“Seʻi o Tatou Faatusatusaina Mau”

I LE fola o se nofoaafi na faimalaga atu i le aai o Niu Ioka, na maua ai e se tamāloa se tamaʻi pepa o taatia ai. Na taʻua i le tamaʻi pepa, e leai se vaega o le tagata e ola pea pe a oti. Ona o lona fia iloa atili, na amata faitau ai e lenei tamāloa, o se faifeʻau, lenā tamaʻi pepa. Na maofa o ia ona na te leʻi masalomia le aʻoaʻoga faapea e ola pea se vaega o le tagata, e lē mafai ona oti. I lenā taimi, na te leʻi iloa po o ai na tusia le tamaʻi pepa. E ui i lea, na ia mātau e foliga e saʻo faamatalaga na lomia ai ma ōgatusa ma le Tusi Paia, ma ia manaʻo e suʻesuʻe māeʻaeʻa i ai.

O le igoa o le faifeʻau, o George Storrs. Na tupu lenā mea i le 1837, o le tausaga lea na tusia ai foʻi e Charles Darwin ona manatu i lana api lea na mulimuli ane avea ma aʻoaʻoga o le evolusione. I aso na, sa toʻaʻaga le toʻatele o tagata i le lotu ma talitonu i le Atua. E toʻatele foʻi na faitau ma talitonu i le Tusi Paia.

Na mulimuli ane iloa e Storrs, na tusia le tamaʻi pepa e Henry Grew mai Filatelefaia, i Pennsylvania. Na maumauaʻi Grew i le manatu e faapea, “e molimau le Tusi Paia iā te ia lava.” Na suʻesuʻe e Grew le Tusi Paia ma isi tagata na tutusa o latou talitonuga ma le sini ia faaōgatusa o latou olaga ma gaoioiga ma fautuaga o loo aumai ai. O a latou suʻesuʻega, na iloa ai nisi o upu moni mataʻina faale-Tusi Paia.

O le naunau o Storrs i tusitusiga a Grew, na ia suʻesuʻe lelei ai po o le ā se faamatalaga a le Tusi Paia ma talanoa i isi faifeʻau e uiga i na mea. Ina ua mavae le lima tausaga o suʻesuʻega filigā a Storrs, na ia filifili loa e faalauiloa i le lautele upu moni faale-Tusi Paia na ia maua. Na muamua ona ia saunia se lauga e faia i se Aso Sa i le 1842. Peitaʻi, na ia iloa e lē lava le lauga e tasi e faamanino atoa ai le mataupu. Mulimuli ane, e ono ana lauga e uiga i le leai o se vaega o le tagata e ola pea, lea na mulimuli ane lomia i le Six Sermons. Na faatusatusa e Storrs mau o le Tusi Paia, ina ia maua ai le upu moni matagofie lea na tanumia e aʻoaʻoga sesē e lē faamamaluina ai le Atua a ē na faapea mai o Kerisiano.

O le ā le Aʻoaʻoga a le Tusi Paia e Uiga i Ē ua Oti?

Ua taʻua i le Tusi Paia e maua e soo faauuina o Iesu le taui o le ola pea e lē mafai ona oti, ona o lo latou faamaoni. (1 Korinito 15:50-56) Na faapea Storrs, afai o le taui o ē e faamaoni le ola pea e lē mafai ona oti, o lona uiga e lē mafai ona ola pea tagata amioleaga. Na i lo le taumatemate e uiga i lenā mea, na ia iloiloina le Tusi Paia. Na ia suʻesuʻeina le Mataio 10:28 ma le Esekielu 18:4 ma ia faia se faaiʻuga, e leai se vaega o le tagata e ola pea.a Ina ua iloiloina le Tusi Paia atoa, na manino mai ai upu moni tautele o loo iai. Na tusi faapea Storrs, “Pe afai e saʻo loʻu malamalamaga i lenei mataupu o lona uiga o le tele o mau o le Tusi Paia sa lē mautinoa ona o le talitonuga taatele faapea e ola pea le agaga e lē mafai ona oti, ua manino lelei mai ma sili atu ona uigā.”

Ae ā le Iuta 7? E faapea: “E pei o Sotoma ma Komoro, ma aai sa vagavagai ai, ua faitaaga pei o i latou, ma mulimuli atu i tuʻinanau ese o le tino, o lea ua tuu mai ai i latou e fai ma faailoga, ua faasalaina i latou i le afi e faavavau.” Pe a faitau le mau lea, e ono faapea nisi, o loo faapuapuagatia i le afi e faavavau ē na fasiotia i Sotoma ma Komoro. Na tusi Storrs, “Seʻi o tatou faatusatusaina mau.” Na ia sii mai le 2 Peteru 2:5, 6, e faapea: “E leʻi faasaoina foʻi le lalolagi tuai, na o Noa . . . , ina ua au mai le lolo i le lalolagi faalēmataʻu; o aai foʻi o Sotoma ma Komoro ua na taui atu i ai i le olopalaina, ina ua lelefu, ua tuu ma faailoga i ē faalēmataʻu i aso amulī.” Ioe, na liu lefulefu Sotoma ma Komoro, pe na faaumatia e faavavau ona tagatānuu uma.

Na faamatala e Storrs, “Ua faamanino atili mai e le tusi a Peteru le manatu o i le tusi a Iuta. Pe a faatusatusa tusi nei e lua, e manino le inosia e le Atua o faiga a ē agasala. . . . O faamasinoga la a le Atua i le lalolagi tuai, Sotoma ma Komoro, ua avea o se lapataʻiga po o se faaaʻoaʻoga e tumau e ‘faavavau’ mo tagata uma lava seʻia oo i le iʻuga o le lalolagi.” O lea la, na faasino Iuta, i aafiaga o le afi, lea na faaumatia ai e lē toe iai e faavavau Sotoma ma Komoro. Ae e lē suia ai fua le manatu moni, e oti lava le tagata.

E leʻi faapea na faaaogā e Storrs na o mau e lagolagoina ai ona manatu. Na ia iloiloina faamatalaga e siʻomia ai mau taʻitasi ma le matua o le Tusi Paia. Pe a foliga e feteenaʻi ni mau, na suʻesuʻe e Storrs isi vaega o le Tusi Paia, ina ia maua ai se faamatalaga moni ma talafeagai.

Suʻesuʻega a Russell i le Tusi Paia

O se tasi o ē na faifaimea faatasi ma George Storrs o se alii talavou na faamaopoopoina se vaega o tagata suʻesuʻe o le Tusi Paia i Pittsburgh, Pennsylvania. O lona igoa o Charles Taze Russell. Na lomia se tasi o ana uluaʻi lauga faale-Tusi Paia i le 1876 i le mekasini Bible Examiner, lea na toe siakiina ma faasaʻosaʻo e Storrs a o leʻi lomia. Na iloa lelei e Russell na taaʻina ona manatu i suʻesuʻega a uluaʻi tagata suʻesuʻe o le Tusi Paia. Na avea o ia ma faatonu o le mekasini Zionʻs Watch Tower, ma na ia talisapaia le fesoasoani tele a Storrs e lē gata i upu po o faamatalaga ae faapea ma le tusia o na lomiga.

O le 18 o tausaga o C. T. Russell na amata ai ona ia faamaopoopo se vasega e suʻesuʻeina le Tusi Paia ma latou ati aʻe se auala aogā mo le suʻesuʻeina o le Tusi Paia. Na faamatala e A. H. Macmillan o se tagata aʻoga o le Tusi Paia sa aufaatasi ma Russell, lea auala aogā: “E lāgā e se tasi se fesili. Ona iloilo lea e le vasega mau uma o le Tusi Paia e fesootaʻi i ai, ma pe a latou malilie i le fesootaʻiga o na mau, ona toe faamatala lea o la latou faaiʻuga ma faamau i lalo.”

Na talitonu Russell, e ao ona fesootaʻi pe autasi le feʻau a le Tusi Paia atoa ma ia lē feteenaʻi manatu ma uiga o le Tusitala o le Tusi Paia. So o se taimi lava na faigatā ai ona malamalama i se mau, na manatu Russell, sa tatau ona faamanino atili pe faamatala e isi vaega o le Tusi Paia.

Se Faiga Masani le Faatusatusaina o Mau

E ui i lea, e lē o Russell, Storrs po o Grew foʻi, tagata muamua na faia lea auala aogā o le faatusatusa o mau. O lenei auala aogā na amata i tuā lava, e lē na faavaeina le faa-Kerisiano o Iesu. E tele mau na ia faaaogā e faamanino ai le uiga moni o se mau. O se faaaʻoaʻoga, ina ua faitioina e le ʻau Faresaio ona soo ona o le ooti o ʻau o saito i le sapati, na faaaogā e Iesu le tala o loo i le 1 Samuelu 21:6 e faaalia ai le auala saʻo e ao ona faatatauina ai le sapati. Na masani lelei taʻitaʻi lotu i lenā tala, lea na ʻaina ai e Tavita ma ona tagata, areto sā e laulauina i luma. Ona faasino lea e Iesu i le vaega o le Tulafono lea sa faapea mai, na o ositaulaga faauuina mai le ituaiga o Arona e ao ona ʻaina le areto sā. (Esoto 29:32, 33; Levitiko 24:9) Peitaʻi, na faatonuina Tavita e ʻai areto. Na faaiʻu e Iesu lana finauga i le sii mai o le tusi o Hosea: “Ana outou iloa le uiga o lea upu, Ou te loto i le alofa, a e lē o le taulaga, po ua outou lē faasalaina o ē lē sala.” (Mataio 12:1-8) Maʻeu se faaaʻoaʻoga mataʻina i le faatusatusa o se mau i isi mau ina ia maua ai se malamalamaga saʻo.

Na faataʻitaʻia e soo o Iesu le faiga lenā o le sii o ni mau e faamatala ai se isi mau. Ina ua aʻoaʻo Paulo i tagata Tesalonia, na “felafolafoaʻi o ia ma i latou i Tusi, ua faamatala ma faasino atu, na tatau ona tigā o le Keriso, ma toe tū mai i ē ua oti.” (Galuega 17:2, 3) I tusi faagaeeina a Paulo, na ia faatusatusa foʻi mau e faamatala ai se manatu. O se faaaʻoaʻoga ina ua tusi i tagata Eperu, e tele mau na ia sii e faamaonia ai o le Tulafono o le ata lea o mea lelei e mulimuli mai.—Eperu 10:1-18.

Ioe, o na tagata suʻesuʻe faamaoni na iai i le senituri 19 ma le amataga mai o le senituri 20, na faaauau maia lenā auala aogā faa-Kerisiano ua leva ona iai. Ma o loo faaauau ona faia faapea, i le mekasini o le Olomatamata. (2 Tesalonia 2:15) E faaaogā e Molimau a Ieova lenei lava auala pe a latou iloiloina se mau.

Iloilo le Mataupu Atoa

Pe a tatou faitauina le Tusi Paia, e faapefea ona tatou faataʻitaʻi i faaaʻoaʻoga lelei a Iesu ma ona soo faamaoni? Muamua, e manaʻomia ona tatou iloilo le mataupu atoa po o faamatalaga o siʻomia ai le mau o loo iloiloina. E faapefea ona fesoasoani le mataupu atoa po o faamatalaga o loo siʻomia ai e malamalama ai i le uiga? O se faataʻitaʻiga, seʻi tatou tilofaʻia fetalaiga a Iesu o loo i le Mataio 16:28: “E moni, ou te fai atu iā te outou, O loo tutū mai iinei nisi e lē oo iā te i latou le oti, seʻia latou vaaia le Atalii o le tagata ua sau i lona malo.” Atonu e faapea nisi e leʻi faataunuuina lenā fetalaiga, ona na maliliu uma soo na talanoa i ai Iesu i lenā taimi a o leʻi faavaeina le Malo o le Atua i le lagi. O loo faapea mai le Interpreterʻs Bible e uiga i le fuaiupu lenei: “E leʻi faataunuuina lenei valoaga, ma sa manaʻomia e Kerisiano ona faamatala faapea, o lenei fuaiupu o loo iai sona uiga faafaatusa.”

Peitaʻi, o le manatu atoa o le mau faapea ma faamaumauga a Mareko ma Luka, ua fesoasoani iā i tatou e malamalama ai i le uiga moni o le mau. O le ā o sosoo mai ma le faamatalaga a Mataio i le fuaiupu o i luga? Na ia tusi: “Ua mavae atu aso e ono, ona ō ai lea o Iesu ma Peteru, ma Iakopo, ma Ioane lona uso, ua ia avaʻe iā te i latou i le mauga maualuga ua na o i latou lava. Ona liua ai lea o ia i o latou luma.” (Mataio 17:1, 2) Na faafesootaʻi foʻi e Mareko ma Luka fetalaiga a Iesu e uiga i le Malo ma le liliuina faavavega. (Mareko 9:1-8; Luka 9:27-36) Na faataʻitaʻia ai le mana o Iesu i le Malo i le liliuina faavavega, ma lona mamalu a o iai na aposetolo e toʻatolu. O loo faamautinoa atili e Peteru le saʻo o lenei malamalamaga ina ua ia taʻua o “le mana ma le afio mai o lo tatou Alii o Iesu Keriso,” e faatatau i lona molimauina o le liliu faavavega o Iesu.—2 Peteru 1:16-18.

Pe E te Tuu Atu i le Tusi Paia e Faamaonia Ia Lava?

Ae faapefea pe a e lē malamalama i se mau e ui ua uma ona e iloiloina le mataupu atoa? E ono aogā pe a e faatusatusa i isi mau, ma manatua le matua o le Tusi Paia. O se tasi o fesoasoani sili, e maua i le New World Translation of the Holy Scriptures, lea ua maua i ni vaega po o le tusi atoa i gagana e 57. O loo iai se lisi o faasino mau, lea o loo i le ogatotonu o laupepa taʻitasi i le tele o lomiga. E te maua le silia i le 125,000 o faasino mau i le New World Translation of the Holy Scriptures—With References, lea ua maua i le tele o gagana. O loo faamatala e le “Faatomuaga” o lenā Tusi Paia e faapea: “O le faatusatusa lelei o faasino mau ma iloilo faaopoopoga o loo iai i lalo, o le a faaalia ai le autasi o manatu o tusi e 66 o le Tusi Paia, ma faamaonia ai o se tusi na faagaeeina e le Atua.”

Seʻi tatou vaai pe faapefea ona fesoasoani le faasino mau ina ia tatou malamalama ai i se mau. Mo se faaaʻoaʻoga o le talafaasolopito o Aperamo, po o Aperaamo. Manatu i le fesili lenei: O ai na taʻitaʻia Aperamo ma lona aiga ina ua ō ese atu ma Uro? O loo faitau faapea le Kenese 11:31: “Na ave foʻi e Tara lona atalii o Aperamo, ma Lota, . . . [ma] Sarai foʻi le avā a lona atalii, . . . ona latou ō atu lea ma i latou ai Uro i Kaletaia, o le a ō atu i le nuu o Kanana; ona latou oo lea i Karana ma nonofo ai.” Pe a faitauina na o le mau lea, e ono faapea se tasi o Tara na taʻitaʻia le aiga. Peitaʻi, i le New World Translation, tatou te maua ai ni faasino mau e 11 i le fuaiupu lava lea. O le faasino mau mulimuli o le Galuega 7:2, tatou te faitauina ai le apoapoaʻiga a Setefano iā Iutaia i le uluaʻi senituri: “Na faaali le Atua e ona le mamalu i lo tatou tamā o Aperaamo, ina o i Mesopotamia o ia, a o leʻi oo i lona nofo i Karana, ua na fetalai mai foʻi iā te ia, Inā tuua ia o lou nuu ma lou aiga, a e alu atu i le nuu ou te faasino atu ai ia te oe.” (Galuega 7:2, 3) Pe na uiga le faamatalaga a Setefano i le ō ese o Aperamo mai Karana? E mautinoa e leai, ona o se vaega o le Afioga faagaeeina a le Atua.—Kenese 12:1-3.

Ae aiseā la ua taʻua ai i le Kenese 11:31 “na ave foʻi e Tara lona atalii o Aperamo” ma ona ʻauaiga ma ō ese mai Uro? Ona o le taimi lenā sa avea pea Tara o le ulu o le augātamā. Sa lotomalie e ō atu ma Aperamo, o lea la na faapea mai ai o ia na aveina lona aiga i Karana. O le faatusatusa o nei mau e lua, tatou te malamalama lelei ai i le mea na tupu. Na talosagaina ma le faaaloalo e Aperamo lona tamā e tuua Uro e tusa ma le poloaʻiga a le Atua.

Pe a tatou faitau i mau, e ao ona manatu i le mataupu atoa ma faamatalaga o loo siʻomia ai faapea ma le matua o le Tusi Paia. Ua faatonuina Kerisiano: “A ua maua e i matou e lē o le agaga o lenei lalolagi, a o le agaga mai le Atua, ina ia matou iloa mea ua foaʻifuaina mai e le Atua iā te i matou. O ia mea foʻi matou te tautala atu ai i upu e aʻoaʻoina mai e le Agaga Paia, a e lē o upu e aʻoaʻoina ai i le poto o tagata, o loo faamatalaina mea faaleagaga i upu faaleagaga.” (1 Korinito 2:11-13, LT) E ao ona tatou talosagaina le fesoasoani a Ieova ina ia malamalama ai i lana Afioga, ma taumafai e “faamatalaina mea faaleagaga i upu faaleagaga” e ala i le tilofaʻia o faamatalaga o loo siʻomia ai le mau o loo lē mautonu ai, ma suʻe mau e fesootaʻi i ai. Tau ina ia tatou mauaina pea upu moni tāua e ala i le suʻesuʻeina o le Afioga a le Atua.

[Faamatalaga pito i lalo]

[Ata i le itulau 12]

Tagata suʻesuʻe o le Tusi Paia i le senituri 19, o ē na faatusatusaina mau ina ia malamalama ai: George Storrs, Henry Grew, Charles Taze Russell, A. H. Macmillan

[Faamatalaga i Ata]

I luga: SIX SERMONS, by George Storrs (1855); second from top: Collection of The New-York Historical Society/69288

[Ata i le itulau 15]

Na faamaonia e le aposetolo o Paulo ana aʻoaʻoga e ala i le faatusatusa o mau