Pe E te Manatua?

Pe na e fiafia i le faitauina o lomiga fou o Le Olomatamata? Seʻi taumafai pe e mafai ona e taliina fesili nei:

• O ā nisi o māfuaaga ua tele ai le leaga i aso nei?

O se tasi o māfuaaga o gaoioiga leaga, ona o le faanaunau o tagata i mea leaga. (Kenese 8:21) O le isi māfuaaga, ona ua toʻatele tagata e leai se malamalamaga saʻo i le finagalo o le Atua. E lē gata i lea, o loo faaauau pea ona gaoioi Satani, o ia o le pogai o mea leaga i mataupu fai a tagata.—1/1, itulau e 4-6.

• O ā iʻuga lelei e maua i upu lelei i ona aso ua tatau i ai? (Faataoto 12:25)

E mafai ona faamalosia ai lē o loo e talanoa atu i ai, e faalaeiau ma faagaeetia ai o ia, ma faatupu ai iā te ia se lagona o le mafuta faatasi. E lē gata i lea, a o tatou avatu iā te ia le faamālō, e fesoasoani iā i tatou e iloa le lelei o isi.—1/1, itulau e 16-17.

• O ā mea sa i totonu o le atolaau o le feagaiga?

Sa iai papamaa e lua o le Tulafono faapea ma ni manai. Ina ua mavae le fouvalega a Koru, ona tuu lea o le tootoo o Arona i le Atolaau ina ia fai ma molimau i lenā tupulaga. (Eperu 9:4) Atonu na aveesea le tootoo ma le manai mai le Atolaau a o leʻi faapaiaina le malumalu o Solomona.—1/15, itulau e 31.

• Aiseā na tatau ai ona aumai e tagata Iutaia fafie i le malumalu i aso o Neemia?

Sa lē manaʻomia i le Tulafono a Mose ni taulaga o fafie. Ae i aso o Neemia sa iai le manaʻoga faifai pea mo fafie e fai ai taulaga i le fata faitaulaga.—2/1, itulau e 11.

• O le ā le Pepa a Muratori?

O le Pepa a Muratori o se vaega o le manusikulipi faa-Latina. Na muaʻi tusia i le gagana Eleni pe tusa o le faaiʻuga o le senituri lona lua T.A. O le pepa aupito i tuai lenā o loo iai le lisi o tusi ua faamaonia o tusi o le Tusi Paia Eleni, faapea ma ni manatu e faatatau i tusi, ma i latou na tusiaina.—2/15, itulau e 13-14.

• Aiseā na musu ai le masiofo Peresia o Vasati e alu i luma o le tupu? (Eseta 1:10-12)

E lē o taʻu maia i le Tusi Paia po o le ā le māfuaaga. Ua manatu nisi o le ʻaufaitofā e faapea, na musu le masiofo ona e leʻi manaʻo e tuu o ia i se tulaga maulalo i luma o mālō a le tupu ia na onanā. Ia pe atonu foʻi o le lē gauaʻi lava o lenei masiofo lalelei, ma faataatia ai se faaaʻoaʻoga leaga i isi avā uma i le itumalo o Peresia.—3/1, itulau e 9.

• Ua faapefea ona faasaʻolotoina ona o le togiola?

Ua laveaʻiina i tatou mai le agasala tuufaasolo ona o le taulaga a Iesu ma faasaʻoloto i tatou mai aafiaga leaga o le agasala. (Roma 6:23) Ua faasaʻolotoina e le taulaga, Kerisiano moni mai le mauaina o se lotofuatiaifo ua ōia. Ma o le faaalia o le faatuatua i le togiola, ua mafai ai ona tatou saʻoloto mai le popole e tusa ai ma lo tatou tulaga i luma o le Atua. (1 Ioane 2:1)—3/15, itulau e 8.

• O le ā e tatou te aʻoaʻoina mai le faasāsāaga o loo i le Tulafono e aua le tunu se tamaʻi ʻoti i le suāsusu o lona tinā? (Esoto 23:19)

E foliga mai o le tunu o se tamaʻi ʻoti i le suāsusu o lona tinā, o se sauniga faapaupau ina ia maua ai le timu. (Levitiko 20:23) Na saunia e le Atua le suāsusu o le ʻoti fafine e fafaga ai le tamaʻi ʻoti, ma fesoasoani ina ia tuputupu aʻe ai. O le tunu la o se tamaʻi ʻoti i lenā suāsusu, e faaalia ai le lē faaaloalo i le faiā ua uma ona faia e le Atua i le va o le ʻoti fafine ma lana tama. Ua faailoa mai ai e lenei tulafono ia le alofa faapelepele o le Atua.—4/1, itulau e 31.