O le Malamalama i le Tusi Paia—O le ā e Fesoasoani iā te Oe?
“UA E nanā ia mea i ē popoto ma ē atamamai, a ua faaalia atu ia mea i tama valevale.” (Luka 10:21) E faamautinoa mai i nei upu a Iesu i lona Tamā i le lagi le manatu, afai tatou te fia malamalama i le Tusi Paia, e tatau ona saʻo le māfuaaga tatou te faia ai. Ua faailoa e Ieova le poto e uiga iā te ia e ala mai i se tusi, e na o tagata lotomaulalo ma aʻoaʻogofie e mafai moni ona malamalama i ai.
E lē o tatou uma e faigofie ona faaalia le lotomaulalo. Na tatou fananau uma mai ma se faanaunauga e fia faamaualuga. E lē gata i lea, i nei “aso e gata ai,” o loo tatou ola faatasi ma tagata o “ē alolofa i latou iā i latou, . . . o ē soona fai, o ē ua faafefeteina.” (2 Timoteo 3:1-4) O uiga nei e taofia ai lo tatou malamalama i le Afioga a le Atua. Ma e faanoanoa talu ai e iai lava ni vala ua aafia ai i tatou i uiga faamaualuluga o tagata o loo tatou ola faatasi. Ae faapefea la ona tatou maua uiga e manaʻomia ina ia malamalama ai i le Tusi Paia?
Saunia o le Loto ma le Mafaufau
O Esera, o se taʻitaʻi o le nuu o le Atua i aso anamua, ‘na saunia e ia lona loto e saʻili i le tulafono a Ieova.’ (Esera 7:10) Pe iai ni auala e mafai ona tatou saunia ai o tatou loto? E iai. E amata i le iai o se vaaiga saʻo i le Tusi Paia. Na tusi atu le aposetolo o Paulo i ona uso Kerisiano: “Na talia e outou le afioga a le Atua na outou faalogo mai ai iā i matou, ua lē talia e outou o le upu a tagata, a e peitaʻi o le upu a le Atua, (e moni lava lea).” (1 Tesalonia 2:13) E ui sa faaaogā tagata e tusia le Tusi Paia, ae o manatu uma e mai iā Ieova. O le amanaʻiaina o lenā mea moni tāua, o le a atili ai ona tatou naunau e talia mea ua tatou faitauina.—2 Timoteo 3:16.
O le isi auala e saunia ai o tatou loto, o le tatalo. Talu ai o le agaga paia na faagaee ai le tusiaina o le Tusi Paia, o le agaga paia foʻi lenā e mafai ai ona tatou malamalama i le feʻau o loo ia momoli maia. Ma e tatau ona tatou tatalo mo lenā fesoasoani. O le manatu lenā sa faatāua e le faisalamo ina ua tusi mai: “Ia e aʻoaʻo mai iā te aʻu, ona ou anaana lea i lau tulafono, ma ou tausia ma loʻu loto atoa.” (Salamo 119:34) E manaʻomia ona tatou tatalo, e lē gata ia maua le poto e malamalama ai i mea o tusia, ae ia iā i tatou le ituaiga loto lea o le a faigofie ai ona tatou talia na mea. Ina ia tatou malamalama i le Tusi Paia, e manaʻomia lava ona tatou taliagofie mea ua tonu.
A o e manatunatu loloto ina ia tonu lou mafaufau, seʻi e mafaufau i vala e aogā ai lou suʻesuʻeina o le Tusi Paia. E tele māfuaaga lelei e tatau ai ona tatou faitauina le Afioga a le Atua, ae o le māfuaaga sili lava, ina ia maua ai sa tatou faiā māfana ma le Atua. (Iakopo 4:8) A o tatou faitau i le silafaga a Ieova i tulaga eseese, le auala na te faatāuaina ai ē alolofa iā te ia, ma le auala e feutagaʻi ai ma i latou ua tuua o ia, ona tatou iloa lelei ai lea o le ituaiga o Atua e iai Ieova. E tatau ona avea ma pogai sili o lo tatou faitauina o le Tusi Paia, ina ia tatou masani lelei ma le Atua, ma atili faamausalīina ai la tatou faiā ma ia.
Toʻatugā mo le Mauaina o se Vaaiga Saʻo
O le ā se mea e ono faafaigatā ai ona tatou malamalama i le Afioga a le Atua? O se tasi o toʻatugā, o le mulimuli fua i manatu ma talitonuga o isi. O se faaaʻoaʻoga, atonu e te mulimuli i talitonuga ma manatu o nisi o loo iai i ni tulaga maualuluga. Ae faapefea pe afai o nei tagata e lē o sapasapaia moni ma lē faatāuaina upu moni o le Afioga a le Atua? O tulaga faapena e ono faigatā ai ona tatou malamalama lelei i aʻoaʻoga o loo aumai e le Tusi Paia. O le pogai lea ua faalaeiauina ai i tatou e le Tusi Paia ina ia matuā iloilo totoʻa mea ua tatou aʻoaʻoina.—1 Tesalonia 5:21.
O le luʻi lenā sa fesagaʻi ma Maria, le tinā o Iesu. Sa tausia aʻe o ia e tusa o tū ma aganuu a Iutaia. Sa ia tausisi ma le faamaoni i le Tulafono a Mose ma e mautinoa sa alu atu o ia i le sunako. Mulimuli ane, na ia iloa ai ua lē o toe taliaina e le Atua le auala tau tapuaʻiga na aʻoaʻoina ai o ia e ona mātua. O le iʻuga, na talia e Maria aʻoaʻoga a Iesu, ma sa avea foʻi Maria o se tasi o uluaʻi sui o le faapotopotoga Kerisiano. (Galuega 1:13, 14) E lē faapea o sona lē faaaloalo i ona mātua ma a latou tū masani; ae peitaʻi o inā na ia faaalia ai lona alofa i le Atua. O lea la, ina ia tatou maua aogā mai le Tusi Paia, e tatau ona tatou faapei o Maria, i le faamaoni tasi atu i le Atua na i lo se isi lava tagata.
E faanoanoa lava ona e toʻatele tagata ua seāseā o latou faatāuaina upu moni o le Tusi Paia. O nisi ua faamalieina i le tau lava ina tausisia o tū faalotu o loo faavae aʻe i mea sesē. O nisi e faaalia le lē faaaloalo i le upu moni e ala i le auala e latou te tautatala ai ma le ituaiga o olaga o loo ola ai. O le mea moni, o le taliaina o upu moni o le Tusi Paia e manaʻomia ai ni faataulaga: Atonu o le a iai ni mea tou te lē ioe faatasi i ai ma au uō, tuaoi, o ē tou te faigaluega faatasi, e oo lava foʻi i lou aiga. (Ioane 17:14) E ui i lea, na tusi le poto o Solomona: “Ia e faatau mai le mea moni, aua lava le faatau atu.” (Faataoto 23:23) Afai e te matuā faasilisilia le upu moni, o le a fesoasoani Ieova iā te oe ina ia e malamalama i le Tusi Paia.
O le isi foʻi luʻitau e faigatā ai ona malamalama i le feʻau a le Tusi Paia, o le uiga lea o le lē fia faatatauina o le feʻau o loo aumai. Na fetalai atu Iesu i ona soo: “Ua foaʻiina atu iā te outou ia outou iloa mea lilo o le malo o le lagi, a ua lē foaʻiina atu iā te i latou. Auā ua mafiafia loto o lenei nuu, ma ua faalogo gatā o latou taliga i faalogo.” (Mataio 13:11, 15) O le toʻatele o i latou na talaʻi atu i ai Iesu, sa leʻi fia faalogo ma e leʻi mananaʻo foʻi e faia ni suiga. E matuā vala lava i latou ma le tagata faatauʻoa lea na taʻua e Iesu i sana tala faatusa. Ina ua maua e le faatauʻoa le penina tautele, sa faavave loa ona faatau ese atu isi ana mea uma, ina ia mafai ai ona ia faatau mai le penina. E tatau foʻi ona faapena le tāua iā i tatou o lo tatou malamalama i le upu moni o le Tusi Paia.—Mataio 13:45, 46.
Le Luʻitau o le Lotomalie e Aʻoaʻoina
O le luʻitau tele lava i le malamalama i le Tusi Paia, o le iai lea o se uiga e lotomalie e aʻoaʻoina. Atonu e faigatā i se tasi ona ia talia ni manatu fou mai se isi e foliga e faatauvaa lona tulaga faaleolaga nei. Peitaʻi, o aposetolo o Iesu Keriso o ni ‘tagata e leʻi aʻoaʻoina ma le valelea.’ (Galuega 4:13) Na faamatala e le aposetolo o Paulo le pogai ina ua tusi mai: “Ia outou manatunatu i lo outou valaauina, le ʻau uso e; e lē toʻatele o ē popoto e tusa ma le manatu o lenei lalolagi, e lē toʻatele faipule, e lē toʻatele alii; a e peitaʻi ua filifilia e le Atua mea vālea a le lalolagi, ina ia faamāina ē popoto.” (1 Korinito 1:26, 27) Afai e te manatu o sou toʻilalopopo le aʻoaʻoina o oe e se tagata e faatauvaa sona tulaga, ia e manatua, o lenā tagata ua na o se auala ua faaaogā e le Atua e aʻoaʻo ai oe. O le ā ea se isi faaeaga e sili atu ona tāua na i lo le aʻoaʻoina o i tatou e Ieova, lo tatou “Aʻoaʻo Silisili”?—Isaia 30:20, NW; 54:13.
Na matuā avea o se luʻitau i le taʻitaʻiʻau Suria o Naamanu lona talia o le faatonuga na sau mai se tagata lē taualoa. Sa agaʻi atu o ia iā Elisaia le perofeta a Ieova, ina ia saʻili se fofō mo lona lepela. Peitaʻi o faatonuga a le Atua mo se fofō, na faaoo ane e se auauna iā Naamanu. Na matuā tofotofoina le lotomaulalo o Naamanu, e lē gata i le feʻau na avane, ae o le auala foʻi na faaoo ane ai. O le iʻuga, na musu Naamanu e usitai i le upu a le perofeta a le Atua, ae na mulimuli ane toe suia lona uiga ma faamālōlōina ai. (2 Tupu 5:9-14) O le luʻi foʻi lenā mo i tatou a o tatou aʻoaʻoina upu moni o le Tusi Paia. Tatou te ono aʻoaʻoina e faapea, ina ia faamālōlōina i tatou faaleagaga ma tau i amioga, e iai se olaga fou e tatau ona tatou ola ai. Po o le a tatou lotomaulalo ea ma faataga se tasi na te aʻoaʻo maia i tatou i le mea e tatau ona fai? E na o i latou e iai le uiga aʻoaʻogofie, e mafai ona malamalama lelei i le Tusi Paia.
E lelei le uiga na faaalia e se tamāloa sa avea ma auauna sili a Kanake, le tupu tamaʻitaʻi o Aitiope. A o tiʻetiʻe atu lenei tamāloa i Aferika i lona nofoa faataavalevale (kariota), sa momoʻe ane le soo o Filipo ma faalatalata atu iā te ia. Na fesili atu Filipo i le tamāloa po o malamalama i mea o loo ia faitauina. Sa lotomaulalo le auauna sili lenei i lana tali atu: “Ou te mafaia faapefea, pe a lē faasino mai se tasi iā te aʻu?” Ina ua malamalama lelei lenā tamāloa i le Afioga a le Atua, ona papatisoina loa lea. Ina ua mavae lenā, sa toe “alu foʻi ia i lana malaga ma le olioli.”—Galuega 8:27-39.
E pei lava Molimau a Ieova o isi uma tagata. O vaiaso taʻitasi e latou te faia ai a latou suʻesuʻega faale-Tusi Paia i aiga o tagata e silia ma le ono miliona. Ua aʻoaʻo mai e le Tusi Paia le olaga e sili ona lelei e ola ai, o loo faamatala maia le faamoemoe moni e tasi mo tagata, ma faasino mai le auala tatou te masani lelei ai ma le Atua. O lea la, ua iloa e le faitau miliona o tagata e faapea, o le suʻesuʻeina o le Tusi Paia ma malamalama i le feʻau o loo momoli mai ai, o se matuā faamanuiaga e lē mafaatusalia, ma o se faamanuiaga e mafai foʻi ona e maua.
[Ata i le itulau 7]
Sa faigatā ona talia e Naamanu faatonuga mai se auauna faatauvaa
[Ata i le itulau 7]
O le malamalama i le Tusi Paia e faamalieina ai o tatou loto