Taulau Manuia​—E Faapefea Ona E Fuaina?

NA MANATU nisi iā Jesse Livermore o se tasi e sili ona taulau manuia i fefaatauaʻiga o tupe i Wall Street, ma na lauiloa foʻi i le faia o faaiʻuga faapisinisi e sili ona atamai. O le iʻuga, na faateleina ana ʻoa. E laʻei i suti anagatā, nofo i se fale telē e 29 potumoe, ma feaveaʻi e lana avetaavale i se taavale uliuli taugatā e taʻua, o le Rolls-Royce.

Na faapena foʻi se ala na uia e Tavita.a Ona o ia o le sui peresitene ma le pule sili o se kamupani e faia ai ituaiga o ata eseese (graphics), na ia agaʻi atu i se tulaga e avea ai ma peresitene o se vaega o le kamupani. Na ia tosina atu i ʻoa ma tulaga taualoa. Ae na faia e Tavita se faaiʻuga lea na iʻu ai i lona faamavae. Na ia taʻua: “Na ou iloa ou te lē toe faigaluega i se tulaga maualuga e totogi lelei.” Pe e te manatu na sesē le faaiʻuga a Tavita?

E talitonu le toʻatele faapea, o le taulau manuia e aofia ai le tele o le ʻoa, lauiloa, po o tulaga taualoa. Peitaʻi o i latou e tele mea faitino, e iai pea lagona faanoanoa ma lē uigā o latou olaga. O le tulaga tonu lenā o Livermore. E ui i le tele o ana ʻoa, ae sa ia ola i se olaga e tumu i mafatiaga, mala, ma faanoanoaga. Na oo iā te ia tulaga mafatia, lē taulau ana faaipoipoga, ma lē lelei lana faiā ma ona atalii. Mulimuli ane i se tasi aso ina ua alu le tele o ana ʻoa, sa ia nofonofo ai i se pā, po o le vaega lea e maua ai pia a se faletalimālō ma ia tagi talatala ai ona ua gau le tele o ana tupe. Na faatau lana uaina, ave ifo lana api fai tusi, ma tusia ai se tusi faamavae i lana avā. Ina ua uma lana uaina, ona alu lea i totonu o se potu e tautau ai ofu o loo mumū itiiti ai se mōlī, ma pule ai i lona ola.

E ui e lē na o le pau lea o le māfuaaga tonu o le pule i lona ola, ae o le mea na tupu ua faamaonia ai le moni o le Tusi Paia: “O ē manaʻo i le fia mauʻoa, . . . ua tuʻia ai ua ati i latou e i latou i puapuaga e tele.”—1 Timoteo 6:9, 10.

Po o faalētonu ea le fua o loo faaaogā e ē o fuaina le taulau manuia i ʻoa, tulaga maualuluga, ma taualoa? Pe e te manatu o e taulau manuia? Aiseā? O ā tapulaa o loo e fua ai lou ausia o ou faanaunauga? O le ā le mea e taaʻina ai ou manatu mo le taulau manuia? O le a iloilo i le mataupu e sosoo mai fautuaga maufaatuatuaina ua taulau manuia ai le faitau miliona o tagata. Seʻi o tatou suʻesuʻe pe faapefea ona e taulau manuia.

[Faamatalaga pito i lalo]