Na Pāʻia Loto o le ʻAufaauu a Kiliata i Aʻoaʻoga na Latou Maua
O LE aso 9 o Setema 2006, sa faia ai le faauuga o le vasega lona 121 o le Aʻoga Faale-Tusi Paia a le Olomatamata o Kiliata i le Watchtower Educational Center i Patterson, Niu Ioka. O se polokalame sa matuā faalaeiauina ai.
O Geoffrey Jackson, o se sui o le Vaega Pule o Molimau a Ieova, na tatalaina le polokalame e ala i le faafeiloaʻi atu i le ʻaufaauu e 56 ma le aofia e 6,366 mai le tele o atunuu. Sa ia talanoaina le Salamo 86:11, lea e faapea mai: “Ieova e, ia e faasino mai iā te aʻu lou ala, ou te savali i le mea moni mai iā te oe; ia e faia ina ia tasi loʻu loto e mataʻu i lou suafa.” E tolu manatu tāua o loo faamamafa i le fuaiupu lenei sa faamatilatila e le Uso o Jackson. Fai mai a ia: “O le mea muamua, o le faasino po o le aʻoaʻo mai; o lona lua, o le savali po o le faatatauina; ma lona tolu, tasi le loto po o le uunaʻiga. E faapitoa lava le tāua o mea nei e tolu iā te outou misionare i mea o le a outou galulue ai.” Na sosoo ai ma lona faasilasilaina atu o se faasologa o lauga ma ni faatalanoaga lea sa faamamafa ai mea ia e tolu.
Faatonuga e Faafiafia Loto
O le Uso o William Malenfant, o se sui o le ʻaufaigaluega i le ofisa ulu, sa tauaaoina le matua “Le Olaga e Sili Ona Lelei.” Sa ia tataʻi atu manatu i le faaaʻoaʻoga a Maria, le uso o Mareta. I se tasi taimi ina ua asiasi atu Iesu, na filifili ai Maria e nofo i lalo i tafatafa o vae o Iesu e faalogologo iā te ia ona o le mea lenā sa ia faamuamua. Na taʻu atu e Iesu iā Mareta: “Ua filifilia foʻi e Maria lea mea lelei, e lē aveeseina iā te ia.” (Luka 10:38-42) Na faapea mai atili le failauga. “Seʻi tau ina manatu i lenā mea, o le a faavavau ona manatua e Maria lona nofo i tafatafa o vae o Iesu ma faafesagaʻi a o faalogologo atu i mea moni matagofie faaleagaga, ona sa ia faia se filifiliga lelei.” Sa faamālō atu le failauga i le ʻaufaauu mo a latou filifiliga lelei faaleagaga, ona ia faapea atu lea: “O a outou filifiliga ua taʻitaʻia ai outou i le olaga e sili ona lelei.”
Na sosoo ai ma Anthony Morris, o se sui o le Vaega Pule, sa ia tauaaoina le lauga e faavae i le Roma 13:14: “Ia Outou Oofu i le Alii o Iesu Keriso.” E faapefea ona tatou fai lenei mea? “O le oofu i le Alii o Iesu Keriso e aofia ai le faaaʻoaʻo i uiga o le Alii.” O lona uiga ia mulimuli i le faaaʻoaʻoga ma uiga o Iesu. Na taʻua e le failauga, “sa saʻoloto tagata e feutagaʻi ma Iesu, talu ai sa faaalia lona naunau moni i tagata, ma sa mafai ona lagona e tagata lenā mea.” Na sosoo ai ma le talanoaina e le failauga o le auala ua tele ai le poto o le ʻaufaauu mai la latou aʻoaʻoga i Kiliata, e pei ona faapea mai le Efeso 3:18: “Ia mafai ai ona iloa lelei . . . o le uiga o le lautele, ma le umi, ma le loloto, ma le maualuga” o le upu moni. Peitaʻi na ia faamanatu iā i latou le fuaiupu e 19, lea e faapea mai: “Ia iloa foʻi le alofa o Keriso ua silisili ese e lē mailoa.” Sa faalaeiau atu le Uso o Morris i le ʻaufaauu e faapea: “A o faaauau ona fai a outou lava suʻesuʻega totino, ia manatunatu i auala e mafai ona outou faaaʻoaʻo ai i uiga alofa faapelepele o Keriso ma ia outou ‘oofu i le Alii o Iesu Keriso.’”
O Fautuaga Mulimuli Mai i Faiaʻoga a Kiliata
O le lauga na sosoo ai sa saunia e se faiaʻoga a Kiliata o Wallace Liverance, o lana matua sa faavae i le Faataoto 4:7. Sa ia taʻua e ui e tāua le maua o le poto faale-Atua, a e ao foʻi ona tatou maua mai ai le atamai po o le malamalama, lea e aofia ai le tuufaatasia o mea moni eseese, ona faavasega lea o lo latou sootaga taʻitasi ina ia maua le uiga o se manatu. Sa faaalia e le failauga e faapea o lo tatou maua o le atamai po o le malamalama e maua ai le fiafia. Mo se faaaʻoaʻoga, i aso o Neemia, o sa Levī sa “latou faamatalaina atu le tulafono” ma “folafola atu le uiga.” Na māeʻa lenā, ona ō lea o tagata ua “taufaiolioli tele, auā ua latou lagona upu na faailoa atu iā te i latou.” (Neemia 8:7, 8, 12) Na faaiʻu le lauga a le Uso o Liverance i lona faapea mai: “O le olioli o āuga o le malamalama i le Afioga a le Atua na faagaeeina e lona agaga.”
O le isi faiaʻoga a Kiliata o Mark Noumair na tauaaoina le lauga o lona matua: “O Ai Moni Lava Lou Fili?” I taimi o taua, e toʻatele tagata tau e toe lavevea i la latou lava itu taua ma manunuʻa pe maliliu ai foʻi. Ona fesili lea o le failauga. “Ae faapefea le taua faaleagaga lea tatou te auai? A tatou lē faaeteete, e tatou te ono fenuminumiaʻi ma lē mautonu po o ai moni lava le fili, ma ono faapogaia ai se manuʻa i se tasi o la tatou lava ʻautau.” E mafai i le matauʻa ona tatou lē mautonu ai po o ai moni le fili. O le matauʻa na taumafai ai le Tupu o Saulo e fasioti Tavita, o lē sa la tapuaʻi faatasi, ae o le fili lea sa iai i lenā taimi o tagata Filisitia. (1 Samuelu 18:7-9; 23:27, 28) Na faaauau le lauga a le uso i lona faapea mai: “O le ā lau mea e fai pe a oulua auauna faatasi ma se uso e tele ona tomai na i lo oe? Po o le a e faaaogā ni faaupuga faitio e faamanuʻa ai lau uō o loo lua tau i le itu taua e tasi, po o le a e talia le mea moni e tele mea e sili ai isi iā te oe?” Pe a lē lava lo tatou faapalepale i tulaga lē lelei atoatoa o isi, e iʻu ai ina galo iā i tatou po o ai moni lo tatou fili. Ia tau malosi i le fili, o Satani.”
Mea Tutupu na Olioli ai ma Faatalanoaga e Aʻoaʻoina Ai
O le vaega na sosoo ai, “Ia e Fai le Galuega a Lē Folafola le Tala Lelei,” sa tauaaoina e Lawrence Bowen, o se faiaʻoga a Kiliata, ma aofia ai ma ni faatalanoaga ma tala i mea na tutupu. O le galuega autū a se misionare e toleni mai i Kiliata, o le folafolaina atu lea o le tala lelei, ma o le mea lenā o loo fai e le vasega lenei i so o se mea lava latou te maua ai tagata.” Sa iai nisi mea na tutupu e faafiafiaina ai sa toe faataʻitaʻi e nisi.
Na sosoo ai ma vaega e lua sa tauaao le isi e Michael Burnett a o le isi sa saunia e Scott Shoffner, o i laʻua o ni sui o le aiga Peteli. Sa la faatalanoaina ni sui o Komiti o Lālā mai Ausetalia, Barbados, Korea, ma Uganda. Sa atagia mai i faamatalaga a sui o komiti le tele o taumafaiga o loo faia mo le tausia o manaʻoga o misionare, e aofia ai le saunia o fale talafeagai e faamautū ai ma le tausia o le soifua mālōlōina. Sa faamamafa mai e sui o komiti e faapea o misionare e taulau manuia, e loto malilie e faamasani i tulaga o mea i atunuu o latou galulue ai.
Se Lauga e Faagaeetia ma Uunaʻia Ai
O le lauga autū o le polokalame o lona matua “Ia Outou Matataʻu i le Atua ma Avatu iā te Ia le Viiga,” sa tauaaoina e John E. Barr, o se tasi ua tele tausaga o auauna i le Vaega Pule. Sa ia talanoaina le Faaaliga 14:6, 7, lea e faitauina faapenei: “Na aʻu iloa foʻi le tasi agelu ua lele i le taulotoaiga o le lagi, ua iā te ia le tala lelei e faavavau e folafola atu i ē nonofo i le lalolagi i atu nuu uma, ma itu aiga, ma gagana eseese, ma nuu, ua faapea atu ma le leo tele, Ia outou matataʻu i le Atua, ma avatu iā te ia le viiga, auā ua oo mai le itu aso o lana faamasinoga.”
Sa faalaeiauina e le Uso o Barr le ʻaufaauu ina ia manatua mea tāua e tolu e faatatau i le agelu e pei ona taʻua i inei. Muamua, e tatau ona folafola le tala lelei e faavavau e faapea ua pule nei Keriso i le mana o le Malo. Na taʻua e le failauga: “Ua tatou talitonu maumaututū o le 1914 na faanofotupu ai o ia. O lona uiga la e ao ona faalauiloa atu i le lalolagi nei tala fiafia.” Lona lua, na taʻua e le agelu: “Ia Outou Matataʻu i le Atua.” Na faamatala e le failauga le manaʻomia i le ʻaufaauu ona fesoasoani i a latou tagata aʻoga o le Tusi Paia ia atiaʻe le āva ma le mataʻu tatau i le Atua ma ʻalofia le faia o se mea e lē fiafia ai lona finagalo. Lona tolu, o loo faatonu mai le agelu: ‘Avatu i le Atua le Viiga.’ Sa pulunaunauina le ʻaufaauu ina ia: “Aua lava neʻi galo o loo tatou galulue mo le viiga o le Atua ae lē o so tatou viiga.” Ina ua talanoaina le “itu aso o lana faamasinoga,” na taʻua e le Uso o Barr: “Ua utiuti lava le taimi o totoe ona faaoo mai loa lea o le faasalaga mulimuli. O loo toʻatele pea tagata i a tatou oganuu e ao ona faalogo i le feʻau a o leʻi oo ina tuai.”
O upu ia sa timaʻi ai le toʻa 56 o le ʻaufaauu a o tuuina atu i ai o latou tipiloma ma auina atu i latou i tuluʻiga uma o le lalolagi. Sa matuā pāʻia moni ai loto o le ʻaufaauu atoa ai ma le aofia atoa i fautuaga e faagaeetia ai sa latou faalogologo i ai i lenā aso fiafia.
[Pusa i le itulau 17]
FAAMAUMAUGA O LE VASEGA
Aofaʻi o atunuu o loo iai o latou sui: 6
Aofaʻi o atunuu ua tofia i ai: 25
Aofaʻi o tagata aʻoʻoga: 56
Faatatauga o tausaga: 35.1
Faatatauga o tausaga i le upu moni: 18.3
Faatatauga o tausaga i le faiva faataimi atoa: 13.9
[Ata i le itulau 18]
Vasega Faauu Lona 121 o le Aʻoga Faale-Tusi Paia a le Olomatamata o Kiliata
I le lisi o i lalo, e amata mai laina i luma ma faasolo i tua ma o suafa e lisi mai i le agavale e agaʻi i le taumatau.
(1) Fox, Y.; Kunicki, D.; Wilkinson, S.; Kawamoto, S.; Consolandi, G.; Mayen, C. (2) Santiago, N.; Clancy, R.; Fischer, M.; de Abreu, L.; Davis, E. (3) Hwang, J.; Hoffman, D.; Wridgway, L.; Ibrahim, J.; Dabelstein, A.; Bakabak, M. (4) Peters, M.; Jones, C.; Ford, S.; Parra, S.; Rothrock, D.; Tatlot, M.; Perez, E. (5) de Abreu, F.; Kawamoto, S.; Ives, S.; Burdo, J.; Hwang, J.; Wilkinson, D. (6) Fox, A.; Bakabak, J.; Cichowski, P.; Forier, C.; Mayen, S.; Consolandi, E.; Wridgway, W. (7) Parra, B.; Perez, B.; Tatlot, P.; Santiago, M.; Ibrahim, Y.; Kunicki, C. (8) Burdo, C.; Cichowski, B.; Ives, K.; Ford, A.; Rothrock, J.; Hoffman, D.; Davis, M. (9) Peters, C.; Dabelstein, C.; Jones, K.; Clancy, S.; Fischer, J.; Forier, S.