na manaʻo Iosefa e iloa pe moni lo latou salamō. Na ia fia iloa foʻi pe faamata ma po o le ā le tele o lo latou alolofa i lo latou uso o Peniamina ma lo latou tamā o Iakopo, o lē ua matuā alofa lava iā Peniamina. O lea la, sa faaaogā ai loa e Iosefa se togafiti.—Kenese 41:55–44:3.
Na faatonu e Iosefa se tasi o ana auauna ina ia faatutumu taga a ona uso i meaʻai, toe tuu a latou tupe i a latou taga ma tuu le ipu a Iosefa i le taga a Peniamina. I lenei tulaga, na amio ai Iosefa e pei o se pule o se atunuu faapaupau. Na ia faaaʻoaʻo i se pule faapena, i ana gaoioiga ma lana gagana ina ia talitonu ai ona uso o ia moni o se pule o se atunuu faapaupau.
Ina ua ia fesagaʻi ma ona uso, na ia amio pea e pei o se pule ma fesili atu iā i latou: “Po ua outou lē iloa ea e mafai lava e le tagata faapei o aʻu nei ona iite?” (Kenese 44:15) E foliga sa avea le ipu ma vaega o le togafiti. E lē moni le faaaogāina e Iosefa o le ipu e iite ai, e pei lava ona e leʻi gaoia e Peniamina le ipu.
[Faamatalaga pito i lalo]
a I le faamatalaina o lenei faiga i aso anamua, ua taʻua e F. C. Cook, i le Holy Bible, With an Explanatory and Critical Commentary: “E masani ona faaaogā ipu e iite ai e ala i le faapaʻū i le vai o se fasi auro, siliva po o se maa tāua ona iloilo lea o lo latou foliga mai, po o le autilo foʻi i le vai e pei ona autilo i se faata.” Ua faapea mai se tagata atamai o Christopher Wordsworth: “I nisi taimi e faatumu ai le ipu i ni vai, ma e maua le tali i le ata lafoʻia o le lā o loo i le vai i totonu o le ipu.”